உடனடிச்செய்திகள்

Latest Post

Thursday, October 22, 2020

தஞ்சைப் பெருவுடையார் கோயில் சதய விழாவில் தமிழில் பூசை செய்ய வேண்டும்! - தஞ்சைப் பெரிய கோயில் உரிமை மீட்புக் குழு ஒருங்கிணைப்பாளர் பெ. மணியரசன் கோரிக்கை!


தஞ்சைப் பெருவுடையார் கோயில்
சதய விழாவில் தமிழில் பூசை செய்ய வேண்டும்!

தஞ்சைப் பெரிய கோயில் உரிமை மீட்புக் குழு
ஒருங்கிணைப்பாளர் பெ. மணியரசன் கோரிக்கை!

தமிழ்ப் பேரரசன் இராசராசன் பிறந்த நாள் விழாவான சதய விழாவை இவ்வாண்டு 26.10.2020 திங்கட் கிழமை ஒருநாள் நிகழ்வாக நடத்திடத் தமிழ்நாடு அரசின் இந்து அறநிலையத்துறை முடிவு செய்ததைத் தஞ்சைப் பெரியகோயில் உரிமை மீட்புக் குழு சார்பில் வரவேற்கிறேன். கொரோனா காலம் என்பதால், பட்டிமன்றம், கருத்தரங்கம், கலை நிகழ்ச்சிகள் போன்ற நிகழ்வுகளை இவ்வாண்டு தவிர்த்ததும் சரியான முடிவே.
பேரரசன் இராசராசனின் 1035ஆம் ஆண்டு பிறந்தநாள் விழாவாக நடைபெறும் இவ்விழாவின் போது, மூலவரான பெருவுடையார் கருவறையிலும், மற்ற தெய்வ பீடங்களின் கருவறையிலும் தமிழ் மந்திரங்களைச் சொல்லி பூசை செய்வதே பேரரசனுக்குச் செலுத்தும் சிறந்த நன்றிக் கடனாகும். சிவன் கோயிலுக்குரிய அர்ச்சனைத் தமிழ் மந்திரங்களைத் தமிழ்நாடு அரசு ஏற்கெனவே வெளியிட்டுள்ளது.
தஞ்சைப் பெருவுடையார் கோயிலில் தேவாரம், திருமந்திரம் முதலிய கருவறை அர்ச்சனை மந்திரங்களில் கற்றுத்தேர்ந்த, தமிழ் ஓதுவாமூர்த்தி உள்ளார். தேவையானால் வெளியிலிருந்து மூத்த ஓதுவாமூர்த்திகளை அழைத்துக் கொள்ளலாம்.
இப்பொழுது கருவறையில் அர்ச்சனை செய்து கொண்டிருப்பவர்களையும் தமிழ் மந்திரம் ஓதி அர்ச்சனை செய்ய வழி காட்டலாம்.
எமது இந்த வேண்டுகோளானது தமிழ்நாடு அரசின் – இந்து அறநிலையத்துறையின் கோயில் கருவறை அர்ச்சனை விதிமுறைகளுக்கு உட்பட்டதே!
கடந்த 05.02.2020 அன்று நடைபெற்ற தஞ்சைப் பெருவுடையார் கோயில் திருக்குடமுழுக்கில் கருவறையிலும் கலசத்திலும் தமிழ் மந்திரம் ஓதி அவ்விழாவை நடத்திட ஆணை இடக்கோரி, தஞ்சைப் பெரிய கோயில் உரிமை மீட்புக் குழு சார்பில் நானும், மற்றவர்களும் தொடுத்த (W.P.(MD) No.1644 of 2020) வழக்கில் 31.01.2020 அன்று சென்னை உயர் நீதிமன்றத்தின் மதுரைக் கிளை தமிழிலும் சமற்கிருதத்திலும் அர்ச்சனை செய்யுமாறு ஆணையிட்டது. அவ்வாணையின் படியே அக்குடமுழுக்கு தமிழிலும் சமற்கிருதத்திலும் நடத்தப்பட்டது.
இப்பொழுது நடைபெறவுள்ள தஞ்சைப் பெரியகோயில் சதயவிழாவிலும் பெருவடையார் கருவறை மற்ற தெய்வங்களின் கருவறைகள் அனைத்திலும் தமிழ் மந்திரங்களைச் சொல்லி பூசை செய்ய ஏற்பாடுகள் செய்யுமாறு தமிழ்நாடு முதலமைச்சர் அவர்களையும், இந்து சமய அறநிலையத்துறை அமைச்சர் அவர்களையும், அதிகாரிகளையும் கனிவுடன் கேட்டுக் கொள்கிறேன்.

தஞ்சைப் பெரிய கோயில்
உரிமை மீட்புக் குழு
பேச: 9443918095, 9841949462
முகநூல் : www.fb.com/thanjaikovilurimai
ஊடகம் : www.kannottam.com
சுட்டுரை : www.twitter.com/Tamizhdesiyam


 


இந்து தமிழ் ஏடே, இனப்படுகொலையை ஆதரிக்கும் முரளிதரனை எதிர்ப்பது இனவெறியா? - ஐயா பெ.மணியரசன் கேள்வி?


இந்து தமிழ் ஏடே,
இனப்படுகொலையை ஆதரிக்கும்
முரளிதரனை எதிர்ப்பது இனவெறியா?


ஐயா பெ.மணியரசன்
தலைவர், தமிழ்த்தேசியப் பேரியக்கம்.



இந்து தமிழ் ஏடு 21.10.2020 அன்று “சனநாயகமும் கருத்துரிமையும் எல்லோருக்கும் பொதுவில்லையா?” என்ற தலைப்பில் ஒரு கட்டுரை வெளியிட்டிருந்தது. அவ்வேட்டின் பெங்களூர் செய்தியாளர் இரா.வினோத் அக்கட்டுரையை எழுதியுள்ளார்.

மட்டைப்பந்து வீரர் முத்தையா முரளிதரன் வேடத்தில் தமிழ்நடிகர் விசய் சேதுபதி நடிக்கக்கூடாது என்று பேரெழுச்சியாய்க் கிளம்பிய தமிழர் எதிர்ப்பை எதிர்க்கும் கட்டுரை இது!

இலங்கையில் உள்நாட்டுப் போர், ஈழத் தமிழர்களின் இனப்படுகொலையோடு முடிந்து பத்து ஆண்டுகள் முடிந்த பின்னும் சினிமா, கிரிக்கெட் சம்பந்தப்பட்ட விஷயங்கள் கூட தமிழகத்தில் சர்ச்சையாக்கப்படுவது சரியா என்று வினோத் கேட்கிறார்.

