பேராசிரியர் இராம சுந்தரம் மறைவு மனத்தை வாட்டுகிறது! - பெ. மணியரசன் இரங்கல்!

பேராசிரியர் இராம சுந்தரம் மறைவு

மனத்தை வாட்டுகிறது!

தமிழ்த்தேசியப் பேரியக்கத் தலைவர்

பெ. மணியரசன் இரங்கல்!

தஞ்சை தமிழ்ப் பல்கலைக் கழக அறிவியல் புலத்தின் தலைவராகப் பணியாற்றி ஓய்வு பெற்ற பேராசிரியர் முனைவர் இராம. சுந்தரம் அவர்கள் தமது 83-ஆம் அகவையில் இன்று (08.03.2021 திங்கள்கிழமை) விடியற்காலை தஞ்சையில் தமது இல்லத்தில் இயற்கை எய்தினார். என்ற செய்தி துயரம் தருகிறது.

ஐயா அவர்கள் மொழியியல் துறையில் ஓர் ஆய்வறிஞர். அத்துறையில் முனைவர் பட்டம் பெற்றவர். அவரின் முனைவர் பட்ட வழிகாட்டி காலஞ்சென்ற தமிழறிஞர் வ. அய். சுப்ரமணியம் அவர்கள். திருவனந்தபுரத்தில் வ.அய்.சு. பேராசிரியராகப் பணியாற்றிய போது இராம. சுந்தரம் முனைவர் பட்டம் பெற்றார்.

ஐயா வ.அய். சுப்ரமணியம் அவர்கள் தமிழ்ப் பல்கலைக் கழகத்தின் முதல் துணை வேந்தராகப் பணியாற்றிய காலத்தில், ஒவ்வொரு துறைக்கும் திறமையாளர்களைத் தேடிப்பிடித்துப் பணியில் அமர்த்தினார். அப்படி வந்தவரே இராம. சுந்தரம். அவர் அண்ணாமலையில் தமிழ்ப் பேரறிஞர்கள். ஏ.சி. செட்டியார், தெ.பொ.மீ.ஆகியோரின் மாணவர்.

புனா, மதுரை தியாகராசர் கல்லூரி, அண்ணாமலைப் பல்கலைக்கழகம் ஆகிய இடங்களில் தமிழ்விரிவுரையாளராகப் பணியாற்றிய இராம. சுந்தரம் அவர்கள், ஏழாண்டுகள் போலந்து நாட்டின் வார்சா பல்கலைக் கழகத்தில் தமிழ்ப் பேராசிரியராகப் பணியாற்றினார். அங்கு திருக்குறளை போலிஷ் மொழியில் வல்லுநர்களின் துணையுடன் மொழியாக்கம் செய்தார்.

தஞ்சை தமிழ்ப்பல்கலையில் அறிவியல் தமிழ்த்துறையின் தலைவராகப் பணியாற்றிய போது மருத்துவம் (MBBS), பொறியியல் (BE) இரண்டு தொழிலியல் கல்வியும் தமிழில் கற்பிப்பதற்கான முயற்சியாக இவற்றின் முதல் இரண்டாண்டுப் பாடங்களைத் தமிழாக்கம் செய்ய துணைவேந்தர் வ.அய். சுப்ரமணியம் அவர்களின் ஊக்குவிப்புடன் களத்தில் இறங்கினார் இராம. சுந்தரம். தக்க கல்வியாளர்களின் துணை கொண்டு இரண்டாண்டுப் பாடங்களைத் தமிழாக்கினார். ஆனால் ஆட்சியாளர்கள் பயன்படுத்திக் கொள்ளவில்லை.

தஞ்சை தமிழ்ப் பல்கலையில் அறிவியல் தமிழ் தொடர்பான ஆய்வுத் திட்டங்கள் பலவற்றை நிறைவேற்றினார். அத்துறையில் பல நூல்கள் எழுதியுள்ளார். மொழியில், அறிவியல் தமிழ் தொடர்பாக ஏராளமாகக் கட்டுரைகள் எழுதியுள்ளார். அமெரிக்கப் பேராசிரியர். தாமஸ் டரவுட்மன் ஆங்கிலத்தில் எல்லீசின் தமிழ்ப் பணி குறித்து எழுதிய “திராவிடச் சான்று” என்ற நூலைத் தமிழாக்கினார். அந்நூலைக் காலச்சுவடும் – சென்னை வளர்ச்சி ஆய்வு நடுவமும் சேர்ந்து வெளியிட்டன.

தமிழ்நாட்டில் குறிப்பிடத்தக்க தமிழ் மொழியியல் ஆய்வாளராக விளங்கிக் கொண்டிருக்கும் தமிழ்ப்பல்கலை மேனாள் ஆய்வுத்துறை பேராசிரியர் மற்றும் பதிவாளர். முனைவர் கி. அரங்கன் அவர்கள் இராம. சுந்தரம் அவர்கள் தமது கருத்து வளர்ச்சியில் செல்வாக்கு செலுத்தியவர் என்று பெருமையுடன் கூறுவார் இராம.சுந்தரம் அவர்கட்கு நட்புவட்டம் அதிகம். எல்லோருடனும் கலகலவென்று இனிமையாக நகைச்சுவையாகப் பேசும் இயல்பு கொண்டவர்.

இடதுசாரிச் சிந்தனையும் தமிழ்ப் பற்றும் மிக்க இராம. சுந்தரம் அவர்களுடன், நானும் எமதியக்கத் தோழர்களும் நெருங்கிய நட்பு கொண்டிருந்தது இயல்பானதே!

முனைவர் சி. பாலசுப்பிரமணியன் அவர்கள் தமிழ்ப் பல்கலைத் துணை வேந்தராக இருந்தபோது உதவி ஆய்வாளர்கள் மற்றும் தற்காலிகப்பணியாளர்களை நிரந்தரப்படுத்துவது போன்ற பல கோரிக்கைகளை முன் வைத்துப் பேராசிரியர்கள் முதல் பணியாளர்கள் வரை அனைவரும் நெடும் போராட்டம் நடத்தினார்கள். சற்றொப்ப 60 நாள் நடந்த அப்போராட்டத்தில் முன்னணித் தலைவர்களில் ஒருவராக இராம.சுந்தரம் பங்கு ஆற்றினார்.

எமது “தமிழர் கண்ணோட்டம்” மாத இதழில் “வசந்தன்” என்ற புனை பெயரில் பல கட்டுரைகள் எழுதினார். வளர்ச்சியடையாத வெளிநாடுகளில் எல்லாம் அந்தந்த நாட்டின் தாய்மொழி ஆட்சி மொழியாகவும், கல்வி மொழியாகவும் செயல்படுத்தப்பட்ட வரலாற்றைத் தொடர்கட்டுரையாகத் தமிழர் கண்ணோட்டத்தில் எழுதி வந்தார். தமிழர் கண்ணோட்டம் வளர்ச்சிக்குப் பல்வேறு மதியுரை வழங்கி வந்தார். தமிழர் கண்ணோட்டம் ஆசிரியர் குழுவிலும் உறுப்பு வகித்தார்.

