பதவி – பணம் – விளம்பரம் மூன்றுக்கும்ஆசைப்படாத இலட்சியத் தலைவர் ஐயா இரா. நல்லக்கண்ணு அவர்களுக்கு வீரவணக்கம்! - தமிழ்த்தேசியப் பேரியக்கத் தலைவர் ஐயா பெ. மணியரசன் இரங்கல்!

பதவி – பணம் – விளம்பரம் மூன்றுக்கும் ஆசைப்படாத இலட்சியத் தலைவர்

ஐயா இரா. நல்லக்கண்ணு அவர்களுக்கு வீரவணக்கம்!

தமிழ்த்தேசியப் பேரியக்கத் தலைவர் 

ஐயா பெ. மணியரசன் இரங்கல்!

 

இந்தியப் பொதுவுடைமைக் கட்சியின் மூத்த தலைவர் ஐயா இரா. நல்லக்கண்ணு அவர்கள், 101 அகவையில் காலமாகி இருந்தாலும் (25.02.2026), அவர் மறைவு ஒரு பேரிழப்பாகவே தமிழர் நெஞ்சங்களில் தாக்கத்தை உண்டாக்கியிருக்கிறது.

 

இளமையிலேயே இந்திய விடுதலைப் போராட்டத்தில் ஈடுபட்டு, சிறைக்குச் சென்ற நல்லக்கண்ணு ஐயா அவர்கள், மனித சமத்துவத்திற்காக மார்க்சிய இலட்சியத்தை ஏந்தி, கம்யூனிஸ்ட் இயக்கத்தில் செயல்பட்டவர். பற்பல போராட்டங்களில் பங்கேற்று, சிறைக்குச் சென்றவர்.

 

அரசியல் என்றாலே, தனிநபர் ஆதாயம் பெறுவதற்கான ஒரு துறை என்று, சீரழிந்து போன தமிழ்நாட்டில், பதவி – பணம் – விளம்பரம் மூன்றுக்கும் இச்சைப்படாமல், ஏற்றுக் கொண்ட பொதுவுடைமை இலட்சியத்திற்குத் தம்மை ஒப்புக் கொடுத்தவர்.    

 

தமிழ்த்தேசியப் பேரியக்கம் நேற்று (25.02.2026) மாலை, தஞ்சை மாவட்டம் – பூதலூர் ஒன்றியம் - புதுக்குடியில் நடத்திய தமிழ்த்தேசிய நாள் – சிறப்புப் பொதுக்கூட்டத்தில், முதல் நிகழ்வாக ஐயா நல்லக்கண்ணு அவர்களுக்கு வீரவணக்கம் செலுத்தினோம். கூட்டத்தில் கலந்து கொண்ட அனைவரும் எழுந்து நின்று அமைதி வணக்கம் செலுத்தினர்.

 

தமிழ்ச் சமூகத்தின் பொருளியல் சார்ந்த வர்க்க ஒடுக்குமுறையும் கூடாது, பிறப்பால் சுமத்தப்படும் வர்ணசாதி ஆதிக்க ஒடுக்குமுறையும் கூடாது என்ற நிலையில், போராட்டங்கள் நடத்தியவர் ஐயா நல்லக்கண்ணு!  அடர்த்தியான பிற்படுத்தப்பட்ட வகுப்பில் பிறந்திருந்தாலும், ஒடுக்கப்பட்ட மக்களின் உயர்வுக்கு உண்மையாகத் தம்மை ஒப்புக் கொடுத்தவர்.

 

தமிழ்நாட்டில் அரசியல் பின்புலத்தோடு நடைபெறும் மணல் கொள்ளைகளைத் தடுக்க,  கூட்டமைப்பு உருவாக்கிப் போராடியவர். மாற்றுக் கருத்து உடையோரைப் பகைவராகக் கருதாமல் பண்போடு பழகக்கூடியவர். ஈகம், நேர்மை, மனிதநேயம் போன்ற மாண்புமிகு குணங்களைக் கொண்ட இலட்சிய மனிதராக வாழ்ந்ததால்தான், தமிழ்நாட்டில் அனைத்துக் கட்சியினராலும், அனைத்துப் பிரிவு மக்களாலும் ஏற்றுக் கொள்ளக்கூடிய மாபெரும் சான்றோராக ஐயா நல்லக்கண்ணு மதிக்கப்படுகிறார்.

 

நான் சி.பி.எம். கட்சியில் செயல்பட்டபோது, சி.பி.ஐ உடன் இணைந்து நடத்தியப் போராட்டம் ஒன்றில், கைதாகி மண்டபத்தில் இருக்கும்போதுதான், ஐயா நல்லக்கண்ணு அவர்களுடன் நேரடி பழக்கமும், தோழமையும் ஏற்பட்டது. தமிழ்த்தேசியப் பேரியக்கத்தின் மாத இதழான தமிழ்த்தேசியத் தமிழர் கண்ணோட்டம் இதழை தொடர்ந்து அவர்களுக்கு அஞ்சலில் அனுப்பி வந்தோம். படித்துவிட்டு, தொலைப்பேசியில் அழைத்து பாராட்ட வேண்டியதைப் பாராட்டிச் சொல்வார். மாற்றுக் கருத்து சொல்ல வேண்டிய இடத்தில் மாற்றுக் கருத்து சொல்வார்.

 

"ஆன்று அவிந்து அடங்கிய கொள்கைச் சான்றோர்" என்று நம்முடைய புறநானூற்றில் பழங்காலச் சான்றோர்களைக் குறிப்பிடுவர். அதற்கான நிகழ்கால சான்றாக வாழ்ந்தவர் ஐயா நல்லக்கண்ணு அவர்கள்!

 

ஐயா இரா. நல்லக்கண்ணு அவர்களின் உடல் மறைந்தாலும், அவரின் ஈகமும், பண்பும், ஆற்றலும் இளையோருக்கு என்றும் வழிகாட்டும்!

 

ஐயா நல்லக்கண்ணு அவர்களுக்கு தமிழ்த்தேசியப் பேரியக்கம் சார்பில் வீரவணக்கத்தையும், அவரின் இழப்பால் துயருரும் இந்தியப் பொதுவுடைமைக் கட்சித் தோழர்களுக்கும், அவரது குடும்பத்தினர்க்கும் ஆறுதலையும் தெரிவித்துக் கொள்கிறேன்!

================================

தலைமைச் செயலகம்,

தமிழ்த்தேசியப் பேரியக்கம்

================================

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

================================

கோழிக்கறி குழுமங்களின் கொள்ளைக்காக உழவர் தலைவர் ஈசன் முருகசாமி உள்ளிட்டோர் சிறையில்! முதலமைச்சர் தலையிட்டு உடனே விடுதலை செய்க! தமிழ்த்தேசியப் பேரியக்கத் தலைவர் ஐயா பெ. மணியரசன் அறிக்கை!

கோழிக்கறி குழுமங்களின் கொள்ளைக்காக

உழவர் தலைவர் ஈசன் முருகசாமி உள்ளிட்டோர் சிறையில்!

முதலமைச்சர் தலையிட்டு உடனே விடுதலை செய்க!

தமிழ்த்தேசியப் பேரியக்கத் தலைவர் ஐயா பெ. மணியரசன் அறிக்கை!

 

தமிழக விவசாயிகள் பாதுகாப்பு சங்கத் தலைவர் திரு. ஈசன் முருகேசன் அவர்களின் கைது அநீதியானதும், கண்டனத்திற்குரியதுமாகும்!

 

தமிழ்நாட்டு உழவர்கள் உழவுத்தொழிலில் போதிய வருமானம் இல்லாத நிலையில், கறிக்கோழி உற்பத்தியில் ஈடுபட்டு வருகின்றனர். ஒரு கிலோவுக்கு உற்பத்தி தொகையாக 6.50 ரூபாய் நிறுவனங்கள் வழங்கி வருகிறது. இது தற்போது தேங்காய் மஞ்சி, மருந்துகள் உள்ளிட்ட மூலப்பொருட்கள் விலை உயர்வு, மின்சார கட்டண உயர்வால் விவசாயிகள் கறிக்கோழி பண்ணைத் தொழிலில் தொடர்ந்து பேரிழப்பு அடைந்து வருகின்றனர்.

 

நிறுவனங்கள் கிலோ ஒன்றுக்கு 20 ரூபாயாக உயர்த்தி வழங்கக் கோரி தமிழக விவசாயிகள் பாதுகாப்பு சங்கத்தின் கறிக்கோழி பண்ணை விவசாயிகள் அணி சார்பில் தமிழ்நாடு முதலமைச்சர், கால்நடைத்துறை அமைச்சர், கால்நடைத்துறை இயக்குநர், கால்நடைத்துறை செயலாளர், அமைச்சர்கள் உள்ளிட்ட பலரையும் நேரில் சந்தித்து நிறுவனங்களுடன், கறிக்கோழி விவசாயிகள், அரசு இணைந்து முத்தரப்பு பேச்சுவார்த்தை நடத்தி, கூலி உயர்வு பெற்றுத் தர வேண்டும் என்பது உள்ளிட்ட 10 அம்ச கோரிக்கைகளை நிறைவேற்றி தர கோரிக்கை வைத்தனர்.

 

பல மாதங்கள் ஆகியும் கோரிக்கை நிறைவேற்றப்படாததால் கறிக்கோழி பண்ணை விவசாயிகளோடு ஆலோசித்து சனவரி 1 முதல் பல்வேறு மாவட்டங்களில் உற்பத்தி நிறுத்த போராட்டம் அறிவிக்கப்பட்டு, அதனை தொடர்ந்து கடந்த சனவரி 7ஆம் தேதி அன்று சென்னை நந்தனத்தில் உள்ள கால்நடைத்துறை பராமரிப்பு மற்றும் மருத்துவ பணிகள் இயக்குநர் அலுவலகத்தின் முன்பு தொடர் காத்திருப்பு போராட்டம் முன்னெடுக்கப்பட்டது. இந்நிலையில், தமிழ்நாடு அரசு தலையிட்டு வருகின்ற சனவரி 21ஆம் தேதியன்று முத்தரப்பு பேச்சுவார்த்தைக்கு ஏற்பாடு செய்தது.

 

இந்நிலையில் நிறுவனங்கள் விவசாயிகளை மிரட்டி கோழி குஞ்சுகளை கட்டாயத்தின் பேரில் இறக்கி வந்தன. இதனை தமிழக விவசாயிகள் பாதுகாப்பு சங்கத்தின் நிர்வாகிகளும், கறிக்கோழி பண்ணை விவசாயிகளும் கண்டித்து, கட்டாயத்தின் பேரில் நிறுவனம் குஞ்சு இறக்குவதை தடுத்து நிறுத்தினர்.

 

அநீதி இழைக்கும் நிறுவனங்களின் அழுத்தத்தின் பேரில் காவல்துறையானது 13.01.2026 இரவு சுமார் 10 மணி அளவில் தமிழக விவசாயிகள் பாதுகாப்பு சங்கத்தின் நிறுவனர் வழக்கறிஞர் ஈசன் முருகசாமி மற்றும் தலைவர் சண்முகசுந்தரம் இருவரும் கள்ளிமந்தயம் ஆலோசனைக் கூட்டத்தை முடித்துவிட்டு ஊர் திரும்பும் வழியில், அவிநாசிபாளையம் என்ற இடத்தில் குடிமங்கலம் காவல்துறை குடும்பத்தினருக்கு தகவல் தெரிவிக்காமல் இருவரையும் கைது செய்துள்ளது. இரவு 10 மணிக்கு கைது செய்து காலை 7 மணி வரை வாகனத்திலேயே அலைக்கழித்து அதன் பிறகு குடும்பத்திற்கு தகவல் சொல்லி உள்ளனர். தலைவர் சண்முகசுந்தரம் அவர்களை காலை 9 மணி வரை வாகனத்திலேயே அடைத்து மனித உரிமை மீறலில் குடிமங்கலம் காவல்துறை ஈடுபட்டுள்ளது. மேலும் நிர்வாகிகள் 8 பேரை இரவோடு இரவாக கைது செய்து, அவர்களின் குடும்பத்திற்கு எந்தவித தகவலும் அளிக்காமல் நயவஞ்சகமாக செயல்பட்டுள்ளது. நிறுவனர் வீடு திரும்பவில்லை என்ற தகவல் கிடைத்த உடன் நிர்வாகிகள் இரவு முழுவதும் தேடி காலை குடிமங்கலம் காவல்துறை கைது செய்ததை உறுதி செய்தனர்.

 

தாராபுரம் சாந்தி ஃபீட்ஸ் நிறுவனம் குஞ்சுகளை வாகனத்தில் ஏற்றி வரும்போது அவர்களை மறித்து ஆபாசமாக பேசி, மிரட்டியதாக காவல் நிலையத்தில் புகார் அளித்ததன் பெயரில் ஈசன் முருகசாமி உள்ளிட்ட 9 பேர் மீதும் இந்திய தண்டனைச் சட்டம் BNS 189(2), 126(2), 296(b), 351(2), பொது சொத்திற்கு சேதம் விளைவித்தல் பிரிவு 1992 ஆகிய 5 பிரிவுகளின் கீழ் காவல் துறையினரால் வழக்கு பதிவு செய்யப்பட்டு, சிறையில் அடைக்கப்பட்டுள்ளனர்.

 

ஈசன் முருகசாமி உள்ளிட்ட போராடுகிற உழவர்கள் மீது அடக்குமுறை ஏவுவது கடும் கண்டனத்துக்குரியது.

 

தமிழக விவசாயிகள் பாதுகாப்பு சங்கத்தின் நிறுவனர் ஈசன் முருகசாமி உள்ளிட்ட நிர்வாகிகள் மீது காவல்துறை பொய் வழக்கு பதிவு செய்ததை திரும்பப் பெற்று, அவர்களை உடனடியாக விடுதலை செய்ய வேண்டும் என்று தமிழ்த்தேசியப் பேரியக்கம் சார்பில் கேட்டுக் கொள்கிறேன்.

================================
தலைமைச் செயலகம்,
தமிழ்த்தேசியப் பேரியக்கம்
================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
================================

தமிழீழ விடுதலைப் போராட்ட ஈகத்தைப்பேசும் “சல்லியர்கள்” திரைப்படத்திற்குதிரையரங்குகள் மறுக்கப்படும் அநீதி! தமிழ்த்தேசியப் பேரியக்கத் தலைவர் ஐயா பெ. மணியரசன் கண்டனம்!

தமிழீழ விடுதலைப் போராட்ட ஈகத்தைப் பேசும் "சல்லியர்கள்" திரைப்படத்திற்கு திரையரங்குகள் மறுக்கப்படும் அநீதி!

தமிழ்த்தேசியப் பேரியக்கத் தலைவர் ஐயா பெ. மணியரசன் கண்டனம்!

 

தமிழ்நாட்டு திரைப்பட உருவாக்கத்தில் மட்டுமின்றி, திரையரங்குகள் மீதும் வெளிமாநில முதலாளிகளின் மேலாதிக்கம் தமிழ்த் திரையுலகத்தையே மூச்சுமுட்ட வைக்கிறது.

 

இன்று (1.1.2026) வெளியாகும் இளம் இயக்குநர் தி. கிட்டுவின் "சல்லியர்கள்" திரைப்படத்திற்குத் தேவையான திரையரங்குகள் மறுக்கப்பட்டுள்ளது.

 

தமிழீழ விடுதலைப் போராளிகளிடையே, போர்ச் சூழலில் பணியாற்றிய மருத்துவப் பணியாளர்களின் ஈகத்தை விளக்கும் வகையில் எடுக்கப்பட்டுள்ள இத் திரைப்படம், தமிழ்நாட்டு இளையோரிடையே பெரும் எதிர்பார்ப்பை உண்டாக்கியிருந்தது.

 

இச்சூழலில், பி.வி.ஆர் சினிமாஸ் போன்ற திரையரங்க வளாகங்கள் மீது ஆதிக்கம் செலுத்தும் வெளிமாநில ஏகபோக நிறுவனங்களால், திரையரங்கம் மறுக்கப்படுவது கொடுமையானது.

 

தமிழின உணர்வுள்ள தயாரிப்பாளர் சுரேஷ் காமாட்சி அவர்கள், இத்திரைப்படத்தை மிகுந்த சிரமங்களுக்கிடையே தயாரித்துவிட்டு, கடந்த 3 ஆண்டுகளாக இத்திரைப்படத்தை வெளியிடப் போராடி வருகிறார்.

 

இவரைப் போன்ற இளம் படைப்பாளர்கள் குறைந்த பொருட்செலவில் தரமான படங்கள் எடுக்கும் முன் முயற்சியை இது முளையிலேயே கிள்ளி எறிந்துவிடும். தமிழில் தரமான திரைப்படைப்புகள் வருவதையே தடுத்துவிடும்.

 

அதைவிட, தமிழ்த் திரை உலகத்தையே அதன் உருவாக்கம், நடிகர்கள், தயாரிப்பாளர்கள், இயக்குநர்கள், வெளியிடுவோர் (விநியோகஸ்தர்கள்), திரையரங்கு உரிமையாளர்கள் என எல்லா நிலையிலும் வெளிமாநிலத்தவர் ஆதிக்கத்தில் முடக்கிவிடும்.

 

எனவே, இச்சிக்கலில் தமிழ்நாடு அரசு உடனடியாகத் தலையிட்டு "சல்லியர்கள்" படத்திற்கு சென்னை உள்ளிட்ட தமிழ்நாட்டின் அனைத்து மையங்களிலும் முதன்மைத் திரையரங்குகள் கிடைக்க ஆவன செய்யவேண்டும் என்றும், தமிழ்நாட்டுத் திரைப்படத்துறையைச் சேர்ந்த தமிழின உணர்வாளர்கள் இதற்கான அனைத்து முயற்சிகளையும் எடுக்க வேண்டும் என்றும் தமிழ்த் தேசியப் பேரியக்கம் சார்பில் வலியுறுத்திக் கேட்டுக்கொள்கிறேன்.   

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
==============================

மாவட்ட நீதிபதி ப.உ. செம்மல்இடை நீக்கத்தைத் திரும்பப் பெறுக! தமிழ்நாடு அரசுக்கு தமிழ்த்தேசியப் பேரியக்க பொதுச் செயலாளர் கி.வெங்கட்ராமன் வேண்டுகோள்!

மாவட்ட நீதிபதி ப.உ. செம்மல்

இடை நீக்கத்தைத் திரும்பப் பெறுக!

தமிழ்நாடு அரசுக்கு

தமிழ்த்தேசியப் பேரியக்க பொதுச் செயலாளர் கி. வெங்கட்ராமன் வேண்டுகோள்!

காஞ்சிபுரம் மாவட்டம், வாலாசாபாத் அருகே உள்ள பூசிவாக்கம் கிராமத்தில் சிவக்குமார் என்பவர் நடத்தும், தேநீர் கடைக்கு, அதே கிராமத்தைச் சேர்ந்த முருகன், அவரது மனைவி பார்வதி ஆகியோர் சென்றுள்ளனர். அங்கு விற்கப்பட்ட உணவுப் பொருட்கள் தரம் இல்லாமல் இருந்தது தொடர்பாக இருவருக்கும் வாக்குவாதம், கைகலப்பு ஏற்பட்டுள்ளது. இதனைத் தொடர்ந்து, சிவக்குமாரும் அவரது மருமகனும், காவலருமான லோகேசுவரன் இரவி (32) ஆகிய இருவரும் சேர்ந்து முருகனைத் தாக்கி, மிரட்டியுள்ளனர்.

 

இதுகுறித்து முருகனின் மனைவி பார்வதி, கடந்த 25.07.2025 அன்று, தனது கணவரைத் தாக்கிய மேற்படி சிவக்குமார், காவலர் லோகேசுவரன் உள்ளிட்ட நான்கு பேர் மீது நடவடிக்கை எடுக்கக்கோரி வாலாசாபாத் காவல் நிலையத்தில் புகார் அளித்துள்ளார். பாதிக்கப்பட்ட முருகன், அவரது மனைவி பார்வதி ஆகியோர் பட்டியலின வகுப்பைச் சேர்ந்தவர்கள்.

 

புகார் கொடுத்த 27 நாட்களுக்குப் பிறகு 20.08.2025 அன்று எஸ்.சி/எஸ்.டி, வன்கொடுமைத் தடுப்புச் சட்டத்தின் கீழ் வழக்குப்பதிவு செய்யப்பட்டது.

 

இதனையடுத்து, 08.09.2025 அன்று மாவட்ட முதன்மை நீதிமன்றத்தில் (வன்கொடுமைத் தடுப்புச் சட்ட வழக்குகளுக்கான சிறப்பு நீதிமன்றம்) இவ்வழக்கு தொடர்பான விசாரணையின்போது காஞ்சிபுரம் காவல்துறை துணைக் கண்காணிப்பாளர் (டி.எஸ்.பி.) சங்கர் கணேஷ் நேர் நின்றுள்ளார். அவர் இந்த வழக்கில், எஸ்.சி/எஸ்.டி. வன்கொடுமைத் தடுப்புச் சட்டத்தின்படி சரியாக நடவடிக்கை எடுக்காததை சிறப்பு நீதிமன்ற நீதிபதி ப.உ. செம்மல் சுட்டிக்காட்டியுள்ளார்.

 

பாதிக்கப்பட்டோர் அளித்த புகாரில் தாமதமாக வழக்குப்பதிவு செய்தது,  குற்றம் சாட்டப்பட்டவர்களைக் கைது செய்யாதது, பாதிக்கப்பட்டோருக்கு நகல் வழங்காதது உள்ளிட்டவைகள் எஸ்.சி/எஸ்.டி வன்கொடுமைத் தடுப்புச் சட்டப் பிரிவுகள் 18-A(B) மற்றும் 10(2) ஆகியவற்றின்படி சட்ட மீறல்களாகும். இப்பிரிவுகளை டி.எஸ்.பி. சங்கர்கணேஷ் முறையாக செயல்படுத்தத் தவறியுள்ளார்.

 

இச்சட்டப் பிரிவு 4-இல் உள்ளபடி டி.எஸ்.பி செய்ய வேண்டிய சட்ட நடவடிக்கைகளைத் திட்டமிட்டுச் செய்யாமல், கடமையில் இருந்து தவறியுள்ளார். இது எஸ்.சி/எஸ்.டி வன்கொடுமைத் தடுப்புச் சட்டப் பிரிவு 4(2)(G) கீழ் தண்டனைக்கு உரிய குற்றமாகும். இதனடிப்படையில் டி.எஸ்.பி.யை 15 நாட்கள் நீதிமன்றக் காவலில் அடைக்க நீதிபதி ப.உ. செம்மல் அவர்கள் ஆணையிட்டார்.

 

உடனடியாக ஒட்டுமொத்தக் காவல்துறை மற்றும் தமிழ்நாடு அரசின் உதவியுடன் உயர் நீதிமன்றத்தில் டி.எஸ்.பி சங்கர் கணேஷ் வழக்குத் தொடுத்தார். இவ்வழக்கில், உயர் நீதிமன்ற நீதிபதி சதீசுக்குமார் அவர்கள்,  நீதிபதி ப.உ. செம்மல் பிறப்பித்த கைது ஆணையை இரத்து செய்து, டி.எஸ்.பியை விடுவித்து ஆணையிட்டார். மேலும், நீதிபதி ப.உ. செம்மல் மீது உயர் நீதிமன்ற விஜிலன்ஸ் பிரிவு விசாரித்து அறிக்கைத் தாக்கல் செய்ய வேண்டுமெனவும் ஆணையிட்டார்.

 

கீழமை நீதிமன்ற ஆணையின் மீது, உயர் நீதிமன்றம் தான் கருதுகின்ற ஆணையைப் பிறப்பிப்பது வழக்கமான நீதிமன்ற நடவடிக்கை. ஆனால், உயர் நீதிமன்ற நீதிபதி சதீசுக்குமார், அத்தோடு நிற்காமல் நீதிபதி ப.உ. செம்மல் மீது விஜிலன்ஸ் பிரிவு விசாரித்து, அறிக்கைத் தாக்கல் செய்ய வேண்டுமென ஆணையிட்டது, அதீதமானது!

 

விஜிலின்ஸ் பிரிவு அளித்த அறிக்கையின் மீது நீதிபதி ப.உ. செம்மலிடம் விளக்கம் ஏதும் கேட்காமலேயே அவரை, இடைநீக்கம் செய்து ஆணைப் பிறப்பித்திருக்கிறார். இது நீதிமன்ற விசாரணை முறைக்கும், இயற்கை நீதிக்கும் முரணானது!

 

நீதிபதி ப.உ. செம்மல், கடமை தவறுகிற காவல்துறையினர் மற்றும் அனைத்துத் துறை அதிகாரிகள் மீதும் சட்டப்படி செயல்பட்டவர். அவர் பழிவாங்கப்பட்டிருக்கிறார் என்பதே இச்சிக்கலை கவனித்து வரக்கூடிய அனைத்து மனித உரிமை ஆர்வலர்களின் கருத்தாகும்.

 

ஏற்கெனவே, தேசியக் குற்ற ஆவணக் காப்பகம் தமிழ்நாட்டில் வன்கொடுமைத் தடுப்புச் சட்டம் உரியவாறு செயல்படவில்லை என ஆதாரங்களின் அடிப்படையில் கண்டித்திருக்கிறது. பட்டியல் சமூகத்தவருக்கு எதிரான வன்முறைகள் அதிகம் நடைபெறும் மாநிலங்களில் ஒன்றாக தமிழ்நாடு குறிக்கப்பட்டிருக்கிறது.

 

இந்த நிலையில், காவல்துறையில் சாதி வன்மம் ஊடுருவும்போது, அது சமூகத்தில் கூடுதல் தீமையை ஏற்படுத்தும். இதைக் கவனத்தில் கொண்டால், நீதிபதி ப.உ. செம்மலின் ஆணையின் பின்னால் இருக்கிற ஞாயம் புரியும்!

 

அந்த ஆணையை இரத்து செய்கிற அதிகாரம், உயர் நீதிமன்றத்திற்கு உண்டு! ஆனால், தனது அதிகாரத்தைத் தவறாகப் பயன்படுத்தி, ப.உ. செம்மல் மீது பழிவாங்கும் நடவடிக்கை மேற்கொள்வது நீதித்துறையில் நேர்மை ஒட்டிக் கொண்டிருப்பதையே இல்லாமல் செய்து விடும்.

 

எனவே, தமிழ்நாடு அரசு உடனடியாக இச்சிக்கலில் தலையிட்டு, நீதிபதி ப.உ. செம்மல் மீது விதிக்கப்பட்டுள்ள இடைநீக்க ஆணையைத் திரும்பப் பெற வேண்டுமென தமிழ்த்தேசியப் பேரியக்கம் சார்பில் கேட்டுக் கொள்கிறேன்

===============================

தலைமைச் செயலகம்,

தமிழ்த்தேசியப் பேரியக்கம்

=================================

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

==============================

இந்தியத் தேர்தல் ஆணையமே! வெளி மாநிலத்தவர்க்கு வாக்காளர் அட்டை வழங்காதே! 2025 திசம்பர் 16 அன்று ஒரே நாளில் - சென்னை மற்றும் திருச்சியில்மாபெரும் தமிழர் ஆர்ப்பாட்டம்!

இந்தியத் தேர்தல் ஆணையமே!

வெளி மாநிலத்தவர்க்கு வாக்காளர் அட்டை வழங்காதே!

சிறப்புத் தீவிர சீராய்வை உடனே நிறுத்து!

தமிழர்களை வாக்காளர் பட்டியலிலிருந்து நீக்காதே!

2025 திசம்பர் 16 அன்று ஒரே நாளில்...

சென்னை மற்றும் திருச்சியில்

மாபெரும் தமிழர் ஆர்ப்பாட்டம்!

காலம் : தி.பி. 2058 கார்த்திகை 30 - 16.12.2025 செவ்வாய் காலை 10.30 மணிக்கு

 
அன்புடையீர்!

வெளி மாநிலத்தவர்க்கு வாக்காளர் அட்டை வழங்காதே!, சிறப்புத் தீவிர சீராய்வை உடனே நிறுத்து!, தமிழர்களை வாக்காளர் பட்டியலிலிருந்து நீக்காதே! ஆகிய முழக்கங்களோடு, வரும் 2025 திசம்பர் 16 அன்று ஒரே நாளில், சென்னையில் மாவட்ட ஆட்சியர் அலுவலகம் அருகில், தமிழ்த்தேசியப் பேரியக்கப் பொதுச் செயலாளர் தோழர் கி. வெங்கட்ராமன் அவர்கள் தலைமையிலும், திருச்சியில் காதி கிராப்ட் (தொடர்வண்டி சந்திப்பு) அருகில், தமிழ்த்தேசியப் பேரியக்கத் தலைமைச் செயற்குழு உறுப்பினர் தோழர் நா. வைகறை தலைமையிலும், மாபெரும் தமிழர் ஆர்ப்பாட்டங்கள் நடக்கின்றன.

உலகத் தமிழர்களின் தாயகம் எனப் போற்றப்படும் தமிழ்நாட்டிலேயே, தமிழர்கள் அகதிகளாகமாறும்ஆபத்தின் விளிம்பில் நாம் நின்று கொண்டிருக்கிறோம். வேலை வாய்ப்பு மறுக்கப்பட்டு, தொழில் – வணிகத்திலிருந்து வெளியேற்றப்பட்டு, நிலம் போன்ற உடைமைகள் பிடுங்கப்பட்டு, இறுதியாக வாக்குரிமையும் பறிக்கப்படும் ஆபத்து நம்மை நெருங்கி விட்டது!

இலட்சக்கணக்கான தமிழர்களுக்கு வாக்குரிமையை மறுத்துவிட்டு, வடநாட்டிலிருந்து தமிழ்நாட்டில் குடியேறியுள்ள பீகாரிகள் உள்ளிட்ட இந்திக்காரர்களுக்கு வாக்குரிமை வழங்கி, அவர்களை தமிழ்நாட்டின் நிரந்தரக் குடிமக்களாக மாற்றும் சதித் திட்டத்தை, இந்தியத் தேர்தல் ஆணையம் "சிறப்புத் தீவிர சீராய்வு" (Special Intensive Revision – SIR) என்ற திட்டத்தின் வழியே செய்து கொண்டிருக்கிறது.

வரும் 2026ஆம் ஆண்டு நடக்கவிருக்கும் தமிழ்நாடு சட்டப்பேரவைத் தேர்தலை மனதில் வைத்துக் கொண்டு, இந்தியத் தேர்தல் ஆணையம் முன்னெடுத்து வரும் இந்த சிறப்புத் தீவிர வாக்காளர் சீராய்வுத் திட்டம் (SIR), செயற்கையான முறையில் இந்திக்காரர்கள் உள்ளிட்ட அயல் மாநில வாக்காளர்களை தமிழ்நாட்டின் வாக்காளர் பட்டியலில் சேர்க்க உதவுகிறது. அதன்வழியே,தமிழ்நாட்டு அரசியலில் செயற்கையான குறுக்கீட்டையும், குழப்பத்தையும் ஏற்படுத்தும்.

பீகாரில் முன்னெடுக்கப்பட்ட இத்திட்டத்தின்படி 42 இலட்சம் பேரும், அரியானாவில் 25 இலட்சம் பேரும் நம் கண் முன்னேயே வாக்காளர் பட்டியலிலிருந்து வெளியேற்றப்பட்டனர். அரியானாவின் 10 வாக்குச்சாவடிகளில், பிரேசிலை சேர்ந்த ஒரு நடிகையின் ஒரே புகைப்படத்தைக் கொண்டு போலியான முறையில் 22 வாக்காளர்கள் சேர்க்கப்பட்ட செய்தி, தேர்தல் ஆணையம் எந்தளவிற்கு சீரழிந்து கிடக்கிறது என்பதை முகத்தில் அடித்தாற்போல் உணர்த்தியது.

இசுலாமியர்கள், ஒடுக்கப்பட்ட மக்கள், நலிந்த பிரிவினர் என பீகாரிலும், அரியானாவிலும் தகுதியான வாக்காளர்களை நீக்கியதன் மூலம் பா.ச.க.வுக்கு பணியாற்றிய தேர்தல் ஆணையம், தமிழ்நாட்டிலோ இலட்சக்கணக்கான தமிழர்களை நீக்கிவிட்டு, அதற்குப் பதிலாக பீகாரிகள் உள்ளிட்ட வெளிமாநிலத்தவரை தமிழ்நாட்டு வாக்காளர் பட்டியலில் சேர்ப்பதன் வழியாக அதே பணியை செய்து கொண்டிருக்கிறது.

வேலைக்காக ஓரிடத்திலிருந்து இன்னொரு இடம் சென்ற வாக்காளர்களை பட்டியலில் இணைப்பது இந்த சீராய்வுத் திட்டத்தின்நோக்கமாக(Point No: 7, Election Commission of India Order No: 23/ERS/2025 dated 24.06.2025) இந்தியத் தேர்தல் ஆணையம் குறிப்பிடுகிறது. இதன் வழியாக, இந்த "சிறப்புத் தீவிர சீராய்வு" (Special Intensive Revision – SIR) திட்டம், வெளி மாநிலங்களிலிருந்து வேலைக்காக தமிழ்நாட்டில் குடியேறியவர்களை தமிழ்நாட்டுப் பட்டியலில் இணைப்பதையே நிறைவேற்றப் போகிறது.

தமிழ்நாடு – இந்தியத் தேர்தல் ஆணையத்தின் இணையதளத்தில் (https://www.elections.tn.gov.in), சீராய்வு படிவத்தை எப்படி நிரப்புவது எனக் குறிப்பிடுவதற்காக பதிவேற்றம் செய்யப்பட்டுள்ள விளக்க ஆவணத்தில் (காண்க: https://www.elections.tn.gov.in/SIR2026/SIR_EF_ENGLISH.pdf) தமிழ்நாட்டு வாக்காளர் பட்டியலில் ஒருவர் இணைந்திடத் தேவையான 13 ஆவணங்கள் பட்டியலிடப்பட்டுள்ளன. அதில் 13ஆவது ஆவணம் - பீகாரின் 2025ஆம் ஆண்டின் வாக்காளர் பட்டியல்!அதாவது, பீகாரி ஒருவர் தனது சொந்த மாநிலத்தின் வாக்காளர் பட்டியலில் இடம் பெற்றிருந்தால், அவர் அதை சுட்டிக்காட்டி அங்கிருக்கும் பட்டியலிலிருந்து தன்னை நீக்கிக் கொண்டு, தமிழ்நாட்டு பட்டியலில் தன்னை சேர்த்துக் கொள்ள விண்ணப்பிப்பதற்கான ஏற்பாடு வெளிப்படையாக ஏற்படுத்தித் தரப்படுகிறது.

தமிழ்நாட்டில் பீகாரிகள் மட்டுமின்றி, உ.பி., அரியானா, ம.பி., சார்க்கண்ட், ஒடிசா உள்ளிட்ட பல்வேறு இந்தி மாநிலங்களைச் சேர்ந்த சற்றொப்ப 1 கோடிக்கும் மேற்பட்டோர் குடியேறியுள்ள நிலையில், அவர்களுக்கு வாக்களிக்கும் உரிமை அளிக்கப்பட்டால், தமிழ்நாட்டு அரசியலைத் தீர்மானிக்கும் ஆற்றலாக அவர்கள் வலுப் பெறுவார்கள். தமிழ்நாட்டையே நிரந்தர வசிப்படமாகக் கொண்டு இங்கேயே நிலைபெற அவர்கள் அதிகாரம் பெறுவார்கள்.

அதன்பிறகு, அரசு நிர்வாகம், கல்வி, வேலை வாய்ப்புத் தேர்வு அனைத்திலும் இந்தியைத் திணிப்பது தீவிரமாக நடக்கும். ஏற்கெனவே உள்ள ஆங்கிலத்தோடு, இந்தியும் சேர்ந்து கொண்டு தமிழர்களை சொந்த மண்ணிலேயே அகதிகளாக்கி விடும்!

தமிழர்கள் தங்கள் வாக்குரிமையை உறுதி செய்து கொள்ள வேண்டுமெனில், தேர்தல் ஆணையம் கொடுக்கும் SIR படிவத்தை உடனே நிரப்பித் தர வேண்டுமாம். அதிலோ, 2002ஆம் ஆண்டு வாக்களித்த விவரங்களையோ, அவரது இல்லத்தினர் வாக்களித்த விவரங்களையோ இணையதளத்தில் பெயரைப் போட்டுப் பார்த்து, நாமே தேடித் தர வேண்டுமாம். தேர்தல் அலுவலர்கள் செய்ய வேண்டிய அலுவலகப் பணிகளை, வாக்காளரே செய்ய வேண்டும் என நிர்பந்தித்து, வாக்காளர்கள் அதை சரியாக நிரப்பித் தரவில்லை என்ற போலிக் காரணத்தைக் கூறி, தமிழர்களை வாக்காளர் பட்டியலிலிருந்து நீக்குவது தான் இதன்வழியே நடக்கப் போகிறது.

"சிறப்புத் தீவிர சீராய்வு" திட்டத்தை எதிர்ப்பதாகக் கூறிக் கொள்ளும் ஆளும் தி.மு.க.வோ, அத்திட்டத்தை நிறைவேற்ற தனது மாநில அரசு அதிகாரிகளை வழங்க மாட்டோம் என உறதியாக நின்று அறிவிக்காமல், அத்திட்டத்தை நிறைவேற்றும் களப்பணியாளனாக நின்று கொண்டு, பா.ச.கவுக்கு அடிமை சேகவம் புரிகிறது. அ.தி.மு.க.வோ நேரடியாகவே பா.ச.க. அடிமையாக சீரழிந்து கிடக்கிறது.

பா.ச.க.வுக்கு தொடர்ந்து பெரும்பான்மைத் தமிழர்கள் வாக்களிக்க மறுக்கும் நிலையில், இந்திக்காரர்களைத் தமிழ்நாட்டு வாக்காளர்களாக்கி, தமிழ்நாட்டிற்குள்ளேயே பா.ச.க.வுக்கான வாக்கு வங்கியை உருவாக்கிடவே இத்திட்டத்தை முனைப்போடு செயல்படுத்துகிறார்கள். அசாம், திரிபுரா, மணிப்பூர் போன்ற வடகிழக்கு மாநிலங்களில் மண்ணின் மக்களை விட அதிகளவில் இந்திக்காரர்களைப் படிப்படியாகத் திட்டமிட்டுக் குடியமர்த்தி, செயற்கையான வாக்கு வங்கியை உருவாக்கியதன் வழியே,அங்கெல்லாம் பா.ச.க. – காங்கிரசு போன்ற இந்தித் தலைமை கொண்ட கட்சிகளின் ஆட்சி இப்போது நடக்கிறது.

ஆரியத்துவாபா.ச.க.வுக்கு அடிமை வேலை புரியும் திராவிடக் கட்சிகள், ஏற்கெனவே தமிழ்நாட்டில் இந்திக்காரர்களுக்கு வாக்காளர் அட்டை – குடும்ப அட்டை – ஆதார் அட்டை போன்றவற்றை வழங்கி, இந்திய அரசின் தமிழின அழிப்புத் திட்டத்திற்கு துணை போனவைதாம்! இப்போதும் கூட, தமிழர்களை ஏமாற்றுவதற்காக பா.ச.க. எதிர்ப்பு வேடம் போடும் தி.மு.க. போன்ற கட்சிகள், மழைக்காலத்தில் இத்திட்டத்தை நடத்தலாமா என சொத்தைக் காரணத்தைக் கூறிக் கொண்டிருக்கிறதே தவிர, தமிழர்களின் வாக்குரிமையைப் பறித்து இந்திக்காரர்களிடம் தரப் போகிறார்கள் என்ற உண்மையான காரணத்தை வெளிப்படையாக எடுத்துக் கூறும் துணிவற்றக் கோழைகளாகவே இருக்கின்றனர். எனவே, இந்தத் திராவிடக் கட்சிகளை நம்பி ஒரு பயனும் இல்லை!

எனவே, தமிழர்கள் விழிப்போடு இத்திட்டத்தை எதிர்த்துக் களம் கண்டு, பேரெழுச்சியை உருவாக்க வேண்டுமென என அழைக்கிறது தமிழ்த்தேசியப் பேரியக்கம்!

கோரிக்கைகள்!

 

இந்தியத் தேர்தல் ஆணையமே!

1. சிறப்புத் தீவிர வாக்காளர் சீராய்வுத் திட்டத்தை உடனே நிறுத்து!

2. வெளி மாநிலத்தவர்க்கு தமிழ்நாட்டில் வாக்காளர் அட்டை வழங்காதே!

தமிழ்நாடு அரசே!

3. வெளிமாநிலத்தவர்க்கு குடும்ப அட்டை – ஆதார் அட்டை வழங்காதே!

மொழிவழி மாநிலம்உருவான1956க்குப் பிறகு தமிழ்நாட்டில் குடியேறிய வெளி மாநிலத்தவரை வெளியேற்று!

4. நாகாலாந்து, மிசோரம், அருணாச்சலப்பிரதேசம், மணிப்பூரில் உள்ளதைப் போல் தமிழ்நாட்டிற்குள் வெளிமாநிலத்தவர் உள்நுழைந்திட, உள்நுழைவு அனுமதிச் சீட்டு (Inner Line Permit – ILP) முறையைக் கொண்டு வா!

5. தமிழர்களுக்கே தமிழ்நாட்டு வேலைகளை உறுதி செய்திட உடனே சட்டமியற்று!

சென்னையிலும், திருச்சியிலும் நடைபெறும் இப்போராட்டங்களில், தமிழின உணர்வாளர்களும், தமிழ் மக்களும் பெருந்திரளாகப் பங்கேற்க வரும்படி அன்புரிமையுடன் அழைக்கின்றோம்! வாருங்கள் தமிழர்களே!

===============================

தலைமைச் செயலகம்,

தமிழ்த்தேசியப் பேரியக்கம்

=================================

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

==============================