நூறாண்டுகள், நூற்றைம்பது ஆண்டுகளுக்கு முன் காலனி ஆட்சியில் ஆங்கிலேய அரசு, பிரஞ்சு அரசு போன்றவை காலனி நாட்டு மக்கள் மீது நடத்திய படுகொலைகளுக்காக, முன்னாள் காலனிகள் அந்த நாடுகளை மன்னிப்புக் கேட்குமாறு கோருவதும் இழப்பீடு கோருவதும் இன்றும் தொடர்கிறது. சீனாவில் ஜப்பான் நடத்திய படுகொலைகளுக்காக சீனா இன்றும் ஜப்பானை மன்னிப்புக் கேட்குமாறு கோருகிறது.
தமிழ் இனப்படுகொலை நடந்து பத்தாண்டு முடிந்த பின்னும் இன்று ஏன் அந்த தமிழர்களுக்காகப் பரிந்து பேசுகிறாய் என்று நம்மை பார்த்துக் கேட்கிறது இந்து தமிழ் கட்டுரை!

“ஏ நாதியற்ற தமிழர்களே, நீங்கள் உலகத்தில் 12 கோடி பேர் இருப்பதாகக் பீற்றிக் கொள்கிறீர்கள். உங்களுக்கு இறையாண்மையுள்ள ஒரு நாடு உண்டா? ஒரு தேசம் உண்டா? ஐ.நா. மன்றத்திலே நீங்கள் உறுப்பு வகிக்கிறீர்களா? இல்லை! ஆதிக்கக்காரனுக்கு அடிமைகள் அடங்கிப்போக வேண்டும்; அளந்து பேசுங்கள்?” என்று வெளிப்படையாகப் பேச இன்னும் கொஞ்ச காலம் இருக்கிறது என்று கருதி, இரா.வினோத் போன்றவர்களின் இனத்துரோகக் கட்டுரைகளை வெளியிடுகிறது அவ்வேடு.

இசை, கலை, விளையாட்டு போன்றவற்றிற்கு அரசியல் இல்லை என்று பேசுகிறார் இரா.வினோத். பாரதிராஜா அவர்களை இடித்துக்காட்டி இக்கருத்தை வினோத் எழுதியுள்ளார்.

எந்த நாட்டிலே, அந்நாட்டின் அரசியல் முடிவுக்கு அப்பால் அயல்நாட்டு இசைக் குழுவை, கலைக்குழுவை, விளையாட்டுக் குழுவை அனுமதிக்கிறார்கள்? இந்திய அரசு பாக்கித்தான் மட்டைப் பந்துக் குழுவை இங்கு விளையாட இப்போது அனுமதிகுமா? சீனாவின் இசைக்குழு இப்போது இந்தியாவில் நிகழ்ச்சி நடத்த மோடி அரசு அனுமதிக்குமா? சீனநாட்டு இணைய டிக்டாக், கேம் ஸ்கேனர் போன்ற செயலிகளை இந்தியா தடைசெய்தது ஏன்? இப்போது நடக்கும் எல்லை மோதல்தான்! இது அரசியல் இல்லையா?

தெனாப்பிரிக்காவில் அந்நாட்டின் மண்ணின் மக்களாகிய கருப்பினத்தவர்களின் வாக்குரிமையைப் பறித்து, வெள்ளை இனவெறி ஆட்சி நடந்துவந்தது. கருப்பர்களுக்கு வெள்ளையருக்குச் சமமாக உரிமை இல்லை. இன ஒதுக்கல் (Aparthied) செய்தார்கள். எனவே அந்த நாட்டுடன் இந்தியா உட்பட பெரும்பாலான நாடுகள் தூதரக உறவு வைக்காமல் ஒதுக்கிவைத்திருந்தன.

கலைக்கும் விளையாட்டிற்கும் அரசியல் இல்லையா?

இசை, கலை, விளையாட்டுக் குழுக்கள் இந்தியா உள்ளிட்ட நாடுகளிலிருந்து தென்னாப்பிரிக்காவுக்குப் போகத் தடை; தென்னாப்பிரிக்கக் குழுக்கள் இந்த நாடுகளுக்கு வரத்தடை இருந்தது.

இன ஒதுக்கலை அந்நாடு கைவிட்ட பின்தான் இந்நாடுகள் இத்தடையை நீக்கின. மேற்படி தடையை எல்லோரும் ஆதரித்தோம்! அதே போல் பாலத்தீனர்களின் தாயகத்தை ஆக்கிரமித்துக் கொண்ட யூதர்களின் இஸ்ரேலுடன் இந்தியா உள்ளிட்ட பல நாடுகள் தூதரக உறவு கொள்ளாமல் – இசை, கலை, விளையாட்டுக் குழுக்கள் போக வரத் தடை விதித்திருந்தன. அமெரிக்கக் குடியரசுத் தலைவர் முன்னிலையில் பாலத்தீன விடுதலை அமைப்பிற்கும் இஸ்ரேல் அரசுக்கும் இடையே ஏற்பட்ட அமைதி உடன்படிக்கைக்குப் பின்னரே இஸ்ரேலுக்கு எதிரான தடைகள் நீங்கின.

இலங்கையில் சிங்கள இனவெறி ஆட்சி ஈழத் தமிழர்களை இலட்சக்கணக்கில் இனப்படுகொலை செய்த பின், இலங்கைக்கு எதிராக இந்திய அரசு தூதரக உறவைத் துண்டித்துத் தடைகள் போட்டிருக்க வேண்டும். சிங்கள அரசுடன் சேர்ந்து கொண்டு தமிழின அழிப்புப் போரை வழிநடத்திய இந்திய அரசு எப்படி இலங்கை அரசுக்கு எதிராகச் செயல்படும்?
ஆனால், தமிழ்நாட்டுத் தமிழர்களின் இன உணர்ச்சியைக் கணக்கில் கொண்டு அன்றையத் தமிழ்நாட்டு முதலமைச்சர் செயலலிதா அவர்கள் தமிழ்நாடு சட்டப் பேரவையில், இலங்கை அரசுக்கு எதிராக இந்திய அரசு பொருளாதாரத் தடைவிதிக்க வேண்டும்; சிங்களப் படை வீரர்களுக்கு இந்தியாவில் பயிற்சி அளிக்கக் கூடாது, இலங்கை விளையாட்டுக் குழுக்கள் இந்தியாவில் குறிப்பாகத் தமிழ்நாட்டில் விளையாடக் கூடாது – என்று சட்டப்பேரவையில் ஒரு மனதாகத் தீர்மானம் நிறைவேற்றினார்!
தமிழ்நாட்டின் குடியரசுத் தலைவராகவோ அல்லது தலைமை அமைச்சராகவோ செயலலிதா இருந்து மேற்கண்ட தீர்மானத்தை நிறைவேற்றியிருந்தால் ஐ.நா.மன்றம் அவர் குரலை செவிமடுத்திருக்கும். பல நாடுகள் தமிழ்நாட்டுடன் சேர்ந்து இலங்கைக்கு எதிராகப் பொருளாதாரத் தடை, கலைக்குழுக்கள், விளையாட்டுக் குழுக்களுக்கான தடை அனைத்தையும் போட்டிருக்கும்!