சிவகங்கை மாவட்டம் அலவாக்கோட்டையில் பிறந்த இராம.சுந்தரம் தஞ்சை தமிழ்ப் பல்கலையில் பணியாற்றியதை ஒட்டி தஞ்சாவூர்க்காரர் ஆனார்.

பேராசிரியர் - முனைவர் - எம் பேரன்புக்குரிய தோழர் இராம. சுந்தரம் அவர்களின் மறைவு மனத்தை வாட்டுகிறது. அவரது மறைவுக்கு தமிழ்த்தேசியப் பேரியக்கத்தின் சார்பில் ஆழ்ந்த இரங்கல் தெரிவித்து கொள்கிறேன்.

பி.கு. பேராசிரியர், முனைவர், இறுதி ஊர்வலம் தஞ்சை பாரதிநகர் அருகே பல்கலைக்கழக குடியிருப்புப் பகுதிக்கு (பிள்ளையார்ப் பட்டிச் சாலை) எதிரே 71, செல்லையா நகரின் இல்லத்திலிருந்து நாளை (09.03.2021) காலை 10 மணிக்குப் புறப்படும்.

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

 

 

இராஜேஸ்தாசைச் சிறையில் அடைக்க வேண்டும் எடப்பாடியார் மீது விசாரணை ஆணையம் அமைக்க வேண்டும்! - ஐயா பெ. மணியரசன் அறிக்கை!

இராஜேஸ்தாசைச் சிறையில் அடைக்க வேண்டும்

எடப்பாடியார் மீது விசாரணை

ஆணையம் அமைக்க வேண்டும்!

தமிழ்த்தேசியப் பேரியக்கத் தலைவர்

ஐயா பெ. மணியரசன் அறிக்கை!

தமிழ்நாட்டின் சட்டம் ஒழுங்கு காவல்துறை சிறப்புத் தலைமை இயக்குநர் இராஜேஸ்தாஸ் என்பவர், ஒரு மாவட்டத்தின் பெண் காவல் கண்காணிப்பாளருக்குப் பாலியல் தொல்லை கொடுத்தார் என்று பாதிக்கப்பட்ட பெண் கண்காணிப்பாளர் எழுத்து வடிவில் தமிழ்நாடு சட்டம் ஒழுங்கு தலைமை இயக்குநர் திரிபாதி அவர்களிடம் புகார் கொடுத்து நடவடிக்கை கோரியுள்ளார். ஆனால், தலைமை இயக்குநர் திரிபாதி, இராஜேஸ்தாஸ் மீது உரிய நடவடிக்கை எடுக்கவில்லை.

எல்லோரும் முதலமைச்சர் எடப்பாடி பழனிச்சாமி நடவடிக்கை எடுக்க வேண்டும் என்று கோரிக்கை வைத்துள்ளனர். நேற்று (04.03.2021) தமிழ்நாட்டில் பணியாற்றும் இந்தியக் காவல் பணியைச் (ஐ.பி.எஸ்.) சேர்ந்த பத்து பெண் அதிகாரிகள் இயக்குநர் திரிபாதியைச் சந்தித்து, இராஜேஸ்தாஸ் மீது நடவடிக்கை எடுக்கக் கோரி மனுக் கொடுத்துள்ளனர். இயக்குநர் திரிபாதி, தனக்குச் சமமான அதிகாரம் படைத்த இராஜேஸ்தாஸ் மீது தன் முடிவாக நடவடிக்கை எடுக்க முடியாது.

இப்படிப்பட்ட ஒரு சட்டச் சிக்கலை உருவாக்கி வைத்தவர் முதல்வர் எடப்பாடி பழனிச்சாமிதான்! ஒட்டுமொத்தத் தமிழ்நாட்டிற்கும் சட்டம் ஒழுங்குத் தலைமை இயக்குநர் ஒருவர் மட்டுமே உண்டு. தலைமை இயக்குநர் தகுதியில் பலர் இருப்பர். ஆனால், அவர்கள் வெவ்வேறு பொறுப்புகளில் இருப்பர். சட்டம் ஒழுங்குத் தலைமை இயக்குநர் பொறுப்பில் இருக்க மாட்டார்கள்.

திரிபாதியைவிடத் தமக்குக் கையடக்கமான, சட்டம் பற்றிக் கவலைப்படாமல் தாம் ஏவியதைச் செய்பவராக சட்டம் ஒழுங்குத் தலைமை இயக்குநர் இருக்க வேண்டும் என்ற உள்நோக்கத்தில் - சிறப்பு சட்டம் ஒழுங்குத் தலைமை இயக்குநர் இராஜேஸ்தாசை பணியமர்த்தம் செய்துள்ளார் எடப்பாடி பழனிச்சாமி! அதுவும், சட்டப்பேரவைத் தேர்தல் நடைபெறும் காலத்தில் எதிர்க்கட்சிகளுக்கு நெருக்கடி கொடுக்கவும் ஆளுங்கட்சியின் சட்டமீறல்களுக்குத் துணை நிற்கவும் பொருத்தமான ஒரு அதிகாரியாக இராஜேஸ்தாசைத் தேர்வு செய்து, சிறப்புத் தலைமை இயக்குநராக அமர்த்தி, அசல் தலைமை இயக்குநர் திரிபாதியை டம்மி ஆக்கியுள்ளார் எடப்பாடி பழனிச்சாமி!

திரிபாதியின் அலுவலகத்திற்கு நேர் எதிரிலேயே இராஜேஸ்தாஸ் தமது அலுவலகத்தை அமைத்துக் கொண்டுள்ளார் என்றும் ஏடுகள் கூறுகின்றன. அசல் அதிகாரம் இராஜேஸ்தாசிடம் இருந்திருக்கிறது.

இந்திய ஆட்சிப்பணி, இந்தியக் காவல்பணி உயர் அதிகாரிகள், தங்களின் தன்னல நோக்கங்களுக்காக ஆளுங்கட்சியின் கைத்தடிகளாக மாறி தி.மு.க. ஆட்சி - அ.தி.மு.க. ஆட்சி இரண்டிலும் பல்லாண்டுகளாக செயல்பட்டு வருகின்றனர். அவ்வாறு கைத்தடியாக மாற மறுக்கும் நேர்மையான அதிகாரிகளை சகாயம் அவர்களைப் பழிவாங்கியதைப் போல் பழிவாங்குவார்கள். இப்போது திரிபாதி அவர்களையும் அப்படித்தான் பழிவாங்கியுள்ளார்கள் என்று எண்ணத் தோன்றுகிறது.

