உடனடிச்செய்திகள்

Tuesday, October 15, 2019

எரியும் வினாக்கள் எதிர்கொள்ளும் விடைகள் பா.ச.க. செய்தித்தொடர்பாளராக அமைச்சர் பாண்டியராசன்! பெ. மணியரசன்



எரியும் வினாக்கள்
எதிர்கொள்ளும் விடைகள் :

பா.ச.க. செய்தித்தொடர்பாளராக
அமைச்சர் பாண்டியராசன்!


ஐயா பெ. மணியரசன்
தலைவர் - தமிழ்த்தேசியப் பேரியக்கம்.

வினா : நரேந்திரமோடியும் சீனக்குடியரசுத் தலைவர் சி சின்பிங்கும் மாமல்லபுரத்தில் சந்தித்துப் பேசிய நிகழ்வு, தமிழ்நாட்டில் கூறப்பட்ட மோடி எதிர்ப்புக் கதைகளைத் துடைத்தெறிந்துவிட்டது என்று தமிழ்த்துறை அமைச்சர் கே. பாண்டியராசன் கூறுகிறார். அது உண்மையா?


“இந்து” ஆங்கில நாளேட்டில் இன்று (14.10.2019) வந்துள்ள அமைச்சர் கே. பாண்டியராசன் செவ்வி அவ்வாறுதான் கூறுகிறது. இவ்வளவு ஆவேசமாக அ.தி.மு.க. அரசின் தமிழ்த்துறை அமைச்சர் தமிழர்களின் மோடி எதிர்ப்புணர்வைச் சாடுவது ஏன்? தமிழ்நாட்டு பா.ச.க. தலைவர்களுடன் போட்டி போட்டு மோடி – அமித்சா கவனத்தை ஈர்க்கிறாரோ?


அண்ணா பொறியியல் பல்கலைக்கழகத்தில் “பகவத் கீதை”யைப் பாடமாக வைத்தது சரியா என்று “இந்து” செய்தியாளர் டென்னிஸ் எஸ். சேசுதாசன் கேட்டதற்கு, “அரிஸ்டாட்டில், தாவோ, கன்பூசியஸ் ஆகியோரின் தத்துவங்கள் போன்றதுதான் பகவத் கீதை! இதைப் பாடமாக வைத்ததை ஏன் எதிர்க்க வேண்டும்? பகவத் கீதையை எதிர்ப்பது முழுக்க முழுக்க அரசியல்! திருக்குறளையும் பாடத்திட்டத்தில் சேர்க்குமாறு உயர்கல்வித் துறை அமைச்சரிடம் பரிந்துரைத்துள்ளேன்” என்றார்.


முந்திக் கொண்டு பகவத் கீதையைப் பொறியியல் பல்கலையில் பாடமாக்கத் துணை நின்ற தமிழ்த்துறை அமைச்சர் பாண்டியராசன் – தமிழுக்கும் பிச்சை போடுகிறேன் என்பதுபோல் திருக்குறளை வைக்கவும் பரிந்துரைத்திருக்கிறேன் என்கிறார்.


மதுரையில் தமிழன்னை சிலையை சமற்கிருத மாதா வடிவில் செய்ய திட்டம் அறிவித்தது, +2 ஆங்கில மொழிப் பாட நூலில் தமிழ்மொழி கி.மு. மூன்றாம் நூற்றாண்டிலும், சமற்கிருதம் கி.மு. 2000-லும் தோன்றியவை என்றும் சங்க காலத்திலேயே தமிழ்ப் பண்பாட்டில் வேத பிராமண இந்துப் பண்பாடு கலந்துவிட்டது என்றும் கூறும் பாடத்தைச் சேர்த்தது போன்றவற்றின் பின்னணியில் பாண்டியராசன் இருக்கிறாரோ என்ற ஐயத்தை வலுப்படுத்துகிறது.


மேற்படி செய்தியாளர் “மோடியே திரும்பிப் போங்கள்” என்ற முழக்கம் (#GoBackModi) சமூக வலைத்தளங்களில் முன்னோடியாய் வந்திருப்பது எப்படி எனக் கேட்டதற்கு, “இதெல்லாம் பாகிஸ்தான் சதி வேலை” என்று பா.ச.க. பாணியில் விடையளித்துள்ளார்.


பாண்டியராசனின் அரசியல் தொடக்கம் ஆர்.எஸ்.எஸ். மற்றும் பா.ச.க. என்கின்றனர் அவரை அறிந்தோர். அ.தி.மு.க. தலைமைதான் இதுபற்றியெல்லாம் சிந்திக்க வேண்டும்.


தலைமைச் செயலகம்,
தமிழ்த்தேசியப் பேரியக்கம்


பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Saturday, October 12, 2019

“மேக்கேத்தாட்டை தடுப்போம்! காவிரியைக் காப்போம்!” - 10 நாள் மக்கள் எழுச்சிப் பரப்புரைப் பயணம்!


“மேக்கேத்தாட்டை தடுப்போம்! காவிரியைக் காப்போம்!” காவிரி உரிமை மீட்புக் குழு - 10 நாள் மக்கள் எழுச்சிப் பரப்புரைப் பயணம்! தொடங்குமிடம் – பூம்புகார், நிறைவடையும் இடம் – மேட்டூர் அணை

இன்று (12.10.2019) காவிரி உரிமை மீட்புக் குழுக் கூட்டம், தஞ்சையில் ஒருங்கிணைப்பாளர் பெ. மணியரசன் தலைமையில் நடைபெற்றது. இதில், காவிரி உரிமை மீட்புக் குழுவின் பொருளாளர் திரு. த. மணிமொழியன், விடுதலைத் தமிழ்ப்புலிகள் கட்சித் தலைவர் திரு. குடந்தை அரசன், தமிழர் தேசிய முன்னணி பொதுச்செயலாளர் மருத்துவர் இலரா. பாரதிச்செல்வன், இந்திய சனநாயகக் கட்சி தஞ்சை மாவட்டச் செயலாளர் திரு. சிமியோன் சேவியர்ராசு, தமிழக விவசாயிகள் சங்கத் தஞ்சை மாவட்டத் தலைவா திரு. க. செகதீசன், மனித நேய சனநாயகக் கட்சி பொறுப்பாளர் திரு. அகமது கபீர், தமிழ்த்தேசியப் பேரியக்கத் தஞ்சை மாவட்டச் செயலாளர் தோழர் நா. வைகறை, தலைமைச் செயற்குழு தோழர் பழ. இராசேந்திரன், இந்திய யூனியன் முசுலீம் லீக் திரு. செய்னுலாபுதீன், தமிழ்த்தேசியப் பாதுகாப்புக் கழக மாநிலத் துணைச் செயலாளர் திரு. சி. குணசேகரன், தமிழர் தேசிய முன்னணி திருவாரூர் மாவட்டச் செயலாளர் திரு. ச. கலைச்செல்வம், காவிரி உரிமை மீட்புக் குழு முன்னணிச் செயல்வீரர்கள் வெள்ளாம் பெரம்பூர் திரு. து. இரமேசு, அல்லூர் திரு. கரிகாலன், திரு. தனசேகர், திரு. பார்த்திபன், திருவாரூர் திரு. சூனா செந்தில், விடுதலைத் தமிழ்ப்புலிகள் தஞ்சை மாவட்டச் செயலாளர் திரு. வெற்றிச்செல்வன் உள்ளிட்டோர் பங்கேற்றனர். அதில் பின்வரும் தீர்மானங்கள் நிறைவேற்றப் பட்டன.

தீர்மானம் – 1 : “மேக்கேத்தாட்டை தடுப்போம்! காவிரியைக் காப்போம்!” 10 நாள் மக்கள் எழுச்சிப் பயணம்

தமிழ்நாட்டுக்கு வரும் காவிரியின் குறுக்கே கர்நாடகம் திட்டமிட்டுள்ள மேக்கேத்தாட்டு அணையைத் தடுக்க தமிழ் மக்களிடம் எழுச்சியை உருவாக்கும் பொருட்டு - “மேக்கேத்தாட்டை தடுப்போம்! காவிரியைக் காப்போம்!” என்ற தலைப்பில், காவிரி உரிமை மீட்புக் குழு சார்பில் வரும் 2019 நவம்பர் 11ஆம் நாள் தொடங்கி 20ஆம் நாள் வரை – பத்து நாட்கள் மக்கள் எழுச்சிப் பரப்புரைப் பயணம் நடத்துவதென காவிரி உரிமை மீட்புக் குழு தீர்மானித்துள்ளது.

காவிரி கடலில் கலக்கும் நாகை மாவட்டம் – பூம்புகாரில் தொடங்கி, பல்வேறு கிராமங்கள் மற்றும் நகரங்கள் வழியாகப் பயணித்து, சேலம் மாவட்டம் - மேட்டூர் அணையில் இப்பரப்புரைப் பயணம் நிறைவடைகிறது.

இப்பரப்புரைப் பயணத்தின்போது, வழியெங்கும் உள்ள நகரங்கள் மற்றும் கிராமங்களில் வாழும் தமிழ் மக்களும், உழவர் பெருமக்களும் காவிரி உரிமை மீட்புக் குழுவின் இந்த எழுச்சிப் பரப்புரைக்குப் பேராதரவு தந்து பங்கேற்குமாறு காவிரி உரிமை மீட்புக் குழு அன்புரிமையுடன் அழைக்கிறது!

முதல்வருக்கு வேண்டுகோள் - "மேக்கேத்தாட்டு அணையைத் தடுக்க தமிழ்நாடு அரசு மக்கள் எழுச்சியை உருவாக்க வேண்டும்!"

காவிரித் தீர்ப்பாயத்தின் இடைக்காலத் தீர்ப்பையும் இறுதித் தீர்ப்பையும் செயல்படுத்த மறுத்ததைப் போலவே உச்ச நீதிமன்றத் தீர்ப்பையும் (16.02.2018) செயல்படுத்த மறுக்கிறது கர்நாடக அரசு. அதற்கான ஏற்பாடுதான் மேக்கேதாட்டு மிச்ச நீர் அணை!

மிச்ச நீர் என்பது கர்நாடகத்தின் கிருஷ்ணராஜ சாகர், கபினி, அர்க்காவதி அணைகள் நிரம்பி வெளியேறும் வெள்ள நீர் ஆகும். இந்த வெள்ள நீர் இப்போது நேரடியாக மேட்டூர் அணைக்கு வந்து விடுகிறது. இதைத் தடுத்து முழுமையாகக் கர்நாடகம் புதிய பாசனத்திற்கும் குடிநீர், தொழிற்சாலைத் தேவைகளுக்கும் பயன்படுத்திக் கொள்ளும் திட்டம்தான் மேக்கேதாட்டு மிச்ச நீர் திட்டம்!

கிருஷ்ணராஜ சாகர், கபினி, அர்க்காவதி அணைகளின் வெள்ள நீர் வந்து கலக்குமிடம் கர்நாடகத்தின் ராம் நகர் மாவட்டத்தின் கனகபுரம் வட்டத்தின் சங்கமம் என்ற இடமாகும். அதிலிருந்து 3 கிலோ மீட்டர் தொலைவில் உள்ளது மேக்கேதாட்டு (ஆடு தாண்டு காவிரி). இரு பக்கமும் 1,000 அடி உயர மலைகளுக்குக் கீழே காவிரி ஓடுகிறது. அந்த இடத்திலிருந்து தமிழ்நாட்டு எல்லை 3.9 கிலோ மீட்டர்தான்!

இந்த மேக்கேதாட்டு அணையின் திட்டமிட்ட தண்ணீர் கொள்ளளவு 67.16 ஆ.மி.க. (T.M.C.) இப்போது கர்நாடகத்தில் உள்ள கிருஷ்ணராஜ சாகர், ஏமாவதி, கபினி, ஏரங்கி, அர்க்காவதி அணைகளின் மொத்தக் கொள்ளளவு நீர் 114 ஆ.மி.க. (T.M.C.). ஆனால் இவற்றிலிருந்து வெளியேறும் மிச்ச நீரைத் தேக்கும் மேக்கேதாட்டு அணையின் கொள்ளளவோ 67.16 ஆ.மி.க.!

தமிழ்நாட்டிற்குரிய தண்ணீரை தட்டுப்பாடில்லாமல், மாதாமாதம் திறந்துவிடத்தான் மேக்கேத் தாட்டு அணை கட்டுகிறோம் என்று கர்நாடகம் கூறுவது நூறு விழுக்காடுப் பொய்! கடந்த காலங்களில் இப்படிச் சொல்லித்தான் ஏமாவதி, ஏரங்கி, கபினி, அர்க்காவதி, சுவர்ணவதி அணைகளைக் கட்டி கர்நாடக அரசு தமிழ்நாட்டுத் தண்ணீரை அபகரித்துக் கொண்டது. மேக்கேத்தாட்டு அணை மட்டும் கட்டப்பட்டுவிட்டால், எப்படிப்பட்ட பெரிய வெள்ளமானாலும் ஒரு சொட்டுத் தண்ணீர் கூட மேட்டூருக்கு வராது.

மிகை வெள்ளத்திலிருந்து தனது அணைகளைப் பாதுகாத்துக் கொள்வதற்காக – எப்பொழுதாவது வெளியேற்றும் நீர் கூட தமிழ்நாட்டின் மேட்டூர் அணைக்குப் போய் விடக்கூடாது என்பதற்காகவே கட்டப்படும் தடுப்பு நீர்த்தேக்கம்தான் மேக்கேதாட்டு அணை!

உச்ச நீதிமன்றம் 16.2.2018 அன்று வழங்கிய தீர்ப்பு 15 ஆண்டுகளுக்குள் மாற்றப்பட முடியாது. அத்தீர்ப்பின் பிரிவு XI பின்வருமாறு கூறுகிறது :

“கீழ்ப்பாசன மாநிலங்களுக்கு ஒதுக்கப்பட்டுள்ள தண்ணீர் வரத்தைப் பாதிக்கும் வகையில் மேல் பாசன மாநிலம் எந்த நடவடிக்கையும் எடுக்கக் கூடாது. ஆனால், தொடர்புடைய மாநிலங்கள், தங்களுக்குள் கலந்து பேசி, ஒத்த கருத்து அடிப்படையில் தண்ணீர் திறந்து விடும் முறைகளில் மாற்றம் செய்து கொள்ளலாம். இவ்வாறு மாற்றிக் கொள்ள காவிரி ஒழுங்காற்றுக் குழுவின் அனுமதி வேண்டும்”.

இதன் பொருள், புதிய நீர்த்தேக்கம் கட்டிக் கொள்ளலாம் என்பதல்ல! மாதவாரியாகத் திறந்து விட வேண்டிய தண்ணீரின் அளவை தங்களுக்குள் கலந்து பேசி ஒரு மாதத்தில் கூட்டியோ, குறைத்தோ திறந்துவிட்டு அடுத்த மாதங்களில் அதை ஈடுகட்டிச் சரி செய்து கொள்ளலாம் என்பதே இதன் பொருள்.

உச்ச நீதிமன்றத் தீர்ப்பின் விதி XVIII பின்வருமாறு கூறுகிறது :
“தீர்ப்பாயத் தீர்ப்பிற்கு முரண்பாடு இல்லாமல், ஒரு மாநிலம் தனது எல்லைக்குள் தண்ணீர்ப் பயன்பாட்டை ஒழுங்குபடுத்திக் கொள்வதற்கும், அனுபவிப்பதற்கும் உரிமை உண்டு”.

இதன் பொருள் என்ன? உச்ச நீதிமன்றம் கர்நாடகத்திற்கு ஒதுக்கியுள்ள 284.75 ஆ.மி.க. தண்ணீரை – தமிழ்நாட்டிற்கு ஒதுக்கியுள்ள 177.25 ஆ.மி.க. தண்ணீரை, அந்தந்த மாநிலமும் தனது வசதிற்கேற்ப, தேவைக்கேற்ப பயன்படுத்திக் கொள்ளலாம் என்பதுதான் இதன் பொருள். கர்நாடகம் தனக்கு ஒதுக்கப்பட்டுள்ள 284.75 ஆ.மி.க. தண்ணீரை எந்தெந்த பகுதிகளுக்குப் பயன்படுத்திக் கொள்ளலாம் என இதன்படி முடிவு செய்து கொள்ளலாம்! ஆனால், கர்நாடகம் தமிழ்நாட்டின் எல்லையோரத்தில் 67.16 ஆ.மி.க. கொள்ளளவில் புதிய நீர்த்தேக்கம் கட்டிக் கொள்ளலாம் என்பது இதன் பொருள் அல்ல.

மேக்கேதாட்டு அணைக்கு அனுமதி கோரி, இந்திய அரசின் சுற்றுச்சூழல், வனத்துறை அமைச்சகத்திற்கு அனுப்பியுள்ள மனுவில் கர்நாடக அரசு மேற்கண்ட XVIII ஆவது விதியைத் தவறாக மேற்கோள் காட்டி வாதம் செய்துள்ளது.

கர்நாடகத்திடமும், இந்திய அரசிடமும் இந்த சட்ட வாதங்களைப் பேசிப் பயனில்லை என்பதுதான் தமிழ்நாட்டின் கடந்தகாலப் பட்டறிவு! ஏமாவதி, ஏரங்கி, கபினி அணைகளைத் தமிழ்நாட்டின் ஒப்புதல் இல்லாமல் கட்டக் கூடாது என்று தமிழ்நாடு அரசு 1968லிருந்து கர்நாடக அரசுக்கும் இந்திய அரசுக்கும் எதிர்ப்புத் தெரிவித்துக் கடிதங்கள் எழுதியது; உச்ச நீதிமன்றத்தில் வழக்குப் போட்டது.

ஆனால் கர்நாடகம் அந்த சட்ட விரோத அணைகளைக் கட்டி முடித்திட, இந்திய அரசு கொல்லைப் புற வழியாக அனுமதித்தது. மேக்கேதாட்டு அணையும் இது போல் கட்டப்படாமல் தடுக்க வேண்டுமானால், “இந்திய ஆட்சியாளர்க்குக் கடிதம் கொடுத்தேன், உச்ச நீதிமன்றத்தில் வழக்குப் போட்டேன்” என்று முதலமைச்சர் பட்டியல் அடுக்கினால் போதாது. ஏமாந்து விடுவோம்.

“இந்திய அரசே, மேக்கேதாட்டு அணை முயற்சியைத் தடுத்திடு; தமிழ்நாட்டின் காவிரி உரிமையைப் பறிக்க, கர்நாடகத்திற்கு துணை போகாதே!” என்று வெளிப்படையாக இந்திய அரசுக்குத் தமிழ்நாடு அரசு கோரிக்கை வைத்து அரசியல் அழுத்தம் தர வேண்டும். இந்தக் கோரிக்கையைத் தமிழ்நாட்டின் மக்கள் முழக்கமாக மாற்றிட குமரி முனையிலிருந்து கும்மிடிப்பூண்டி வரையுள்ள மக்கள் “காவிரி எழுச்சி நாள்” கடைபிடிக்கத் தமிழ்நாடு அரசு ஏற்பாடு செய்ய வேண்டும். இதற்காக அனைத்துக் கட்சி மற்றும் உழவர் அமைப்புகளின் கூட்டுக் கூட்டத்தைத் தமிழ்நாடு அரசு நடத்த வேண்டும்.

கர்நாடகம் ஏமாவதி, ஏரங்கி, கபினி ஆகிய சட்டவிரோத அணைகள் கட்டிய போது, அன்றைய ஆளுங்கட்சியான தி.மு.க. அன்றைய இந்திய ஆளுங்கட்சியான இந்திரா காங்கிரசுடன் கூட்டணியில்தான் இருந்தது; தி.மு.க. ஆட்சி, இந்த அணைகள் கட்ட எதிர்ப்புத் தெரிவித்தது என்றாலும், அணை கட்ட நடுவண் அரசு அனுமதித்தது என்பதை முதலமைச்சர் எடப்பாடி பழனிச்சாமி அவர்கள், கவனத்தில் கொள்ள வேண்டும். பா.ச.க.வுடன் அ.இ.அ.தி.மு.க. வைத்திருக்கும் கூட்டணியின் வரம்பை உணர்ந்து கொள்ள வேண்டும்.

மேக்கேத்தாட்டு அணையைத் தடுத்து, தமிழ்நாட்டிற்குரிய காவிரி நீரைப் பெற்றிட தமிழ்நாடு முதலமைச்சர் அவர்கள் மேற்கண்டவாறு செயல்பட வேண்டுமென்று காவிரி உரிமை மீட்புக் குழு கனிவுடன் கேட்டுக் கொள்கிறது.

தீர்மானம் – 2 : 21 விழுக்காடு ஈரப்பதம் உள்ள நெல்லையும் கொள்முதல் செய்க!

காவிரிப்படுகை மாவட்டங்களில் நிலத்தடி நீரைப் பயன்படுத்தி பல்வேறு துன்பங்களுக்கிடையே நம் உழவர்கள் குறுவை சாகுபடி செய்திருக்கிறார்கள். அறுவடைக்குப் பின் அந்த நெல்லை விற்பதற்கு வழியில்லாமல் திண்டாடுகிறார்கள். தமிழ்நாடு அரசின் நேரடி நெல் கொள்முதல் நிலையங்களில் 17 விழுக்காட்டிற்கு மேல் ஈரப்பதம் இருந்தால் வாங்க மறுக்கிறார்கள். இதனால் அங்கங்கே நெல் கொள்முதல் நிலையங்களுக்கு முன்பாக நெல் மூட்டைகள் குவிந்து கிடக்கின்றன. நெல்லுக்கு சேதாரம் ஏற்படுகிறது.

கடந்த காலங்களில் 21 விழுக்காடு வரை ஈரப்பதம் உள்ள நெல்லை தமிழ்நாடு அரசு கொள்முதல் செய்திருக்கிறது. இப்பொழுதும் அதுபோல் 21 விழுக்காடு வரை ஈரப்பதம் உள்ள நெல்லைக் கொள்முதல் செய்யுமாறு தமிழ்நாடு அரசு – நேரடி கொள்முதல் நிலையங்களுக்கு வழிகாட்ட வேண்டுமென்றும், கொள்முதல் நிலையம் திறக்கப்படாத ஊர்களில் உடனடியாகத் திறக்க வேண்டுமென்றும் காவிரி உரிமை மீட்புக் குழு தமிழ்நாடு முதலமைச்சர் அவர்களை கனிவுடன் கேட்டுக் கொள்கிறது.

தீர்மானம் – 3 : பயிர்க்காப்பீட்டுத் திட்டத்தில் பலன்கள் கிடைக்காமல் தவிப்பு

கடந்த 2018 – 2019 ஆம் ஆண்டுக்கான வேளாண் பயிர்க் காப்புத் திட்டத்தில், காப்பீட்டுத் தொகை கிடைக்காமல் பல்வேறு கிராமங்களில் உழவர்கள் பெருந்தொல்லைக்கு ஆளாகி உள்ளார்கள். பல கிராமங்கள் விடுபட்டுப் போயுள்ளன. ஒரே கிராமத்தில் ஒரு பகுதி விவசாயிகள் விடுபட்டுள்ளனர்.
ஒரே கிராமத்தில் இழப்பீட்டுத் தொகை நிர்ணயிப்பதிலும் வேறுபாடு கடைபிடிக்கப்பட்டு சிக்கல்கள் எழுந்துள்ளன.

தமிழ்நாடு அரசு, உடனடியாக இதில் தலையிட்டு பயிர்க் காப்பீட்டுத் திட்ட நிறுவனங்களுக்கு வழிகாட்டுதல் செய்து, எல்லா கிராமங்களுக்கும், எல்லா உழவர்களுக்கும் பயிர்க் காப்பீட்டு இழப்பீடு கிடைக்க விரைந்து நடவடிக்கை எடுக்க வேண்டுமென்று காவிரி உரிமை மீட்புக் குழுக் கேட்டுக் கொள்கிறது.

தீர்மானம் – 4 : உழவர்களுக்கு வட்டியில்லா வேளாண் கடன்

வேளாண் விளை பொருட்களுக்கு உரிய இலாப விலை கொடுக்காமல், அடிமாட்டு விலைக்கு விற்கும் நிலையைத்தான் இந்திய அரசும், தமிழ்நாடு அரசும் வழங்கியிருக்கிறது. இதனால், உழவர்கள் தொடர்ந்து கடனாளி ஆவதும், உயிரை மாய்த்துக் கொள்வதும் நடந்து வருகிறது.

இப்பின்னணியைக் கருத்தில் கொண்டு, இந்திய அரசு வங்கிகள் உழவர்களுக்கு வட்டியில்லா வேளாண் கடன் கொடுக்க உடனடியாக ஏற்பாடு செய்ய வேண்டுமென்று காவிரி உரிமை மீட்புக் குழு கேட்டுக் கொள்கிறது. தமிழ்நாடு அரசு இந்திய அரசை வலியுறுத்தி, அரசுடைமையாக்கப்பட்ட வங்கிகளில் வட்டியில்லா வேளாண் கடன் கிடைக்க ஏற்பாடு செய்ய வேண்டுமென்று காவிரி உரிமை மீட்புக் குழு கேட்டுக் கொள்கிறது.

செய்தித் தொடர்பகம்,
காவிரி உரிமை மீட்புக் குழு

பேச: 90251 62216, 94432 74002
Fb.com/KaveriUrimai
#SaveMotherCauvery
www.kaveriurimai.com

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Friday, October 11, 2019

முக்கால் கிணறு தாண்டுகிறது முரசொலி! பெ. மணியரசன் சிறப்புக் கட்டுரை!


முக்கால் கிணறு தாண்டுகிறது முரசொலி!

தமிழ்த்தேசியப் பேரியக்கத் தலைவர்
ஐயா பெ. மணியரசன் சிறப்புக் கட்டுரை!

தி.மு.க.வின் “முரசொலி” நாளேட்டில் “கீழடி அகழாய்வு: அறிக்கைகள் வெளியிடப்படுமா? ஆய்வு தொடருமா?” என்று நேற்று (10.10.2019) ஆசிரியவுரை வந்துள்ளது. அதில் இறுதிப்பகுதியின் இரண்டு மூன்று பத்திகளை மட்டும் தவிர்த்திருந்தால், தமிழர்கள் அனைவருக்குமான சிறந்த ஆசிரிய உரையாக அமைந்திருக்கும்.

முரசொலி ஆசிரியவுரையின் சாரம்

கீழடி நாகரிகம் தமிழர் நாகரிகம் என்பதால் இனப்பாகுபாட்டு அணுகுமுறையுடன் இந்திய அரசு அதைத் தொடராமல் ஏற்கெனவே மூடிவிட்டது. கீழடி ஆய்வில் உண்மையான ஆர்வத்துடன் பணியாற்றிய இந்திய அரசின் தொல்லியல் துறைக் கண்காணிப்பாளர் அமர்நாத் இராமகிருட்டிணனை அசாமுக்கு இடமாற்றம் செய்து விட்டது.

சிந்து சமவெளிப் பானைக் கீறல்களும் கீழடிப் பானைக் கீறல்களும் (எழுத்துகள்) ஒன்றாக இருக்கின்றன.

தமிழ்நாடு அரசு செயல்படுத்தி வந்த ஐந்தாம் கட்ட கீழடி ஆய்வும் 7.10.2019 அன்றுடன் நிறுத்தப்பட்டு விட்டதாகத் தெரிகிறது. இந்திய அரசின் தலையீடுதான் இதற்குக் காரணம் என்பதையும் “முரசொலி” கூறுகிறது. அத்துடன் நில்லாமல் இந்திய அரசு தொடர்ந்து தமிழ்நாட்டை வஞ்சித்துவரும் செய்திகளையும் பட்டியல் இட்டுள்ளது.

1. நூறாண்டு போராடி தமிழுக்கு செம்மொழி – நிலையைப் பெற்றோம். ஆனால், அந்த செம்மொழி நிறுவனம் நிர்வாகக் கோளாறால் சிதறுண்டு கிடக்கிறது.

2. இந்தித் திணிப்பை எதிர்த்து 82 ஆண்டுகளாக இன்னும் போராட்டம் நடத்தி வருகிறோம்.

3. தமிழ்நாட்டில் உள்ள நடுவண் அரசு அலுவலகங்களில் தமிழை அலுவல் மொழியாக்க வேண்டும் என்று நீண்டகாலமாகக் கோரி வருகிறோம். நடுவண் அரசு அதை ஏற்கவில்லை.

4. தமிழ்நாட்டிற்குரிய நிதியைப் பெறுவதற்கு புதுதில்லியிடம் தொடர்ந்து பிச்சைப் பாத்திரம் ஏந்தி வருகிறோம்.

5. நமது ஆற்றுநீர் உரிமைகளை இந்திய அரசு நிலைநாட்டித் தரவில்லை.

இப்படி இன்னும் பெரிய பட்டியல் எழுதலாம்.

இப்பொழுது கீழடி ஆய்வையும் தடுத்து நிறுத்தியுள்ளது இந்திய அரசு. தமிழர்களின் தொன்மை வெளிப்பட்டு விடக்கூடாது என்பதற்காகவே இப்படிச் செய்கிறது.

தமிழர்களுக்கு எதிரான இந்திய அரசின் இச்செயல்பாடுகள் பற்றி “முரசொலி” மேலே பட்டியலிட்டுள்ள அனைத்தும் உண்மைதான்! ஆனால், தமிழ்நாட்டில் தி.மு.க. ஆட்சி நடத்திய காலங்கள் “பொற்காலங்கள்” என்று தி.மு.க. தலைமையும், முரசொலியும் வர்ணித்து வந்த புகழ்ச்சிகள்தாம் பொய்யானவை!

காவிரி உரிமை மீட்பில் வெற்றி பெற்று விட்டதாகத் தி.மு.க.வும், அ.இ.அ.தி.மு.க.வும் நடத்திய வெற்றி விழாக்கள்தாம் போலியானவை என்பதற்கான ஒப்புதல் வாக்குமூலங்கள்தாம் “முரசொலி”யின் இந்த ஆசிரியவுரை!

கூட்டணிக் கும்மாளம்

தமிழ்நாட்டின் உரிமைகளை இந்திய ஆட்சியாளர்கள் பறித்த வந்தக் காலங்களில் காங்கிரசு ஆட்சியுடன் அல்லது பா.ச.க. ஆட்சியுடன் கூட்டணி சேர்ந்து கும்மாளம் போட்ட கழகம் தி.மு.க.! இப்போதும், காங்கிரசுடன் கூட்டணி!

அ.இ.அ.தி.மு.க.வும் காங்கிரசு, பா.ச.க.வோடு கூட்டணி சேர்ந்த - சேரும் கட்சிதான்!

எங்கள் கூட்டணி வெற்றி பெற்றால், இராகுல்காந்திதான் தலைமை அமைச்சர் என்று இந்தியாவிலேயே முதல் முதலில் அறிவித்தது நான் தான்” என்று பெருமை பேசிக் கொள்கிறார் தி.மு.க. தலைவர் மு.க. ஸ்டாலின். “முரசொலி” பட்டியலிடும் உரிமைப் பறிப்புகளை காங்கிரசு ஆட்சி செய்யவில்லையா?

என்ன நெருக்கடி?

ஏதோ ஒரு நெருக்கடியில் இந்த உண்மைகளைக் கூறிவிட்டது “முரசொலி”! அது என்ன நெருக்கடி? “முரசொலி”யே கூறுகிறது :

“கீழடி அகழாய்வின் அறிக்கையே இன்னும் வெளிவரவில்லை. அதற்குள் இது தமிழர் நாகரிகமா – திராவிட நாகரிகமா என்று ஒருவர் வினா எழுப்புகிறார். தமிழர் நாகரிகம் என்றுதான் சொல்ல வேண்டும் என்கிறார்.

இன்னொருவர் கால்டுவெல்லைச் சாடுகிறார்; குழப்பம் செய்வதையே வாடிக்கையாகக் கொண்டவர். கீழடி எழுத்துகளைத் தமிழ் பிராமி, தமிழி என்றெல்லாம் சொல்லக்கூடாது; மூலத்தமிழ் (Proto Tamil) என்றுதான் கூற வேண்டும் என்கிறார்.

வேறொருவர் பாரதப் பண்பாடு என்கிறார். தமிழராகப் பிறந்தது நாம் சிரித்துக் கொண்டே அழுவதற்குத்தானா?”

முரசொலி ஆசிரிய உரையின் முடிவில் உள்ள மேற்கண்ட “நெருக்கடி” – தமிழரா – திராவிடரா என்பதில் அடங்கி இருக்கிறது.

கீழடி சென்று பார்வையிட்டுவிட்டு அறிக்கை கொடுத்த தி.மு.க. தலைவர் மு.க. ஸ்டாலின் அவர்கள், “அதனை (கீழடியை) திராவிடப் பண்பாடு என அறிஞர்கள் குறிப்பிடுவதைக் கேட்கும்போது செவிகளில் இன்பத்தேன் பாய்கிறது” என்று கூறியிருந்தார்.

அ.இ.அ.தி.மு.க. அமைச்சர் பாண்டியராசன் கீழடி – பாரதப் பண்பாடு என்று கூறியிருந்தார்.

இவ்விரு கூற்றையும் மறுத்து நான் சமூக வலைத்தளங்களில் “கீழடி நாகரிகத்தை ஆரியமும் திராவிடமும் திருட அனுமதிக்காதீர்” என்ற தலைப்பில் கட்டுரை வெளியிட்டிருந்தேன். இணையத் தொலைக்காட்சி “ழகரம்”, “தமிழன்” தொலைக்காட்சி ஆகியவற்றில் செவ்வியும் கொடுத்தேன்.
தமிழ்த்தேசியப் பேரியக்கத்தின் மாத இதழான “தமிழ்த்தேசியத் தமிழர் கண்ணோட்டம்” - 2019 அக்டோபர் இதழில், “கீழடி நாகரிகம் திராவிட நாகரிகமா?” என்ற தலைப்பில் கட்டுரையும் எழுதியிருந்தேன்.

நாம் தமிழர் கட்சியின் தலைவர் சீமான் அவர்கள் கீழடி நாகரிகத்தைத் திராவிடர் நாகரிகம் என்று தி.மு.க. தலைவர் கூறுவதைச் சாடி இடைத்தேர்தல் பரப்புரைக் கூட்டங்களில் ஆவேசமாகப் பேசினார். கீழடி நாகரிகம் தமிழர் நாகரிகமே என்றார்.

“முரசொலி” ஆசிரியவுரையின் முடிவில் “ஒருவர்” என்பதில் சீமானையும், “இன்னொருவர்” என்பதில் என்னையும் சுட்டித்தான் சாடி உள்ளார்கள்.

எனக்கு “முரசொலி” கொடுத்துள்ள பட்டம் “குழப்பவாதி”! அகழாய்வில் கிடைக்கும் தொன்மையான தமிழ் எழுத்துகளை அசோகரின் கல்வெட்டு எழுத்தாகச் சொல்லப்படும் “பிராமி” என்ற பெயரின் வால் போல் “தமிழ் பிராமி” என்று சொல்லாதீர்கள்; அல்லது அதே பாணியில் “தமிழி” என்று ‘இ’கரம் போட்டு சொல்லாதீர்கள்; தமிழ் எழுத்து என்றே சொல்லுங்கள்; அல்லது மூலத்தமிழ் (Proto Tamil) என்று சொல்லுங்கள் என்று எனது நேர்காணல் மற்றும் தமிழர் கண்ணோட்டம் இதழில் கூறியிருந்தேன். அவற்றில், இராபர்ட் கால்டுவெல் “திராவிடக்” கயிறு திரித்துக் கதையளந்ததையும் சாடி இருந்தேன்.

“திராவிடம்” என்ற பெயரில் ஒரு மொழியோ, ஓர் இனமோ, ஒரு நாடோ வரலாற்றில் இருந்ததில்லை; இருக்கிறது என்றால் சான்றுகளுடன் பேசுங்கள் அல்லது எழுதுங்கள்; உங்களை எதிர்கொள்கிறேன் என்று நான் பலமுறை கூறியுள்ளேன். எந்தத் திராவிடவாதியும் இந்த அறைகூவலை இதுவரை ஏற்கவில்லை!

மாறாக, திராவிடர்தான் தமிழர்; தமிழர்தான் திராவிடர் என்று சறுக்கு விளையாட்டு விளையாடுகிறார்கள். நான் குழப்பவாதி அல்லன்; திராவிடக் குழப்பத்தைத் தீர்ப்பவன்!

தென்னாட்டுப் பிராமணர்களை மட்டுமே குறிப்பதற்கு உருவான சொல்தான் “திராவிடர்”! குசராத்தி, மராத்தி, தெலுங்கு, கன்னடம், தமிழ் நிலம் ஆகியவற்றில் குடியேறிய ஆரிய பிராமணர்களைக் குறிக்க பஞ்ச திராவிடர் என்ற சொல்லை சமற்கிருத நூல்களும், பிராமணர்களும் பயன்படுத்தியுள்ளதையும் கூறி வருகிறேன்.

ஆந்திரம், தெலங்கானா, கர்நாடகம் போன்ற மாநிலங்களில் கீழடி போன்ற அகழாய்வு கிடைத்தால் அதை அவர்கள் திராவிடர் நாகரிகம் என்று சொல்வார்களா? மாட்டார்கள்! தெலுங்கர் நாகரிகம், கன்னடர் நாகரிகம் என்றுதான் சொல்லுவார்கள். தமிழ் இனத்தில் பிறந்துவிட்டு, தமிழ்நாட்டில் வாழ்ந்து கொண்டு, தமிழர் இனத்திற்கு ஏன் இரண்டகம் செய்கிறீர்கள் என்பதுதான் எனது வினா! இனிமேலாவது, தமிழினத் துரோகத்தைக் கைவிடுங்கள்!

கீழடியைத் தமிழர் நாகரிகம் என்றே நீங்களும் நெஞ்சை நிமிர்த்திப் பெருமையாகப் பேசுங்கள்!

இந்திய அரசு என்பது சாரத்தில் ஆரிய அரசுதான்! ஆரியத்தின் இரட்டைப் பிள்ளைகள்தாம் காங்கிரசும், பா.ச.க.வும்! பாண்டியராசன் போன்றவர்கள் பாரதமாதாவின் நிரந்தரப் பாதந்தாங்கிகள்!

தமிழ்த்தேசியம் – எந்த மாற்று இனத்தாரையும் சிறுபான்மை மொழி பேசுவோரையும் எதிரியாகக் கருதவில்லை. நாம் எல்லோரும் சேர்ந்த வடிவம்தான் தமிழ்நாடு! அதேவேளை, தமிழ் இன அடையாளத்தை மறைக்க அல்லது மறுக்க, தமிழ் இனத்தை – தமிழ் மொழியை ஆதிக்கம் செய்ய எந்த இனம் வந்தாலும் எந்த மொழி வந்தாலும், எந்தப் பெயர் வந்தாலும், யார் வந்தாலும் எதிர்ப்போம்; முறியடிப்போம்! அந்த வகையில்தான் ஆரியத்தையும் அது பெற்றெடுத்த திராவிடத்தையும் எதிர்க்கிறோம்!

தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Sunday, October 6, 2019

புரட்சித்தாய் வாலாம்பாள் அவர்களுக்கு 10 ஆம் ஆண்டு வீரவணக்க நிகழ்வு!


புரட்சித்தாய் வாலாம்பாள் அவர்களுக்கு 10 ஆம் ஆண்டு வீரவணக்க நிகழ்வு!

கடலூர் மாவட்டம், திட்டக்குடி வட்டம், பெண்ணாடம் அருகே சௌந்திரசோழபுரம் தென்னஞ்சோலை நினைவிடத்தில் தமிழ்த்தேசியப் போராளி புலவர் கு. கலியபெருமாள் அவர்களின் துணைவியார், புரட்சித்தாய் வாலாம்பாள் அவர்களுக்கு 10 ஆம் ஆண்டு வீரவணக்க நிகழ்ச்சி நடைபெற்றது.

இந்நிழ்வில் தமிழர் நீதிக்கட்சி நிறுவனர் சுபா. இளவரசன், என்.எல்.சி. தொழிற்சங்க நிர்வாகி சண்முகம், தமிழ்ப் பாதுகாப்பு இயக்கம் தோழர் சோழநம்பியார், செந்தமிழ் மரபு வழி வேளாண் நடுவத்தின் தலைமை ஒருங்கிணைப்பாளர் க. கண்ணதாசன், தமிழ்த்தேசியப் பேரியக்கத் தோழர் கு. மாசிலாமணி, பொதுக்குழு உறுப்பினர் தோழர் அரா. கனகசபை, தோழர் மா. மணிமாறன், தமிழக மாணவர் முன்னசணி நடுவண்குழு உறுப்பினர் தி. ஞானபிரகாசம் ஆகியோர் உரையாற்றினர்.

தமிழ்த்தேசியப் பேரியக்கத் தலைமைச் செயற்குழு உறுப்பினர் க. முருகன், தோழர்கள் சி. பிரகாசு, மு. பொன்மணிகண்டன், சி. பிரபாகரன், மகளிர் ஆயம் பொருளாளர் ம. கனிமொழி, தோழர்கள் மு.வித்யா, மு. தமிழ்மணி உள்ளிட்ட பல்வேறு தோழர்கள் கலந்து கொண்டனர்.

தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Friday, October 4, 2019

வர்ணாசிரம ஆன்மிகத்தை வழிமறிக்கும் ஆசீவக ஆன்மிகம்! பெ. மணியரசன்



வர்ணாசிரம ஆன்மிகத்தை

வழிமறிக்கும் ஆசீவக ஆன்மிகம்!

ஐயா பெ. மணியரசன்

தலைவர் - தமிழ்த்தேசியப் பேரியக்கம்


கடந்த 28.09.2019 அன்று சென்னையில் நடைபெற்ற “ஆசீவகம்” (சமய சமூக இயக்கம்) அமைப்பின் ஐந்தாமாண்டு தொடக்க விழாவுக்கு தமிழ்த்தேசியப் பேரியக்கத் தலைவர் ஐயா பெ. மணியரசன் அவர்கள் வழங்கிய வாழ்த்துச் செய்தி :

“ஆசீவகம்” (சமய சமூக இயக்கம்) அமைப்பின் ஐந்தாமாண்டு தொடக்க விழா – 2050 புரட்டாசி – 11 (28.09.2019) அன்று சென்னை வடபழனியில் நடைபெறுவது குறித்த அழைப்பிதழ் கிடைக்கப் பெற்றேன். மிக்க மகிழ்ச்சி! நன்றி!

தமிழர்களின் மிகத் தொன்மையான மெய்யியல் ஆசீவகம்! இயற்கை குறித்தும், இயற்கைக்கும் மனிதர்களுக்கும் இடையே உள்ள உறவு குறித்தும் மனிதர்களுக்கிடையே உள்ள உறவு குறித்தும் பண்பாட்டு வளர்ச்சியின் தொடக்க காலத்திலேயே மனிதர்கள் சிந்திக்கத் தொடங்கினார்கள். அச்சிந்தனைதான் மெய்யியலாக வளர்ந்தது.

அவ்வாறு வளர்ந்த தமிழர் மெய்யியல் பிரிவுகளில் ஆசீவகம் மிகவும் பழைமையானது என்பர் அறிஞர் பெருமக்கள்! பக்குடுக்கை நன்கணியார், மற்கலி, பூரணர் ஆகிய மூவரும் ஆசீவகத்தின் மூல ஆசான்கள். அறிஞர் குணா, பேராசிரியர் க. நெடுஞ்செழியன் ஆகியோர் ஆசீவகம் பற்றி விரிவாக ஆய்ந்து எழுதியுள்ளார்கள்.

இப்பேரண்டம் அணுக்களால் ஆனது. இந்த அணுக்கள் எப்போதும் இருக்கின்றன. இவை புதிதாகத் தோன்றுவதுமில்லை, அழிவதுமில்லை! இந்த அணுக்களின் திரட்சியும், பிரிவும் பற்பல பொருட்கள் ஆகின்றன. அடிப்படையான நிலம், நீர், தீ, காற்று, உயிர் ஆகியவை தனித்தனி அணுக்கள் வகையினால் ஆனவை என்கிறது ஆசீவகம்!

கிரேக்கத்தில் டெமாகிரீடஸ் என்ற மெய்யியலாளர் அணுக் கொள்கையாளர். அணுக்களின் சேர்க்கை மற்றும் பிரிவுகளே பேரண்டப் பொருட்கள் – உயிரினங்கள் என்றார். அவருக்குத் தன் முடிவுகளில் முழு நிறைவு இல்லை. அறிவைத் தேடி வெளிநாடுகளுக்குப் போனார். இந்தியாவுக்கும் வந்தார் என்கிறார்கள்.

“தான் திரட்டியிருக்கின்ற அறிவைப் பற்றி அவருக்கு எப்பொழுதும் அதிருப்தியே. அவர் வடிவ கணிதத்தைக் கற்பதற்காக எகிப்துக்கும் பாரசீகத்தில் உள்ள ஹால்டியர்களுக்கும் சென்றார். அவர் இந்தியாவுக்குச் சென்று யோகிகளிடமிருந்து அறிவைச் சேகரித்தார் என்றும் சிலர் சொல்கிறார்கள்” (நூல் : மார்க்ஸ் பிறந்தார், ஹென்ரி வோல்கவ், தமிழில் – நா. தர்மராஜன், முன்னேற்றப் பதிப்பகம், மாஸ்கோ, பக்கம் 166).

“இந்தியா” என்று அப்போது நாடில்லை. இப்போதுள்ள இந்திய நிலப்பரப்பில் உள்ள ஏதோவொரு நாட்டிற்கு டெமாக்ரீட்டஸ் வந்திருக்கலாம். அவரது காலம் கி.மு. 460 – 370. இக்காலத்தில் தமிழ்நாட்டில்தான் அணுக்கோட்பாடு – ஆசீவகர்களால் செல்வாக்குப் பெற்றிருந்தது.

பேரண்டத்தின் இயக்கம் – செயல்பாடுகள் பற்றி ஆசீவக அணுக் கோட்பாட்டாளர்கள் அறிவியல் ஆய்வுடன் சிந்தித்துள்ளார்கள்.

கீழடி அகழ்வாய்வில் கடவுள் சிலைகளோ, வழிபாட்டுப் பொருட்களோ கிடைக்கவில்லை என்கிறார்கள். அக்காலத்தில் தமிழ்நாட்டில் ஆசீவக மெய்யியல் செல்வாக்கு செலுத்தியிருக்கலாம். அதனால் சிலை வடிவக் கடவுள் வழிபாடு இல்லாமல் இருந்திருக்கலாம்.

தமிழர்களின் தொன்மையான – அறிவியல் வழிப்பட்ட ஆன்மிகச் சிந்தனையான ஆசீவகத்தின் பெயரில் அமைப்பு நடத்தும் பெருமக்கள், இளந்தலைமுறைத் தமிழர்களிடம் தமிழினத்தின் மரபுப் பெருமிதங்களைக் கொண்டு சேருங்கள்! தமிழினம் பழங்காலத்திலிருந்தே அறிவுச் சமூகமாக இருந்தது என்பதற்கான மெய்யியல் சான்றே ஆசீவகம். அதேபோல், வீரச் சமூகமாக – அறநெறி போற்றும் சமூகமாக இருந்தது என்பதற்கும் ஐயனார் போன்ற வீரர்களும், பக்குடுக்கை நன்கணியார் பாடலும் மற்கலி, பூரணர் கருத்துகளும் சான்றுகளாகும்.

ஆன்மிக முகமூடியுடன் வரும் ஆரிய – பிராமண – சமற்கிருத – இந்தி ஆதிக்க அரசியலை எதிர்கொள்ளும் களத்தில் தமிழர்களின் மெய்யியல் வாளாக ஆசீவகத்தைக் களமிறக்கிடுங்கள்! உங்கள் அனைவருக்கும் வாழ்த்துகள்!”


தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Wednesday, October 2, 2019

தோழர் தி.மா. சரவணன் மறைவு சமகால வரலாற்று ஆய்வாளர்களுக்குப் பேரிழப்பு! பெ. மணியரசன் இரங்கல் அறிக்கை!

தோழர் தி.மா. சரவணன் மறைவு

சமகால வரலாற்று ஆய்வாளர்களுக்குப் பேரிழப்பு!
தமிழ்த்தேசியப் பேரியக்கத் தலைவர் 

தோழர் பெ. மணியரசன் இரங்கல் அறிக்கை!


தமிழ்த்தேசியப் பேரியக்கத்தின் திருச்சி மாவட்ட மூத்த தோழர்களில் ஒருவரும், பத்தொன்பதாம் நூற்றாண்டிலிருந்து வெளி வந்த தமிழ் இதழ்களின் தொகுப்பாளருமான நம்முடைய அன்பிற்குரிய தோழர் தி.மா. சரவணன் அவர்கள், நேற்று (01.10.2019) திருச்சி அரசு மருத்துவமனையில் காலமானார் என்ற செய்தி பெரும் துயரமளிக்கிறது.

சிறுநீரகக் கோளாறால் மருத்துவ சிகிச்சை பெற்று வந்த தி.மா.ச. காலமானது தமிழ்த்தேசியப் பேரியக்கத்திற்கு மட்டுமின்றி, சமகாலத் தமிழர் வரலாறு கற்கக்கூடியவர்களுக்கும் எழுதுவோருக்கும் பேரிழப்பாகும்!

தமிழர் கண்ணோட்டம் இதழ், உருட்டச்சாக வந்ததிலிருந்து அண்மைக்காலம் வரை அதில் வந்த போராட்டச் செய்திகள், கட்டுரைகள், மாற்றுக் கருத்துடையோருடன் நடந்த தர்க்கங்கள் அனைத்தையும் தொடர்ந்து ஒவ்வொரு இதழிலும் எழுதி வந்தார். அந்தப் பணி, அவர் மருத்துவமனையில் சேர்ந்ததிலிருந்து நின்று விட்டது. இப்பொழுது அவர் மறைவால் நிரந்தரமாக அந்தப் பணி நின்று போன பேரிழப்பும் நமக்கிருக்கிறது.

2014இல் சென்னையில் நடைபெற்ற புத்தகச் சங்கமம் (ஏப்ரல் 18 - 27) நிகழ்வில், திராவிடர் கழகத் தலைவர் ஆசிரியர் கி. வீரமணி அவர்கள் தோழர் தி.மா.சரவணன் அவர்களுக்கு “புத்தகர்” விருது வழங்கி பாராட்டினார்.

மிக நல்ல பண்பாளராக, தோழமை உணர்வுமிக்கவராக அனைவரோடும் இணக்கமாகப் பழகும் பக்குவம் பெற்றவராக விளங்கிய தோழர் தி.மா.ச. அவர்களின் மறைவு தமிழுணர்வாளர்கள் அனைவருக்குமான இழப்பாகும்.

தமிழ்த்தேசியப் பேரியக்கம் சார்பில், தோழர் தி.மா. சரவணன் அவர்களுக்கு வீரவணக்கத்தையும், அவர்தம் குடும்பத்தினருக்கு இரங்கலையும் தெரிவித்துக் கொள்கிறேன்.


தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Tuesday, October 1, 2019

சூழலியல் நெருக்கடி நிலை ! கி. வெங்கட்ராமன் கட்டுரை.

சூழலியல் நெருக்கடி நிலை !

தோழர் கி. வெங்கட்ராமன் பொதுச்செயலாளர்,
       தமிழ்த்தேசியப் பேரியக்கம்.

“மக்கள் தத்தளித்துக் கொண்டிருக்கிறார்கள். மக்கள் செத்துக் கொண்டிருக்கிறார்கள். ஒட்டுமொத்த இயற்கை அமைப்பே நிலைகுலைந்து வருகிறது. மாபெரும் உயிர்மப் பேரழிவின் தொடக்கத்தில் நாம் நிற்கிறோம். ஆனால், நீங்களெல்லாம் பணத்தைப் பற்றிப் பேசுகிறீர்கள். தடையில்லாத பொருளியல் வளர்ச்சி குறித்து கற்பனைக் கதைகளை அள்ளி விடுகிறீர்கள். உங்களுக்கு எவ்வளவு நெஞ்சழுத்தம்?”

நியூயார்க்கில் கடந்த 2019 செப்டம்பர் 23 அன்று நடைபெற்ற ஐக்கிய நாடுகள் பருவநிலை செயல்பாட்டு உச்சி மாநாட்டில் ஸ்வீடன் நாட்டின் சிறுமி கிரேட்டா துன்பெர்க் ஆற்றிய அறச்சீற்ற சொற்கள் இவை!

2015 பாரீசு பருவநிலை ஒப்பந்தத்திற்குப் பிறகு அதன் மீதான செயல்பாடுகளை விரைவுபடுத்த நடைபெற்ற இந்த உலகநாட்டுத் தலைவர்களின் உச்சி மாநாட்டை ஒட்டி, வரலாறு காணாத அளவில் ஏறத்தாழ 150 நாடுகளில் ஆயிரத்திற்கும் மேற்பட்ட நகரங்களில் இலட்சக்கணக்கான இளையோர் கூடி, புவிவெப்பமாதலைத் தடுக்க நாட்டுத் தலைவர்களும், பெருங்குழுமங்களும் உடனடியாக செயல்பட வேண்டுமென வலியுறுத்தி பேரணிகள் நடைபெற்றன. மாநாடு நடைபெற்ற நியூயார்க்கில் வரலாறு காணாத பேரணியும் நடந்தது.

இவ்வளவு அழுத்தங்கள் இருந்தபோதும், பருவநிலை நெருக்கடியை எதிர்கொள்ள புயல் வேகத்தில் செயல்பட வேண்டிய நாடுகள் ஆமை வேகத்தில் நடந்து கொண்டிருப்பதையே உச்சி மாநாட்டின் நிகழ்வுகள் எடுத்துக் காட்டின.

பாரீசு பருவநிலை மாநாட்டில் 195 நாடுகள் பங்கேற்ற போதிலும், அதன் மீதான செயல்திட்டங்களை உறுதிப்படுத்தும் உச்சி மாநாட்டில் 70 நாடுகள் மட்டுமே பங்கேற்றன. புவிவெப்பமடைவதற்கு காரணமான கர்பன் டை ஆக்சைடு – மீத்தேன் ஆகியவற்றை வெளியிடுவதில் முதன்மைப் பங்கு வகிக்கும் அமெரிக்க வல்லரசு அதிலும் பங்கேற்கவில்லை. ஆனால், மாநாடு நடந்து கொண்டிருந்தபோது வட அமெரிக்கக் குடியரசுத் தலைவர் டொனால்டு டிரம்ப் பார்வைாளராக சிறிது நேரம் அமர்ந்திருந்தார்.

கரி உமிழும் முதல் வரிசை நாடுகளான சீனாவும், இந்தியாவும் இதில் பங்கேற்றாலும் கருதத்தக்க உறுதிப்பாடு எதையும் வெளிப்படுத்தவில்லை.

ஏற்கெனவே தாங்கள் உறுதி அளித்தவாறு பசுமை மாற்று எரிசக்திகளுக்கு கூடுதல் திட்டங்கள் வகுத்து வருவதாகக் கூறிய சீனா, தாங்கள் அதற்கு மேல் செயல்பட முடியாததற்கு பாரீசு ஒப்பந்தத்திலிருந்து அமெரிக்கா விலகியதை காரணமாகக் கூறியது.

இந்தியத் தலைமையமைச்சர் மோடி, கதிரவன் மின்சாரம் உள்ளிட்ட மாற்று எரி ஆற்றல் மின்சார உற்பத்தியை இப்போதுள்ள 175 ஜிகா வாட்டிலிருந்து 2022-க்குள் 450 ஜிகா வாட்டாக உயர்த்தப்போவதாக அறிவித்தார். ஆனால், நிலக்கரி, மீத்தேன் பெட்ரோலியப் பயன்பாடுகள் குறைப்பது பற்றி ஒரு சொல்கூட பேசவில்லை.

ஆயினும், 65 நாடுகள் மற்றும் கலிபோர்னியா போன்ற முக்கியமான மாகாண அரசுகள் 2050க்குள் பசுமைக்குடில் வளிகள் உமிழ்வதை முற்றிலும் நிறுத்துவதாக உறுதியளித்தன.

பிரான்சு குடியரசுத் தலைவர் மக்ரான் பாரீசு ஒப்பந்தத்திற்கு இசையாத நாடுகளுடன் பிரான்சு எந்த தொழில் – வர்த்தக ஒப்பந்தமும் இனி செய்யாது என்று அறிவித்தார். மற்றபடி தன்னுடைய நாடு என்ன செயல்பாட்டை மேற்கொள்ளப் போகிறது என்பது குறித்து, திட்டம் எதையும் முன்வைக்கவில்லை.

செர்மனி, இத்தாலி, போர்ச்சுகல் உள்ளிட்ட ஐரோப்பிய நாடுகள் பலவும் 2020-லிருந்து புதிய நிலக்கரிச் சுரங்கங்களை தங்கள் நாடுகளில் திறப்பதில்லை எனவும், இருப்பதையும் 2050-க்குள் மூடி விடுவதாகவும் அறிவித்தன.

பாரீசு பருவநிலை ஒப்பந்தத்தில், இதுவரை கையெழுத்திடாத இரசியா கையொப்பமிட இப்போது ஒப்புக் கொண்டது. சிறிய நாடுகளில் கரிம வளியை நிறுத்தும் நடவடிக்கைகளுக்கு கூடுதல் நிதியை வழங்குவதற்கு பிரிட்டன், செர்மனி, பிரான்சு, நார்வே ஆகிய நாடுகள் உறுதி கொடுத்தன.

ஆயினும் இதுவரை இல்லாத அளவுக்கு 100 பன்னாட்டுப் பெருங்குழுமங்கள் பாரீசு ஒப்பந்தத்திற்கு இசைய, தங்கள் உற்பத்தித் திட்டங்களை மாற்றியமைத்துக் கொள்வதாக உறுதி கூறின. இவற்றுள் 87 பெருங்குழுமங்கள் புவிவெப்பமலை 1.5 செல்சியசுக்கு மிகாமல் இருப்பதற்குத் தங்கள் பங்களிப்பை உறுதி கூறின.

அதுபோல், உலகின் பெரிய வங்கிகளாக அறியப்பட்ட 130 வங்கிகள் பாரீசு பருவநிலை ஒப்பந்தத்திற்கு முரணாகச் செயல்படும் திட்டங்களுக்கு நிதி வழங்குவதை 2030-க்குள் முற்றிலும் நிறுத்திக் கொள்வதாக அறிவித்தன.

மக்கள் போராட்டங்களின் அழுத்தங்கள் முற்றிலும் பயணற்றுப் போய் விடவில்லை. இந்த உச்ச மாநாடு தொடங்குவதற்கு முன்னால் 23 நாடுகள் மட்டுமே செயல்திட்டங்களுக்கு உறுதியளித்திருந்தன. ஆனால், இம்மாநாட்டு அரங்கில் 70 நாடுகள் பங்கேற்று, செயல் திட்டங்களுக்கு உறுதி கூறியிருக்கின்றன.

ஐ.நா. தலைமைச் செயலாளர் அந்தோனியோ குட்டிரஸ் தனது நிறைவுரையில் கூறியதுபோல, இந்த ஆண்டு இறுதியில் திசம்பரில் சில்லி நாட்டின் சான்டியோகோ நகரில் நடைபெறவுள்ள பருவநிலை மாநாட்டில் கருதத்தக்க முன்னேற்றம் ஏற்படும் என்று நம்பலாம்.

ஆயினும், “சந்தை சொல்மிக்க மந்திரமில்லை” என்ற கொள்கை வழியிலிருந்தும், “வளர்ச்சி” வாதத்திலிருந்தும் மீளாமல் பருவநிலை சிக்கலுக்கு முற்றிலும் விடை கண்டு விட முடியாது.

இருந்தபோதிலும், இருக்கின்ற அரசியல் – பொருளியல் கட்டமைப்பிற்குள்ளேயே மாற்றங்கள் கொண்டு வர தொடர் அழுத்தங்களால் முடியும்!

இத்தொடர் முயற்சியின் முதல் நடவடிக்கையாக கிரேட்டா துன்பெர்க்கும், இந்தியாவைச் சேர்ந்த ரீமா பாண்டே உள்ளிட்ட வெவ்வேறு நாடுகளைச் சேர்ந்த 17 வயதுக்குட்பட்ட 15 சிறார்களும் - “ஐ.நா. குழந்தைகள் பாதுகாப்பு மையத்தின் இந்த உச்சி மாநாட்டில் நடைபெற்றவை உலக நாடுகளின் குழந்தைகள் எதிர்காலத்தைப் பாதுகாக்க உதவாது. எனவே, ஐ.நா. தங்களது மனுவை குழந்தைகளுக்கு எதிரான வன்முறை என்ற புகாராக எடுத்துக் கொள்ள வேண்டும்” என வலியுறுத்தி ஒவ்வொரு நாட்டுக் குழந்தைகளும் புவிவெப்பமடைவதால் எந்தந்த வகையில் பாதிக்கப்படுகிறார்கள் என்பதை விளக்கி வரலாற்றுச் சிறப்பு வாய்ந்த மனு அளித்திருக்கிறார்கள்.

வரும் திசம்பரிலும், அதற்கு முன்பும் “பருவநிலை நெருக்கடி” (Climate Emergency) அறிவிக்க வலியுறுத்தி, உலகெங்கிலும் தொடர் மக்கள் போராட்டங்கள் நடத்தப்பட வேண்டியது அவசியமாகும்!

பெருந்திரள் மக்கள் அழுத்தமில்லாமல், உலக நாடுகள் தாமே செயல்படாது!
தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Monday, September 30, 2019

கீழடி நாகரிகம் : ஆரிய - திராவிடத் திருட்டை அனுமதிக்காதீர்! பெ. மணியரசன்

கீழடி நாகரிகம் :
ஆரிய - திராவிடத் திருட்டை அனுமதிக்காதீர்!

ஐயா பெ. மணியரசன்
தலைவர் - தமிழ்த்தேசியப் பேரியக்கம்.

ஐயகோ, இந்தக் கொடுமை இந்தியாவில் வேறு எந்த இனத்திற்காவது உண்டா?

சொந்த இனத்தின் பெயரை சொல்லக்கூடாது; வேறொரு கலப்பட இனப்பெயரைச் சொல் என்று கட்டளை இடும் இந்தக் கொடுமை மராத்தியர்க்கு உண்டா? குசராத்தியர்க்கு உண்டா? தெலுங்கர் – கன்னடர்க்கு உண்டா? இல்லை! தமிழர்களுக்கு மட்டும்தான் உண்டு!

தமிழர் என்று சொல்லாதே, திராவிடர் என்று சொல்! தப்பித்தவறி தமிழர் என்று சொல்லிவிட்டால், திராவிடர் என்பதை அடுத்த வரியில் சேர்த்துக் கொள் என்கிறார்கள். “தமிழர் நாகரிகம் என்று சொல்லாதே! பாரத நாகரிகம் என்று சொல்!” என்கிறார்கள். இந்தக் கொடுமை வேறு எந்த இனத்திலாவது உண்டா? இல்லை!

திராவிடத் திருட்டு

கற்பனையாகக் கயிறு திரித்த கால்டுவெல் கூட “தமிழர்க்கு மறுபெயர் திராவிடர்” என்று கூறவில்லை. தமிழ், தெலுங்கு, கன்னடம், மலையாளம், துளு போன்ற மொழிகளுக்கு மூல மொழியாக இருந்தது திராவிடம் என்றுதான் கதையளந்தார்!

ஆனால், “திராவிடத் தந்தை” பெரியாரும், அவரின் வாரிசுகளும்தாம் தமிழர் அடையாளத்தை மறைத்து, திராவிட அடையாளத்தைத் திணிப்பதிலேயே 24 மணி நேரமும் குறியாக இருக்கிறார்கள்.

இதோ கீழடியில் தமிழர் தொன்மைப் பண்பாட்டின் பொருட்கள் அடுக்கடுக்காய் கிடைத்து வருகின்றன. திராவிடவாதிகள் திருட்டு வேலையைத் தொடங்கி விட்டார்கள்! அது திராவிட நாகரிகமாம்!

“அதனைத் திராவிடப் பண்பாடு என அறிஞர்கள் குறிப்பிடுவதைக் கேட்கும்போது, செவிகளில் இன்பத்தேன் பாய்கின்றது” என்று 28.09.2019 அன்று வெளியிட்ட அறிக்கையில் தி.மு.க. தலைவர் மு.க. ஸ்டாலின் பூரித்துப் போகிறார்.

ஸ்டாலின் அவர்களே, நீங்கள் தமிழர் பண்பாட்டை – திராவிடப் பண்பாடு என்று திரிக்கும்போது எங்களுக்குக் காதில் தேள் கொடுட்டுவது போல் அல்லவா வலிக்கிறது.

இன்னொருபுறத்தில், அமைச்சர் பாண்டியராசனோ கீழடியை பாரதப் பண்பாடு என்கிறார்.

ஆந்திராவிலோ, கர்நாடகத்திலோ கீழடிபோல் பழைய பண்பாட்டு அகழாய்வு கிடைத்தால் அவர்கள் அதைத் திராவிடப் பண்பாடு என்று சொல்வார்களா? சொல்லவே மாட்டார்கள்! தெலுங்கர் பண்பாடு, கன்னடர் பண்பாடு என்றுதான் சொல்வார்கள். தெலுங்கு தேசம் என்றல்லவா அங்கே கட்சி வைத்திருக்கிறார்கள். திராவிடப் பரிவாரங்கள் அங்கு கிடையாதே! தமிழீழத் தமிழர்களிடம் திராவிடக் கயிறு திரிக்க முடியுமா?

திராவிடவாதிகளே, நீங்கள் “தமிழர் என்றாலும் திராவிடர் என்றாலும் ஒன்றுதான் என்று கூறிக் கொள்கிறீர்கள். அக்கூற்றிலாவது, நீங்கள் நேர்மையாக இருந்தால், இலக்கிய வழக்கிலும், மக்கள் வழக்கிலும் தமிழர் என்றே அழைக்கப்படும் தமிழர்களைத் “தமிழர்” என்றே அழையுங்கள்!

தமிழர்களைத் “திராவிடர்கள்” என்றே அழையுங்கள் என்று இன்று உங்களிடம் கோரிக்கை வைப்போர் யார்? இராதாரவி போன்றவர்களா? அதையாவது சொல்லுங்கள்!

மொகஞ்சோதாரோ, அரப்பா நாகரிகம் திராவிட நாகரிகம் என்று அறிஞர்கள் கூறிவிட்டார்களாம். பூரித்துப் போகிறார் ஸ்டாலின். அந்த சிந்துவெளி நாகரிகம் தமிழர் நாகரிகம்தான்! எந்தத் திராவிடர் எந்த நாட்டில் வாழ்ந்தார்? அதற்கென்ன இலக்கியச் சான்று? அதற்கென்ன கல்வெட்டுச் சான்று? செப்பேட்டுச் சான்று?

தமிழர் – திரமிளர்; திராவிடர் என்று ஆனார்கள் என தேவநேயப் பாவாணர் கூறியுள்ளார் என்றும் ஸ்டாலின் தமது அறிக்கையில் “விளக்குகிறார்”. திராவிடரை நிலைநாட்ட இவ்வளவு பெரிய முயற்சி எடுப்பானேன்? “தமிழர்” என்ற இன அடையாளத்தைப் பின்னுக்குத் தள்ளத் தானே!

வலிந்து திராவிடரைத் திணிக்காவிட்டால் வருத்தப்படும் இனம் எது? மொழிஞாயிறு பாவாணர் தெளிவாகக் கூறியுள்ளார். “தமிழ் மொழி திராவிட மொழியன்று; தமிழிலிருந்து திரிந்து பிரிந்து போன தெலுங்கு, கன்னடம், மலையாளம் போன்றவையே திராவிட மொழிகள்” என்று! தமிழர் திராவிடர் அல்லர் என்றும், பாவாணர் தெளிவுபடுத்தியுள்ளார்.

தெலுங்கு, கன்னடம், மலையாளம் போன்ற மொழிகள் கூட திராவிட மொழிகள் அல்ல. அவை தமிழிலிருந்து பிரிந்தவை. அவை தமிழ் மொழிக் குடும்பத்தைச் சேர்ந்தவை (Tamil Linguistic Family).

கீழடிப் பொருட்களில் காணப்படும் எழுத்தைத் தமிழ் பிராமி என்று கூறுவது, வடநாட்டுப் பிராமிக்கு வால் பிடிக்கும் அடிமைத்தனம்! அது தமிழ் எழுத்து மட்டுமே! அதை மூலத்தமிழ் (Proto Tamil) என்று கூற வேண்டும். தமிழி என்று கூற வேண்டியதில்லை!

ஆரிய நூல்களான மனுதர்மம், குமாரில பட்டரின் தந்திரவார்த்திகா ஆகியவற்றிலிருந்து “திராவிட” என்ற சொல்லை எடுத்தேன் என்கிறார் கால்டுவெல். கால்டுவெல் கயிறு திரித்ததை வைத்து, தமிழர் நாகரிகங்களைத் “திராவிட” நாகரிகம் என்று மேலை நாட்டு ஆய்வாளர்கள் மேம்போக்காக அன்றும் கூறினார்கள்; இன்றும் கூறி வருகிறார்கள்.

இவர்கள் எல்லோரும் கால்டுவெல்லைப் போலவே முதலில் ஆரிய – பிராமணர்களிடம் பாடம் கேட்டு, சமற்கிருதம் கற்றுத் தேர்ந்த பின்னர் தமிழ் கற்றவர்கள். சமகால எடுத்துக்காட்டு – கலிபோர்னியா பல்கலைக்கழகப் பேராசிரியர் ஜார்ஜ் எல் ஹார்ட்; சில ஆண்டுகளுக்கு முன் காலமான பின்லாந்தின் அஸ்கோ பர்போலா!

ஆரியப் பெருமிதங்கள் – சமற்கிருதச் சிறப்புகள் ஆகியவற்றில் திளைத்துப் பின்னர், தமிழையும் கற்று – கால்டுவெல் காட்டிய திராவிடத்தை வழிமொழிந்தவர்கள் இவர்கள்.

ஆரியப் புரட்டு

தமிழறிஞர் என்று அறியப்படும் ஜார்ஜ் எல் ஹார்ட் என்பவரின் சமற்கிருதச் சார்பை மட்டும் – ஒரு சோறு பதமாகப் பார்க்கலாம்.

இவர் கலிபோர்னியா பல்கலைக்கழகத்தில் சமற்கிருதப் பேராசிரியராக செயல்பட்டுப் பின்னர் தமிழ் கற்றவர். தமிழ்மொழி கி.மு. 300–இல் தோன்றியது என்றும் சமற்கிருதம் கி.மு. 2000–இல் தோன்றியது என்றும் கட்டுரை எழுதியவர். சங்ககாலத் தமிழ் இலக்கியம் இந்துமதக் கருத்துகளைக் கொண்டது என்று “ஆய்வுரை” வழங்கியவர். இவருக்கு இந்திய அரசு (மோடி அரசு) 2015-இல் பத்மசிறீ விருது வழங்கி சிறப்பித்தது.

மேற்கண்ட கருத்துகளைக் கொண்ட இவரது கட்டுரையை நடப்பாண்டு 12ஆம் வகுப்பு ஆங்கிலப் பாடத்தில் சேர்த்திருந்தார்கள். கடும் எதிர்ப்புக் கிளம்பிய பின் தமிழ்நாடு அரசு அப்பாடத்தை நீக்கியது.

ஆரியமயமாக்கல் ஆபத்து

கீழடி நாகரிகத்தை இந்து நாகரிகம் – ஆரிய நாகரிகம் கலந்தது என்று கூறிட ஆரிய பிராமண “அறிஞர்கள்” இந்நேரம் அணியமாகிக் கொண்டிருப்பார்கள். இவர்கள் சிந்துவெளி தமிழர் நாகரிகத்தையே ஆரிய சரசுவதி நாகரிகம் என்று மாற்றி எழுதினார்கள். இவர்களில் இராசாராம் என்பவர் அரப்பாவில் கிடைத்த காளையின் வால் சுடுமண் வடிவத்தை – குதிரையின் வால் என்று மாற்றினார். காளை தமிழர் விலங்கு, குதிரை ஆரியர் விலங்கு! எனவே, சிந்துவெளி நாகரிகம் ஆரிய நாகரிகம் என்றார். அக்கதையை எல்லாம் உண்மையான ஆய்வாளர்கள் உடைத்துச் சுக்குநூறாக்கினர்.

எல்லாவற்றுக்கும் மேலாக அண்மையில் சிந்துவெளி நாகரிகத்தில் கிடைத்த எலும்புகளை வைத்து, மரபணு (DNA) ஆய்வு செய்ததில், அது ஆரியர் வருகைக்கு முன் இருந்த உள்ளூர் மக்கள் எலும்பு என்று கண்டறியப்பட்டுள்ளது. இதுபற்றிய ஆய்வுக்கட்டுரை Science (சைன்ஸ்) என்ற ஆங்கில ஆய்விதழில் வந்தது. அதை வைத்து ஆங்கில “இந்து” நாளேட்டில் 13.09.2019 அன்று “New reports clearly confirm ‘Arya’ migration into India” என்ற தலைப்பில் டோனி ஜோசப் கட்டுரை எழுதியுள்ளார்.

தமிழ்நாடு தமிழ்த்துறை அமைச்சர் பாண்டியராசன் (அ.தி.மு.க.) அவர்கள், “கீழடியை தமிழர் நாகரிகம் என்று கருதாமல் பாரத நாட்டின் மொத்த நாகரிகத்தின் தொடக்கமாகப் பார்க்க வேண்டும்” என்று இடுக்கில் புகுந்து கடுக்கண் கழற்றுவது போல் ஆரியக் கருத்தைப் புகுத்தினார்.

சங்கம் வளர்த்த தமிழ் மதுரையில் தமிழன்னை சிலையும், மற்ற வரலாற்றுச் சின்னங்களும் வடிப்பதற்குத் தமிழ்நாடு அரசு சார்பில் கொடுக்கப்பட்ட வரைவுக் கோட்பாடுகள் ஆரியஞ்சார்ந்து இருந்தன. அந்தத் துறைக்குப் பாண்டியராசன்தான் அமைச்சர்.

சங்ககாலத் தமிழர் பண்பாடு என்பது வேத பிராமண மதம் – இந்து மதம் ஆகியவை எல்லாம் கலந்த பண்பாடு. இந்த இந்துப் பண்பாடும் வெளிப்படும் வகையில் தமிழன்னை சிலை இருக்க வேண்டும் என்று தமிழ்நாடு அரசு வழிகாட்டும் நெறி வகுத்திருந்தது. தமிழ்த்தேசியப் பேரியக்கம், நாம் தமிழர் கட்சி மற்றும் தமிழின உணர்வாளர்கள் சமற்கிருத மாதா வடிவில் தமிழன்னை சிலை அமைப்பதை எதிர்த்து மதுரையில் போராடினோம். அச்சிலைத் திட்டத்தைத் தமிழ்நாடு அரசு கைவிட்டது.

ஆரியம் கீழடி நாகரிகத்தைக் களவாட முயலும். முடியாவிட்டால், அது மிகமிகப் பிற்காலத்து நாகரிகம் என்று சொல்லிவிடும். தமிழர்கள் ஆரியத் திருட்டு – திராவிடத் திருட்டு இரண்டிடமும் ஏமாறாமல் எச்சரிக்கையாக இருக்க வேண்டும்!

கீழடி நாகரிகம் கி.மு. ஆறாம் நூற்றாண்டைச் சேர்ந்தது என்பது சரியாக இருக்காது. அதற்கும் ஆயிரம் ஆண்டுகளுக்கு முற்பட்டதாகவே இருக்கும். மீண்டும் கீழடிப் பொருட்களை விரிவாக ஆய்வு செய்ய வேண்டும். சிந்துவெளி நாகரிகம் கி.மு. 3,300 – 1,700 என்று ஆய்வாளர்கள் கூறுகிறார்கள். கீழடி நாகரிகமும் இதையொட்டித்தான் இருக்கும்.

கடலியல் ஆய்வாளர் கிரகாம் அன்காக் பூம்புகாரிலிருந்து 5 கி.மீ. தொலைவில் கடலுக்குள் 11,500 ஆண்டு பழைமையான நகரம் ஒன்று கிடக்கிறது என்று கூறியுள்ளார். சிந்துவெளி நாகரிகம் என்பது, தமிழர்களின் வழிமுறை (Secondary Civilization) நாகரிகமே தவிர முதனிலை நாகரிகமன்று. தமிழர்கள் தெற்கிலிருந்து வடக்கே போனவர்கள்.

கடலுள் மூழ்கிய பஃறுளி ஆறு, குமரிக் கண்டம் ஆகியவையே தமிழர்களின் முதனிலை நாகரிகம் தோன்றிய இடங்கள். அவை கடலுக்குள் மூழ்கிவிட்டதால், ஆதிச்சநல்லூர், பூம்புகார் போன்றவையே இப்போதுள்ள முதனிலை நாகரிகங்கள்!

அருள் கூர்ந்து, தமிழ் இனத்தில் பிறந்த அனைவரும் தங்களைத் தமிழர் என்ற உண்மைப் பெயரில் அழைத்துக் கொள்ளுங்கள்! உங்கள் முன்னோர்க்கு இழுக்குச் சேர்க்கும் வகையில் “திராவிடர்” என்று அழைத்துக் கொள்ளாதீர்கள்! அரசியல் ஆதாயத்திற்காகவோ, பெரியார் பக்திக்காகவோ பிறந்த இனத்தை இழிவு படுத்தாதீர்கள்!

#கீழடி
#கீழடி_தமிழர்_நாகரிகம்
தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9443918095
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

போராட்டங்கள்

செய்திகள்

 
Copyright © 2013 தமிழ்த்தேசியப் பேரியக்கம்
Design by FBTemplates | BTT