செயலலிதா அம்மையார் போட்ட அந்த சட்டப் பேரவைத் தீர்மானத்தின் தொடர்ச்சியாகத்தான் இன்றும் தமிழ்நாட்டில் இலங்கை விளையாட்டுக்குழுக்கள் விளையாட அனுமதிக்கக் கூடாது; சிங்களப் படையாட்களுக்குப் பயிற்சி தரக்கூடாது என்கிறோம்.

இதன் தொடர்ச்சியாகத்தான், சிங்களப் பேரினவாத அரசு நடத்திய தமிழினப் படுகொலையை ஆதரித்த, ஆதரிக்கின்ற, தமிழினத் துரோகி முத்தையா முரளிதரன் வேடத்தில் தமிழ்நடிகர் விசய்சேதுபதி நடிக்கக்கூடாது என்கிறோம். சிங்கள நடிகர்களைக் கொண்டோ, வேறுநாட்டு நடிகர்களைக் கொண்டோ முரளிதரன் வாழ்க்கை வரலாற்றுப் படம் வந்தால் எங்களுக்குக் கவலை இல்லை. ஆனால் அந்தப் படம் தமிழ்நாட்டில் ஓடக்கூடாது என்கிறோம்!

இனப்படுகொலை மற்றும் மனித உரிமைப் பறிப்பு நாடுகளுக்கு எதிராக நாகரிகச் சமூகம் – சனநாயகச் சமூகம் கடைபிடிக்கும் புறக்கணிப்பு நடவடிக்கையைத்தான் தமிழின உணர்வாளர்களாகிய நாங்கள் கடைபிடிக்கிறோம்.

ஐ.நா.பொதுச்செயலரும் - மனித உரிமை மன்றமும்

அன்றைய முதல்வர் செயலலிதா, அப்போது ஈழத்தமிழர் இனப்படுகொலையால் மனம் பதைத்த தமிழ்நாட்டுத் தமிழர்களின் வாக்குகளை வாங்குவதற்கான ஒரு சாகசமாக – ஓர் உத்தியாக – இலங்கைக்கு எதிரான தடைகளை விதித்தார் என்று இந்து தமிழ் நாளேட்டின் “உயர்மட்ட அறிவாளர் குழு” எதிர்வாதம் செய்யக்கூடும்!

2009இல் பொறுப்பில் இருந்த ஐ.நா. மன்றத்தின் பொதுச் செயலாளர் பான்கிமூன் அவர்களுக்குத் தமிழ்நாட்டில் வாக்குக் கேட்கும் தேவை இல்லையல்லவா? ஐ.நா.மனித உரிமை மன்றத்தில் உறுப்பு வகிக்கும் அமெரிக்கா போன்ற பல நாடுகளுக்குத் தமிழ்நாட்டில் வாக்குக் கேட்கும் தேவை இல்லை அல்லவா!

இனப்படுகொலை நடந்த 2009 ஆம் ஆண்டே, பன்னாட்டுப் புகழ்பெற்ற இந்தோனேசிய மனித உரிமைச் சிந்தனையாளர் தாருஸ்மான் தலைமையில் மூன்று பேர் கொண்ட குழுவை அமர்த்தி, இலங்கையில் இறுதிப்போர் நாட்களில் நடந்த மனிதப்படுகொலைகள், மனித உரிமை மீறல்கள் முதலியவற்றை ஆய்வு செய்து அறிக்கை தருமாறு கேட்டுக்கொண்டார். அக்குழு அளித்த அறிக்கை பின்வருமாறு கூறியது.

2009 இறுதிப்போரில் கடைசி மூன்று நாட்களில் மட்டும் 40 ஆயிரம் அப்பாவித் தமிழர்கள் – பொதுமக்கள் – இலங்கைப்படையினரால் கொல்லப்பட்டனர். வெள்ளைக்கொடி ஏந்தி சரண்டையச் சென்ற பொதுமக்கள் இலங்கை படையாட்களால் கொல்லப்பட்டனர். அங்கு நடந்துள்ள படுகொலைகள் மனித குலத்திற்கு எதிரான குற்றம் (Crime against Humanity). இவற்றை விசாரித்துத் தக்க நடவடிக்கை எடுக்கப் பன்னாட்டுப் புலனாய்வுக் குழு அமைக்க வேண்டும் என்று மேற்படி தாருஸ்மான் குழு ஐ.நா.பொதுச் செயலாளர்க்குப் பரிந்துரைத்தது.

2015-இல் செனிவாவில் கூடிய ஐ.நா.மனித உரிமை மன்றம் இலங்கை அரசு நடத்திய இறுதிப்போரில் நடந்த படுகொலைகள், போர்க் குற்றங்கள் அனைத்தையும் விசாரிக்க இலங்கை அரசு பன்னாட்டு வல்லுநர்களையும் இணைத்துக் கொண்ட புலனாய்வுக் குழுவை அமைத்து விசாரிக்க வேண்டும் என்று தீர்மானம் நிறைவேற்றியது.
ஐ.நா.மன்றப் பொதுச் செயலாளர் கொடுத்த அறிக்கைப்படியும் ஐ.நா.மனித உரிமை மன்றம் நிறைவேற்றிய தீர்மானப்படியும் புலனாய்வு அமைப்புகள் அமைக்காதபடி இந்தியா உள்ளிட்ட பலநாடுகள் சிங்கள இனவெறி அரசுக்குப் பாதுகாப்பு அரண்களாக விளங்குகின்றன. ஆனால், சிங்கள அரசு – ஈழத்தமிழர்களை இனப்படுகொலை செய்தது என்ற உண்மையை ஏதோ ஒரு வடிவில், உலக நாடுகள் ஒப்புக்கொள்கின்றன.