இந்த இராஜேஸ்தாஸ் ஏற்கெனவே பெண் காவல் அதிகாரிகளுக்குப் பாலியல் தொல்லைகள் கொடுத்தார் என்று புகார்கள் இருப்பதாக ஏடுகளில் செய்திகள் வந்துள்ளன. அப்படிப்பட்ட நபருக்கு, இப்போதுள்ள தலைமை இயக்குநர்க்கு மேல் சிறப்புத் தலைமை இயக்குநர் பதவியை உருவாக்கி முதல்வர் எடப்பாடி பழனிச்சாமி தந்ததேன்? பொது நலம் கருதியா, தன்னலம் கருதியா?

இராஜேஸ்தாசின் துணைவியார் பீலா இராஜேசுக்கு தமிழ்நாடு அரசின் பொதுநலத்துறையில் தலைமைப் பதவி கொடுத்ததுடன், கொரோனா காலத்தில் அவர் மட்டுமே செய்தியாளர்களைச் சந்தித்து அன்றாடக் கொரோனா அறிக்கை தர வேண்டும் என்றும், நலத்துறை அமைச்சரும் நலத்துறைச் செயலாளரும் அறிக்கை கொடுக்க வேண்டாம் என்றும் ஏற்பாடு செய்தார் எடப்பாடி பழனிச்சாமி. அந்த அம்மையாரின் ஊழல்களை ஏடுகளும், காட்சி ஊடகங்களும் அம்பலப்படுத்திய பின்தான் அவருக்குத் தந்த சிறப்பு முதன்மைக் கைவிடப்பட்டது.

பாலியல் தொல்லை தொடர்பாகத் தன் மீது தலைமை இயக்குநர் திரிபாதியிடம் புகார் கொடுக்க மேற்படி பெண் காவல் கண்காணிப்பாளர் சென்னை நோக்கி வருவதை அறிந்து கொண்ட இராஜேஸ்தாஸ் செங்கல்பட்டிலேயே அவரை மறித்து, திருப்பி அனுப்பிட செங்கல்பட்டு மாவட்டக் காவல் கண்காணிப்பாளர் கண்ணனுக்குக் கட்டளை இட்டுள்ளார். அச்சட்ட விரோதக் “கட்டளையை”க் கண்ணன் செயல்படுத்தி அப்பெண்ணைத் தடுத்துள்ளார். பெண் காவல் கண்காணிப்பாளர் தில்லி ஆட்சியாளர்களுக்குப் புகார் தெரிவித்து, அவர்கள் தலையீட்டில் விடுவிக்கப்பட்டு, சென்னை வந்து புகார் கொடுத்துள்ளார்.

உரிய தண்டனைப் பிரிவுகளில் வழக்குப்பதிவு செய்து, இராஜேஸ்தாசைச் சிறையில் அடைக்க வேண்டும்; கண்காணிப்பாளர் கண்ணனைப் பணி இடைநீக்கம் செய்து விசாரணைக்கு உட்படுத்த வேண்டும்.

மேற்கண்ட குற்றவாளி இராஜேஸ்தாசுக்கு சட்டமரபுக்கு விரோதமாகவும், ஒழுங்குவிதிகளுக்கு எதிராகவும் போட்டித் தலைமை இயக்குநர் பதவி வழங்கித் தனன்னலத்திற்காகக் காவல்துறைக் கட்டுக்கோப்பை சீரழித்தது உள்ளிட்ட குற்றச்சாட்டுகள் குறித்து முதலமைச்சர் எடப்பாடி பழனிச்சாமி மற்றும் தொடர்புடைய அதிகாரிகளை விசாரிக்க - நேர்மைக்குப் பெயர் பெற்ற ஓய்வு பெற்ற உயர் நீதிமன்ற நீதிபதி தலைமையில் விசாரணை ஆணையம் அமைக்க வேண்டும் என்று தமிழ்த்தேசியப் பேரியக்கம் சார்பில் கேட்டுக் கொள்கிறேன்.

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

பா.ச.க. பாசிசத்தை வீழ்த்த தி.மு.க. அணியை ஆதரித்தால் என்ன? ” - ஐயா பெ. மணியரசன் நேர்காணல்!

“பா.ச.க. பாசிசத்தை வீழ்த்த 

தி.மு.க. அணியை ஆதரித்தால் என்ன? ”

தமிழ்த்தேசியப் பேரியக்கத் தலைவர்

ஐயா பெ. மணியரசன் நேர்காணல்!

கண்ணோட்டம் வலையொளியில்..!!!

“மோடி-இராகுலின் தமிழ் முகமூடி! ” - ஐயா பெ.மணியரசன் நேர்காணல்!.

“மோடி-இராகுலின்

தமிழ் முகமூடி! ”

ஐயா பெ.மணியரசன் நேர்காணல்!. 

கண்ணோட்டம் வலையொளியில்..!!!

ஜக்கி வாசுதேவின் திட்டம் வர்ணாசிரமத்திற்கு வாசல் திறக்கும்! ஐயா கி. வெங்கட்ராமன், சிறப்பு கட்டுரை!

ஜக்கி வாசுதேவின் திட்டம்

வர்ணாசிரமத்திற்கு வாசல் திறக்கும்!

தோழர் கி. வெங்கட்ராமன்,

பொதுச்செயலாளர், 

தமிழ்த்தேசியப் பேரியக்கம்.

“அரசின் அடிமைத்தனத்திலிருந்து கோயில்களை மீட்க வேண்டும், தமிழ்நாட்டுக் கோயில்களைப் பக்தர்களிடமே விட்டுவிட வேண்டும்” என்று ஜக்கி வாசுதேவ் கூக்குரலிடுகிறார். பல காலமாக ஆர்.எஸ்.எஸ். சொல்லி வந்ததைத்தான் இப்போது ஜக்கியின் வழியாகச் சொல்கிறார்கள். 

இதற்கு சில வாதங்களை அவர்கள் முன்வைக்கிறார்கள். “முசுலீம்களின் மசூதி, கிறித்தவர்களின் சர்ச்சுகள் ஆகியவற்றில் தலையிடாத அரசு, இந்துக் கோயில்களை மட்டும் அறநிலையத்துறையின் கீழ் வைத்திருப்பது ஒருதலைபட்சமானது; கோயில்களின் சொத்துகளை மீட்க முடியவில்லை. அரசியல் தலையீடே இதற்குக் காரணம்! பல கோயில்கள் விளக்கேற்றாமல் இருண்டு கிடக்கின்றன. அரசின் அலட்சியமே இதற்குப் பொறுப்பு!” ஆகியவையே இந்தக் காரணங்களாகும். 

முசுலீம்கள், கிறித்தவர்கள் ஆகியோருக்கு உலகு தழுவிய ஒற்றைப் புனித நூல், ஒற்றை மதத் தலைமை என்பவை இருக்கின்றன. இந்து மதம் அப்படியானதல்ல! ஒற்றை மத பீடம் என்றோ, ஒற்றைப் புனித நூல் என்றோ இந்து மதத்தில் எந்த ஒன்றையும் காட்ட முடியாது! இது பன்மைத்தன்மை வாய்ந்தது.  

