உடனடிச்செய்திகள்

Monday, September 21, 2020

"புதிய விவசாய திருத்த சட்டங்களால் ரேசன் கடைகள் மூடப்படும்" - "ஆதன் தமிழ்" ஊடகத்திற்கு. ஐயா கி. வெங்கட்ராமன் நேர்காணல்!

"புதிய விவசாய திருத்த சட்டங்களால் ரேசன் கடைகள் மூடப்படும்"


"ஆதன் தமிழ்" ஊடகத்திற்கு.

தமிழ்த்தேசிய பேரியக்கப் பொதுச்செயலாளர்
ஐயா கி. வெங்கட்ராமன் நேர்காணல்!



கண்ணோட்டம் வலையொளியில்..!!!

Sunday, September 20, 2020

"பதவி அரசியலுக்கு வெளியே தமிழன்டா முழக்கத்தோடு புதிய இளைஞர்கள் புறப்பட்டுவிட்டார்கள்!” - தோழர் கி. வெங்கட்ராமன் அவர்களின் பேச்சு!

"பதவி அரசியலுக்கு வெளியே தமிழன்டா முழக்கத்தோடு புதிய இளைஞர்கள் புறப்பட்டுவிட்டார்கள்!”



தமிழ்த்தேசியப் பேரியக்கம் முன்னெடுத்த தொடர் மறியலின் இறுதி நாள் (18.09.2020) போராட்டத்தில் தமிழ்த்தேசியப் பேரியக்கப் பொதுச்செயலாளர் தோழர் கி. வெங்கட்ராமன் அவர்களின் பேச்சு!  




கண்ணோட்டம் வலையொளியில்..!!!

Saturday, September 19, 2020

“வெளி மாநிலத்தவர்களுக்கு எதிராக ஒத்துழையாமை இயக்கம் நடத்துவோம்! “வெளி மாநிலத்தவர்களுக்கு எதிராக ஒத்துழையாமை இயக்கம் நடத்துவோம்! தோழர் பெ. மணியரசன் அவர்களின் பேச்சு!

வெளி மாநிலத்தவர்களுக்கு எதிராக

ஒத்துழையாமை இயக்கம் நடத்துவோம்!



தமிழ்த்தேசியப் பேரியக்கம் முன்னெடுத்த தொடர் மறியலின் இறுதி நாள் (18.09.2020) போராட்டத்தில் தமிழ்த்தேசியப் பேரியக்கத் தலைவர் ஐயா பெ. மணியரசன் அவர்களின் பேச்சு! 




கண்ணோட்டம் வலையொளியில்..!!!

Wednesday, September 16, 2020

சூரியா அறிக்கை: நீதிபதி எஸ்.எம்.சுப்பிரமணியத்திற்கு “இந்து” நாளேடு தக்க பதிலடி! - ஐயா பெ. மணியரசன் அறிக்கை!


சூரியா அறிக்கை:
நீதிபதி எஸ்.எம்.சுப்பிரமணியத்திற்கு
“இந்து” நாளேடு தக்க பதிலடி!


பெ.மணியரசன்,
தலைவர், தமிழ்த்தேசியப் பேரியக்கம்.

அகரம் அறக்கட்டளைத் தலைவர் நடிகர் சூரியா மீது நீதிமன்ற அவமதிப்பு வழக்குத் தொடுக்க வேண்டும் என்று சென்னை உயர்நீதி மன்ற நீதிபதி எஸ்.எம்.சுப்பிரமணியம் சீறிப் பாய்ந்ததை மறுத்து அக்குவேறு ஆணி வேறாகப் பிரித்து மேய்ந்துவிட்டது இன்று(16.09.2020) இந்து ஆங்கில நாளேடு!

அவ்வேட்டின் முதன்மை ஆசிரியவுரை செய்துள்ள சாட்டையடித் திறனாய்வுகளில் சில:

“கொரோனோ அச்சத்தால் உயிருக்குப் பயந்து காணொலி மூலம் நீதி வழங்கும் நீதிமன்றம் மாணவர்களை அச்சமில்லாமல் தேர்வெழுத ஆணை இட்டது” சரியல்ல என்ற சூரியாவின் விமர்சனம் தொலைக் காட்சிகளில் ஒளிபரப்பான சில மணி நேரங்களில் முந்திக் கொண்டு, நீதிபதி எஸ்.எம்.சுப்பிரமணியம், சென்னை உயர்நீதிமன்றத் தலைமை நீதிபதிக்கு, சூரியா மீது அவதூறு வழக்குத் தொடுக்கக் கடிதக் கணை பாய்ச்சினார். இதற்கான அவசரக் காரணத்தை நீதிபதி கூற வேண்டும்!

விமர்சனங்களை சகித்துக் கொள்ளாத நீதிபதியின் (எஸ்.எம்.சுப்பிரமணியம்) வேகம் மன்னராட்சியின் எதேச்சாதிகாரம் போல் உள்ளது.

சமூகத்தில் சிறப்பு வாய்ப்பற்றவர்களின் பிள்ளைகள் கல்வி கற்பதற்கு உதவிடத் தனி அறக்கட்டளை வைத்துப் பாராட்டத் தக்க பணிகள் செய்து வருகிறார் அந்த நடிகர். எனவே அவர், மாணவர்களின் நலன் கருதி செய்த விமர்சனம் நீதி மன்ற அவமதிப்பு அல்ல! மேலும் அவருக்கு அரசமைப்புச் சட்டம் வழங்கியுள்ள கருத்துரிமையை - பொது நலன் சார்ந்த கருத்துரிமையைப் பறிப்பதற்கு எந்தக் காரணமும் இல்லை. அத்துடன், நீதிபதி எஸ்.எம்.சுப்பிரமணியம் சூரியா மீது அவதூறு வழக்குப் பதிவு செய்ய விடுத்த வேண்டுகோளை உயர்நீதி மன்றத் தலைமை நீதிபதி அனுமதிக்கக் கூடாது.

மேலும், உச்சநீதிமன்றத் தீர்ப்பு பற்றி செய்த விமர்சனத்தின் மீது, அவமதிப்பு வழக்குத் தொடுக்க உயர்நீதிமன்றத்திற்கு அதிகார வரம்பில்லை! உச்சநீதிமன்றம், விதுசா ஓபிராய் வழக்கில் 2017-இல் அளித்த தீர்ப்பே இதற்குச் சான்று!

எனவே சென்னை உயர்நீதிமன்றத் தலைமை நீதிபதி அமரேஸ்வர் பிரதாப் சாகி அவர்கள், சூரியாவுக்கு எதிராக அவதூறு வழக்குத் தொடுக்க அனுமதிக்கக் கூடாது.

சூரியா மீது அவதூறு வழக்குத் தொடுக்கக் கூடாது என்று சென்னை உயர்நீதிமன்ற மேனாள் நீதிபதிகள் ஆறு பேர் தலைமை நீதிபதிக்கு எழுதிய கடிதத்தில், எஸ்.எம்.சுப்பிரமணியத்தின் வாதத்தில் சட்டதின் சாரம் இல்லை என்று குறிப்பிட்டுள்ளார்கள் என்றும் இந்து ஆசிரியவுரை கூறியுள்ளது.

இந்து நாளேடு கொடுத்துள்ள பதிலடி போதுமா?

கடைசியாக ஒரே ஒரு வினா: இந்த ஆசிரியவுரைக்கு இந்து ஏடு “மதியற்ற முன்னெடுப்பு”(Ill-advised move) என்று தலைப்புக் கொடுத்துள்ளது. நீதிபதியின் மதியை மறைத்தது எது? இந்து ஏட்டுக்குப் பாராட்டுகள்!

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


Tuesday, September 15, 2020

சூரியா அறிக்கை நீதிமன்ற அவமதிப்பல்ல சமூகநீதித் தவிப்பு! - ஐயா பெ. மணியரசன் அறிக்கை!



சூரியா அறிக்கை  நீதிமன்ற அவமதிப்பல்ல
சமூகநீதித் தவிப்பு!

பெ.மணியரசன், 
தலைவர், தமிழ்த்தேசியப் பேரியக்கம்.

மருத்துவக் கல்லூரி மாணவர் சேர்க்கை நுழைவுத் தேர்வான நீட் தேர்வினால் பாதிக்கப்பட்டு இதுவரை 13 மாணவ மாணவிகள் தமிழ்நாட்டில் தற்கொலை செய்து உயிரை மாய்த்துக் கொண்டார்கள்.

நடப்பாண்டு நீட் தேர்வு 13.09.2020 அன்று நடைபெறவிருந்த நிலையில், அதன் மீதுள்ள அச்சத்தின் காரணமாக ஒரே நாளில் 11.09.2020 அன்று மட்டும் ஒரு மாணவி உட்பட மூன்று மாணவர்கள் தற்கொலை செய்து கொண்டு மடிந்தார்கள். தமிழர்களிடையே இந்தத் தற்கொலைகள் பெருஞ்சோகத்தை ஏற்படுத்தின. 

இந்தப் பின்னணியில் நீட் தேர்வைக் கைவிட வலியுறுத்தி அகரம் அறக்கட்டளைப் பொறுப்பாளரும் நடிகருமான சூரியா 13.09.2020 அன்று ஓர் அறிக்கை வெளியிட்டார். 

சூரியாவின் அறிக்கை உச்ச நீதிமன்றத்தையும் நீதித்துறையையும் அவமதித்துள்ளதாகவும் அவர் மீது சென்னை உயர் நீதிமன்றம் தானாக முன்வந்து, நீதிமன்ற அவமதிப்பு வழக்குத் தொடுக்க வேண்டும் என்றும் அதன் தலைமை நீதிபதி ஏ.பி. சாகி அவர்கட்கு, அதே உயர் நீதிமன்ற நீதிபதி எஸ்.எம். சுப்பிரமணியம் அவர்கள் கடிதம் எழுதியுள்ளார். 