தமிழினப் படுகொலை செய்தோர் மற்றும் முரளிதரன்

தமிழினத்தில் பிறந்த, இலங்கையைச் சேர்ந்த முத்தையா முரளிதரன் 2009 இனப்படுகொலையைக் கண்டிக்கவில்லை. போர் முடிந்த நாள் தன் வாழ்நாளில் மிகவும் மகிழ்ச்சியான நாள் என்றார்.

“2009 – இல் போர் முடிவுக்கு வந்ததால் அப்பாவிப் பொதுமக்கள் கொல்லப்படுவது நின்று போனது என்ற கருத்தில்தான் என் வாழ்நாளில் அது மகிழ்ச்சியான நாள் என்று 2019-இல் கூறினேன்” என்று இப்போது மிண்டும் கூறியுள்ளார்.

அப்பாவிப் பொதுமக்கள் இனிமேல் கொல்லப்பட மாட்டார்கள் என்று மகிழ்ந்த முரளிதரன் 2008 – 2009 ஆண்டுகளில் ஒரு இலட்சத்திற்கும் மேல் அப்பாவிப் பொதுமக்கள் கொல்லப்பட்டதற்குக் கண்டனம் தெரிவித்ததுண்டா? இல்லை! ஏனேனில் கொன்றவர்கள் முரளிதரனின் எசமானர்கள். கொல்லப்பட்டவர்கள் அப்பாவித் தமிழர்கள்! அப்பாவி மக்கள் கொல்லப்பட்டதற்கு ஒரு சம்பிரதாயத்திற்குக் கூட இன்று வரை கண்டனம் தெரிவிக்கவில்லை! இதில் முரளிதரனுக்குத் தன்னலவெறி அரசியல் இல்லையா?

ஈழத்தமிழர், சிங்களர் என்ற இரண்டு இனங்களின் தாயகமாக உள்ளது இலங்கை. இதைச் சிங்களத் தீவு என்று கூறி பெருமைப்பட்டுக்கொண்டார் முரளிதரன். இதில் அவரது தன்னல அரசியல் இல்லையா?

பிரித்தானியத் தலைமை அமைச்சர் டேவிட் காமரூன் காமன் வெல்த் மாநாட்டிற்காக இலங்கை சென்றிருந்த போது 16.11.2013 அன்று வடக்கே தமிழர் பகுதிக்குப் போய் தமிழர்களின் துயரங்களைக் கேட்டறிந்தார். அவரிடம் தமிழ்த்தாய்மார்கள் தங்கள் பிள்ளைகளைப் பிடித்துக் கொண்டுபோன, சிங்களக் காவல்துறை என்ன செய்தது என்றே தெரியவில்லை. அவர்கள் உயிரோடு இருக்கிறார்களா இல்லையா என்றே தெரியவில்லை; எங்கள் பிள்ளைகளை ஒப்படைக்க ஏற்பாடு செய்யுங்கள் என்று கூறிக் கதறி அழுதனர். அதுபற்றி இலண்டன் பிபிசி நிறுவனம் முத்தையா முரளிதரனிடம் கேட்ட போது, இருபது, முப்பது பெண்கள் சொல்வதெல்லாம் உண்மை ஆகிவிடுமா என்று எதிர்க் கேள்வி கேட்டார். இது முத்தையா முரளிதரனின் இனத்துரோக அரசியல் இல்லையா?

கடந்த ஆண்டு இலங்கைக் குடியரசுத் தலைவர் தேர்தல் நடந்த போது முரளிதரன் இனப்படுகொலைக் குற்றவாளி கோத்தபய இராசபட்சேவுக்குத் தேர்தல் பரப்புரை செய்தார். அப்போதுதான் என் வாழ்நாளில் மகிழ்ச்சியான நாள் 2009-இல் போர் முடிந்த நாள் என்றார். அதுமட்டுமல்ல, இப்போது இலங்கையில் எங்கு வேண்டுமானாலும் அச்சமின்றிப் போய் வர முடிகிறது. இந்த அமைதி – பாதுகாப்பு மேலும் உறுதிப்பட வேண்டுமானால், கோத்தபய ஆட்சி வரவேண்டும் என்று பேசினார்.

இப்படிப்பட்ட முரளிதரனைத்தான் “அவர் ஒரு விளையாட்டு வீரர்; அரசியர் அல்ல என்பதை நாம் மறந்துவிடக்கூடாது” என்று வினோத் விளக்குகிறார். என்னே அவரது வாய்மை!

முரளிதரன் அரசியலற்ற வெறும் விளையாட்டு வீரரா? தமிழினத்திற்கு எதிரான அரசியல் பேசினால், அது அரசியல் அல்ல என்பது இந்து தமிழ் நாளேட்டின் நடுப்பக்கச் சிந்தனை நாயகர்களின் முடிவோ? மேற்கண்ட முரளிதரன் கூற்றுகள் அனைத்தும் அவர் கொடுத்த காணொலிக் காட்சிப் பதிவுகளாக உள்ளன.
“இலங்கை என்பது சிங்கள பெளத்த நாடு என்று சொன்னேன். அது உண்மை தானே” என்று ஒரு நேர்காணலில் கேட்கிறார் முரளிதரன். இலங்கை அரசமைப்புச் சட்டம் அனைவர்கும் ஒன்றுதான் அதில் பாகுபாடு இல்லை” என்கிறார் அதே காணொலியில்! இலங்கையில் ஈழத்தமிழர்களும் - அவர்கள் தாயகமும் - அவர்களின் இந்து மதமும் இல்லையா?

இந்துத் தமிழ்நாளேட்டின் சிந்தனை நீர்த் தேக்கங்களுக்கு (think tanks) மேற்கண்ட முரளிதரன் கூற்றுகள் எல்லாம் மட்டைப் பந்து விளையாட்டின் சில விதிமறைகளாகத் தெரிகின்றனவோ? சிங்களப் பேரினவாத அரசியலாகத் தெரியவில்லையோ?

தமிழின வெறுப்பு அரசியல்

விளையாட்டு வீரரிடம் போய் அரசியல் பண்ணலாமா என்று நம்மைப் பார்த்துக் கேட்கின்றனர், தமிழின வெறுப்பு தலைக்கேறிப்போன இந்த “நடுநிலை இதழாளர்கள்!”

நாங்கள் அரசியல் பண்ண வில்லை; அரசியல் அனாதையாகக் கிடக்கும் தமிழினத்தின் அவலக் குரலை வெளிப்படுதுகிறோம். மனித உரிமைகளின் மாண்பறிந்த பன்னாட்டுச் சமூகம் காட்டிய பாதையைப் பின்பற்றுகிறோம். தமிழினப் படுகொலைக் குற்றவாளிகளைப் பாதுகாக்கும் கேடயம்தான் முரளிதரன் என்கிறோம். அந்தப் பாத்திரத்தில் நடிக்க வேண்டாம் என்று நம் நடிகர் விசய் சேதுபதியைக் கேட்டுக் கொண்டோம்.