இந்து சமய அறநிலையத்துறையின் கீழ் இருக்கிற பல்வேறு பழமையான கோயில்கள் அரசர்கள் உள்ளிட்டு பல தலைமுறையினரால் கட்டி விரிவாக்கப் பட்டவை. ஒவ்வொரு கோயிலும் ஒவ்வொரு ஆகமத்தை ஒழுகுகின்றன. 

பொத்தாம் பொதுவாக “பக்தர்களின் கட்டுப்பாடு” என்று சொன்னால், எந்தக் கட்டுப்பாட்டை ஜக்கி சொல்கிறார்? அவர் சொல்லாமல் சொல்வது பிராமணர்களின் கட்டுப்பாட்டைத்தான்! பல்வேறு சமூகங்களைச் சேர்ந்த இந்துமத பக்தர்களின் வழிபாட்டுரிமையை - சமய உரிமையை மறுப்பதுதான் இவரது உள்நோக்கம்! 

இன்று அரசின் நிர்வாகத்தில் கோயில்கள் இருந்தாலும், அவற்றின் விழாக்கள், கோயில் மரபுப் பழக்கங்கள் ஆகியவை குறித்து, அக்கோயில்களைச் சேர்ந்த நிர்வாக அதிகாரிகள், அக்கோயில் அர்ச்சகர்களையும், பக்தர்கள் பலரையும் கலந்துதான் நாள் குறிப்பதிலிருந்து, நிகழ்ச்சி நிரலை இறுதி செய்வது வரை நடத்திக் கொண்டிருக்கிறார்கள். 

பக்தர்கள் என்ற பெயரால், தனியார் கொள்ளையிலும் ஒழுங்கீனத்திலும் கோயில்கள் இருந்த காரணத்தினால் தான் இந்து சமய அறநிலையத்துறையே ஏற்படுத்தப்பட்டது. கோயில் சொத்துகளை மீட்பது, அரசால்தான் முடியும். அதில் குறைபாடு இருந்தால் அரசின் கையில் இருந்தால்தான் பக்தர்கள் தலையிட முடியும். குறைகளைக் களைய முடியும்! கோயில் வருமானத்தைப் பெருக்க முடியும்! 

எடுத்துக்காட்டாக, சிதம்பரம் நடராசர் கோயில் இந்து சமய அறநிலையத்துறையின் நேரடி நிர்வாகத்தின் கீழ் இருந்த காலத்தில் கணக்கில் காட்டப்பட்ட உண்டியல் வசூலைவிட, இப்போது தீட்சிதர்களின் தனி நிர்வாகத்தின் கீழ் வந்ததற்குப் பிறகு பல மடங்கு குறைத்துக் காட்டப்படுபடுகிறது. இது நிர்வாக சீர்கேடு எங்கே அதிகமாக இருக்கும் என்பதை எடுத்துக்காட்டுகிறது. இந்த உண்மை வெளியில் தெரிந்த பிறகும், நடராசர் கோயில் பக்தர்கள் நிர்வாகத்தைத் தட்டிக் கேட்க முடியவில்லை. ஏனென்றால், அது தீட்சிதர்களின் தனி நிர்வாகத்தில் இருக்கிறது. அரசின் கைகளில் இல்லை!

செயலலிதா முதலமைச்சராக இருந்தபோது, பூசைகள நடைபெறாத பல கோயில்களில், ஒரு கால பூசையாவது நடப்பதற்கான விரிவான ஏற்பாடுகள் செய்தார். அன்னதானம் செய்ய ஏற்பாடுகள் நடந்தன. அதுபோல் இன்னும் இருக்கிற கோயில்களில் முறையான வழிபாடு நடத்த அரசின் வழியாகச் செய்தால்தான் தொய்வின்றி நடக்கும். தனியார் நன்கொடை வரவு அரசின் கட்டுப்பாட்டில் இருக்கிறபோதுதான் நெறிப்படுத்தப்பட்டு, கோயில்களுக்குக் கிடைக்கிறது.

“பக்தர்களின் நிர்வாகத்தின்கீழ்” என்றால், பிராமணத் தலைமையின் கீழும், அதற்கு அடிபணிவோர் கீழும் நிர்வாகம் செல்கிறது என்று பொருள்! வருணாசிரம உயர்வு தாழ்வு கோயில்களில் புது வடிவம் எடுக்கும் என்று பொருள்! இப்போது, அரசின் கட்டுப்பாட்டில் இருக்கிறபோதே தமிழில் வழிபாடு நடத்துவதற்கு மிகப்பெரும் போராட்டம் நடத்த வேண்டியிருக்கிறது. மொத்தமாகத் தனியார்வசம் போய்விட்டால், தமிழ் தலைகாட்டுவதற்கு வாய்ப்பே இல்லை! 

இந்து மதம் என்று பொதுவாகச் சொல்லப்பட்டாலும், வடநாட்டு வழிபாட்டு முறைகளுக்கும், தமிழ்நாட்டு வழிபாட்டு முறைகளுக்கும் முற்றிலும் வேறுபட்ட தன்மைகள் இருக்கின்றன. ஜக்கியும் அவருக்குப் பின்னால் இருக்கிற ஆர்.எஸ். எஸ்.சும், தமிழ்நாட்டுக் கோயில்களின் தனித்தன்மையையும், தமிழ்நாட்டு பக்தர்களின் வழிபாட்டு உரிமையையும் பறித்து, “ஜெய் ஸ்ரீராம்”, “ஜெய் ஸ்ரீ அனுமான்” என்ற ஒற்றை முழக்கத்தின்கீழ் ஒட்டுமொத்தக் கோயில்களையும் அடக்குவதற்குத்தான் சூது செய்கிறார்கள். 

சைவத் திருமுறைகளையும், ஆழ்வார் பாசுரங்களையும், அருணகிரிநாதர் பாடல்களையும் நீக்கிவிட்டு, சமற்கிருத மந்திரங்கள் மட்டுமே ஒலிக்க வேண்டும் என்ற திட்டத்தில்தான் இதனை முன்வைக்கிறார்கள். தமிழ்நாட்டுக்குத் தொடர்பே இல்லாதவர் என்பது மட்டுமல்ல, சிவலிங்கத்திற்குத் தம்விருப்பம் போல் மனித வடிவம் கொடுத்து, கட்டடத்  திறப்புவிழா போல் தலைமையமைச்சர் மோடியை வைத்து, சிலைத் திறப்புவிழா நடத்தியவர்தான் ஜக்கி வாசுதேவ்! 

தமிழ்நாட்டு சமய ஆகமங்களுக்கோ, மரபுகளுக்கோ கொஞ்சமும் தொடர்பில்லாத ஜக்கி வாசுதேவும், அவரை இயக்குகிற ஆர்.எஸ்.எஸ்.சும் தமிழர்களைக் கோயில்களிலிருந்து முற்றிலும் அகற்றுவதற்கு சூழ்ச்சி செய்வதை தமிழர்கள் புரிந்து கொண்டு முறியடிக்க வேண்டும்! 