சூரியா அறிக்கையிலிருந்து நீதிபதி சுப்பிரமணியம் சுட்டிக்காட்டியுள்ள குற்றச்சாட்டு, “கொரோனா அச்சத்தால் உயிருக்குப் பயந்து காணொலி மூலம் நீதி வழங்கும் நீதிமன்றம், மாணவர்களை அச்சமில்லாமல் தேர்வு எழுத ஆணையிடுகிறது” என்ற பகுதியாகும். 

கொரோனாவில் நீதிபதிகளுக்குரிய பாதுகாப்பு மட்டுமின்றி, வழக்கறிஞர்கள், வழக்கிற்கு உரிய மக்கள், நீதிமன்ற அலுவலர்கள் மற்றும் ஊழியர்கள், பொதுமக்கள் முதலிய அனைவர்க்குமான பாதுகாப்புக் கருதித்தான், நீதிமன்றங்கள் காணொலி மூலம் இயங்க வேண்டும் என்று உச்ச நீதிமன்றம் ஆணை இட்டது. எனவே, சூரியா சுட்டிக்காட்டியுள்ள “உயிருக்குப் பயந்து” என்ற தொடர் நீதிபதிகளை மட்டுமே குறித்தது ஆகாது.

அடுத்து, இந்தக் கொரோனா பொது முடக்கக் காலத்தில் நீட் போன்ற நுழைவுத் தேர்வுகள் நடத்தக் கூடாது என்ற கோரிக்கையை மாணவர்களும், மக்களும் வைத்தனர். இது தொடர்பாக நடந்த வழக்கில் உச்ச நீதிமன்றம் நீட் தேர்வு நடத்த அனுமதி அளித்துத் தீர்ப்பளித்தது. 

இந்தியா முழுவதும் 15 இலட்சத்திற்கு மேல் மாணவ மாணவிகள் பங்கேற்கும் நீட் தேர்வை நடப்புக் கொடிய கொரோனா காலத்தில் நடத்தாமல் அம்மாணவர்கள் பன்னிரெண்டாம் வகுப்பில் பெற்ற மதிப்பெண்களை வைத்து, மருத்துவக் கல்லூரிகளில் சேர உச்ச நீதிமன்றம் வழிகாட்டியிருக்கலாம். விடுதலை பெற்ற இந்தியாவில் 1947லிருந்து 2014 வரை மருத்துவக் கல்லூரி மாணவர் சேர்க்கையில் கடைபிடித்து வந்த நடைமுறை இதுதான்!

கொரோனாக் கொடிய முடக்கத்தில் விதிவிலக்காக இவ்வாண்டு மாணவர் சேர்க்கைக்கு, ஏற்கெனவே நீண்டகாலமாக இருந்து வந்த நடைமுறையைப் பின்பற்ற உச்ச நீதிமன்றம் ஆணை இட்டிருக்கலாம் என்ற விமர்சனம்தான் சூரியாவின் அறிக்கையின் சாரம்! இந்த விமர்சனம் நீதிபதிகளின் தீர்ப்பிற்கு எந்தக் கெட்ட உள்நோக்கமும் கற்பிக்கவில்லை. 

உள்நோக்கம் கற்பிக்காமலும் நீதிபதிகளைத் தனிப்பட்ட முறையில் இழிவுபடுத்தாமலும் தீர்ப்புகளை விமர்சிக்கலாம் என்று உச்ச நீதிமன்றம் ஏற்கெனவே தீர்ப்பளித்துள்ளது. 

சூரியா அறிக்கை நீதிமன்ற அவமதிப்புக் குற்றச்சாட்டில் வராது என்றும், அவ்வாறு சூரியா மீது வழக்குத் தொடுக்கக் கூடாது என்றும் சென்னை உயர் நீதிமன்றத் தலைமை நீதிபதி சாகி அவர்கட்கு வேண்டுகோள் விடுத்து, சென்னை உயர் நீதிமன்றத்தின் மேனாள் நீதிபதிகள் கே. சந்துரு, கே.என். பாஷா, டி. சுதந்திரம், து. அரிபரந்தாமன், கே. கண்ணன், ஜி.எம். அக்பர் அலி ஆகியோர் கடிதம் எழுதியிருப்பது பாராட்டிற்குரிய முன்னெடுப்பாகும்! 

தமிழ்நாட்டு பா.ச.க.வினர் வழக்கம்போல் தமிழர்களின் உணர்வுக்கும் உரிமைக்கும் எதிராகக் கண்டனக் குரல் எழுப்புகிறார்கள். 

மருத்துவக் கல்லூரி மாணவர் சேர்க்கைக்கு அனைத்திந்திய அளவில், “நீட்” என்ற நுழைவுத் தேர்வு நடத்துவது ஒடுக்கப்பட்ட, பிற்படுத்தப்பட்ட, அரசுப் பள்ளி மாணவர்களை வடிகட்டி, கழித்துக் கட்டுவதற்கான வர்ணாசிரம உத்தி என்பதை தமிழ்நாட்டில் எல்லோரும் புரிந்து கொண்டுள்ளார்கள். இந்த உணர்வைத்தான் “நீட்” போன்ற “மனுநீதி”த் தேர்வுகள், எங்கள் மாணவர்களின் வாய்ப்பை மட்டுமின்றி உயிர்களையும் பறிக்கிறது” என்று மிகச் சரியாகச் சொல்லியுள்ளார் சூரியா! 

“அகரம்” அறக்கட்டளை மூலம் பல்லாயிரக்கணக்கான தமிழ் மாணவர்களின் படிப்பிற்குரிய படிக்கட்டுகள் அமைத்துத் தரும் சூரியா, அம்மாணவர்களின் மருத்துவக் கல்லூரி வாய்ப்பையும் உயிரையும் பறிக்கும் நீட் தேர்வுக்கு எதிராகக் கண்டன அறிக்கை விடுத்தது பாராட்டத்தக்க செயலாகும்!


தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


 


“தமிழ்நாட்டிற்குத் தேவை இறையாண்மை” - ஐயா பெ.மணியரசன் அவர்களின் செவ்வி!

தமிழ்நாட்டிற்குத் தேவை இறையாண்மை”



தமிழ்த்தேசியப் பேரியக்கத் தலைவர்

 ஐயா பெ.மணியரசன் அவர்களின் செவ்வி!




கண்ணோட்டம் வலையொளியில்..!!!

Sunday, September 13, 2020

“தமிழ்தேசியம் பேசாத.! முதல்வர் ஆகி என்ன பண்ணுவ.!" பாயும் “ழகரம்” இணைய ஊடகத்துக்கு - ஐயா பெ.மணியரசன் அவர்களின் செவ்வி!

தமிழ்தேசியம் பேசாத.! முதல்வர் ஆகி என்ன பண்ணுவ.!" பாயும் பெ.மணியரசன்



“ழகரம்” இணைய ஊடகத்துக்கு

தமிழ்த்தேசியப் பேரியக்கத் தலைவர்

 ஐயா பெ.மணியரசன் அவர்களின் செவ்வி!




கண்ணோட்டம் வலையொளியில்..!!!

Friday, September 11, 2020

“ செப்டம்பர் 11” தமிழ்நாடு தமிழர்க்கே முழக்க நாள்!“ - ஐயா,பெ.மணியரசன் உரை”

“ செப்டம்பர் 11” தமிழ்நாடு 

தமிழர்க்கே முழக்க நாள்!



தமிழ்த்தேசியப் பேரியக்கத் தலைவர்
ஐயா,பெ.மணியரசன் உரை”!




கண்ணோட்டம் வலையொளியில்..!!!

“தமிழக மாணவர்கள் திட்டமிட்டு புறக்கணிக்கப் படுகிறார்கள்” - “ஆதான்தமிழ்” இணைய ஊடகத்துக்கு ஐயா பெ.மணியரசன் அவர்களின் செவ்வி!

தமிழக மாணவர்கள்  திட்டமிட்டு புறக்கணிக்கப் படுகிறார்கள்”


“ஆதான்தமிழ்” இணைய ஊடகத்துக்கு

தமிழ்த்தேசியப் பேரியக்கத் தலைவர்

 ஐயா பெ.மணியரசன் அவர்களின் செவ்வி!




கண்ணோட்டம் வலையொளியில்..!!!

Wednesday, September 9, 2020

” தமிழ்நாடு அரசுப்பள்ளிகளில் சமற்கிருதம் படிக்க ஊக்கத் தொகையா?” - ஐயா பெ. மணியரசன் அறிக்கை!


”தமிழ்நாடு அரசுப்பள்ளிகளில்
 சமற்கிருதம் படிக்க ஊக்கத் தொகையா? 

தமிழ்த்தேசியப் பேரியக்கத் தலைவர்
ஐயா பெ. மணியரசன் அறிக்கை!

தமிழ்நாடு அரசு பள்ளிக் கல்வி இணை இயக்குநர் அலுவலகத்திலிருந்து தமிழ்நாடு அரசு பள்ளிகளுக்கு அண்மையில் ஒரு சுற்றறிக்கை வந்துள்ளது. அதில் 9ஆம் வகுப்பு முதல் 12ஆம் வகுப்பு வரை படிக்கும் மாணவர்கள், சமற்கிருதம் படிக்க இந்திய அரசு உதவித்தொகை தருவதாகவும், அவ்வாறு விரும்பும், தகுதியுள்ள மாணவர் பட்டியலை எடுத்து அந்தந்த மாவட்ட முதன்மைக் கல்வி அலுவலகர்களுக்கு அனுப்பி வைக்குமாறு கோரப்பட்டுள்ளது.