எங்கள் வேண்டுகோளை விசய் சேதுபதி ஏற்கவில்லை; எழுந்துள்ள எதிர்ப்பின் ஆழத்தையும் பரப்பையும் புரிந்து கொண்ட முரளிதரன், தன் படத்தில் விசய்சேதுபதி நடித்தால் படம் தோற்றுவிடும் என்று உணர்ந்து கொண்டார். அதை நாசுக்காக – வெளிப்படுத்தி, விசய்சேதுபதி வேண்டாம் என்று விலக்கிக் கடிதம் எழுதிவிட்டார். விலக்கப்பட்ட நபர் விசய்சேதுபதி; அவராக விலகிக் கொண்டது போல் சொற்களை அடுக்கியுள்ளார் சூழ்ச்சிக்கார வினோத்!

இரா.வினோத்தின் இந்து ஏட்டுக் கட்டுரையை வரிக்குவரி மறுக்கலாம். அவரின் அந்தரங்க சூழ்ச்சியை வெளிப்படுத்தலாம். கட்டுரை பெரிதாகிவிடும். எல்லாவற்றையும் வாசகர்களே புரிந்துகொள்வார்கள்!

திரும்பத் திரும்ப சாதியை இழுத்துப் போர்த்திக்கொள்கிறார் வினோத்! முரளிதரனைச் சாதிபார்த்துத் தமிழ் உணர்வாளர்களும் சனநாயகவாதிகளும் கண்டிப்பது போல் எழுதுகிறார். முரளிதரன் தமிழ்நாட்டு மரபுவழித் தமிழன் என்பது மட்டுமே என்னைப் போன்றவர்களுக்குத் தெரியும். அவர் என்ன சாதி என்று தெரியாது. அதைத் தெரிந்து கொள்ளவும் ஆர்வம் காட்டவில்லை. தமிழீழத் தேசியத் தலைவர் பிரபாகரன் சாதி வேறுபாடற்ற உயர் பண்புத்தமிழன்! அவர் தலைமையை ஏற்றுக்கொண்டது தமிழீழம்.

முரளிதரனை எதிர்ப்போர், வர்க்க வேறுபாடு பார்ப்பதாகச் சொல்கிறார் இரா.வினோத். கோடீசுவரராக உள்ள முரளிதரனின் இன்றைய வர்க்கம் என்ன?

அடுத்து மலையகத் தமிழர்களுக்கும் தமிழ்நாட்டில் உள்ள தமிழ்த்தேசியர்களுக்கும் இடையே சிண்டுமுடியும் வேலையில் ஈடுபட்டுள்ளார் வினோத்! மலையகத் தமிழர்கள் உரிமை காக்கவும் அவர்கள் மீது சிங்கள அரசு ஏவி விட்ட ஒடுக்குமுறையைக் கண்டிக்கவும் 1950,60களிலிருந்து இன்று வரை தமிழ்நாடு குரல் கொடுத்து வருவதும் போராடியதும் வினோத்துக்கு தெரியுமா? இவற்றை எல்லாம் இந்து தமிழ் நாளேட்டின் நடுப்பக்கச் சிந்தனை நாயகர்கள் விசாரித்து உண்மையறியவேண்டும்!

தமிழ்நாட்டில் முத்தையா முரளிதரனுக்கு எதிராகக் கிளம்பிய இன உணர்வுக் குரலை – சனநாயகக் குரலை தூண்டிவிட்டவர்கள் புலம் பெயர்ந்த ஈழத்தமிழர்கள் என்று அபாண்டமாக குற்றம்சாட்டுகிறார் வினோத். “இலங்கை அரசுக்கு ஆதரவானவர் (முரளிதரன்) என்று புலம் பெயர் ஈழத் தமிழ் குழுக்கள் ஒரு திரியை கொளுத்திவிட்டதும், தமிழ்நாட்டில் தமிழ் அடையாள அரசியல் பேசுவோர் குரல் பொங்க ஆரம்பித்தது,” என்று வினோத் நையாண்டி செய்கிறார். முரளிதரன் சிங்கள பேரினவாத அரசுக்கு ஆதரவானவர் என்பது கட்டுக்கதையா? அடுத்து, புலம்பெயர்ந்து வாழும் ஈழத்தமிழர்கள்தான் தமிழ்நாட்டுத் தமிழர்களைத் தூண்டிவிட்டார்கள் என்று இவர் கூறுவது நயவஞ்சகமல்லவா!

“இப்போது போராளிகள் வேஷம் கட்டுபவர்கள் தமிழ்நாட்டில் சாதியின் பெயரால் நடந்த கொலைகளைச் செய்தவர்கள் வீடுகளை முற்றுகையிட்டார்களா?” என்று கேட்கிறார். சாதிக் கொலைகளை தொடர்ந்து கண்டித்துவந்துள்ளோம். சாதி ஆதிக்கக் கொலைகாரர்களைச் சட்டப்படி தண்டிக்க வேண்டும் எனப் போரடி வந்திருக்கிறோம், அது வேறு செய்தி. ஆனால் இனப்படுகொலை ஆதரவாளரை எதிர்த்துக் குரல் கொடுக்கும் தமிழ் இன உணர்வாளர்களைப் பார்த்து சாதி ஆதிக்ககாரர்கள் வீட்டை முற்றுகையிட்டீர்களா என்று கேட்பது என்ன வகையான சனநாயகம், என்ன வகையான தருக்கம்?

தூத்துக்குடியில் ஸ்டெர்லைட் ஆலையை மூட வலியுறுத்திப் போராடி துப்பாக்கிச் சூட்டில் 13 பேர் பலியானர்கள். அந்தத் துப்பாக்கிச் சூட்டைக் கண்டித்துத் தமிழ்நாட்டுத் தமிழர்கள் போராடினால் சாதி ஆதிக்ககாரர்கள் கொலை செய்த போது அவர்கள் வீடுகளை நீங்கள் முற்றுகையிட்டீர்களா என்று கேட்பாரோ வினோத்? எவ்வளவு வன்மமாக, சூழ்ச்சியாக, மக்களைத் திசைதிருப்பும் உள்நோக்கத்தோடு இந்த வினாவை எழுப்பியுள்ளார்! இச்சூழ்ச்சியை சனநாயக உணர்வுள்ள அனைவரும் புரிந்துகொள்வர்.

இலங்கையில் ஈழத்தமிழர்கள் சிங்கள இனவெறியர்களால் கொத்துக் கொத்தாகக் கொலை செய்யப்பட்ட ஆண்டுகளில் முத்தையா முரளிதரன் இலங்கை அணியில் மட்டைப் பந்து விளையாடி விருதுகள் பெற்றுவந்தார். என்னை போன்றவர்கள் அப்போது, நம் தமிழ்ப் பிள்ளை விருதுகள் வாங்கிவருகிறது என்று பெருமையாகத்தான் கருதினோம். அப்பிள்ளை என்ன சாதி என்றெல்லாம் பார்க்கவில்லை. அதே பிள்ளை பிற்காலத்தில் தமிழினப்படுகொலையை ஆதரித்தும், கோத்தபய இராசபட்சே குடும்பத்திற்கு வாக்கு கேட்டும் வெளிபட்ட போதுதான் முத்தையா முரளிதரனின் இனத்துரோகம் என்னைப் போன்றவர்களுக்குத் தெரியவந்தது.

முத்தையா முரளிதரன் வேடத்தில் விசய் சேதுபதி நடிக்கக் கூடாது என்று வலைத்தளங்களில் விமர்சனம் செய்தவர்களை “சோஷியல் மீடியா மாஃபியா” என்று தரக்குறைவாகக் தாக்கியுள்ளார் வினோத். இது தான் சனநாயகமா? இது கண்ணியமான விமர்சனமா?


தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Monday, October 19, 2020

விலகவில்லை, விலக்கப்பட்டார் விசய்சேதுபதி! - பெ. மணியரசன் அறிக்கை!



விலகவில்லை, விலக்கப்பட்டார்
விசய்சேதுபதி!

தமிழ்த்தேசியப் பேரியக்கத் தலைவர்
பெ. மணியரசன் அறிக்கை!


மட்டைப் பந்து வீரர் முத்தையா முரளிதரன் நடிகர் விசய் சேதுபதிக்கு விடுத்த வேண்டுகோளில், “என்னுடைய வாழ்க்கை வரலாற்றுப் படத்தில் நடிப்பதால் உங்களுக்குப் பல சிக்கல்கள் உருவாகியுள்ளன; அதனால் உங்களுக்கு சங்கடங்கள் ஏற்பட வேண்டாம். வேறு நடிகரை வைத்து என் வரலாற்றுப் படத்தை எடுத்து கொள்கிறோம்” என்று கூறியுள்ளார்!

இதன் காரணமாகத்தான் விசய் சேதுபதி அப்படத்தில் நடிப்பதிலிருந்து விலகி கொள்வதுப் போன்ற பொருள் தரும் “நன்றி, வணக்கம்” தெரிவித்துள்ளார்.

தமிழ்நாட்டில் தமிழ்த்தேசிய உணர்வாளர்களும் தமிழ்த் திரைத்துறை உலகின் மதிப்பு மிக்க மூத்தவராக விளங்கிக் கொண்டிருக்கும் இயக்குநர் பாரதிராசா, திரைத்துறை அமைச்சர் கடம்பூர் ராசு அவர்கள் போன்றோரும் கேட்டுக் கொண்டும் இனத் துரோகி முத்தையா முரளிதரன் வேடத்தில் நடிப்பதை கைவிடாத விசய் சேதுபதி முத்தையா முரளிதரனே விசய் சேதுபதி வேண்டாம் என்று சொன்ன பிறகு விலகிக் கொள்வதில் சிறப்பு ஒன்றும் இல்லை.


தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


 


 


Saturday, October 17, 2020

முத்தையா முரளிதரன் இனத்துரோகி அவர் அறிக்கையே அதற்குச் சான்று! - ஐயா பெ. மணியரசன் அறிக்கை!


முத்தையா முரளிதரன் இனத்துரோகி
அவர் அறிக்கையே அதற்குச் சான்று!

தமிழ்த்தேசியப் பேரியக்கத் தலைவர்
ஐயா பெ. மணியரசன் அறிக்கை!

இலங்கையின் மட்டைப்பந்து வீரர் முத்தையா முரளிதரன் தன்னிலை விளக்க அறிக்கை ஒன்று வெளியிட்டுள்ளார். அதில், “அப்பாவி மக்கள் படுகொலையை நான் ஆதரித்ததும் இல்லை. ஒருபோதும் ஆதரிக்கவும் மாட்டேன்” என்று கூறியுள்ளார்.
2009-இல் அப்பாவித் தமிழ் மக்களை பல்லாயிரக்கணக்கில் அன்றாடம் இராசபட்சேயின் சிங்களப் படை கொன்று குவித்ததை முத்தையா முரளிதரன் கண்டித்தாரா? ஏன் கண்டிக்கவில்லை? இப்பொழுது வெளியிட்ட அறிக்கையில்கூட அப்பாவி மக்களைக் கொன்றதைக் கண்டிக்கிறேன் என்று கூறவில்லையே, ஏன்?
அப்போது ஐ.நா.வின் பொதுச்செயலாளராக இருந்த பான்கிமூன் அமைத்த தாருஸ்மான் ஆய்வுக்குழு, 2009இல் அப்பாவித் தமிழர்களை சிங்களப் படையினர் படுகொலை செய்ததை “மனித குலத்திற்கு எதிரான குற்றம்” என்று வரையறுத்து, பன்னாட்டுப் புலனாய்வுக் குழு விசாரித்துக் குற்றவாளிகளைத் தண்டிக்க வேண்டும் என்று கூறியது.
இலங்கையில் அப்பாவிப் பொது மக்களுக்கு எதிராக நடந்த உயிர்க்கொலை மற்றும் குற்றங்களை விசாரிக்க பன்னாட்டு வல்லுநர்களையும் இணைத்துக் கொண்ட புலனாய்வுக் குழுவை இலங்கை அரசு அமைக்க வேண்டும் என்று ஐ.நா. மனித உரிமை மன்றம் 2015இல் தீர்மானம் நிறைவேற்றியது. இந்திய அரசும் ஆதரித்து வாக்களித்தது.
இலங்கை அரசு தமிழர்களைக் கொன்று குவித்த போர்க் குற்றங்களை, உலகளாவிய பொது அமைப்புகள் கண்டித்ததுடன், புலனாய்வு செய்து குற்றவாளிகளைத் தண்டிக்க வேண்டும் என்று கூறியள்ள நிலையில், முத்தையா முரளிதரன் இன்று வரை அந்த இனப்படுகொலையைக் கண்டிக்கவில்லை. அவர் விடுத்துள்ள அறிக்கையில் கூட கண்டிக்கவில்லை.
“பல்லாயிரக்கணக்கான அப்பாவி மக்களைக் கொன்று குவித்த போர் 2009இல் முடிவடைந்ததால் – அந்த ஆண்டு எனக்கு மகிழ்ச்சியான நாள் என்று சொன்னேன்” என விளக்கம் கொடுத்துள்ளார் முரளிதரன். தாய்த்தமிழ் உறவுகள் – முதியோர், பெண்கள், குழந்தைகள் எனப் பல்லாயிரக் கணக்கானோரை (ஒரு இலட்சத்திற்கும் மேற்பட்டோரை) சிங்களப் படைக் கொன்றழித்ததை – துக்க நாளாக முரளிதரனால் உணர முடியவில்லை. மகிழ்ச்சியான நாளாகத்தான் உணர முடிகிறது.
முரளிதரன் பிறந்த தமிழ் இனத்தைச் சேர்ந்தவர்கள் கட்சி, சாதி, மதம், நாடு அனைத்தையும் கடந்து உலகம் முழுவதும் துக்கம் கடைபிடித்தார்கள்! இன்றும் அந்தத் துக்கத்தைச் சுமந்து கொண்டுள்ளார்கள். ஆனால், இப்பொழுது வெளியிட்ட விளக்க அறிக்கையில் கூட முரளிதரன் மேற்கண்ட தமிழினப் படுகொலைக்காகத் துயரம் தெரிவிக்கவில்லை என்பது கவனிக்கத்தக்கது.
“இலங்கை அணியில் இடம் பெற்று மட்டைப்பந்து விளையாடியதால் என் மீது தவறான பார்வை கொண்டுள்ளார்கள்” என்று கூறுகிறார் முரளிதரன். அது உண்மையல்ல; இவர் இனப்படுகொலை பற்றி கூறிய கருத்துக்களுக்காகவும் இலங்கையை சிங்களத் தீவு என்று சொன்னதற்காகவும், இராசபட்சேக்களைப் புகழ்ந்து கொண்டு இருப்பதற்காகவும்தான் இவரை எதிர்க்கிறோம்.
இப்படிப்பட்ட வன்னெஞ்சம் கொண்ட தமிழினத் துரோக முத்தையா முரளிதரன் வேடத்தில் நடிகர் விசய் சேதுபதி நடிக்கக்கூடாது என்ற எண்ணமே முரளிதரன் விளக்க அறிக்கைக்குப் பிறகு தமிழர்கள் நெஞ்சில் கூடுதலாக உறுதிப்படுகிறது.
மேலும் தமிழ்நாடு திரைப்படத்துறை அமைச்சர் திரு. கடம்பூர் இராசு அவர்களும் விசய் சேதுபதி முரளிதரன் வேடத்தில் நடிக்க வேண்டியதில்லை என்று வேண்டுகோள் வைத்தார்.
எனவே, முரளிதரன் வேடத்தில் அப்படத்தில் நடிக்கவில்லை என்று விசய் சேதுபதி வெளிப்படையாக அறிக்கை விட வேண்டும் என்று கேட்டுக் கொள்கிறேன்.

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


 


Monday, October 12, 2020

"விஜய் சேதுபதியை புறக்கணியுங்கள்" - 'டென்ட்கொட்டாய்' ஊடகத்திற்கு.. ஐயா பெ. மணியரசன் நேர்காணல்!

"விஜய் சேதுபதியை புறக்கணியுங்கள்"


'டென்ட்கொட்டாய்' ஊடகத்திற்கு..


தமிழ்த்தேசியப் பேரியக்கத் தலைவர் ஐயா பெ. மணியரசன் நேர்காணல்!



கண்ணோட்டம் வலையொளியில்..!!!

Sunday, October 11, 2020

கவிபாஸ்கர் தந்தையார் மறைவுக்கு - ஐயா பெ. மணியரசன் இரங்கல்!



கவிபாஸ்கர் தந்தையார் மறைவுக்கு

தமிழ்த்தேசியப் பேரியக்கத் தலைவர்
ஐயா பெ. மணியரசன் இரங்கல்!

தமிழ்க் கலை இலக்கியப் பேரவைத் தலைவரும் திரைப்படப் பாடலாசிரியருமான பாவலர் கவிபாஸ்கர் அவர்களின் தந்தையார். ஐயா கு. சுப்பிரமணியன் அவர்கள் (அகவை 72) உடல் நலம் பாதிக்கப்பட்டு வீட்டிலிருந்தவாறே சிகிச்சை பெற்று வந்தார்.
அவர் 11.10.2020 ஞாயிற்றுக்கிழமை தொடங்கும் நள்ளிரவு 1.30 மணிக்கு தஞ்சை மாவட்டம் நெய்வாசல் கிராமத்தில் தமது இல்லத்தில் காலமானார்.
திரு. சுப்பிரமணியன் – திருவாட்டி மயிலம்பாள் இணையர் தங்கள் மகன்கள் இரவீந்திரன், கவிபாஸ்கர் மகள் பூமாது ஆகியோரை நன்கு படிக்க வைத்தனர். பண்பான முறையில் வளர்த்தனர்.
ஐயா சுப்ரமணியன் அவர்கள் மறைவிற்குத் துயரத்தையும் ஆழ்ந்த இரங்கலையும் தெரிவித்து கொள்கிறேன். துயருற்றிருக்கும் இல்லத்தார் அனைவருக்கும் ஆறுதல் தெரிவித்துக் கொள்கிறேன்.
குறிப்பு: இறுதி ஊர்வலம் இன்று 11.10.2020 மாலை 5 மணிக்கு அவர்கள் இல்லத்திலிருந்து புறப்படும்.

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


 


Saturday, October 10, 2020

அண்ணா பல்கலையை இந்திய அரசிடம் ஒப்படைக்கும் துணைவேந்தர் முயற்சியைத் தடுக்க வேண்டும்! தமிழ்நாடு முதல்வருக்கு ஐயா பெ. மணியரசன் வேண்டுகோள்!



அண்ணா பல்கலையை இந்திய அரசிடம்
ஒப்படைக்கும் துணைவேந்தர்
முயற்சியைத் தடுக்க வேண்டும்!


தமிழ்நாடு முதல்வருக்கு
தமிழ்த்தேசியப் பேரியக்கத் தலைவர்
ஐயா பெ. மணியரசன் வேண்டுகோள்!



தமிழ்நாட்டு அரசின் சென்னை அண்ணா பல்கலைக் கழகத்தை இந்திய அரசு தன் வசப்படுத்திக் கொள்ள தொடர்ந்து முயன்று வருகிறது. தமிழ்நாடு அரசு அதற்கு ஒப்புதல் தெரிவிக்காத நிலையைில், இந்திய அரசின் கல்வி அமைச்சகம் புதுஉத்தி ஒன்றைக் கையாள்கிறது.

இந்தியாவின் உயராய்வு நிறுவனமாக (Institute of Eminence) அண்ணா பல்கலைக்கழகத்தை இந்திய அரசின் கல்வி அமைச்சகம் ஏற்றுக் கொண்டு அதில் சிறப்புத் திட்டங்களைச் செயல்படுத்துவது என்பதே அத்திட்டம்.

அவ்வாறு அண்ணா பல்கலையை ஏற்றுக் கொள்வதற்கு நடுவண் கல்வி அமைச்சகத்திற்கு தமிழ்நாடு அரசு 1,500 கோடி ரூபாய் செலுத்த வேண்டும் என்றும் அத்தொகையில் 1,000 கோடி ரூபாயை உடனடியாக செலுத்த வேண்டும் என்றும் இந்திய அரசு கோருகிறது.

தனது உரிமையைப் பறிக்கும் இத்திட்டத்தைத் தமிழ்நாடு அரசு ஏற்கவில்லை. ஆனால், அதை வெளிப்படையாகச் சொல்லாமல் வேறு காரணங்களைத் தமிழ்நாடு அரசு கூறி வருகிறது. அண்ணா பொறியியல் பல்கலைக்கழகம் இந்திய நாட்டில் உள்ள முதல் தரமான பல்கலைகளில் ஒன்று. இது இந்திய அரசு வசம் போனால், மாணவர் சேர்க்கை, ஆசிரியர்கள் - அலுவலர்கள் சேர்க்கை ஆகியவற்றில் கடைபிடிக்கப்படும் 69 விழுக்காடு இட ஒதுக்கீடு பறிபோய்விடும். இதை ஒரு காரணமாகத் தமிழ்நாடு அரசு கூறி வருகிறது. இது ஞாயமான காரணமே!

அண்ணா பல்கலையை இந்திய அரசின் கல்வித் துறை வசம் ஒப்படைப்பது தொடர்பாக பரிந்துரை வழங்குவதற்காக தமிழ்நாட்டின் ஐந்து அமைச்சர்களைக் கொண்ட ஆய்வுக் குழுவை தமிழ்நாடு முதலமைச்சர் அமைத்துள்ளார். அக்குழு இன்னும் பரிந்துரை வழங்கவில்லை.

ஆனால், அதற்குள் அண்ணா பல்கலைக்கழத்தின் துணைவேந்தர் சூரப்பா, இந்திய அரசின் கல்வித்துறைக்குத் தன்னிச்சையாக ஓர் உறுதிமொழி விண்ணப்பம் அனுப்பியுள்ளார். அண்ணா பல்கலைக்கழகத்தை உயராய்வுக் கல்வி நிறுவனமாக உடனே ஏற்றுக் கொள்ளுமாறும், இதற்காக செலுத்த வேண்டிய 1,570 கோடி ரூபாயை அண்ணா பல்கலையே செலுத்தும் என்றும், தமிழ்நாடு அரசிடம் அத்தொகையைக் கேட்க வேண்டியதில்லை என்றும் அக்கடிதத்தில் அவர் குறிப்பிட்டுள்ளார்.

அண்ணா பல்கலைக்கழகம் மாணவர்களிடம் வசூலிக்கும் தேர்வுக் கட்டணம், கல்விக் கட்டணம், அதன் கீழ் உள்ள கல்லூரிகள் கட்டும் இணைப்புக் கட்டணம் ஆகியவற்றிலிருந்து ஓர் ஆண்டுக்கு 314 கோடி ரூபாய் என ஐந்து ஆண்டுகளில் 1,570 கோடி ரூபாய் செலுத்தி விடுவதாக உறுதி கொடுத்துள்ளார் சூரப்பா!

அத்துடன் சூரப்பா தமது இந்த ஏற்பாட்டைத் தானே புகழ்ந்து கொண்டு ஏடுகளுக்கு செய்தியும் கொடுத்துள்ளார். தமது இந்த ஏற்பாட்டால் தமிழர்கள் பெருமகிழ்ச்சி அடைவார்கள் என்றும் கூறியுள்ளார்.

சூரப்பாவின் இந்தத் தன் ஆணவத் தலையீட்டைக் கண்டு விழிப்புணர்வு பெற்றுள்ள தமிழர்கள் அதிர்ச்சியும் வேதனையும் அடைகிறார்கள். தமிழ்நாட்டு உரிமைகளை அன்றாடம் பறித்து வரும் மோடி அரசுக்குக் கையாள் வேலை பார்த்து அண்ணா பல்கலைக்கழகத்தை அதன் அதிகாரத்திற்குக் கைமாற்றிவிடும் சூரப்பாவின் சட்டவிரோதச் செயலை வன்மையாகக் கண்டிக்கிறேன்.

இவ்வாறெல்லாம் தமிழ்நாடு அரசுக்கு எதிராக உள்ளிருந்து கொண்டே குழி பறிக்கத் தகுதியானவர் என்பதை முன்னறிந்துதான், தமிழ்நாடு அரசுடன் கலந்தாய்வு செய்யாமல் வழக்கத்திற்கு மாறாக தன்னிச்சையாக கர்நாடகத்தைச் சேர்ந்த சூரப்பாவை அண்ணா பல்கலைக்கழகத்திற்குத் துணை வேந்தர் ஆக்கினார் தமிழ்நாடு ஆளுநர் பன்வாரிலால் புரோகித். ஆளுநரின் திட்டத்தை அரங்கேற்றிக் கொண்டுள்ளார் சூரப்பா!

தமிழ்நாடு முதலமைச்சர், சூரப்பாவின் இந்தத் தன்முனைப்பு நடவடிக்கையை வெளிப்படை யாகக் கண்டிக்க வேண்டும். சூரப்பாவின் மேற்படி நடவடிக்கையைத் தடுத்து நிறுத்துவதுடன் அவர்மீது சட்ட நடவடிக்கை எடுக்கவும் களமிறங்க வேண்டும் என்று தமிழ்த்தேசியப் பேரியக்கம் சார்பில் கேட்டுக் கொள்கிறேன்.


தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

போராட்டங்கள்

செய்திகள்

 
Copyright © 2013 தமிழ்த்தேசியப் பேரியக்கம்
Design by FBTemplates | BTT