(தமிழ்த்தேசியத் தமிழர் கண்ணோட்டம் - மாத இதழின் 2021 மார்ச்சு இதழின் ஆசிரியவுரையாக எழுதியது)

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

 

தோழர் தா. பாண்டியன் மறைவு பாசிச எதிர்ப்புப் போரில் பேரிழப்பு! ஐயா பெ. மணியரசன் இரங்கல்!

தோழர் தா. பாண்டியன் மறைவு

பாசிச எதிர்ப்புப் போரில் பேரிழப்பு!

தமிழ்த்தேசியப் பேரியக்கத் தலைவர் 

பெ. மணியரசன் இரங்கல்!

இந்தியக் கம்யூனிஸ்ட்டுக் கட்சியின் தமிழ்நாட்டுத் தலைவர்களில் ஒருவரான தோழர் தா. பாண்டியன் அவர்கள் (அகவை 88) இன்று 26.02.2021 முற்பகல் சென்னை அரசு தலைமை மருத்துவமனையில் காலமானார் என்ற துயரச் செய்தி வேதனை அளிக்கிறது.

சிறுநீரகப் பாதிப்பில் டயாலிசிஸ் என்ற சிகிச்சையில் இருந்த நிலையிலும் தா.பா. அவர்கள் மனவலிமையுடன் தமது அரசியல் பணிகளில் சுறுசுறுப்பாக ஈடுபட்டு கருத்துகள் கூறிவந்தார்.

முதுகலை மற்றும் வழக்கறிஞர் பட்டம் பெற்று, கல்லூரிப் பேராசிரியர், உயர் நீதிமன்ற வழக்கறிஞர் என்ற வாய்ப்புகள் இருந்தும், அவற்றில் நாட்டமின்றி மார்க்சிய – லெனினிய வழியில் புரட்சிப்பணியில் ஈடுபட வேண்டும் என்று அதற்கான முழுநேரப் பணியைத் தேர்வு செய்தார் தா.பா! தோழர் ஜீவாவுக்குப் பிறகு தமிழ் இலக்கியத்தையும் மார்க்சியத்தையும் இணைத்து மேடைகளில் வழங்கியவர் தா.பா. பல நூல்கள் எழுதியுள்ளார்.

இந்தியாவில் பொதுவுடைமை இயக்கத்தினர் பெரும் ஈகங்கள் செய்து போராடிய போதும் அனைத்திந்திய அளவில் வளர்ச்சி அடையாததேன் என்ற வினாவுக்கு விடையளிக்கும் வகையில் கடந்த சில ஆண்டுகளுக்கு முன் “பொதுவுடைமையரின் எதிர்காலம்” என்ற நூல் எழுதினார்.

இந்தியாவில் பல தேசிய இனங்கள், பல தேசங்கள் இருக்கின்றன. இவற்றின் தனித்தன்மைகளை ஏற்க வேண்டும். இந்தியாவிற்கான ஒற்றைத் தலைமை கொண்ட அனைத்திந்திய தேசியக்குழு, நடுவண்குழு என்பவற்றைக் கலைத்துவிட்டு, ஒரு கூட்டிணக்கக் குழு (Coordination Committee) தலைமையில் பொதுவுடைமை இயக்கம் செயல்பட வேண்டும் என்பது உட்பட பல மறுக்கட்டமைப்புப் பரிந்துரைகளை அந்நூலில் கூறியிருந்தார்.

இரண்டு ஆண்டுகளுக்கு முன் உடல் நலம் பாதிக்கப்பட்டு சென்னையில் வீட்டிலிருந்த போது அவர் நலம் கேட்க நானும், புலவர் இரத்தினவேலவன் அவர்களும் நம் தோழர்களும் சென்றிருந்தோம். அப்போது இந்த நூல் குறித்து என்னிடம் பேசி அவசியம் படிக்க வேண்டும் என்று கூறியதுடன், தஞ்சை என்.சி.பி.எச். பொறுப்பாளர் மூலம் அந்நூல் எனக்கு கிடைக்கச் செய்தார். கடந்த ஆண்டு சென்னை மருத்துவமனையில் சிகிச்சை பெற்றபோதும் நானும், தோழர் கி.வெ.அவர்களும் சென்று நலம் விசாரித்தோம்.

மாறுபட்ட கருத்துகள் கொண்டோருடனும் அன்பாகப் பழகக் கூடிய பண்பாளர் தோழர் தா.பா அவர்கள்.

பா.ச.க., பாசிசத்தைக் கடுமையாக எதிர்த்து வந்தார். ஆரியத்துவா பாசிச எதிர்ப்பைக் கூர்மைப் படுத்த வேண்டிய காலத்தில் தோழர் தா.பா. அவர்களின் மறைவு பேரிழப்பாகும்.

தோழர் தா.பா அவர்களின் மறைவிற்குத் தமிழ்த்தேசியப் பேரியக்கத்தின் சார்பில் ஆழ்ந்த இரங்கல் தெரிவித்துக் கொள்கிறேன்.

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

 

“கேந்திரிய வித்தியாலயாவை தமிழ்நாட்டிலிருந்து வெளியேற்று! ” - ஐயா பெ.மணியரசன் நேர்காணல்!.

“கேந்திரிய வித்தியாலயாவை

 தமிழ்நாட்டிலிருந்து வெளியேற்று!  ”

ஐயா பெ.மணியரசன் நேர்காணல்!. 

கண்ணோட்டம் வலையொளியில்..!!!

“நெய்வேலி வேலை சேர்ப்பில் தமிழர்கள் முற்றிலும் புறக்கணிப்பு ” - ஐயா பெ.மணியரசன் ஆவேசம்!.

“நெய்வேலி வேலை சேர்ப்பில்

 தமிழர்கள் முற்றிலும் புறக்கணிப்பு  ”

ஐயா பெ.மணியரசன் ஆவேசம்!. 

கண்ணோட்டம் வலையொளியில்..!!!

பேரறிவாளன் உள்ளிட்ட ஏழு தமிழர் விடுதலையில் தமிழ்நாடு முதலமைச்சர் உண்மையை உரைக்க வேண்டும்! ஐயா கி. வெங்கட்ராமன்

பேரறிவாளன் உள்ளிட்ட ஏழு தமிழர் விடுதலையில் தமிழ்நாடு முதலமைச்சர் உண்மையை உரைக்க வேண்டும்!

தமிழ்த்தேசியப் பேரியக்கப் பொதுச்செயலாளர் 

ஐயா கி. வெங்கட்ராமன் வலியுறுத்தல்!

தனது சட்டக் கடமையை முற்றிலும் மீறி ஏழு தமிழர் விடுதலை குறித்து தான் முடிவெடுக்க முடியாது என்றும், குடியரசுத் தலைவர்தான் முடிவெடுக்க முடியும் என்றும் தமிழ்நாடு ஆளுநர் பன்வாரிலால் புரோகித் தெரிவித்திருப்பது அதிர்ச்சியளிக்கிறது.