இக்கடிதத்தில் குறிப்பிடப்ப்பட்டுள்ள வழிகாட்டும் நெறிமுறைகளைப் பின்பற்றி உரிய படிவத்தில் (form 1, form 2) நிரப்பி 10.09.2020 மாலை 5 மணிக்குள் கையொப்பமிட்ட நகலினை அனுப்பி வைக்க வேண்டும் என்றும் கேட்கப்பட்டுள்ளது.

மோடி அரசு இந்தியை மட்டுமின்றி சமற்கிருதத்தையும் சேர்த்தே தமிழ்நாட்டில் திணிக்கிறது என்பதற்கு மேற்கண்ட கடிதம் மற்றுமொறு சான்று. இந்தி மற்றும் சமற்கிருத மொழிகளை விரும்பினால் படிக்கலாம் என்று போலியாக சொல்லிக்கொண்டு, இந்தியைக் கட்டாயமாகவும், சமற்கிருதத்தைப் பணத்தாசை காட்டியும் திணிக்கிறது. இச்செயல் தமிழை, தமிழ்நாட்டின் கல்வியில் இருந்து முற்றிலுமாக நீக்கிவிடும் தொலைநோக்குத் திட்டம் கொண்டது. மேலும் தமிழ்நாடு அரசின் இருமொழிக் கொள்கைக்கு எதிரான செயல்பாடாகும்.

அத்துடன் இந்தி சமற்கிருதம் இரண்டையும் திணிபதன் மூலம் தமிழ்நாட்டுக் கல்வியை ஆரியமயப் படுத்தும் உள்நோக்கமும் இதில் அடங்கியுள்ளது.

தனது அரசின் இருமொழித் திட்டத்திற்குக் குழி தோண்டும் சமற்கிருதத் திணிப்பை ஆதரித்துத் தனது அதிகாரத்தில் உள்ள பள்ளிகளுக்கு சுற்றறிக்கை அனுப்புவது தமிழ்நாட்டு மக்களை ஏமாற்றும் செயலாகும். முதலமைச்சர் எடப்பாடி பழனிச்சாமி அரசு இருமொழிக் கொள்கையை உண்மையாகவும் உறுதியாகவும் பின்பற்றுகிறது என்றால் உடனடியாக சமற்கிருத திணிப்பு சுற்றறிக்கையை இரத்து செய்து வெளிப்படையாக அறிவிக்க வேண்டும் என்று தமிழ்த்தேசியப் பேரியக்கதின் சார்பில் கேட்டுக்கொள்கிறேன்.

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam


Friday, September 4, 2020

“ தகவல் அறியும் சட்டப்படி கேட்ட கேள்விக்கு, இந்தியில் விடை!“ - ஐயா,பெ.மணியரசன் ஆவேசம்!”

“ தகவல் அறியும் சட்டப்படி கேட்ட கேள்விக்கு, இந்தியில் விடை!



தமிழ்த்தேசியப் பேரியக்கத் தலைவர்
ஐயா,பெ.மணியரசன் ஆவேசம்!”




கண்ணோட்டம் வலையொளியில்..!!!

”பா.ச.க. பரவாமல் தடுக்கும் தத்துவம்!” - ஐயா பெ. மணியரசன் சிறப்புக்கட்டுரை!


”பா.ச.க. பரவாமல் தடுக்கும் தத்துவம்!”

தமிழ்த்தேசியப் பேரியக்கத் தலைவர்
ஐயா பெ. மணியரசன் சிறப்புக்கட்டுரை!

வரும் சட்டப்பேரவைத் தேர்தலுக்கான (2021) முதலமைச்சர் வேட்பாளரை இப்போதே அறிவித்துவிட வேண்டும்; எடப்பாடி பழனிச்சாமிதான் முதல்வர் வேட்பாளர் என்று அ.இ.அ.தி.மு.க.வின் அமைச்சர்கள் சிலர் பேசினர். வேறு சில அமைச்சர்கள், தேர்ந்தெடுக்கப்பட்ட அ.இ.அ.தி.மு.க. சட்டப்பேரவை உறுப்பினர்கள் கூடி முதலமைச்சரைத் தேர்ந்தெடுப்பார்கள்; முன்கூட்டியே முதலமைச்சர் வேட்பாளரை அறிவிக்கக்கூடாது என்றனர். திரைமறைவில் வளர்ந்து கொண்டிருந்த எடப்பாடி - ஓ.பி.எஸ். குழு மோதல் தெருவுக்கு வந்துவிட்ட பின் இருவரும் இடைக்காலப் போர் நிறுத்தம் அறிவித்துள்ளார்கள். முதல்வர் வேட்பாளர் குறித்து இப்போது யாரும் பேசக்கூடாது; தக்க நேரத்தில் கழகம் முடிவு செய்யும் என்று அறிவித்துள்ளார்கள்.
கர்நாடகம், மத்தியப்பிரதேசம் இரண்டிலும் தேர்தலை எதிர்கொள்ளாமலே ஆளும் கட்சியைப் பிளவுப்படுத்தி, ஆட்சியைப் பிடித்தது பா.ச.க.! இராசஸ்தானில் ஆளும் காங்கிரசைப் பிளவுபடுத்திய பா.ச.க. கடைசியில் தோற்று விட்டது.
திராவிடப் பாசறையான தி.மு.க.விலிருந்து தாவி ஆரியப் பாசறையான பா.ச.க.வுக்கு அண்மையில் போன வி.பி. துரைசாமி, “வரும் சட்டப்பேரவைத் தேர்தலில் தமிழ்நாட்டில் பா.ச.க. தலைமையில்தான் கூட்டணி” என்று அறிவித்தார். அடுத்து, பா.ச.க.வின் தமிழ்நாட்டுத் தலைவர் எல். முருகன், “வரும் சட்டப்பேரவைத் தேர்தலில் பா.ச.க. தனித்து நின்றாலும் 60 தொகுதிகளில் வெற்றிபெறும்” என்று கூறினார். தமிழ்நாட்டில் பா.ச.க. வளர்ந்து விட்டது என்றார்.
ஓ. பன்னீர்ச்செல்வத்தை ஆதரித்து, துக்ளக் எழுதத் தொடங்கி விட்டது! “தர்ம யுத்தம் - 2”-ஐ ஓ.பி.எஸ். தொடங்குவார் என்று அது அட்டைப்படம் போட்டுள்ளது (02.09.2020). ஓ.பி.எஸ். மகன் மக்களவை உறுப்பினராக வெற்றி பெற்றது இரட்டை இலையில்; செயல்படுவது தாமரையில்! பா.ச.க. தலைமையுடன் உள்ள உறவைக் காட்டித்தான் எடப்பாடியை சமாளித்து வருகிறார் ஓ.பி.எஸ்!
தி.மு.க.வின் முக்கியப் பொறுப்பில் இருந்த வி.பி. துரைசாமி பா.ச.க.வில் சேர்ந்தததுடன், அக்கழகத்தின் சரிவு நிற்கவில்லை; தி.மு.க.வின் தலைமை நிலையச் செயலாளரும், தியாகராய நகர் சட்டப்பேரவை உறுப்பினருமான கு.க. செல்வம் கரை வேட்டியை மாற்றி, காவி உடுத்தி பா.ச.க.வில் கலந்து விட்டார். பா.ச.க. வின் தமிழ்நாட்டுத் தலைவர் எல். முருகன், தி.மு.க.விலிருந்து இன்னும் பல தலைவர்கள் பா.ச.க.விற்கு வர உள்ளனர் என்றும் வரும் டிசம்பர் மாதம் தமிழ்நாட்டில் அரசியல் மாற்றம் ஏற்பட வாய்ப்புள்ளது என்றும் கூறியுள்ளார் ( மாலை மலர் - 01.09.2020 ).
“இது பெரியார் மண்; இங்கு பா.ச.க.வின் இந்துத்துவா எடுபடாது” என்றெல்லாம் திராவிட வாய் வீச்சாளர்கள் பழைய பேச்சையே மீண்டும் மீண்டும் பேசி, புளிச்ச ஏப்பம் விட்டுக் கொண்டு இருக்கப் போகிறார்களா? அவர்களின் பேச்சை நம்பி தமிழர்கள் ஏமாறப் போகிறார்களா?
ஒரு சமூகம் என்று எடுத்துக் கொண்டால் ஆரியரில் நேர்மையானவர்களே இல்லை என்று கூற முடியாது; அப்படிப்பட்டவர்கள் மிகமிகக் குறைவு! அதனால் தான் பெரும்பான்மையைக் கணக்கில் கொண்டு, ஆரியர்களுக்கு ஆன்மிக ஒழுக்கமோ, ஆண்டவன் மீது அச்சமோ இல்லை என்று நாம் சொல்லி வருகிறோம்! மற்ற சமூகத்தினரின் மன பலவீனத்தைப் பயன்படுத்தித்தான் இன்றுவரை அவர்கள் எசமானப் பதவியில் இருந்து வருகிறார்கள். நம்முடைய தமிழ்ச் சமூகத்தில் பலவீனர்களுக்குப் பஞ்சமா என்ன?
குற்றச் செயல்களில் சிக்குண்டோர், கோடிகளைக் குவிக்க ஆசைப்படுவோர், அதிகாரத்தின் காலடியே காப்பாற்றும் என அண்டிப்பிழைக்கும் உளவியல் கொண்டோர், பதவிக் காமத்தில் பரிதவிப்போர் எனப் பலவகைப் பலவீனர்கள் பா.ச.க.வில் சேர்கிறார்கள்! பலவீனங்களால் பீடிக்கப்பட்ட இந்தத் தனிநபர்களை விட தமிழ்ச சமூகத்திற்கு ஆபத்தானவை - பா.ச.க,விற்குப் பட்டுக் கம்பளம் விரிக்கும் சந்தர்ப்பவாதக் கட்சிகள்!
இப்போது அ.இ.அ.தி.மு.க. பா.ச.க. கூட்டணியில் இருக்கிறது. ஒரு வேளை - இக்கூட்டணி முறிந்தால் தி.மு.க. - பா.ச.க.வுடன் கூட்டணி சேரும் ஆபத்து உண்டு! ஏற்கெனவே 1999 முதல் 2004 வரை பா.ச.க.வுடன் கூட்டணி சேர்ந்து, அதன் நடுவண் அமைச்சரவையில் பங்கு வகித்தது தி.மு.க.! பா.ம.க. இப்பொழுது பா.ச.க. கூட்டணியில் தான் இருக்கிறது. தே.மு.தி.க.வும் 2019 தேர்தலில் இருந்து பா.ச.க. கூட்டணியில் தான் இருக்கிறது. ம.தி.மு.க. 2014 மக்களவைத் தேர்தலில் பா.ச.க.வுடன் கூட்டணி சேர்ந்தது.
பா.ச.க. பாசிசம் ஓர் ஆட்டம் ஆடித்தான் வீழும்! அதை வீழ்த்தும் ஆற்றல் பல்வேறு மாநிலக் கட்சிகளின் எதிர்ப்போராட்டங்களில் அடங்கியுள்ளது. இந்தியாவின் பன்மை இன அடையாங்களை வேகமாக அழித்து வரும் மோடி ஆட்சிக்கு எதிராக - மண்ணின் இனம் சார்ந்தும், சமூகங்கள் சார்ந்தும் செயல்படும் கட்சிகள் போராடும் சூழல் அதிகரித்து வருகிறது. பன்னாட்டு நிறுவனங்களுக்கு இந்தியாவை மலிவாக ஏலம் விட்டுக் கொண்டுள்ள மோடி அரசின் பொருளியல் கொள்கை எல்லாத் தரப்பு மக்களின் வாழ்க்கைத் தரத்தையும் வீழ்த்திக் கொண்டுள்ளது. ஒரு கட்டத்தில் மக்கள் எதிர்ப்பு எழுச்சி பெறும். அப்போது மோடியின் ஒற்றை சர்வாதிகாரத்தை எதிர்த்து உட்கட்சிப் பூசல் வெடிக்கும்.
ஏனெனில் கூட்டுத் தலைமையாக உட்கட்சி சனநாயகத்திற்கு உரிய முகாமை கொடுத்து இயங்கி வந்த பா.ச.க.வை ஒரு நபர் ஏதேச்சாதிகாரக் கூடாரமாக மாற்றிவிட்டார் மோடி!
அந்நிலையில் தமிழ்நாடு எப்படி இருக்கும்? அடிப்படை மனித உரிமைகளையும் - சனநாயக உரிமைகளையும் பறித்து 1975 - 1976 இல் இந்திராகாந்தி நெருக்கடி நிலை என்ற சர்வாதிகாரத்தைச் செயல்படுத்தியபோது தமிழ்நாடு எப்படி இருந்தது? தி.மு.க. நெருக்கடி நிலையை எதிர்த்தது; அ.இ.அ.தி.மு.க. நெருக்கடி நிலையை ஆதரித்தது. நெருக்கடி நிலையைக் கைவிடாமல் அதைக் கொஞ்சம் தளர்த்தி 1977 மார்ச் மக்களவைக்கான பொதுத் தேர்தலை இந்திரா காந்தி நடத்தினார். வெற்றிபெறுவோம் என்ற மிகை நம்பிக்கையில் தேர்தல் நடத்தினார். வடநாட்டில் இந்திரா காங்கிரசு படுதோல்வி அடைந்தது. ஆட்சியை இழந்தது காங்கிரசு! இந்திரா காந்தியே தமது தொகுதியில் தோற்றுப் போனார். ஆனால் அ.தி.மு.க. கூட்டணியில் போட்டியிட்ட இந்திரா காங்கிரசு தமிழ்நாட்டில் பெருவெற்றி கண்டது.
எனவே, தமிழ்நாட்டில் பா.ச.க. தலையெடுக்க முடியாது என்ற இறுமாப்பில் தமிழர்கள் இருக்கக் கூடாது. பாசிச பா.ச.க.வுக்கு தமிழ்நாட்டில் கூட்டணி கட்சிகள் இருக்கும். பா.ச.க. தலையெடுக்காமல் தடுக்கும் சனநாயக வழிகளைத் தமிழர்கள் பொறுப்புடன் பின்பற்ற வேண்டும். இந்துத்துவா என்ற போலித் தத்துவம் மற்றும் புரட்டு நடைமுறைகள் என்ற இருமுனைகளைக் கொண்டுள்ளது.
பா.ச.க. இந்துத்துவா என்பது ஆரிய மேலாதிக்கவாதம் கொண்ட புதிய வர்ணாசிரம தர்மம் தவிர வேறல்ல! அதை எதிர்கொள்ளத் தமிழ்த்தேசியம் என்ற தத்துவத்தைத் தமிழர்கள் ஏந்த வேண்டும். ஆரிய இனவாதத்தை முறியடிக்கும் ஆற்றல் தமிழ்நாட்டில் தமிழினத் தத்துவத்திற்கு மட்டுமே உண்டு!
திராவிடம் என்பது ஆரியம் உருவாக்கிய சொற்கோவை! ஆரியத்தின் கையடக்கப் பதிப்பு தான் திராவிடம்! திராவிடம் என்ற பெயரில் ஓர் இனமோ, ஒரு மொழியோ, ஒரு நாடோ இருந்ததில்லை. திராவிடம் என்பது ஆரியக் கற்பனை! ஆரியத்திற்கும் திராவிடத்திற்கும் நடப்பது பங்காளிச் சண்டை! ஆரியத்திற்கும் தமிழர்களுக்கும் இடையே நடப்பது பகையாளிச் சண்டை!
மதச்சார்பற்ற இந்தியத்தேசியம் என்பது மாய்மாலப் பேச்சு! இந்துமதத் தீவிரவாதத்தின் மேல் கட்டப்பட்டதுதான் இந்தியத்தேசியம்! இந்திய விடுதலைப் போராட்டத்தின் போதே ஆரியத்துவாவாதிகள் இந்த நோக்குடன் இந்தியத்தேசியத்தைக் கட்டமைத்தார்கள்.
இந்து மதத்தைப் பயன்படுத்தி, இந்தியாவை ஒரு தேசமாகக் கற்பனை செய்து, இந்தியத் தேசியத்தை உருவாக்கியவர்கள் ஆரியத்துவாவாதிகளே! இந்துதான் ‘இந்தியன்’ என்று புதிய தேசிய இனத்தைக் கற்பித்தார்கள். இந்துதான், இந்தியன் மற்ற மதத்தவர்கள் வெளியார் என்று இப்போது கற்பிக்கிறது பா.ச.க.! இந்தியா என்பது ஆங்கிலேய வணிக வேட்டையாடிகள் தங்கள் பீரங்கிகளால் உருவாக்கிய ஒரு நிர்வாகக் கட்டமைப்பு என்ற புரிதலில் தெளிவும் உண்மையும் உள்ளவர்களால் மட்டுமே இந்துத்துவா என்கிற ஆரியத்துவாவும் பா.ச.க.வும் தமிழ்நாட்டில் பரவாமல் தடுக்க முடியும். இடதுசாரிகள் இந்தியத்தேசியத்தை முன் நிபந்தனையாக்கிக் கொண்டு பா.ச.க.வின் முன்னேற்றத்தைத் தடுக்க முடியாது. மேற்கு வங்கத்தில், சி.பி.எம். கட்சியினர் - பிரமுகர்கள் உட்பட பா.ச.க.வில் இணைகிறார்கள் என்பதே இதற்குச் சான்று.
“இந்துத்துவா இந்தியத்தேசியத்தை” உருவாக்கிய முதல் அரசியல் கட்சி காங்கிரசு! இப்போதும் அது பாபர் மசூதித் தகர்ப்பு, அதே இடத்தில் இராமர் கோயில் எழுப்புதல், சம்மு - காசுமீர் உரிமைப்பறிப்பு, சமற்கிருதத் திணிப்பு, இந்தித் திணிப்பு, ஒரே தேச முழக்கம், மாநில உரிமைப் பறிப்பு போன்றவற்றில் சுற்றி வளைத்தோ அல்லது நேரடியாகவோ பா.ச.க.வுடன் இணைந்து செல்கிறது காங்கிரசு!
இந்தியத் தேசியத்தை முதன்மைப்படுத்திக் கொண்டிருக்கும் இடதுசாரிகளும் காங்கிரசாரும் பா.ச.க.வின் இந்துத்துவா என்ற தத்துவத்திற்கு மாற்றுத் தத்துவத்தை வழங்க முடியாது. திராவிடவாதத்தின் தந்தையாக விளங்கும் பெரியார் இந்துத்துவா வர்ணாசிரமத்துக்கு எதிரான கருத்துகளை முன்வைத்தார். ஆனால் மாற்று தேசியத்தையோ, மாற்றுத் தத்துவத்தையோ முன்வைக்கவில்லை. பெரியாரின் கடவுள் மறுப்புக் கருத்துகள் உலகம் முழுவதும் இருக்கின்றன. அது ஒரு குறிப்பிட்ட தேசத்திற்கான தனித்துவமான தத்துவமில்லை.
தமிழ்நாட்டில் பா.ச.க. பரவாமல் தடுக்கும் தத்துவம் தமிழ்த்தேசியம்தான்! இந்தியா ஒரு தேசமல்ல; தமிழ்நாடு ஒரு தேசம் என்கிறது தமிழ்த்தேசியம்! தமிழர் ஆன்மிகம் இரண்டாயிரம் ஆண்டுகளுக்கு மேல் ஆரிய ஆன்மிகத்தை எதிர்த்து வந்த இலக்கியச் சான்றுகள், வரலாற்றுச் சான்றுகள் ஏராளமாக இருக்கின்றன.
ஆங்கிலேயர் சிந்து ஆற்றை அடையாளப்படுத்தி சூட்டிய இந்து மதம் என்ற பெயர்ப் பொதுமை இருந்தாலும் ஆரிய இந்து வேறு; தமிழ் இந்து வேறு என்கிறோம். ஒற்றைக் கடவுள், ஒற்றைப் புனித நூல் கொண்ட கிறித்துவத்தில் ஒன்றுக்கொன்று தொடர்பில்லாத ஆர்.சி. மற்றும் புராட்டஸ்டண்டு பிரிவுகள் இருக்கின்றன. அதேபோல் இஸ்லாத்தில், பகை கொண்டு மோதிக் கொள்ளும் சன்னி - சியா பிரிவுகள் இருக்கின்றன. எனவே தமிழ் இந்துக்கு ஆரியத் தலைமையோ, ஆரியத் தொடர்போ இல்லை என்பதில் எந்தத் தடையும் இல்லை. இந்து மத்திற்கு என்று ஒற்றை தெய்வமோ, ஒற்றைப் புனித நூலோ, ஒற்றைத் தலைமையோ இல்லை. தமிழ் மக்கள் நடைமுறையில் இந்து மதத்தை ஏற்றுக் கொண்டுள்ளார்கள். இந்து மத மறுப்பையும் கடவுள் மறுப்பையும் தமிழ்நாட்டு வெகுமக்கள் ஏற்கமாட்டார்கள். பெரியாரின் இந்துமத எதிரப்பும் கடவுள் மறுப்பும் ஒரு பகுதிச் செயல்வீரர்களுக்கு ஏற்புடையது. அந்த ஏற்பு வெகுமக்களுக்கு அல்ல! அதனால் தான், பெரியாரை விட்டுப் பிரிந்த அண்ணா, “ஒன்றே குலமும் ஒருவனே தேவனும்” என்ற திருமூலர்க் கொள்கையே தன் கொள்கை என்றார்.
கடவுள் ஏற்பும் கடவுள் மறுப்பும் அவரவர் உரிமை! இவ்விரு பிரிவாரும் ஒருவரையொருவர் இழிவுபடுத்திக் கொள்ளாமல் தம் தம் கருத்துகளை மக்களிடம் முன்வைக்கலாம். தமிழ் இந்துவுக்கும் ஆரிய இந்துவுக்கும் இணைப்பில்லை. தமிழ்ச் சைவ, வைணவ நெறிகள் பிராமணியத்தைப் புறந்தள்ளுபவை என்கிறது தமிழ்த்தேசியப் பேரியக்கம் முன் வைக்கும் தமிழ்த்தேசியம்!
மனிதர்கள் அனைவரும் சமம்; தமிழர்கள் அனைவரும் சமம்; ஆணும் பெண்ணும் சமம் என்கிறது நாம் முன் வைக்கும் தமிழ்த்தேசியம்!
பா.ச.க.வின் ஆரிய இந்துத்துவா தத்துவத்திற்கு மாற்றுத் தத்துவமாகத் தமிழ்த்தேசியம் அமைகிறது. தமிழர் அறம் மனிதகுல மேன்மைக்குரிய நடைமுறைக் கோட்பாடாகும்.
தமிழ்நாட்டில் பா.ச.க. பாசிசம் பரவாமல் தடுப்பதற்கான சரியான தத்துவ முழக்கம் தமிழ்த்தேசியமே என்பதை இடதுசாரி மற்றும் திராவிடப் பற்றாளர்கள் சிந்திக்க வேண்டும்.

தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

Tuesday, September 1, 2020

“தமிழ்நாட்டு வேலைகள் தமிழருக்கே” பொன்மலை தொடர்வண்டித் தொழிற் சாலையில் - ஒரு வாரம் தொடர் மறியல்! தமிழ்த்தேசியப் பேரியக்கத் தலைமைச் செயற்குழு தீர்மானம்!



“தமிழ்நாட்டு வேலைகள் தமிழருக்கே”

பொன்மலை தொடர்வண்டித் தொழிற்
சாலையில் - ஒரு வாரம் தொடர் மறியல்!

தமிழ்த்தேசியப் பேரியக்கத் 
தலைமைச் செயற்குழு தீர்மானம்!


தமிழ்த்தேசியப் பேரியக்கத்தின் தலைமைச் செயற்குழுக் கூட்டம், 2020 ஆகத்து 29, 30 ஆகிய நாட்களில், திருச்சியில் நடைபெற்றது. கூட்டத்திற்கு, தமிழ்த்தேசியப் பேரியக்கத் தலைவர் ஐயா பெ. மணியரசன் தலைமை தாங்கினார். பொதுச்செயலாளர் தோழர் கி. வெங்கட்ராமன் முன்னிலை வகித்தார். பேரியக்கப் பொருளாளர் தோழர் அ. ஆனந்தன், தலைமைச் செயற்குழு தோழர்கள் க. அருணபாரதி, நா. வைகறை, கோ. மாரிமுத்து, க. முருகன், க. விடுதலைச்சுடர், ம. இலட்சுமி, தை. செயபால், மு. தமிழ்மணி ஆகியோர் பங்கேற்றனர். கூட்டத்தில், பின்வரும் தீர்மானங்கள் ஒருமனமாக நிறைவேற்றப்பட்டன. 

தீர்மானம் 1  
“தமிழ்நாட்டு வேலைகள் தமிழருக்கே!”
ஒரு வாரம் தொடர் மறியல் போராட்டம்
================================
தமிழ்நாட்டிலும், புதுச்சேரியிலும் செயல்படும் இந்திய அரசு நிறுவனங்களான தொடர்வண்டித் துறை, அஞ்சல் துறை, பி.எச்.இ.எல். – நெய்வேலி அனல் மின் நிலையம் – திருச்சி, ஆவடி, அரவங்காடு போன்ற இடங்களிலுள்ள பாதுகாப்புத்துறை தொழிற்சாலைகள், ஓ.என்.ஜி.சி., ஐ.ஓ.சி., ஜிப்மர் மருத்துவமனை, அரசுடைமையாக்கப்பட்ட வங்கிகள், வருமான வரி – சரக்கு சேவை வரி – சுங்க வரி போன்ற நடுவண் வரித்துறை நிறுவனங்கள், துறைமுகங்கள், வானூர்தி நிலையங்கள் முதலியவற்றிலும், இந்திய அரசு திட்டமிட்டு தமிழர்களைப் புறக்கணித்து வட மாநிலத்தவரையும் மற்ற வெளி மாநிலத்தவரையும் வேலையில் சேர்த்து வருகிறது. சொந்தத் தாயகத்திலேயே வேலைக்குத் தகுதியுள்ள தமிழர்கள் ஏதிலிகள் (Refugees) போல் ஒதுக்கி வைக்கப்பட்டுள்ளனர். 

மேற்கண்ட நிறுவனங்களில் வேலைக்காக நடத்தப்படும் தேர்வுகளில் ஆள்மாறாட்டம் செய்து தேர்வெழுதுதல், வினாவிடைத் தாள்களை முன்பே வெளியில் பெற்று தேர்வெழுதுதல் போன்ற பல்வேறு மோசடிகள் வடநாட்டுத் தேர்வு மையங்களில் நடக்கின்றன. திருச்சி துப்பாக்கித் தொழிற்சாலை, ஆவடி திண்ணூர்தித் தொழிற் சாலை, தமிழ்நாடு அஞ்சல் துறை முதலிய வற்றில் அவ்வாறான ஊழல் வழிகளில் தேர்வெழுதி தமிழ்நாட்டில் வேலையில் சேர்ந்த வடநாட்டினர் அவ்வப்போது காவல்துறையினரால் கைது செய்யப்பட்டிருக்கிறார்கள்; வழக்குகள் நடக்கின்றன. 

தமிழ்நாடு அரசு பல்தொழில்நுட்பக் கல்லூரிகளில் விரிவுரையாளர் பணியிடங்களுக்காக 2017இல் நடத்திய தேர்வில், வடநாட்டினர் கலந்து கொண்டு தேர்வெழுதி மோசடியாக அதிகம் பேர் வெற்றி பெற்றனர். அந்த ஊழல் அம்பலப்படுத்தப்பட்ட பிறகு, அவர்கள் கைது செய்யப் பட்டனர். அந்தத் தேர்வு முடிவுகள் இரத்து செய்யப்பட்டன. 

இவ்வாறான மோசடி வழிகளில் இந்திக்காரர்கள் உள்ளிட்ட வெளி மாநிலத்தவர் தமிழ்நாட்டில் வேலையில் சேர்வதை இந்திய ஆட்சியாளர்கள் ஊக்கப்படுத்தி, தமிழ்நாட்டு வேலைகள் தமிழர்களுக்குக் கிடைக்காமல் செய்து வருகிறார்கள். 

இந்த ஊழல் பின்னணியில்தான், 2019இல் தமிழ்நாடு தொடர்வண்டித்துறையில் பழகுநர் வேலைக்கு தேர்ந்தெடுக்கப்பட்டவர்களில் 100க்கு 95 விழுக்காட்டினர் வடமாநிலத்தவர்களாக இருந்தார்கள். அதை எதிர்த்து தமிழ்த்தேசியப் பேரியக்கம் 2019 மே 3ஆம் நாள் பொன்மலை தொடர்வண்டித்துறைத் தொழிற்சாலை வாயிலில் மறியல் போராட்டம் நடத்தியது. பல்வேறு அரசியல் கட்சிகளும், அமைப்புகளும் இந்த அநீதியை எதிர்த்துக் கண்டனக் குரல் எழுப்பின. 

இதன் விளைவாக, பழகுநர் பயிற்சிக்கான பணி சேர்ப்புக்கு தென்னகத் தொடர்வண்டித் துறையின் எல்லைக்கு உட்பட்டவர்கள் மட்டுமே விண்ணப்பிக்க வேண்டுமென்றும், அதற்கு வெளியே உள்ள மாநிலங்களைச் சேர்ந்தவர்கள் விண்ணப்பிக்கக் கூடாதென்றும் தென்னகத் தொடர்வண்டித்துறை முடிவெடுத்து அறிவித்தது. ஆனால், தொடர்வண்டி பணித்தேர்வு வாரியம் (ஆர்.ஆர்.பி.) மற்றும் தொடர்வண்டி பணித்தேர்வு அலகு (ஆர்.ஆர்.சி.) ஆகியவற்றின் மூலம் பணியமர்த்தம் பெறும் வேலைகளுக்கு அனைத்திந்திய அளவில் விண்ணப்பிக்கலாம், தேர்வெழுதலாம் என்ற அநீதி இப்பொழுதும் தொடர்ந்து கொண்டுள்ளது. 

இதனால், அண்மையில் தென்னகத் தொடர்வண்டித்துறையில் பணிக்குச் சேர்க்கப்பட்ட 3,218 பேரில் மிகப்பெரும்பாலோர் இந்திக்காரர்களும், மற்ற வெளி மாநிலங்களைச் சேர்ந்தவர்களும் ஆவர். இதில் பொன்மலை தொடர்வண்டித் தொழிற்சாலையில் சேர்க்கப்பட்ட 541 பேரில் 400க்கும் மேற்பட்டோர் இந்திக்காரர்களே! தமிழர்கள் புறக்கணிக்கப்பட்டனர். 

பழகுநர் பயிற்சி முடித்தவர்களில் 20 விழுக்காட்டினரை மேற்படி வேலைகளுக்கு பணியமர்த்தம் செய்ததாகச் சொல்லும் தென்னகத் தொடர்வண்டித்துறை, இந்தப் பணிகளைக் கூட பயிற்சி முடித்தத் தமிழர்களுக்கு வழங்கவில்லை. இதிலும் இந்திக்காரர்களே அதிக இடங்களை ஆக்கிரமித்தனர். இதிலும், தொடர்வண்டித் துறையின் இனப்பாகுபாட்டுக்கு தமிழர்கள் பலியாகி வருகின்றனர். 

தொடர்வண்டித்துறையில் திட்டமிட்டு மண்ணின் மக்களாகிய தமிழர்கள் வேலை மறுக்கப்பட்டு, புறக்கணிக்கப்படுகிறார்கள். இதேபோன்ற தமிழினப் புறக்கணிப்பு நடுவண் அரசின் மற்ற துறைகளிலும் அன்றாடம் அரங்கேறிக் கொண்டுள்ளது. மேலே சுட்டிக்காட்டப்பட்டுள்ள – தமிழ்நாட்டின் நடுவண் அரசு நிறுவனங்களில் 90 விழுக்காட்டிற்கு மேல் வடமாநிலத்தவரையும் பிற மாநிலத்தவரையும் வேலையில் சேர்க்கிறார்கள். 

இது தமிழ்நாட்டு இளைஞர்களின் வேலை உரிமைப் பறிப்பு, வாழ்வுரிமைப் பறிப்பு மட்டுமல்ல – தொலைநோக்கில் தமிழர் தாயக உரிமையைப் பறிக்கும் இன ஒதுக்கல் கொள்கையாகும். 

தமிழ்நாடு – புதுச்சேரி மாநிலங்களில் தமிழர்களுக்கு எதிராகக் கடைபிடிக்கப்படும் இந்திய அரசின் இன ஒதுக்கல் கொள்கையைக் (Aparthied) கண்டித்தும், இவற்றில் 90 விழுக்காட்டு வேலை மண்ணின் மக்களாகிய தமிழர்களுக்கே வழங்க வேண்டுமென்று கோரிக்கை வைத்தும் தமிழ்த்தேசியப் பேரியக்கம் தொடர்ந்து போராடி வருகிறது. 

இவற்றின் அடுத்தகட்டமாக, பின்வரும் அட்டவணைப்படி தமிழ்த்தேசியப் பேரியக்கம் பொன்மலை தொடர்வண்டித்துறை தொழிற்சாலை வாயிலில் 11.09.2020 முதல் 18.09.2020 வரை காலை 10 மணிக்கு – ஒவ்வொரு நாளும் ஓர் அணி என்ற நிலையில் தொடர் மறியல் போராட்டம் நடத்தவிருக்கிறது!

கோரிக்கைகள்
---------------------
1. தமிழ்நாடு மற்றும் புதுச்சேரியிலுள்ள இந்திய அரசு நிறுவனங்கள் அனைத்திலும் 90 விழுக்காடு வேலை தமிழர்களுக்கே வழங்க வேண்டும்! 10 விழுக்காட்டிற்கு மேலுள்ள வெளி மாநிலத்தவர் அனைவரையும் வெளியேற்ற வேண்டும்! 

2. தொடர்வண்டித்துறையின் தென் மண்டலப் பணிகளுக்கான தேர்வுகளையோ, நேர்காணல் களையோ அனைத்திந்திய அளவில் நடத்தக்கூடாது. தென்னகத் தொடர்வண்டித் துறையின் எல்லைக்குட்பட்ட பகுதிகளில் காலங்காலமாக வசித்து வரும் மக்கள் மட்டுமே விண்ணப்பிக்க முடியும், கலந்து கொள்ள முடியும் என்று வரம்பு விதிக்க வேண்டும். 

தமிழ்நாட்டிலுள்ள இதர இந்திய நிறுவனங்கள் மற்றும் அலுவலகங்கள் அனைத்திற்குமான வேலைத் தேர்விற்கும், நேர்காணலுக்கும் தமிழ்நாட்டில் காலங்காலமாக வசித்து வரும் மக்கள் மட்டுமே விண்ணப்பிக்க முடியும் என்ற நிபந்தனையை விதிக்க வேண்டும். 

3. அண்மையில் தென்னகத் தொடர்வண்டித்துறையில் உதவி ஓட்டுநர் (அசிஸ்டெண்ட் லோக்கோ பைலட்) மற்றும் தொழில்நுட்பப் பணியாளர் (டெக்னீசியன்) பணிகளுக்குத் தேர்வு செய்த 3,218 பேரில் 10 விழுக்காட்டினருக்கு மேலுள்ள வெளி மாநிலத்தவர் பணிகளை இரத்து செய்து, அந்த இடங்களுக்கு ஏற்கெனவே தேர்வெழுதியுள்ள தமிழர்களை மதிப்பெண் அடிப்படையில் பணியமர்த்த வேண்டும்.

தென்னகத் தொடர்வண்டித் துறையில் பழகுநராக (ஆக்ட் அப்ரண்டிஸ்) பயிற்சி முடித்த தமிழர்களுக்கு, பணியமர்த்தத்தில் முன்னுரிமை வழங்க வேண்டும். அவர்களை வடிகட்டும் முறையில் நடத்தப்படும் ஓட்டப்பந்தயம் போன்ற உடல் தகுதித் தேர்வை இரத்து செய்ய வேண்டும்.

4. மண்ணின் மக்களுக்கு வேலையை உறுதி செய்யும் சட்டங்கள் கர்நாடகம்,  மகாராட்டிரம், குசராத், ஆந்திரம், மத்தியப்பிரதேசம் போன்ற பல மாநிலங்களில் இருக்கின்றன. தமிழ்நாட்டில் மண்ணின் மக்கள் வேலைக்கு உறுதியளிக்கும் சட்டத்தைத்  தமிழ்நாடு அரசு உடனடியாக இயற்ற வேண்டும்! இச்சட்டம் நடுவண் அரசு மற்றும் தனியார் துறை வேலைகளில் 90 விழுக்காடு வேலையும், தமிழ்நாடு அரசுத் துறையில் 100 விழுக்காடு வேலையும் தமிழர்களுக்கே என விதிமுறை வகுக்க வேண்டும்! 

போராட்ட அட்டவணை
--------------------------------
நாள் கிழமை          தலைமை
11.09.2020 வெள்ளி வே.க. இலக்குவன்
த.தே.பே. திருச்சி மாநகரச் செயலாளர்

12.09.2020 காரி நா. வைகறை
த.தே.பே. தஞ்சை மாவட்டச் செயலாளர்

14.09.2020 திங்கள் க. முருகன்
த.தே.பே. தலைமைச் செயற்குழு உறுப்பினர்

15.09.2020 செவ்வாய் க. அருணபாரதி
த.தே.பே. தலைமைச் செயற்குழு உறுப்பினர்

16.09.2020 அறிவன் மு. தமிழ்மணி
த.தே.பே. தலைமைச் செயற்குழு உறுப்பினர்

17.09.2020 வியாழன் கோ. மாரிமுத்து
த.தே.பே. தலைமைச் செயற்குழு உறுப்பினர்

18.09.2020 வெள்ளி ம. இலட்சுமி
தலைவர் - மகளிர் ஆயம்

அன்னையின் மடியில் அனாதையா?
சொந்த மண்ணில் அகதிகளா?
================================

தமிழர்களே, இந்தியா என்பது பல்வேறு இனங்களின் இணைப்பு! இன அடிப்படையில்தான் மாநிலங்கள் பிரிக்கப்பட்டுள்ளன. ஆனால், தமிழ்நாட்டில் தமிழினத்தைச் சேர்ந்தவர்களுக்கு வேலை மறுப்பதும் இந்திக்காரர்களையும் மற்ற வெளி மாநிலத்தவர்களையும் வேலையில் மிக அதிகமாகச் சேர்ப்பதும் பச்சையான தமிழின ஒதுக்கல் கொள்கையாகும்! 

தென்னாப்பிரிக்காவில் வெள்ளை இன ஆதிக்கவாதிகள் மண்ணின் மக்களாகிய கருப்பினத்தவர்களை ஒதுக்கி ஓரங்கட்டியதைப் போல் (Aparthied), தமிழ்நாட்டில் தமிழர்களை இந்திய ஆட்சியாளர்கள் இன ஒதுக்கல் செய்கிறார்கள். உரிய கல்வித் தகுதி பெற்று வேலை கேட்டு, ஒரு கோடிப் பேருக்கு மேல் ஆண்களும் பெண்களும் தமிழ்நாட்டில் பதிவு செய்துள்ளார்கள். 

இந்த இன ஒதுக்கல் அநீதிக்குக் கீழ்ப்படிந்து, வாழ்வுரிமை இழந்து வறுமையில் மடிவதா? போராடி தாய்மண்ணின் வாழ்வுரிமையை மீட்பதா? இந்த வினாவுக்கு இன்றையத் தலைமுறைத் தமிழர்கள் விடை கண்டாக வேண்டும்! 

ஆங்கிலேயர் ஆதிக்கத்தின்கீழ் அன்றைய சென்னை மாகாணத்தில் நடந்த காங்கிரசு ஆட்சி, 1938இல் இந்தியைத் திணித்தது. அதை எதிர்த்து, இதே திருச்சியிலிருந்து – தமிழின உணர்வாளர்கள் மாபெரும் பரப்புரை நடைப்பயணம் சென்னையை நோக்கி நடத்தினார்கள். அவர்களை வரவேற்க சென்னைக் கடற்கரையில் மறைமலையடிகளார் தலைமையில்,  பெரியார், நாவலர் சோமசுந்தர பாரதியார் போன்ற தலைவர்களும் தமிழறிஞர்களும் பங்கேற்ற மாபெரும் பொதுக்கூட்டம் 11.09.1938 அன்று நடந்தது. பல்லாயிரக்கணக்கான ஆண்களும், பெண்களும் பங்கேற்றனர். அந்த மக்கள் கடலில்தான், “தமிழ்நாடு தமிழருக்கே!” என்ற வரலாற்றுப் புகழ்பெற்ற முழக்கத்தைத் தீர்மானமாக நிறைவேற்றினார்கள். அந்தத் தமிழினத்தின் இன்றையத் தலைமுறையினர் நாம்! அதே செப்டம்பர் 11 இல், “தமிழ்நாட்டு வேலை தமிழர்களுக்கே!” என்ற முழக்கத்துடன் போராட்டக் களத்தில் குதிக்கின்றோம்! வாருங்கள் தமிழர்களே! 

தீர்மானம் 2 :
இந்திய அரசின் இன உரிமை ஆக்கிரமிப்பை
“மாநில உரிமைப் பறிப்பு” என்று 
மென்மைப்படுத்தக் கூடாது!
================================

கொரோனா பேரிடரால் மக்கள் தங்கள் வாழ்வாதாரத்தை இழந்து, உயிருக்கு அஞ்சி, வீடுகளுக்குள் முடங்கிக் கிடக்கும் இக்காலகட்டத்தில், நாள்தோறும் புதிய அறிவிப்புகள் மற்றும் சட்டங்கள் வழியாக தேசிய இனங்களின் உரிமைகளைப் பறித்து வருகிறது மோடி தலைமையிலான இந்திய அரசு!

இந்தி – சமற்கிருத மொழிகளைத் திணிப்பது, புதிய கல்விக் கொள்கையின் வழியே கல்வி பெறும் மக்களின் உரிமையையும், புதிய சுற்றுச்சூழல் தாக்க மதிப்பீட்டு அறிவிக்கை வழியே கருத்துக்கேட்பு உள்ளிட்ட சனநாயக உரிமைகளை நீக்கி - சுற்றுச்சூழலை நாசமாக்குவது, புதிய மின்சார சட்டத்தின் வழியே மாநில அரசின் மின்சார உரிமையைப் பறிப்பது, புதிய மீன்பிடிக் கொள்கை வழியே மண்ணின் மக்களுக்கும் மாநில அரசுக்குமுள்ள மீன்பிடி உரிமையைப் பறிப்பது, ஒரே நாடு – ஒரே ரேசன் திட்டம் வழியே ஞாயவிலைக் கடைகளை மூடி உணவு உரிமையைப் பறிப்பது என, கொடிய இக்கொரோனா காலத்தில் - எதேச்சாதிகார ஆணவத்துடன் இந்திய அரசு நடத்திக் கொண்டிருக்கும் உரிமைப் பறிப்புகள் மிகமிகக் கொடூரமானவை! 

இந்த உரிமைப் பறிப்புகளை “மாநில உரிமைப் பறிப்பு” என்பதாகவே, பலரும் புரிந்து கொள்கின்றனர். ஆனால், உண்மையில் இது “மாநிலங்கள்” என்ற பெயரில் அமைந்துள்ள தேசிய இனத் தாயகத்தின் – தேசிய இனத்தின் உரிமைப் பறிப்புகள் ஆகும்! 

தமிழ்த்தேசிய இனம் உள்ளிட்ட இயற்கையான தேசிய இனங்களின் உரிமைகளைப் பறித்து, ஆரிய - இந்தி இன ஆதிக்க மையத்தில் அதிகாரங்களைக் குவித்துக் கொள்கிறது.

இந்திய அரசின் இந்த ஆரிய இன அதிகாரக் குவிப்பை “மாநில உரிமைப் பறிப்பு” என்று நிர்வாகச் சிக்கலாக சுருக்கிக் காட்டக்கூடாது. அதிகார ஆக்கிரமிப்பை மென்மைப்படுத்தும் இச்சொல்லாடலைக் கைவிட்டு, இந்திய அரசின் உண்மையான ஆரிய – இந்தி ஆதிக்க இன அரசியலை மக்கள் புரிந்து கொள்ள வேண்டும். உரிமை பறிக்கப்பட்ட அனைத்து தேசிய இனங்களும் ஒன்று சேர்ந்து போராட வேண்டும். இந்தப் புரிதலோடு தமிழர்கள் ஒருங்கிணைந்து செயலாற்ற வேண்டும் என்று தலைமைச் செயற்குழு கேட்டுக் கொள்கிறது! 

தீர்மானம் 3 :
காவிரி நீர்ப் பகிர்வில் உச்ச நீதிமன்றத் தீர்ப்பு 
செத்துக் கிடக்கிறது! உபரி நீர்த் திட்டங்கள் 
கூறி ஏமாற்றுகிறது எடப்பாடி அரசு!
================================

கடந்த 2018ஆம் ஆண்டு உச்ச நீதிமன்றம் வங்கிய காவிரி இறுதித் தீர்ப்பு, தன்னாட்சி அதிகாரத்துடன் முழுநேரப் பணி கொண்ட “காவிரி மேலாண்மை ஆணையம்” அமைக்கக் கட்டளையிட்டது. ஆனால், இந்திய அரசு “பெயருக்கு” ஒரு ஆணையத்தை அமைத்துத் தமிழ்நாட்டை ஏமாற்றிவிட்டது. முழுநேரத் தலைவரே, முழுநேர அதிகாரிகளோ இல்லாத   மேலாண்மை ஆணையத்தையும் ஒழுங்காற்றுக் குழுவையும் அமைத்துள்ளது.

இந்திய அரசின் 01.06.2018 நாளிட்ட அரசிதழில் வெளியான அறிவிக்கையில், ஒரு முழுநேரத் தலைவரும், 2 முழுநேர உறுப்பினர்களும், 6 பகுதி நேர உறுப்பினர்களும் காவிரி ஆணையத்தில் இருப்பார்கள் என்று கூறப்பட்டுள்ளது. ஆனால், இதுவரை முழுநேரத் தலைவரோ, முழுநேர உறுப்பினர்களோ அமர்த்தப்படவில்லை. 
 
இதுமட்டுமின்றி, உச்ச நீதிமன்றத் தீர்ப்பின்படி, மாதந்தோறும் திறந்துவிட வேண்டிய காவிரி நீரையும் கர்நாடக அரசு 2018லிருந்து இப்பொழுது வரை திறந்துவிடவில்லை. காவிரி மேலாண்மை ஆணையம் மாதந்தோறும் கர்நாடகம் திறந்துவிட வேண்டிய தண்ணீரை, திறந்துவிடச் செய்து உச்ச நீதிமன்றத் தீர்ப்பை செயல்படுத்தவில்லை. 

இந்திய அரசு தமிழ்நாட்டை வஞ்சிப்பது தொடர்கதை! ஆனால், தமிழ்நாடு அரசும் தனது மக்களுக்குரிய சட்டப்படியான உரிமையை நிலைநாட்ட முன்வராமல் இந்திய அரசின் வஞ்சகத்திற்குத் துணை போவது மிகப்பெரும் துயரம்; மிகப்பெரும் இனத்துரோகம்! 

உச்ச நீதிமன்றத்தீர்ப்பின்படி, 2020 சூன் மாதம் 9.19 ஆ.மி.க. தண்ணீர் கர்நாடகம் திறந்து விட்டிருக்க வேண்டும். ஆனால், 6.2 ஆ.மி.க. தண்ணீர்தான் மேட்டூர் அணைக்கு வந்துள்ளது. சூலை மாதம் 31.24 ஆ.மி.க. கர்நாடகம் திறந்து விட்டிருக்க வேண்டும். ஆனால், 11.3 ஆ.மி.க.தான் மேட்டூர் அணைக்கு வந்துள்ளது. 

காவிரி மேலாண்மை ஆணையம் இவ்வாண்டு கர்நாடகத்தில் முன்கூட்டிய தென்மேற்குப் பருவமழை கூடுதலாகப் பெய்து, அம்மாநில அணைகளில் தண்ணீர் இருப்பு போதிய அளவு இருந்தும் உச்ச நீதிமன்றத் தீர்ப்பை காவிரி மேலாண்மை ஆணையம் செயல்படுத்தவில்லை. தமிழ்நாடு அரசு அதன்படி தண்ணீர் தர உரிய முயற்சி எடுக்கவில்லை! ஆனால், 28.08.2020 அன்று திருவாரூரில் பேசிய தமிழ்நாடு முதலமைச்சர் எடப்பாடி பழனிச்சாமி அவர்கள், மாதந்தோறும் பெற வேண்டிய காவிரி நீரை கர்நாடகத்திடமிருந்து பெற்றுள்ளோம் என்ற செய்தியாளர்களிடம் மார்தட்டிப் பேசினார். 

2020 ஆகத்து மாதம், எதிர்பாராத வகையில் பெருமழைப் பெய்து, பெருவெள்ளம் ஏற்பட்டு, கிருட்டிணராஜ சாகர், கபிணி அணையில் நிரம்பியதால், அவ்வணைகளைப் பாதுகாக்க கர்நாடகம் திறந்துவிட்ட மிகை வெள்ள நீரை மாதாமாதம் வந்தக் கணக்கில் முதலமைச்சர் சேர்த்துப் பேசியதைப் பார்த்தபோது, தமிழ்நாடு முதலமைச்சர் கர்நாடக முதலமைச்சராகவே பேசுகிறார் என்ற எண்ணம்தான் உழவர்களுக்கு ஏற்பட்டது. 

கர்நாடக அணைகளின் மதகுகளைத் திறந்து, தமிழ்நாட்டிற்குரிய தண்ணீரை அளிக்கும் தன்னாட்சி அதிகாரம் பெற்ற, முழுநேர அதிகாரிகளைக் கொண்ட காவிரி ஆணையம் மற்றும் காவிரி ஒழுங்காற்றுக் குழுவை அமைத்திட தமிழ்நாடு அரசு உச்ச நீதிமன்றத்தில் வழக்குத் தொடுக்க வேண்டும். உச்ச நீதிமன்றத் தீர்ப்பின்படி மாதாமாதம் திறந்துவிட வேண்டிய காவிரி நீரை அந்தந்த மாதமும் பெற தமிழ்நாடு அரசு உரிய நடவடிக்கை எடுக்க வேண்டும். 

இன்றியமையாத இப்பணிகளைச் செய்யாமல், மேட்டூர் மிச்ச நீரை தமிழ்நாடு முழுவதற்கும் கொண்டு செல்ல பல்லாயிரக்கணக்கான கோடி ரூபாயில் புதிய புதிய திட்டங்களை எடப்பாடி பழனிச்சாமி அரசு தீட்டுவதும், செயல்படுத்துவதும், காவிரி டெல்டா மக்களை மட்டுமின்றி, ஒட்டுமொத்தத் தமிழ் மக்களை ஏமாற்றும் அரசியல் ஆதாயத் தந்திரமாகும் என்று தமிழ்த்தேசியப் பேரியக்கத்தின் தலைமைச் செயற்குழு, தனது கண்டனத்தைத் தெரிவித்துக் கொள்கிறது! 

தீர்மானம் 4 :
வாழ்வாதாரம் இழந்த மக்களிடம் கடன் தவணை 
கேட்டு அடாவடித்தனத்தில் ஈடுபடுவோர் மீது 
குற்ற நடவடிக்கை எடுக்க வேண்டும்! 
================================

கொரோனா கொள்ளை நோய் காரணமாக இந்திய – தமிழ்நாடு அரசுகள் அறிவித்த பொது முடக்கம், கோடிக்கணக்கான மக்களின் எதிர்காலத்தையே கேள்விக்கு உள்ளாக்கியுள்ளது. தொழிற்சாலைகள் – நிறுவனங்கள் – கடைகள் மூடப்பட்டு, வணிக நடவடிக்கைகளே நிறுத்தப்பட்டதால், மக்கள் தங்கள் வாழ்வாதாரத்தை இழந்துத் தவிக்கின்றனர். 

இச்சூழலை அனைவரும் இணைந்து எதிர்கொள்ள வேண்டிய நேரத்தில், இந்திய அரசின் பொதுத்துறை வங்கிகளும், தனியார் வங்கிகளும், தனியார் நிதி நிறுவனங்களும் பொது மக்களிடம் கடன் தவணை கேட்டது அதிர்ச்சியையும், கொந்தளிப்பையும் ஏற்படுத்தியது. இதனையடுத்து, மூன்று மாதங்கள் எந்தக் கடன் தவணையும் கட்ட வேண்டாம் என இந்திய சேம வங்கி அறிவிப்பு வெளியிட்டது. அது இன்றுடன் (2020 ஆகத்து 31) முடிவடைகிறது. இன்னும் நிலைமை சீராகாத நிலையில், அது இன்னும் 6 மாத காலத்திற்காவது நீட்டிக்கப்பட வேண்டும்.

இன்னொருபுறத்தில், இந்திய சேம வங்கின் மூன்று மாத காலம் கடன் தவணைக் கட்ட வேண்டாம் என்ற அறிவிப்பை பல வங்கிகள் பின்பற்றவில்லை. தொடர்ந்து, பல்வேறு வங்கிகள் கடன் தவணை கேட்டது, கடும் கண்டனத்திற்குரியது. 

இந்திய சேம வங்கிக்கும், இந்திய அரசுக்கும் கட்டுப்பட வேண்டிய வங்கிகளே இவ்வாறு அத்துமீறல்களில் ஈடுபட்டு வரும்நிலையில், சிறுதொகைக் கடன்களை சட்ட விரோதமாக அதிக வட்டியில் அளித்து வரும் கந்துவட்டிக்காரர்கள் மிகவும் கொடூரமாக நடந்து கொண்டார்கள். இவர்களைக் கட்டுப்படுத்த எவ்வித அமைப்பும் இல்லாத நிலை உள்ளது. 

தமிழ்நாட்டின் பல்வேறு பகுதிகளில் கடன் தவணை கட்டமுடியாமல், தனித்தும், குடும்பத்தோடும் தற்கொலையில் ஈடுபட்டோர் குறித்த செய்திகள், மிகவும் அதிர்ச்சி அளிக்கின்றன. தஞ்சை மாவட்டம் – வல்லத்தில், வீட்டுக் கடன் வாங்கியவர் 9 இலட்சம் ரூபாய் மதிப்புள்ள வீட்டுக்கு வட்டியுடன் சேர்த்து 13 இலட்சம் ரூபாய் கட்டிய நிலையில், மேலும் 6 இலட்சம் ரூபாய் கேட்டு நெருக்கடி கொடுத்துள்ளனர். இதனால் மனமுடைந்த அவர், வங்கி வாயிலேயே தீக்குளித்து உயிரிழந்துள்ளார். தருமபுரி, கிருட்டிணகிரி போன்ற பல மாவட்டங்களில் மிகச் சிறிய கடன் தொகையைக் கூட கட்ட முடியாமல், எளிய மக்கள் தனது வீட்டையே காலி செய்து விட்டு ஓடும் கொடுமை நிலைமையின் தீவிரத்தை உணர்த்துகிறது. 

எனவே, இந்திய அரசும், தமிழ்நாடு அரசும் இந்நிலைமையின் தீவிரத்தை உணர்ந்து கடன் தொல்லையில் சிக்கியுள்ள மக்களை, தவணை கேட்டு அச்சுறுத்தும் வங்கிகள் – நிதி நிறுவனங்கள் – தனிநபர்கள் மீது கடும் நடவடிக்கைகளை எடுக்க வேண்டும்! கடன் தவணை கட்டுவதற்கு ஓராண்டு காலம் விலக்களிக்க வேண்டும். 

விலக்கு அளிக்கப்படும் காலத்திற்கும் சேர்த்து வட்டி வசூலிக்கும் கொடும் வட்டிமுறையைக் கைவிடச் செய்ய வேண்டும் என தமிழ்த்தேசியப் பேரியக்கத்தின் தலைமைச் செயற்குழு இந்திய – தமிழ்நாடு அரசுகளை வலியுறுத்திக் கேட்டுக் கொள்கிறது! 

தீர்மானம் 5 :
இணையவழி சூதாட்டத்தை முற்றிலுமாகத் 
தடை செய்ய வேண்டும்!
================================

இணையவழிச் சூதாட்டக் கொள்ளை மக்களின் வாழ்வை சூறையாடிக் கொண்டிருக்கிறது. “ஆன்லைன் ரம்மி” என்ற பெயரிலும், வேறு பல பெயர்களிலும் கணினி மற்றும் கைப்பேசிகளில் மட்டுமின்றி, தொலைக்காட்சிகளிலும் வெளிப்படையான விளம்பரங்கள் வந்து கொண்டுள்ளன. 

பணம் வைத்து சூதாடும் சீட்டாட்டத்தை தமிழ்நாடு அரசு தடை செய்துள்ள நிலையில், இதுபோன்ற விளம்பரங்கள் இவ்வளவு வெளிப்படையாக வந்து கொண்டிருப்பதும், இதில் அறியாமல் சிக்கிக் கொள்வோர் பணத்தை இழந்து நிற்பதோடில்லாமல் தங்கள் உயிரையும் மாய்த்துக் கொள்ளும் அவலம் நடந்து கொண்டுள்ளது. 

இந்திய அரசும், தமிழ்நாடு அரசும் உடனடியாக இதனைத் தடை செய்து, அதற்கான இணையத் தளத்தையும், கைப்பேசி செயலியையும் உடனே முடக்க வேண்டும் என தமிழ்த்தேசியப் பேரியக்கத்தின் தலைமைச் செயற்குழு தமிழ்நாடு அரசை வலியுறுத்திக் கேட்டுக் கொள்கிறது! 


தலைமைச் செயலகம்,
தமிழ்த்தேசியப் பேரியக்கம்

பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam

போராட்டங்கள்

செய்திகள்

 
Copyright © 2013 தமிழ்த்தேசியப் பேரியக்கம்
Design by FBTemplates | BTT