உச்ச நீதிமன்றத்தில் தனது முன்விடுதலை கோரி பேரறிவாளன் தொடுத்த வழக்கில், நீதிபதி நாகேசுவரராவ் தலைமையிலான அமர்வு, பேரறிவாளன் உள்ளிட்ட ஏழு தமிழர் முன்விடுதலை தொடர்பாக தமிழ்நாடு அமைச்சரவை அளித்த பரிந்துரையின் மீது இரண்டு ஆண்டுகளைக் கடந்தும் ஆளுநர் முடிவெடுக்காமல் இருப்பது அதிருப்தி அளிப்பதாக தனது கண்டனத்தை வெளிப்படையாகப் பதிவு செய்தது.

இதைத் தொடர்ந்து உச்ச நீதிமன்றத்தில் இந்திய அரசு வழக்குரைஞர், ஆளுநர் மூன்று நாட்களில் இதுகுறித்து முடிவெடுப்பார் என்று முதலிலும், அடுத்த நாள் ஒருவாரத்தில் முடிவெடுப்பார் என்றும் பதிலுரை தாக்கல் செய்தது.

இந்நிலையில், 2021 சனவரி 25ஆம் நாளிட்ட தனது கடிதத்தின் வழியாக ஆளுநர் “இதுகுறித்து, தான் முடிவெடுக்க முடியாது. தொடர்புடைய அதிகாரமுள்ளவர் குடியரசுத் தலைவர்தான்” என்று தெரிவித்துவிட்டதாக நேற்று (04.02.2021) உச்ச நீதிமன்றத்தில் இந்திய அரசு வழக்குரைஞர் பதிலுரை அளித்திருக்கிறார்.

அரசமைப்புச் சட்ட உறுப்பு 163-இன்படி, ஆளுநர் மாநில அமைச்சரவையின் முடிவுக்குக் கட்டுப்பட்டவர் ஆவார். அவருக்கு எந்தத் தனிப்பட்ட விருப்பு அதிகாரமும் கிடையாது. இந்த நிலையில், ஆளுநர் புரோக்கித்தின் இந்த முடிவு முற்றிலும் சட்டத்திற்குப் புறம்பான செயலாகும்! தமிழ்நாடு ஆளுநர் பன்வாரிலால் புரோகித் ஆளுநர் பதவியில் இருப்பதற்கே உள்ள தகுதியை இழந்துவிட்டார்.

ஏழு தமிழர் விடுதலை குறித்து எதிர்க்கட்சிகள் கேள்வி எழுப்பியபோது, சட்டமன்றத்தில் பதிலுரைத்த தமிழ்நாடு முதலமைச்சர் எடப்பாடி பழனிச்சாமி, தான் கடந்த 2021 சனவரி 29 அன்று ஆளுநரை சந்தித்து ஏழு தமிழர் விடுதலை குறித்து வலியுறுத்தியதாகவும், இதுகுறித்து ஆளுநர் விரைவில் நல்ல முடிவை அறிவிப்பார் என்றும் தேவையில்லாமல் எதிர்க்கட்சியினர் பிரச்சினை செய்கிறார்கள் என்றும் கூறினார்.

முதலமைச்சர் எடப்பாடி பழனிச்சாமி, ஆளுநரை சந்தித்தது சனவரி 29ஆம் நாள். ஆனால், ஆளுநரோ சனவரி 25ஆம் நாளே ஏழு தமிழர் விடுதலையை மறுத்து, தனது பதிலுரையை அளித்திருக்கிறார். நீதிமன்றத்தில் தாக்கல் செய்யப்பட்ட ஆவணமும் அதை உறுதி செய்கிறது.

அப்படியானால், சனவரி 29 அன்று தன்னை சந்தித்த முதலமைச்சரிடம் ஆளுநர் இந்த உண்மையை மறைத்திருக்கிறாரா? அல்லது ஆளுநர் இந்த உண்மையைச் சொன்ன பிறகும் சட்டமன்றத்தில் முதலமைச்சர் எடப்பாடி பழனிச்சாமி பொய் சொல்லியிருக்கிறாரா என்பது நாட்டு மக்களுக்குத் தெரிய வேண்டும்!

இச்சிக்கலில், முதலமைச்சர் எடப்பாடி பழனிச்சாமி இரட்டை வேடம் போடுகிறார் என்பதை தொடர்ந்து கூறிவருகிறோம். பேரறிவாளன் தொடர்பான பரோல் வழக்கிலேகூட, அவரை சிறை விடுப்பில் விடக்கூடாது என்று தமிழ்நாடு அரசு உயர் நீதிமன்றத்தில் கடுமையாக வாதிட்டது. அதனைப் புறக்கணித்து, உயர் நீதிமன்றம் பேரறிவாளனுக்கு சிறைவிடுப்பு வழங்கியது. எடப்பாடி பழனிச்சாமி அரசின் அணுகுமுறைக்கு இது சான்று கூறுகிறது!

எனவே, தமிழ்நாடு முதலமைச்சர் இதுகுறித்து இப்போதாவது உண்மை நிலையை தெளிவுபடுத்த வேண்டும்.

ஆளுநரின் அப்பட்டமான இந்த சட்டமீறல் அவரது தமிழினப் பகைப் போக்கை வெளிப்படுத்துகிறது.

இந்நிலையில், ஏற்கெனவே அன்றைய தலைமை நீதிபதி தத்து தலைமையிலான உச்ச நீதிமன்ற அரசமைப்பு ஆயம் 2015ஆம் ஆண்டு திசம்பரில் உறுப்பு 161இன்படி, மாநில அமைச்சரவை பரிந்துரை பெற்று ஆளுநர் இராசீவ்காந்தி வழக்கில் சிறையிலுள்ள ஏழு தமிழர்களை விடுதலை செய்ய எந்தத் தடையும் இல்லை என உறுதிப்படுத்தியுள்ள சூழலில், உச்ச நீதிமன்றம் அரசமைப்பு உறுப்பு 142-ஐ பயன்படுத்தி பேரறிவாளனை விடுதலை செய்ய வேண்டும், மற்ற ஆறு பேரையும் விடுதலை செய்ய வழி ஏற்படுத்த வேண்டும்.

இந்திய அரசு தனது தமிழினப் பகை நோக்கை செயல்படுத்துவதற்காக எந்தளவுக்கு சட்ட மீறலில் ஈடுபடும் என்பதையும், தமிழ்நாடு அரசு பா.ச.க. அரசோடு தனக்குள்ள கீழ்நிலை உறவுக்காக தமிழர் உரிமையை மட்டுமின்றி, தனது அமைச்சரவைக்கு உள்ள சட்ட உரிமையை பலியிடும் என்பதையும் தமிழ்நாட்டு மக்கள் உணர்ந்து கொள்ள வேண்டும்.

இச்சிக்கலில் நடந்த உண்மை என்ன என்பது பற்றி முதலமைச்சர் எடப்பாடி பழனிச்சாமி விளக்க வேண்டுமென்றும், பேரறிவாளன் உள்ளிட்ட ஏழு தமிழர் விடுதலைக்கு உண்மையாக செயல்பட வேண்டுமென்றும் தமிழ்த்தேசியப் பேரியக்கம் சார்பில் வலியுறுத்துகிறேன்.

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

 

என்.எல்.சி. நிறுவனம் - தமிழர்களைப் புறக்கணிக்கும் பட்டதாரிப் பொறியாளர் நேர்முகத் தேர்வை இரத்து செய்ய வேண்டும்! ஐயா கி. வெங்கட்ராமன் வலியுறுத்தல்!

என்.எல்.சி. நிறுவனம் - தமிழர்களைப் புறக்கணிக்கும் பட்டதாரிப் பொறியாளர் நேர்முகத் தேர்வை இரத்து செய்ய வேண்டும்!

தமிழ்த்தேசியப் பேரியக்கப் பொதுச்செயலாளர்

ஐயா கி. வெங்கட்ராமன் வலியுறுத்தல்! 

தமிழ்நாட்டில் இயங்கும் நெய்வேலி நிலக்கரிப் பழுப்பு நிறுவனம் பட்டதாரிப் பொறியாளர்கள் மற்றும் பல்வேறு பட்டயக் கணக்காளர்கள், மனித வளப் பட்டதாரிகள் உள்ளிட்டோருக்கு மின்துறை, சுரங்கத்துறை, கணினி, நிதி, மனித வளம் போன்ற துறைகளுக்கான 259 நிரந்தரப் பணிகளுக்கு கடந்த 13.03.2020 அன்று (விளம்பர எண் : 2 / 2021), விண்ணப்பங்களை வரவேற்று அறிவிப்பு கொடுத்திருந்தது. 

கொரோனா தொற்று காரணமாக இதற்கான நேர்முகத் தேர்வு மூன்றுமுறை நாள் குறிப்பிடப்பட்டு தள்ளி வைக்கப்பட்டு, இறுதியில் கடந்த 2021 நவம்பரில் நடத்தப்பட்டது. 

இத்தேர்வுகளை உத்திரப்பிரதேசத்தின் நொய்டா நகரைத் தலைமையிடமாகக் கொண்டு செயல்படும் “எஜூகேசன் கன்சல்டேசன் இந்தியா லிமிடெட்“ (Ed.C.I.L.) என்ற வடநாட்டு அரசுத்துறை நிறுவனம் நடத்தியது. 2 இலட்சத்திற்கும் அதிகமானோர் பங்கேற்ற இத்தேர்வின் முடிவில் நேர்முகத் தேர்வுக்கான முன்னுரிமைப் பட்டியலை இந்நிறுவனம் அளித்து, அதனை 30.01.2021 அன்று என்.எல்.சி. தனது இணையதளத்தில் வெளியிட்டது.  

259 காலியிடங்களுக்கான 1582 பேர் அடங்கிய இந்தப் பெயர் பட்டியலில், தமிழ்நாட்டைச் சேர்ந்தவர்கள் வெறும் 8 பேர் தான்! நேர்முகத் தேர்வுக்கு அழைக்கப்பட்டவர்களிலேயே 8 பேர்தான் தமிழர்கள் என்றால், ஒருவரைக்கூட நேர்முகத் தேர்வில் பணிக்குத் தேர்வு செய்வார்களா என்பது ஐயம்!

தமிழ்நாட்டில் தமிழ் மக்கள் வழங்கிய நிலத்தில் இயங்கும் என்.எல்.சி. நிறுவனம் நிலம் கொடுத்தவர்களையோ, அந்நிறுவனப் பணியிலிருந்து இறந்தோரின் வாரிசுகளையோ, பழகுநர் பயிற்சி முடித்தவர்களையோ முற்றிலும் புறக்கணித்துவிட்டு, இந்திக்காரர்களையும் வடநாட்டுக்காரர்களையும் தொடக்க ஊதியமே 60,000 ரூபாயுள்ள இந்த நிரந்தரப் பணிகளில் சேர்ப்பது தற்செயலானது அல்ல – திட்டமிட்ட தமிழின ஒதுக்கல் கொள்கை ஆகும்! இது கடும் கண்டனத்திற்குரியது! 

எனவே, என்.எல்.சி. நிறுவனம் இந்த நேர்முகத் தேர்வை இரத்து செய்துவிட்டு, புதிதாக விளம்பரம் வெளியிட்டு இப்பணிகளுக்கு 90 விழுக்காடு தமிழ்நாட்டு மக்களையே சேர்க்கும் வகையில் ஒதுக்கீடு வழங்கி, பணியமர்த்தும் நடவடிக்கையை மீண்டும் தொடங்குமாறு தமிழ்த்தேசியப் பேரியக்கத்தின் சார்பில் வலியுறுத்திக் கேட்டுக் கொள்கிறேன்.

தலைமைச் செயலகம்,

தமிழ்த்தேசியப் பேரியக்கம்

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

 

 

இலங்கை இனப்படுகொலையாளிகளை பன்னாட்டு நீதிமன்றத்தில் நிறுத்து! ஐ.நா. மனித உரிமை ஆணையர் அறிக்கை! ஐயா கி. வெங்கட்ராமன்

இலங்கை இனப்படுகொலையாளிகளை பன்னாட்டு நீதிமன்றத்தில் நிறுத்து! ஐ.நா. மனித உரிமை ஆணையர் அறிக்கை!

ஐயா கி. வெங்கட்ராமன், பொதுச்செயலாளர்,
தமிழ்த்தேசியப் பேரியக்கம்.

ஐ.நா. மனித உரிமை மன்றத் தீர்மானத்திலிருந்து இலங்கை அரசு விலகிக் கொள்வதாக கோத்தபய இராசபக்சே அரசு அறிவித்துள்ளது.  ஐ.நா. மனித உரிமை மன்றத் தலைமை ஆணையரோ, இனப்படுகொலை குற்றவாளிகளைப் பன்னாட்டுக் குற்றவியல் நீதிமன்றத்தில் நிறுத்த வேண்டும் என்கிறார்.  

இலங்கை அரசும் சேர்ந்து கொண்டு ஐ.நா. மனித உரிமை மன்றத்தில் 2015இல் நிறைவேற்றிய தீர்மானம், வெளிநாட்டு சட்ட வல்லுநர்களின் உதவியோடு உள்நாட்டு விசாரணை நடத்தி 2008 - 2009 தமிழீழ அழிப்புப் போரில் ஈடுபட்டவர்கள் மீது நடவடிக்கை எடுக்கப்படும் என்றும், பொறுப்பேற்பு - நல்லிணக்கம் ஆகியவை குறித்து நடவடிக்கைகள் மேற்கொள்ளப்படும் என்றும் உறுதி கூறியது.

ஆயினும், கோத்தபய இராசபக்சே - மகிந்த இராசபக்சே ஆட்சிப் பொறுப்பேற்றவுடன் இதிலிருந்து விலகுவதாக அறிவித்தனர். ஐ.நா. மனித உரிமை மன்றத்தோடு இணைந்து இச்சிக்கலில் செயல்படப்போவதில்லை எனவும் கூறினர்.

அண்மையில், இந்திய வெளியுறவுத்துறை அமைச்சர் ஜெய்சங்கர் இலங்கையில் மூன்று நாள் அரசுமுறைப் பயணம் மேற்கொண்டபோது, ஈழத்தமிழர்களுக்கு எதிரான போரில் நிகழ்ந்த “போர்க்குற்றம், மனித உரிமை மீறல்” ஆகியவை இலங்கையின் உள்நாட்டுச் சிக்கல் என்று கூறி, கோத்தபய ஆட்சியின் நிலைப்பாட்டிற்கு ஆதரவு தெரிவித்தார்.

இந்தப் பின்னணியில், ஐ.நா. மனித உரிமை மன்றத்திற்குத் தலைமை ஆணையர் கடந்த 2021 சனவரி 12 அன்று முன்வைத்துள்ள அறிக்கை “கசிந்து” வந்துள்ளது. இதற்கு முன்பாகவும் இலங்கை இனச்சிக்கல் தொடர்பான தீர்மானங்கள் பலநேரம் இதுபோல் “கசிந்தது” உண்டு! பெரும்பாலும், அவையே உண்மையான அறிக்கையாகவும் அமைந்ததும் உண்டு!

கசிந்துள்ள தலைமை ஆணையர் முன்மொழிவு, சில புதிய நிலைமைகளையும் முடிவுகளையும் கூறுகிறது.

(-) கொரோனா தடுப்பு, தகவல் தொடர்பு, பேரிடர் மேலாண்மை, ஊடக மையம் உள்ளிட்ட ஏறத்தாழ 31 குடிமை நிர்வாக அமைப்புகளும் இராணுவத்தின் கட்டுப்பாட்டில் வைக்கப்பட்டிருக்கின்றன.

(-) குடியரசுத் தலைவரின் முற்றதிகாரத்திற்கு வழி ஏற்படுத்தும் 20ஆவது அரசமைப்புச் சட்டத்திருத்தம் மேற்கொள்ளப்பட்டிருக்கிறது.

(-) மனித உரிமை மீறல் குற்றங்கள் தொடர்பாக நடைபெற்ற உள்நாட்டு விசாரணைகளில் அரசியல் குறுக்கீடு அதிகரித்து, அவை முன்னேறாமல் தடுக்கப்படுகின்றன.

(-) சிங்களர்களின் வாக்குகளைப் பெற்றே தாங்கள் அரசு அமைத்திருப்பதாகவும், அதனால் சிங்களர்களின் விருப்பங்களுக்கு முன்னுரிமை தருவது தேவையானது என்றும் குடியரசுத் தலைவரே பேசுவதும், கொரோனா தடுப்பு நடவடிக்கையில் கூட இனப்பாகுபாடு காட்டப்படுவதும் அவநம்பிக்கையை ஏற்படுத்துகிறது.

(-) ஊடகத்துறையினர் கடுமையாகக் கண்காணிக்கப்படுகிறார்கள். சனநாயக நடவடிக்கைகள் பெருமளவில் குறுக்கப்பட்டுவிட்டன. மனித உரிமை மீறல் நடவடிக்கைகள் அன்றாடம் அதிகரித்திருக்கின்றன.

இவ்வாறு அடுக்கடுக்கான நிலைமைகளை எடுத்துக்கூறும் தலைமை ஆணையர், ஐ.நா. மனித உரிமை மன்றத்தின் 2015ஆம் ஆண்டு தீர்மானத்தை இலங்கை அரசு செயல்படுத்தாது என்ற முடிவுக்கு வருகிறார்.  பொறுப்புக் கூறல் மற்றும் நல்லிணக்கத்திற்கான நிலைமைகள் மோசமடைந்து வருவதால் போர்க்குற்றம் குறித்த விசாரணையைப் பன்னாட்டுக் குற்றவியல் நீதிமன்றத்திற்கு எடுத்துச் செல்ல ஐ.நா. மனித உரிமை மன்றம் செயல்பாடுகளைத் தொடங்கிவிட வேண்டும் என்கிறார்

அதேநேரம், உறுப்பு நாடுகள் போர்க்குற்றம் தொடர்பாக தங்கள் நாடுகளில் நீதிமன்ற நடவடிக்கைகளை மேற்கொள்ளலாம் என்றும், கொடும் குற்றச்சாட்டுக்கு ஆளான உயர் அதிகாரிகள் தங்கள் நாடுகளுக்கு வரக்கூடாது என பயணத் தடை விதிக்கலாம் என்றும் பரிந்துரைத்திருக்கிறார்.

நம்மைப் பொறுத்தளவில் நடைபெற்றது வெறும் போர்க்குற்றமல்ல - அப்பட்டமான இன அழிப்பு (Genocide) என்பதே உண்மை! இனப்படுகொலை தொடர்பான குற்ற விசாரணையே பன்னாட்டு அரங்கில் முன்னெடுக்கப்பட வேண்டும் என்பதும், ஐ.நா. மேற்பார்வையில் தனி ஈழம் தொடர்பான கருத்து வாக்கெடுப்பு நடத்தப்பட வேண்டும் என்பதுமே நமது கோரிக்கை!

தலைமை ஆணையரின் இந்தப் பரிந்துரை முக்கியமான முன்னேற்றமாகும். தமிழ்நாடு முதல்வர் எடப்பாடி பழனிச்சாமி அவர்கள், மனித உரிமை ஆணையரின் இந்த அறிக்கையை அவருடைய கூட்டணித் தலைவர் மோடி ஆதரிக்க வேண்டுமென கோரிக்கை வைக்க வேண்டும்!

ஐ.நா. மனித உரிமை மன்றத்தில் இந்த அறிக்கையின்படி தீர்மானம் நிறைவேற்ற இந்திய அரசு அழுத்தம் கொடுக்க வேண்டுமென்று தமிழ்நாடு முதலமைச்சர் வலியுறுத்த வேண்டும். மற்ற எதிர்க்கட்சிகளும் இக்கோரிக்கையை எழுப்ப வேண்டும்.

அவ்வாறு வரைவுத் தீர்மானம் முன்வைக்கப்பட்டால், அதனையாவது இந்திய அரசு ஆதரித்து, பன்னாட்டு அரங்க விசாரணைக்கு இனப்படுகொலையாளர்களை கொண்டு நிறுத்த நடவடிக்கை மேற்கொள்ள வேண்டும்!

(தமிழ்த்தேசியத் தமிழர் கண்ணோட்டம் 2021 பிப்ரவரி இதழின் ஆசிரியவுரை).

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam