“மூளைச் சோம்பலும் முகமூடித் தமிழ்த்தேசியமும்” பெ. மணியரசன் சிறப்புக் கட்டுரை!

“மூளைச் சோம்பலும் முகமூடித் தமிழ்த்தேசியமும்” தமிழ்த்தேசியப் பேரியக்கத் தலைவர் பெ. மணியரசன் சிறப்புக் கட்டுரை!

கர்நாடக முதலமைச்சர் சித்தராமையா, கன்னடர்களுக்கென்று ஒரு தேசியக் கொடியை வடிவமைத்துத் தருமாறு கேட்டு, ஒரு வல்லுநர் குழுவை நிறுவியுள்ளார். அந்த வல்லுநர் குழுவில் இந்திய ஆட்சிப் பணியைச் சேர்ந்த செயலாளர் (Secretary) அளவில் பணி மூப்புள்ள அதிகாரிகளை அமர்த்தியுள்ளார்.

பெங்களூர் மாநகரத் தொடர்வண்டி நிலையங்களில் இந்தியில் எழுதப்பட்டிருந்த வழிக்குறிப்புகளை கன்னடர்கள் அழித்துள்ளார்கள். இந்தி அழிப்பை சித்தராமையா ஆட்சி ஆதரித்தது. கர்நாடக அரசுப் பொறுப்பில் உள்ள பெங்களூர் மாநகராட்சித் தொடர்வண்டி நிலையங்களில் இனிமேல் இந்தியில் வழிக்குறிப்புகள் எழுதப்படமாட்டா என்று அத்துறை அதிகாரியும் அறிவித்துள்ளார்.

இந்த அதிரடிகளின் அதிர்வுகள் நிற்பதற்குள், கர்நாடகத்தில் உள்ள வங்கிகளில் பணியாற்றும் வெளி மாநில அதிகாரிகளும் பணியாளர்களும் ஆறு மாதத்திற்குள் கன்னடம் கற்றுக் கொள்ள வேண்டும்; வாடிக்கையாளர்களிடம் கன்னடத்தில் பேசவும், கன்னட மொழியில் எழுதப்படும் படிவங்களைப் புரிந்து கொள்ளவும் திறன் பெற வேண்டும். இல்லையேல் அவர்கள் வேலையை விட்டு நீக்கப்படுவார்கள் என்று கர்நாடக அரசின் கன்னட மொழி ஆணையர் சுற்றறிக்கை அனுப்பியுள்ளார்.

சித்தராமையா இந்தியத்தேசியக் காங்கிரசுக்காரர். கர்நாடகத்தில் காங்கிரசு ஆட்சி நடக்கிறது.

அங்கே முதன்மை எதிர்க்கட்சியாக இருப்பது பா.ச.க! இந்தியத்தேசியத்தின் தீவிரப் பிரிவு அது! மேற்கண்ட கன்னட மொழி சார்பான - இந்தியத் தேசியத்திற்கு முரணான கர்நாடக அரசின் நடவடிக்கைகளை பா.ச.க. எதிர்க்கவில்லை.

கன்னட தேசியக் கொடியை வடிவமைக்க சித்தராமையா வல்லுநர் குழு அறிவித்த போது, “இது தேர்தல் தந்திரம்” என்று கர்நாடகப் பா.ச.க. விமர்சித்தது. அதற்கு மறுமொழி கூறிய சித்தராமையா, “கர்நாடகத்திற்கென்று தனிக்கொடி உருவாக்குவதைப் பா.ச.க. எதிர்க்கிறதா அல்லது ஆதரிக்கிறதா?” என்று நேரடியாகக் கூற வேண்டும் என்றார். பதுங்கிக் கொண்டது பா.ச.க.! அக்கட்சியும் கன்னடக் கொடி உருவாவதை எதிர்க்கவில்லை.

அடுத்து கர்நாடகத்தில் இன்னொரு முக்கியக்கட்சி தேவகவுடாவின் ஐக்கிய சனதா தளம்! இதுவும் இந்தியத்தேசியத்தை ஏற்றுக்கொண்ட அனைத்திந்தியக் கட்சி! இக்கட்சியும் தனிக்கொடியை எதிர்க்கவில்லை; இந்தி அழிப்பை எதிர்க்கவில்லை.

இந்தியத்தேசியத்தின் தாயகமாக - தலைமைப் பீடமாகக் கருதிக் கொள்ளும் காங்கிரசு, பா.ச.க. போன்ற கட்சிகளின் கர்நாடகத் தலைமை கன்னடத் தேசியத்துடன் தங்களைப் பிணைத்துக் கொண்டு, அதற்கான நடவடிக்கைகளில் இறங்குகின்றன. ஆனால் இந்தியத்தேசியத்திற்கு மாற்றாக திராவிடத்தை முன்வைத்த தி.மு.க.வோ, அதிலிருந்து பிரிந்த அ.தி.மு.க.வோ தமிழ்த்தேசியத்தோடு தங்களை இணைத்துக் கொள்ளாமல் - இந்தியத்தேசியத்தின் கங்காணிகளாகச் செயல்படுவதேன்?

இந்த உளவியல் திரிபை ஆய்வு செய்வது மிகமிகத் தேவை!

1970-இல் அன்று முதலமைச்சராக இருந்த கலைஞர் கருணாநிதி, தமிழ்நாட்டிற்கென்று தனிக்கொடி உருவாக்கும் திட்டத்தை வெளியிட்டார். தமிழ்நாட்டுக் காங்கிரசும், பிராமண அமைப்புகளும் அறிவாளிகளும் எதிர்த்தவுடன், அத்திட்டத்தைக் கைவிட்டு விட்டார். கைவிட்டதோடு, நேர் எதிரான வேலையில் ஈடுபட்டார்.

இந்திய விடுதலை நாளில் ஆளுநர் இந்திய அரசுக் கொடியை ஏற்றி வந்த மரபை மாற்றி, அக்கொடியை முதலமைச்சர்கள் ஏற்றுவதற்கான “உரிமை” கோரினார். இந்திய அரசும் கருணாநிதியின் கோரிக்கையை மகிழ்ச்சியோடு ஏற்றுக் கொண்டது.

தமிழ்நாட்டிற்கென்று தனிக்கொடி வடிவம் ஒன்றைக் காட்டி, அவ்வுரிமையைப் பெறப்போவதாக மார்தட்டிக்கொண்ட கருணாநிதி, அதற்கு மாற்றாரிடம் எதிர்ப்பு வந்தவுடன், உடனே மண்டியிட்டார். எந்த இந்திய ஏகாதிபத்தியத்தை எதிர்த்து தி.மு.க. வளர்ந்ததோ, அந்த இந்தியக் கொடியை ஏற்றும் உரிமை பெற்ற “மாவீரராகத்” தம்மை வர்ணித்துக் கொண்டார்.

திராவிட இயக்கத்தின் இரண்டுங்கெட்டான் இனவாதத்தாலும் போலி வாய் வீச்சாலும் வளர்க்கப்பட்ட தமிழர்களும் “மூவண்ணக் கொடியேற்றும் உரிமையை” மூவேந்தர் கொடியினை ஏற்றும் உரிமை பெற்றதுபோல் பேசிப் பூரித்தனர்! கலைஞர் கருணாநிதிக்கு அவரின் அரசியல் தந்தை பெரியார் காட்டிய வழிதான் இதுவும்!

பெரியார் தனித்தமிழ்நாடு கேட்டுக் கொண்டே 1954 முதல் 1967 வரை, காங்கிரசுக்கு வாக்குக் கேட்டு, தேர்தலுக்குத் தேர்தல் பரப்புரை செய்து வந்தார். ஒரு கட்டத்தில் திராவிடர் கழகத் தோழர்களைக் காங்கிரசிலேயே சேரும்படி அறிக்கையும் வெளியிட்டார்.

“தமிழர்” என்பது கலப்பட இனப்பெயர், “திராவிடர்” என்பதுதான் அசல் அக்மார்க் இனப்பெயர் என பெரியார் பரப்புரை செய்தார். தமிழ் காட்டுமிராண்டி மொழி, தமிழ்ச் சனியனைக் கைவிட்டு, ஆங்கிலத்திலேயே வீட்டில் மனைவியுடனும் வேலைக்காரியுடனும் பேசிப் பழகுங்கள் என்றார்.

ஒரு காலத்தில் பெரியார் இந்தி எதிர்ப்புப் போராட்டம் நடத்தியவர்தான்! ஆனால் பிற்காலத்தில் எனது இந்தி எதிர்ப்பு தமிழ் ஆதரவு கொண்டது அல்ல; ஆங்கில ஆதரவு கொண்டது என்று அறிக்கையும் வெளியிட்டார்.

பெரியாரும் கருணாநிதியும் இன உறவு கொண்டாடிய ஆந்திர, கர்நாடக, கேரள தேசங்களில், தமிழ்நாட்டைப் போல் இரண்டுங்கெட்டான் இன அரசியல் கிடையாது. அங்கெல்லாம், காங்கிரசு, கம்யூனிஸ்ட்டுக் கட்சி போன்ற இந்தியத்தேசியக் கட்சிகள்தாம்! ஆனால் அவற்றின் “மாநிலத்” தலைமைகள், அலுவலகப் படிவங்கள் நிரப்பும்போது மட்டும்தான் தங்களை இந்தியர் என்று கூறிக் கொள்ளும்; மற்ற நேரங்களில் தங்களைத் தெலுங்கர், கன்னடர், மலையாளி என்றே அழைத்துக் கொள்ளும். ஆரியக் கைச்சரக்கான “திராவிடர்” என்ற இரண்டுங் கெட்டான் பெயரை அவர்கள் ஏற்கவில்லை.

இரண்டுங்கெட்டான் திராவிடப் பின்புலம் இல்லாதததால்தான், ஆந்திராவில் ஒரு நடிகர் இயல்பாகத் “தெலுங்கு தேசம்” என்ற பெயரில் கட்சி தொடங்க முடிந்தது. கேரளத்தில் கம்யூனிஸ்ட்டுத் தலைவர்களும், காங்கிரசுத் தலைவர்களும் மலையாள இனப்பற்றைத் தாண்டி, மலையாள இனவெறியுடன், தமிழ்நாட்டிற்குரிய முல்லைப் பெரியாறு அணையை முடக்கும் வேலைகளில் தீவிரமாகச் செயல்படுகிறார்கள். கர்நாடகத்தில் காங்கிரசு முதலமைச்சர் கன்னடக் கொடியேற்ற சட்டப்படி அதிகாரிகள் குழு அமைத்துள்ளார்.

இந்தியத்தேசிய வெறிக் கட்சிகளான காங்கிரசு மற்றும் கம்யூனிஸ்ட் கட்சிகளின் தலைமையின் கீழ் உள்ள கர்நாடக, கேரளத் தலைமைகள் கன்னட, மலையாள இனப்பற்றைத் தாண்டி, இனவெறியுடன் இருக்கிறார்கள்; தமிழ்நாட்டிலோ இன உரிமை என்ற பெயரில் “திராவிட” இனம் பேசி, இயற்கையான தமிழின உணர்வைக் கொன்று தமிழரல்லாத அயல் இனங்களின் மீது மோகத்தை வளர்த்துவிட்டனர், திராவிடத் தலைவர்கள்!

இருந்தும் தமிழ் இன உணர்ச்சி இங்கு மற்ற தென்மாநிலங்களைவிட குறைவாக இருப்பதற்குக் காரணம் தமிழின அரசியலில் திராவிட அரசியல் புகுந்ததுதான்!

ஆரிய ஏகாதிபத்தியவாதிகள் புதிதாக கட்டமைத்த “இந்தியன்” என்ற வடக்கத்திய இனப்புனைவுக்கு எதிராக தமிழ்நாட்டில் தமிழறிஞர்களும், தமிழர்களும் வெளிப்படுத்திய தமிழின உணர்ச்சியை - “திராவிடன்” என்று பெரியார் தலைமையிலான திராவிடத் தலைவர்கள் மடைமாற்றினார்கள். அந்த பாதிப்பைத் தான் இன்றையத் தலைமுறைத் தமிழர்கள் சுமக்கிறார்கள்.
கர்நாடகத்தில் கன்னடரல்லாதவர்களாக தெலுங்கர்கள், தமிழர்கள், மராத்தியர்கள் அதிகம் உள்ளனர். இவர்களின் கூட்டுத்தொகை கன்னடர்களின் மக்கள் தொகையைவிட அதிகம் என்றும் கூறுகின்றனர். ஆனால் தமிழ்நாட்டில் தமிழர்கள் 80 விழுக்காடு அளவிற்குப் பெரும்பான்மையினர்!

கர்நாடகத்தில் கன்னட மொழி அலுவல் மொழியாகச் செயல்படுகிறதா என்பதைக் கண்காணிக்கவும் நடவடிக்கை எடுக்கவும் அதிகாரமுள்ள கன்னட வளர்ச்சி ஆணையம் (Kannada Development Authority - KDA) அமைத்துள்ளது அம்மாநில அரசு. கர்நாடகாவில் கன்னடம் உரியவாறு பயன் படுத்தவில்லையென்றால் - அதற்குப் பொறுப்பான அதிகாரிக்கு அல்லது தனிநபருக்கு அழைப்பாணை (சம்மன்) அனுப்பி வரவழைத்து, அவரை விசாரணை செய்யவும், அவரை இடைநீக்கம் செய்யவும், அவருக்குத் தண்டனை வழங்கவும் அதிகாரம் படைத்தது கன்னட ஆணையம்!

தமிழ்நாட்டில் தமிழ் வளர்ச்சித்துறை என்று ஒன்றுள்ளது. அதற்கு எந்த அதிகாரமும் இல்லை. வணிக நிறுவனங்களின் பெயர்ப் பலகையில் உரியவாறு தமிழ் எழுதப்பட்டிருக்கிறதா என்று பார்க்கக்கூட அதிகாரம் இல்லை! அதற்கான அதிகாரம், தொழிற்சாலை ஆய்வாளர்களுக்கு வழங்கப்பட்டிருக்கிறது. கன்னட ஆணையத்திற்கு அழைப்பாணை (Summoning Authority) அனுப்பும் அதிகாரம் வழங்கப்பட்டுள்ளது. அப்படிப்பட்ட அதிகாரம் எதுவும் தமிழ் வளர்ச்சித்துறை துணை இயக்குநர்களுக்கோ, இயக்குநருக்கோ இல்லை!

“இருப்பது ஓர் உயிர்; அது போவது ஒருமுறை; அது தமிழுக்காகப் போகட்டும்” என்று ஆயிரத்தோருமுறை பேசிய கருணாநிதி தம் ஆட்சிக் காலத்தில், கன்னட ஆணையம் போல் “தமிழ் ஆணையம்” (Thamizh Authority) அமைக்காதது ஏன்?

கன்னடப் பிராமணப் பெண்ணான செயலலிதாவுக்கு இயல்பிலேயே தமிழுக்கு எதிரான காழ்ப்புணர்ச்சி உண்டு! எனவே அவர் தமிழ் ஆணையம் அமைக்காததைப் புரிந்து கொள்ள முடிகிறது. தமது தமிழ் ஆற்றலால் தமிழ் மக்களிடம் வேர் பிடித்த கருணாநிதி, கன்னட ஆணையம் போல், கன்னடத்தேசியக் கொடி போல் தமிழ் ஆணையம் _ தமிழ்த்தேசியக் கொடி முதலியவற்றிற்கு முயலாதது ஏன்?

பிற மாநிலப் பிராமணர்கள்

தமிழ்நாட்டைத் தவிர மற்ற மாநிலங்களில் உள்ள பிராமணர்களும் பிராமண அறிவுத் துறையினரும், அந்தந்த மாநிலத் தேசிய இனத்துடன் தங்களை ஒருங்கிணைத்துக் கொண்டு, அந்தந்த மொழி, இன உரிமைக்குக் குரல் கொடுக்கிறார்கள்.

தமிழ்நாட்டில் பிராமணர்களில் பெரும்பாலோர் தாங்கள் தமிழர்கள் என்ற உளவியல் ஒருங்கிணைப்பு இல்லாமல் ஒதுங்கியே சிந்திக்கிறார்கள். அதிலும் அறிவுத்துறை மற்றும் ஊடகத்துறையில் உள்ள பிராமணர்களில் பெரும்பாலோர் தமிழின அடையாளங்களுக்கும், தமிழ்மொழி உரிமைகளுக்கும் எதிராகவே செயல்படுகிறார்கள். அவர்கள் தங்களின் முன்னோர்கள் ஆரியர்கள், தங்களின் புனித மொழி சமற்கிருதம் என்று பல ஆயிரம் ஆண்டுகளுக்கு முந்தைய தங்கள் வீட்டு நினைவுடனேயே (Nostalgia) வாழ்கிறார்கள்.

ஆயிரக்கணக்கான ஆண்டுகள் கடந்த பின்னும் அவர்களது ஆரிய கோத்திர நினைவுகள் அவர்களுக்கு மீண்டும் மீண்டும் வரக் காரணம் என்ன? வர்ணாசிரம தர்மப்படி ஆரியப் பிராமணர்கள் எல்லோர்க்கும் தலைமையாக ஆதிக்கம் செலுத்தியவர்கள். அந்த ஆதிக்கத்தை இன்று விட்டுவிட மனம் வரவில்லை. நவீனமான முறையில், நளினமான வடிவங்களில் இன்றும் பிராமண ஆதிக்கம் நீடிக்க வேண்டும் என்பதே அவர்களின் உள்ளுணர்வு!

சோ, குருமூர்த்தி, சுப்பிரமணிய சாமி போன்றவர்கள் தங்களின் ஆரிய பிராமண ஆதிக்கம் தொடர வேண்டும் என்பதை ஓரளவு ஒளிவு மறைவின்றிச் சொல்லக் கூடியவர்கள். இடதுசாரிகள், சனநாயகர்கள், தாராளர்கள் என்று அறியப்படும் பிராமணர்களில் பலர் வர்ணாசிரம தர்மத்தின் மறைமுக இரசிகர்கள்!

தமிழ்நாட்டில் பெரியாரும், திராவிட இயக்கத்தினரும் மிகவும் கடுமையாக அவர்களைப் பகைவர்களாக்கும் வகையில் பிராமண எதிர்ப்புப் பரப்புரை செய்தார்கள்; அதனால் பிராமணர்கள் - குறிப்பாகப் பிராமண அறிவுத் துறையினர் தமிழ்த்தேசிய இனத்துடன் ஒருங்கிணையாமல் போய் விட்டார்கள் என்ற வாதம் இங்கு பேசப்படுகிறது. பிராமண ஆதிக்கக் கொடுமைகள் - சகிக்க முடியாத நிலையில் இருந்ததால், பெரியாரும் அவர் வழி வந்தோரும் கடுமையாக எதிர்வினை ஆற்ற வேண்டிய தேவை இருந்தது. அதனைக் குறைகூற முடியாது!

பிராமண வகுப்பில் பிறந்த பாரதியாரே, “பார்ப்பானை ஐயரென்ற காலமும் போச்சே, வெள்ளை பரங்கியைத் துரையென்ற காலமும் போச்சே” என்று பாடினார். “ஏது செய்தும் பார்ப்பான் காசு பெற பார்ப்பான்” என்றார்.

சங்க காலத்திலிருந்து ஆரிய இன ஆதிக்கத்தையும் ஆரிய மொழி ஆதிக்கத்தையும் எதிர்த்து வந்த மரபு தமிழர்களுக்குண்டு! “பேர் கொண்ட பார்ப்பான் பிரான்தன்னை அர்ச்சித்தால் போர் கொண்ட மன்னர்க்குப் பொல்லாத வியாதியாம்” என்று பாடினார் திருமூலர். “வேதாகமங்கள் என்று வீண்வாதம் ஆடுகின்றீர்”, “நால்வருணம் தோல் வருணம் ஏது” என்று பேசினார் வள்ளலார்!

தமிழ்நாட்டுப் பிராமணர்களில் உண்மையான சீர்திருத்தவாதி தோன்றி, களைப்படையாமல் தன் சமூகத்தைத் திறனாய்வு செய்து, அவர் பிராமணர்களிடையே செல்வாக்கு பெற்று அந்த வரலாற்றுப் போக்கில் தமிழர்களும் பிராமணர்களும் தேசிய இன அடிப்படையில் ஒருங்கிணைந்திருக்க வேண்டும். அந்தச் சீர்திருத்தம் தமிழ்நாட்டுப் பிராமணர்களிடையே நடைபெறவில்லை.

கர்நாடகத்தில் தனிக்கொடிக்கு அரசுக் குழுவை அம்மாநில முதல்வர் சித்தராமையா அமைத்ததை அம்மாநிலப் பிராமண அறிவுத்துறையினர் எதிர்க்கவில்லை. தமிழ்நாட்டில் 1970-இல் கலைஞர் கருணாநிதி தனிக்கொடி திட்டத்தை அறிவித்தபோது இங்குள்ள பிராமண ஏடுகள் அதை எதிர்த்துக் கொதித்துக் கொந்தளித்தன. 1938-இல் இந்தித் திணிப்பு எதிர்ப்புப் போராட்டம் நடந்த போது, “தமிழ்நாடு தமிழர்க்கே” என்று தமிழ்த்தேசியத் தாயகக் குரல் கொடுத்தபோது, “எலிவளை எலிகளுக்கே” என்று பிராமண ஏடோன்று கேலி செய்தது.

தமிழ்நாட்டுப் பிராமணர்களிடையே உள்ள சனநாயக ஆற்றல்கள் பிராமணியத்தை வெளிப்படையாக விமர்சிக்க வேண்டும். தமிழ் வளர்ச்சிக்கு அரும்பெரும் பங்காற்றிய அறிஞர்களில் பிராமணர்கள் பலர் உள்ளனர்.

ஆயிரம் இரண்டாயிரம் ஆண்டுகளாகத் தமிழ் மண்ணில் வாழ்ந்து, தமிழைத் தாய்மொழியாகக் கொண்டுள்ள பிராமணர்கள் மற்ற மாநிலங்களில் அந்தந்த தேசிய இனத்துடன் ஒன்றுகலந்ததுபோல், தமிழ்நாட்டிலும் தமிழ்த்தேசிய இனமாய் உளவியல் பெற வேண்டும்.

குருமூர்த்தி, எச். இராசா, சுப்பிரமணிய சாமி, எஸ்.வி. சேகர் போன்ற ஆரிய ஆதிக்கவாதிகள் இருக்கத்தான் செய்வார்கள். சனநாயக உணர்வுள்ள பிராமணர்கள் அவர்களை ஓரங்கட்ட வேண்டும். எச். இராசாக்கள், தமிழ்நாட்டில் செல்வாக்குப் பெற்றால் பிராமணியத்திற்கு எதிரான தமிழர்களின் எதிர்வினை விமர்சனங்களும் கடுமையாகத்தான் இருக்கும்!

பிறமொழி பேசுவோர்

கர்நாடகத்தில் தெலுங்கு, தமிழ், மராத்தி மொழிகள் பேசுவோர் - கன்னடத்தேசியக் கொடி உருவாவதற்கு எதிர்ப்புத் தெரிவிக்கவில்லை. கன்னட மொழிதான் கர்நாடக அலுவல் மொழி என்பதற்கு எதிர்ப்புத் தெரிவிக்கவில்லை.

அதேபோல் வரலாற்றின் போக்கில் பல நூறு ஆண்டுகளுக்கு முன் தமிழ்நாட்டில் குடியேறி இந்த மண்ணின் மக்களாக வாழும் பிறமொழி பேசும் மக்கள், தமிழுடனும் தமிழ்த்தேசியத்துடனும் ஒருங்கிணைந்தவர்கள். இந்த உணர்வை, உறவைக் குலைக்கும் வகையில் தெலுங்கு மாநாடு நடத்தி தமிழ்நாட்டில் தெலுங்கை இரண்டாவது ஆட்சி மொழியாக்க வேண்டும் என்று சிலர் தீர்மானம் போடுகிறார்கள். இந்தத் தன்னலவாதிகளின் சூழ்ச்சி வலையில் தெலுங்கைத் தாய்மொழியாகக் கொண்ட மக்கள் வீழ்ந்துவிடக் கூடாது!

தமிழ்நாட்டை தமிழ் மற்றும் தெலுங்கு பேசும் இருமொழி மாநிலமாக மாற்றும் சூழ்ச்சித் திட்டத்தில் தெலுங்கைத் தாய்மொழியாகக் கொண்ட ஒரு சாரார் முயல்கிறார்கள். இந்த முயற்சியின் பின்னணியில் தெலுங்குத் தொழில் அதிபர்களில் ஒரு சாரார் இருக்கிறார்கள். இந்த முயற்சியின் அறிவிக்கப்படாத தலைவராக வெங்கையா நாயுடு, நிர்மலா சீத்தாராமன் போன்றோர் செயல்படுகின்றனர். இந்த ஏற்பாட்டின் ஒரு பகுதியாகத்தான், ஆந்திரத் தெலுங்கர்களைத் தமிழ்நாட்டின் ஆளுநராக இந்திய அரசு அவ்வப்போது அமர்த்துகிறது.

தெலுங்கைத் தாய்மொழியாகக் கொண்ட குடும்பங்களைச் சேர்ந்தவர்களில் பெரும்பாலோர் தங்களைத் தமிழர்களாக உணர்கிறார்கள். தமிழ்மொழி உரிமைப் போராட்டங்களில், ஈழ விடுதலைப் போராட்டங்களில் பங்கேற்று வருகிறார்கள். அந்த சிறந்த மரபு தொடர வேண்டும்.

பலநூறு ஆண்டுகளாகத் தமிழ்நாட்டைத் தாயகமாகக் கொண்டு வாழும் பிறமொழி பேசும் மக்கள் அனைவரும் இந்த மண்ணின் மக்கள் மட்டுமல்ல, மரபுவழிப்பட்ட தமிழர்களுக்குள்ள உரிமைகள் அனைத்தும் அவர்களுக்கும் இருக்கிறது என்ற நிலைபாடு கொண்டது நாம் முன்வைக்கும் தமிழ்த்தேசியம்!
பிறமொழி பேசுவோரும் தமிழைத் தமிழ்நாட்டின் அலுவல் மொழியாகவும், கல்வி மொழியாகவும் ஏற்க வேண்டும். விருப்பப்பாடமாக அவர்கள் தாய் மொழியைக் கற்கும் வாய்ப்பும் இங்கு இருக்க வேண்டும்.

முகமூடித் தமிழ்த்தேசியம்

“தமிழ்நாடு தமிழர்க்கே” என்ற முழக்கத்துடன் 1930களில் தமிழ்த்தேசியக் குரல் ஓங்கி ஒலிக்கத் தொடங்கியது. பின்னர் பெரியார் தலைமையிலும் அண்ணா தலைமையிலும் திரிபான திராவிட வடிவம் என்ற போதிலும் தமிழ்நாட்டு விடுதலையை பெருவாரியான தமிழ் மக்கள் ஆதரித்து அணிவகுத்தனர்.

தனிநாட்டு விடுதலைக்குரல் எழுப்பாத ஆந்திரம், கர்நாடகம், கேரளம் ஆகியவற்றையும் ஒருதலைக் காமம் போல் சேர்த்துக் கொண்டு, நான்கு மாநில விடுதலைக்குத் தி.மு.க. குரல் எழுப்பியது. தமிழ்நாட்டு விடுதலையாவது கிடைக்கும் என்ற நம்பிக்கையில் தமிழ்நாட்டு மக்கள் திரள் தி.மு.க.வை ஆதரித்தனர். விடுதலை முழக்கத்தை எழுப்பிக் கொண்டு முதல் முதலாக போட்டியிட்ட 1957 தேர்தலில் 15 சட்டப் பேரவை உறுப்பினர்களையும், அடுத்து 1962 தேர்தலில் 50 சட்டப் பேரவை உறுப்பினர்களையும் தமிழ் மக்கள் தி.மு.கழகத்திற்கு வழங்கினார்கள்.

அதன்பிறகு 1963இல் தி.மு.க. தனிநாட்டுக் கோரிக்கையைக் கைவிட்டது. 1971 தேர்தலில் காங்கிரசுடன் கூட்டணி சேர்ந்தது தி.மு.க. அதன் பின்னர் காங்கிரசுடனும் பா.ச.க.வுடனும் மாறி மாறிக் கூட்டணி சேர்ந்து வருகிறது.

பெரியார், அண்ணா, கருணாநிதி ஆகியோர் எழுப்பிய தனிநாட்டுக் கோரிக்கை தொடக்கத்திலேயே ஒரு பகட்டு முழக்கமாகவே முன்வைக்கப்பட்டது. பிறக்கும்போதே ஊனமாகப் பிறந்தது. தேசியம், தேசிய இனத் தாயகம் ஆகியவற்றைப் பற்றி இவர்களிடம் சமூக அறிவியல் படியிலான வரையறுப்பு இல்லை; அப்படி வரையறுக்க வேண்டும் என்ற விருப்பமும் இவர்களிடம் இல்லை! எல்லாவற்றிற்கும் மேலாக இம்மூவருக்கும், இவர்கள் எழுப்பும் விடுதலைக் கோரிக்கையின் மீது இவர்களுக்கே நம்பிக்கை இல்லை; எனவே விடுதலை இயக்கத்திற்கேற்ற நடைமுறை அரசியலை இவர்கள் பின்பற்றவும் இல்லை!

இந்திய ஏகாதிபத்தியத் தலைமையுடன் கூடிக் குலாவிக் கொண்டனர். தங்கள் இயக்கத்தின் எல்லைக்குள் வராத இன்ன பிற இனங்களையும் இவர்களாக சேர்த்துக் கொண்டு, அவற்றிற்கும் விடுதலை கேட்டனர்.

இவர்களால் தமிழர் இன அரசியலில் - அதாவது தமிழ்த்தேசிய அரசியலில் ஏற்பட்ட குழப்பங்களும், பின்னடைவுகளும் கொஞ்ச நஞ்சமல்ல. இன்றையத் தலைமுறை அவர்கள் ஏற்றி வைத்த சுமைகளைத் தாங்கித் தவிக்கின்றனர்.

மீண்டும் அவ்வாறான குழறுபடிகள் இல்லாமல் தமிழ்த்தேசியத்தை முன்னெடுக்க வேண்டிய பொறுப்பு இளந்தலைமுறையினர்க்கு இருக்கிறது.

இந்தியம், திராவிடம் இரண்டையும் புறக்கணிக்காமல் தமிழ்த்தேசியம் பேசினால், அது முகமூடித் தமிழ்த்தேசியம்! முகமூடியில் தமிழர் முகம்; உள்ளே பச்சோந்தி முகம்!

இந்தியம், எதிரியாகச் செயல்பட்டு தமிழர் உரிமைகளைப் பறிக்கிறது. இது நேர்முக எதிரி! திராவிடம் - உறவாடிச் சீர்குலைக்கிறது! இது மறைமுக எதிரி!

இந்தியத்தேசியம் பேசும் அனைத்திந்தியக் கட்சிகள் செல்வாக்குப் பெற்றுள்ள மாநிலங்களில் வளர்ந்துள்ள சொந்த இன உணர்ச்சியும் சொந்த இன அரசியலும், மாநிலக்கட்சிகள் செல்வாக்குப் பெற்றுள்ள தமிழ்நாட்டில் இல்லை. இதை உணர்ந்து படிப்பினைகள் பெறுவோம்!

தமிழ்த்தேசிய முழக்கங்கள் இன்று பல முனைகளிலிருந்து வருகின்றன. அம்முழக்கம் எழுப்புவோர், தமிழ்த்தேசிய இறையாண்மையை முன் வைக்கிறார்களா? பதவி, பணம், விளம்பரம் மூன்றுக்கும் ஆசைப்படாத தன்னல மறுப்பு இலட்சியவாதிகளாக இருக்கிறார்களா?

பகட்டு ஆரவாரத்துடன் தமிழ்த்தேசியம் பேசிக் கொண்டே, பகைவன் அனுமதிக்கும் கங்காணிப் பதவிகளுக்காகக் காத்திருக்கிறார்களா?

இளந்தலைமுறையினர் இப்படியெல்லாம் அலசி ஆராய வேண்டிய தேவை உள்ளது. ஏற்கெனவே நம் முன்னோர் ஏமாற்றப்பட்டனர்!

சிந்திக்கத் தயங்காதீர்; மூளைச்சோம்பல் அறிவை முடக்கிவிடும்! திறனாய்வு செய்ய அஞ்சாதீர்; தேசத்தின் தலைவிதி உங்கள் கையில் உள்ளது! நம்தேசம் தமிழ்த்தேசம்!

“தமிழ்த்தேசியத் தமிழர் கண்ணோட்டம்” - தமிழ்த்தேசிய மாதமிருமுறை இதழின் ஆகத்து 16-31 இதழில் தோழர். பெ. மணியரசன் எழுதிய கட்டுரை இது!

தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannottam.com
இணையம்: www.tamizhdesiyam.com

ஆரியத்தால் கொல்லப்பட்ட அனிதா! பெண்ணாடம்- ஆர்ப்பாட்டம்!!!!!!

ஆரியத்தால் கொல்லப்பட்ட அனிதா! பெண்ணாடம் - ஆர்ப்பாட்டம்!!!!!!

அரியலூர் மாவட்டம் குழும்பூர் மாணவி அனிதா படுகொலைக்கு காரணமான மத்திய, மாநில அரசுகளை கண்டித்து தமிழ்நாட்டில் நீட் தேர்வை இரத்து செய்ய வலியுறுத்தி பெண்ணாடம் பழைய பேருந்து நிலையம் அருகில் தமிழ்த்தேசியப் பேரியக்க பொதுக்குழு உறுப்பினர் தோழர் அர. கனகசபை தலைமையில் இன்று (4-9-2017) மாலை நடைபெற்றது.

மாணவி அனிதாவுக்கு வீரவணக்கம்!

அனிதாவைக் காவ வாங்கிய ஆரியத்தை பழிதீர்ப்போம்! 

ஆரிய இந்தியாவின் இனப்பகையை முறியடிப்போம்!

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com 

இணையம்: tamizhdesiyam.com

ஆரியத்தால் கொல்லப்பட்ட அனிதா!

ஆரியத்தால் கொல்லப்பட்ட அனிதா!

இந்திய மருத்துவக் கழகம் தொடங்கப்படுவதற்கு - இருபதாண்டுகளுக்கு முன்பேயே தமிழ்நாட்டில் மருத்துவக் கழகம் தொடங்கப்பட்டது. இந்தியாவின் மருத்துவத் தலைநகராக விளங்கும் அளவிற்கு, மருத்துவத்தில் தமிழ்நாடே சிறந்து விளங்கியது.

இவற்றையெல்லாம் முறியடித்து, தமிழர்களை தற்குறிகளாக மாற்ற வேண்டுமென்ற ஆரிய இனவெறி வன்மத்தோடுதான் - தமிழ்நாட்டின் மீது மிக வன்மையாக “நீட்” தேர்வு வலிந்து திணிக்கப்பட்டது. 2017 சனவரி மாத இறுதியில் நிறைவேற்றப்பட்ட தமிழ்நாட்டின் “நீட்” சட்டத்திற்கு, இந்திய அரசு ஒப்புதல் அளிக்காததற்கான காரணம் - ஆரிய இனவெறிப் பகையே அன்றி வேறல்ல!

இந்த இனப்பகையின் களபலியாகத்தான் அரியலூர் மாணவி தங்கை அனிதா, “பாரத மாதா” பலி பீடத்தில் காவு கொடுக்கப்பட்டார். இந்த உண்மையை, இனியாவது உரக்கப் பேசுவோம்!

நேற்று (02.09.2017) மாலை, அரியலூர் குழுமூர் கிராமத்தில் நடைபெற்ற அனிதாவின் இறுதி வணக்க நிகழ்வில், பல்வேறு கட்சி - இயக்கங்களைச் சேர்ந்த ஆயிரக்கணக்கானோரும், பொது மக்களும் உணர்ச்சிப் பெருக்கோடு பங்கேற்றனர். தமிழ்த் தேசியப் பேரியக்கத் தலைமைச் செயற்குழு உறுப்பினர் தோழர் க. முருகன் தலைமையில் பேரியக்கத் தோழர்கள் பங்கேற்றனர்.

மாணவி அனிதாவுக்கு வீரவணக்கம்!

அனிதாவைக் காவ வாங்கிய ஆரியத்தை பழிதீர்ப்போம்!

ஆரிய இந்தியாவின் இனப்பகையை முறியடிப்போம்!

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com 

இணையம்: tamizhdesiyam.com 

மாணவி அனிதா தற்கொலை: எடப்பாடியும் நிர்மலா சீத்தாராமனும் பதவி விலக வேண்டும்! தோழர் பெ. மணியரசன் அறிக்கை!

மாணவி அனிதா தற்கொலை: எடப்பாடியும் நிர்மலா சீத்தாராமனும் பதவி விலக வேண்டும்! தமிழ்த்தேசியப் பேரியக்கத் தலைவர் தோழர் பெ. மணியரசன் அறிக்கை! 

ஏகாதிபத்திய மனப்போக்குடன் இந்திய அரசு திணித்த மருத்துவக் கல்லூரி மாணவர் சேர்க்கைக்கான “நீட்” தேர்வு, தமிழ்நாட்டு பட்டியல் வகுப்பைச் சேர்ந்த மாணவி அனிதாவின் உயிரைப் பலிவாங்கிவிட்டது!

அன்றாடம் மூட்டைத் தூக்கி உழைத்துக் குடும்பம் நடத்தும் அரியலூர் மாவட்டம் - குழுமூர் சண்முகத்தின் மகளான அனிதா, “மருத்துவராக வேண்டும்” என்ற நேர்மையான கனவுடன் கடுமையாக உழைத்து, +2 தேர்வில் 1176 மதிப்பெண் வாங்கினார். மருத்துவக் கல்லூரியில் சேர்வதற்கான அவரது கட்ஆப் மதிப்பெண் 196.75 ஆகும்.

தமிழ்நாட்டில் வழக்கமாக +2 மதிப்பெண் அடிப்படையில் மருத்துவக் கல்வியில் மாணவர் சேர்க்கை இவ்வாண்டு நடந்திருந்தால், எடுத்த எடுப்பிலேயே மாணவி அனிதா மருத்துவக் கல்லூரியில் சேர்க்கப்பட்டிருப்பார்.

“நீட்” தேர்வில், அனிதா படித்த பாடத்திட்டத்திற்கு வெளியே நடுவண் கல்வி வாரிய (சி.பி.எஸ்.இ.) பாடத்திட்ட கேள்விகள் கேட்கப்பட்டதால், மிகக்குறைவான மதிப்பெண்ணே அனிதாவால் வாங்க முடிந்தது.

தன் குடும்பத்தின் வறுமை நிலையை - அன்றாடம் கண்டு மனம் நொந்து தான் மருத்துவராகி அந்த நிலையை மாற்ற வேண்டும் என்ற உறுதியில் - ஊக்கமுடன் படித்து முதல் தரமான மதிப்பெண் வாங்கினார், அந்த ஒடுக்கப்பட்ட வகுப்பு மாணவி!

இவ்வாண்டுக்கு “நீட்” தேர்விலிருந்து விலக்கு அளிக்கும் தமிழ்நாடு அரசின் ஆணையை எதிர்த்து, உச்ச நீதிமன்றத்தில் போடப்பட்ட வழக்கில், தமிழ்நாடு அரசுத் தரப்பில் தன்னையும் இணைத்துக் கொண்டு அவ்வழக்கை வலுப்படுத்தினார். இந்த முயற்சிகளெல்லாம் பலன் அளிக்காத நிலையில், தனது குடும்பத்தின் எதிர்காலம் பற்றிய கனவு நொறுங்கியதும், மாணவி அனிதா தற்கொலை செய்து கொண்டுள்ளார்.

தமிழ்நாட்டில் அனைத்துத் தமிழ் நெஞ்சங்களிலும் ஈட்டி பாய்ச்சியதைப் போல், அனிதாவின் தற்கொலை சொல்லொண்ணா துன்பம் தருகிறது!

இளம் மாணவி அனிதாவின் உயிரைக் காவு கொண்டவர்கள் இந்திய ஏகாதிபத்திய ஆட்சியாளர்களும், தமிழ்நாட்டுக் கங்காணி ஆட்சியாளர்களும் ஆவர்.

இந்திய அரசமைப்புச் சட்டத்தில் உள்ள பொது அதிகாரப் பட்டியலில் “கல்வி” சேர்க்கப்பட்டுள்ளது. இந்தப் பொது அதிகாரப் பட்டியல் என்பது, மாநில அரசுக்கும் – நடுவண் அரசுக்கும் பொதுவான அதிகாரப் பட்டியலாகும். இதில் மாநில அரசும் சட்டம் இயற்றலாம், நடுவண் அரசும் சட்டம் இயற்றலாம்.

நீட் தேர்வு தமிழ்நாட்டில் தேவையில்லை என்றும், தமிழ்நாட்டில் ஏற்கெனவே கடைபிடித்து வரும் மதிப்பெண் அடிப்படையிலான மாணவர் சேர்க்கையைத் தொடர வேண்டும் என்றும் தமிழ்நாடு சட்டப்பேரவை 2017 பிப்ரவரி மாதம், ஒரு மனதாக சட்ட முன்வடிவு நிறைவேற்றி குடியரசுத் தலைவர் ஒப்புதலுக்காக தில்லிக்கு அனுப்பி வைத்தது. இதுவரை அந்த சட்ட முன் வடிவுக்கு ஒப்புதல் தராமலும், நேரடியாக மறுப்புத் தெரிவிக்காமலும் கிடப்பில் போட்டு விட்டது இந்திய அரசு!

இதுபோல் இந்தியாவின் பல மாநிலங்களிலிருந்து, “பொதுப்பட்டியல்” தொடர்பாக, பல்வேறு துறைகள் சார்பாக நிறைவேற்றப்பட்ட 95 சட்ட முன் வடிவுகளுக்கு இந்திய அரசு ஒப்புதல் தராமல் கிடப்பில் போட்டுள்ளது என்று செய்தி வெளியாகியுள்ளது. இவற்றில் தமிழ்நாடு அரசு அனுப்பி வைத்த 5 சட்ட முன் வடிவுகளும் அடங்கும்!

நடைமுறையில் “பொதுப்பட்டியல்” என்ற ஒன்று இல்லை என்ற நிலையை நரேந்திர மோடி அரசும், ஏற்கெனவே காங்கிரசு அரசும் ஏற்படுத்திவிட்டன.

“நீட்” தேர்வு குறித்து நாடாளுமன்றக் குழு வழங்கிய 92ஆவது பரிந்துரையில், “நீட்” தேர்வை விரும்பாத மாநிலங்களுக்கு விலக்கு அளிக்கலாம் என்று கூறியுள்ளது. நாடாளுமன்றக் குழுவின் இந்தப் பரிந்துரைப்படி, தமிழ்நாட்டின் சட்ட முன்வடிவுக்கு மோடி அரசு ஒப்புதல் வழங்காதது ஏன்?

தமிழ்நாடு அரசு இது தொடர்பாக சட்ட முன்வடிவை இயற்றி அனுப்பிவிட்டு, ஓர் அரசாணை இயற்றும் நிலைக்கு மாறியது ஏன்? இந்தக் கேள்வியை இவ்வழக்கில் சென்னை உயர் நீதிமன்றத்தில் தனி நீதிபதி ஏற்கெனவே கேட்டுள்ளார். அவ்வப்போது நரேந்திர மோடியுடன் கூடிக் குலாவிக் கொண்டிருக்கும் எடப்பாடி பழனிச்சாமியும் அவர்களது அமைச்சர்களும், “நீட்” தேர்வுக்கு விலக்கு அளிக்கும் சட்ட முன்வடிவை சட்டமாக்கித்தர வலியுறுத்தவே இல்லையா?

நடுவண் அமைச்சர் நிர்மலா சீத்தாராமன், தமிழ்நாட்டிற்கு இந்த ஓராண்டு நீட் தேர்விலிருந்து விலக்கு அளிக்க நடுவண் அரசு ஒப்புக் கொண்டுள்ளது என்று உறுதியளித்தார். ஆனால், உச்ச நீதிமன்றத்தில் தமிழ்நாடு அரசு இயற்றிய அரசாணை குறித்த வழக்கு வந்தபோது, இந்திய அரசின் தலைமை வழக்கறிஞர் தமிழ்நாடு அரசின் சட்ட முடிவை நாங்கள் ஏற்கவில்லை என்று மனுத்தாக்கல் செய்தார்.

நரேந்திர மோடி அரசு, ஆதரவளிப்பது போல் நாடகமாடி கடைசியில் கழுத்தறுத்துவிட்டது! இதில் நிர்மலா சீத்தாராமன் பாத்திரம் எப்படிப்பட்டது என்று கண்டறிய வேண்டியுள்ளது.

வாக்குறுதி கொடுத்துவிட்டு - காலை வாரி விட்ட இந்திய அரசின் இந்த ஏமாற்று வேலையை விமர்சித்து, தமிழ்நாடு முதலமைச்சர் எடப்பாடி பழனிச்சாமி ஒரு வார்த்தை கூட பேசாதது ஏன்?

ஊர் ஊராக விழாக் கொண்டாடிக் கொண்டு, வாண வேடிக்கை நடத்தி வாய்ச்சவடால் அடித்துக் கொண்டு வருகிறார். “நீட்” தேர்வில் தமிழ்நாட்டை பலியிட்டதைப் போலவே, மாநில அரசின் வணிக வரி உரிமையைப் பறித்துக் கொண்ட ஜி.எஸ்.டி. வரியையும் எடப்பாடி பழனிச்சாமி ஏற்றுக் கொண்டார். அடுத்து, காவிரியில் தமிழ்நாட்டுக்கு பாதகம் செய்யும் வகையில் நடுவண் அரசு முன்வைக்கும் கட்டப்பஞ்சாயத்து குறித்தும் அனுசரனையாக இருக்கிறார். எடப்பாடி பழனிச்சாமி அரசு, இன்னும் என்னென்ன தமிழ்நாட்டு உரிமைகளைப் பலியிடுமோ என்ற அச்சம் மக்களுக்கு ஏற்பட்டுள்ளது.

மாணவி அனிதாவின் சாவிற்கு முதன்மைப் பொறுப்பாளி இந்திய அரசு - இரண்டாவது பொறுப்பாளி தமிழ்நாடு அரசு! வாக்குறுதி கொடுத்து மோசடி செய்த நடுவண் அமைச்சர் நிர்மலா சீத்தாராமனும், அந்த மோசடி நாடகத்தை அனுமதித்து தமிழ்நாட்டு உரிமையை பலியிட்ட எடப்பாடி பழனிச்சாமியும் உடனடியாகப் பதவி விலக வேண்டும்!

இன்றைக்குள்ள இந்திய அரசு மற்றும் தமிழ்நாடு அரசின் போக்குகள், இதே நிலையில் நீடித்தால் தமிழ்நாட்டு மக்கள் குடியிருக்கும் உரிமையைக் கூட இழக்க வேண்டிய அவலம் ஏற்படலாம்! எனவே, எடப்பாடி பழனிச்சாமியும் நிர்மலா சீத்தாராமனும் பதவி விலகி தமிழ்நாட்டு மக்களுக்கு புதிய நம்பிக்கை அளிப்பதற்கான சூழலை உருவாக்க வேண்டும். தமிழ்நாடு அரசும் இந்திய அரசும் தங்களின் பழியைத் துடைத்துக் கொள்ளும் வகையில், போர்க்கால அவசரத்துடன் தமிழ்நாட்டிற்கு “நீட்” தேர்விலிருந்து நிரந்தர விலக்களிக்கக்கூடிய சட்டத்தை இயற்ற வேண்டும்.

மாணவி அனிதாவின் இழப்பு அவருடைய பெற்றோருக்கு மட்டுமல்ல, அனைவருக்குமான பெரும் துயரம்! அனிதாவின் நினைவைப் போற்றும் அதே வேளையில், மாணவ மாணவிகள் மனம் உடைந்து விடாமல் இந்த நிலையை மாற்றிட - “நீட்” தேர்வை விரட்டியடிக்கும் முயற்சியில் இறங்க வேண்டும் என்றும், மாணவர்கள் மட்டுமின்றி, ஒட்டு மொத்தத் தமிழ் மக்களும் “நீட்” தேர்வை விரட்டியடிக்கும் அறப்போராட்டத்தில் இறங்க வேண்டிய தேவை எழுந்துள்ளது என்றும் தமிழ்த்தேசியப் பேரியக்கம் சார்பில் தெரிவித்துக் கொள்கிறேன்.

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhdesiyam.com 

சுருங்கி வரும் ஜனநாயகம் குறித்தான பொது உரையாடல்!

சுருங்கி வரும் ஜனநாயகம் குறித்தான பொது உரையாடல்!

“மனித உரிமைப் போராளி” - வழக்குரைஞர் பி.வி. பக்தவச்சலம் அவர்களின் பத்தாம் ஆண்டு நினைவு நிகழ்வாக, நாளை (02.09.2017) “சுருங்கி வரும் ஜனநாயகம் குறித்தான பொது உரையாடல்” என்ற தலைப்பில் கருத்தரங்கம் நடைபெறுகின்றது.

பி.வி.பி. அறக்கட்டளை மற்றும் மக்கள் கண்காணிப்பகம் ஆகிய அமைப்புகளின் சார்பில், நாளை (02.09.2017) காலை 10 மணிக்கு, சென்னை நுங்கம்பாக்கம் இலயோலா கல்லூரியின் இலாரன்சு சுந்தரம் அரங்கில் நடைபெறும் இக்கருத்தரங்குக்கு, மக்கள் கண்காணிப்பகம் செயல் இயக்குநர் - வழக்கறிஞர் ஹென்றி திபேன் தலைமை தாங்குகிறார்.

எழுத்தாளர் பா. செயப்பிரகாசம், மருத்துவர் பி.வி. வெங்கட்ராமன் (பி.சி.ப. அறக்கட்டளை) ஆகியோர் முன்னிலை வகிக்கின்றனர். வழக்கறிஞர் அஜிதா அறிமுக உரையாற்ற, ஓய்வு பெற்ற சென்னை உயர் நீதிமன்ற நீதிபதி து. அரிபரந்தாமன் தொடக்க உரையாற்றுகிறார்.

நிகழ்வில், பல்வேறு கட்சி - இயக்கங்களைச் சேர்ந்த தலைவர்கள் கருத்துரையாற்றுகின்றனர். தமிழ்த்தேசியப் பேரியக்கம் சார்பில், பொதுச் செயலாளர் தோழர் கி. வெங்கட்ராமன் உரையாற்றுகிறார்.

நிகழ்வில், தமிழின உணர்வாளர்களும், சனநாயக ஆற்றல்களும் திரளாகப் பங்கேற்க வேண்டுமென அன்புரிமையுடன் அழைக்கின்றோம்!

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com

இணையம்: tamizhdesiyam.com

ஆளுநருக்கு அரசமைப்புச் சட்டம் வழி காட்டுகிறதா? ஆர்.எஸ்.எஸ். வழி காட்டுகிறதா? தோழர் பெ. மணியரசன் கேள்வி!

ஆளுநருக்கு அரசமைப்புச் சட்டம் வழி காட்டுகிறதா? ஆர்.எஸ்.எஸ். வழி காட்டுகிறதா? தமிழ்த்தேசியப் பேரியக்கத் தலைவர் தோழர் பெ. மணியரசன் கேள்வி! 

தமிழ்நாடு பொறுப்பு ஆளுநர் வித்தியாசாகர ராவ் “தினகரன் குழுவினர் உட்பட அனைத்து அ.இ.அ.தி.மு.க. சட்டப்பேரவை உறுப்பினர்களும், அ.இ.அ.தி.மு.க.வை விட்டு விலகவில்லை, அதிலேயே இருக்கிறார்கள்; எனவே முதல்வர் எடப்பாடி பழனிச்சாமி சட்டப்பேரவையில் நம்பிக்கை வாக்கு கோர வேண்டிய தேவை இல்லை” என்று கூறி இருப்பது, ஆளுநர் நடுநிலையோடு செயல்படவில்லை என்பதைக் காட்டுகிறது.

அ.இ.அ.தி.மு.க.வின் தன்னலக் குழுக்கள் நடத்திக் கொண்டிருக்கும் பதவிச் சண்டையைப் பயன்படுத்தி, பா.ச.க.வின் தில்லித் தலைமை தமிழ்நாட்டில் தனது நாட்டாண்மை அரசியலை வலுப்படுத்திக் கொள்ளும் வேலைகளைத் தொடர்கிறது. இந்திய அரசமைப்புச் சட்டத்தையும் அரசியல் அறத்தையும் பலியிட்டு, தமிழ்நாட்டில் பா.ச.க.வை ஊதிப் பெருக்கச் செய்ய நடுவண் அரசு முயல்கிறது.

தினகரன் குழுவினர் ஆளுநர் வித்தியாசாகர ராவைக் கடந்த 22.08.2017 அன்று சந்தித்து, தங்கள் அணியைச் சேர்ந்த சட்டப்பேரவை உறுப்பினர்கள் 19 பேரும் முதல்வர் எடப்பாடி பழனிச்சாமிக்கு அளித்து வந்த ஆதரவை விலக்கிக் கொண்டு விட்டார்கள் என்று கூறும் மனுவைத் தனித்தனியே அளித்தனர். அதில் முதல்வர் எடப்பாடி பழனிச்சாமியை மாற்ற வேண்டும் என்றும் ஆளுநரைக் கேட்டுக் கொண்டிருந்தனர்.

அதையொட்டி தி.மு.க. உள்ளிட்ட எதிர்க்கட்சியினர் நம்பிக்கை வாக்கெடுப்பு நடத்த ஆளுநர் ஆணையிட வேண்டும் என்று கோருகின்றனர். இக்கோரிக்கை மனுவை நேற்று (30.08.2017) எதிர்க்கட்சிகள் அளித்த போது மேற்கண்டவாறு ஆளுநர் கூறியுள்ளார்.

அ.இ.அ.தி.மு.க.வின் தன்னலக் குழுக்களின் பதவிச் சண்டையினால் கடந்த எட்டு மாதங்களாகத் தமிழ்நாட்டில் மாநில அரசின் செயல்பாடுகள் குழம்பிக் கிடக்கின்றன; பல துறைகளில் வேலைகள் தேங்கிக் கிடக்கின்றன. இன்னொரு பக்கம் சட்டப்பேரவை உறுப்பினர்களை அவ்வப்போது அதிக விலையில் குத்தகைக்கு எடுத்து கூடாரங்களில் அடைத்து வைத்துக் கொள்ளும் அ.தி.மு.க. தன்னலக் குழுக்களின் “சந்தைச் சனநாயகம்” அரங்கேறிக் கொண்டிருக்கிறது. அ.இ.அ.தி.மு.க. அணிகளின் இந்தச் செயல்கள் தமிழ்நாட்டிற்குத் தலைகுனிவை ஏற்படுத்துகின்றன.

தமிழ்நாட்டிற்கு ஏற்பட்டுள்ள இந்தத் தலைகுனிவையும், ஆட்சி மற்றும் அரசியல் குழப்பங்களையும் பா.ச.க.வின் நடுவண் அரசு கொண்டாடுகிறது. கொல்லைப்புற வழியில் தமிழ்நாட்டு ஆட்சியைப் பிடிக்க சூழ்ச்சி செய்கிறது.

தமிழ்நாட்டு ஆட்சிக்கு இன்று ஏற்பட்டுள்ள சிக்கல்களுக்குத் தீர்வு காண அரசமைப்புச் சட்டத்திலும், ஏற்கெனவே எஸ்.ஆர். பொம்மை உள்ளிட்ட பல வழக்குகளில் உச்ச நீதிமன்றம் வழங்கியுள்ள தீர்ப்புகளிலும் வழி சொல்லப்பட்டிருக்கிறது. சட்டமன்றத்தில் பெரும்பான்மையை ஐயத்திற்கு இடமின்றி அறிய வேண்டுமே தவிர ஆளுநரின் விருப்பு வெறுப்புக்கேற்ப முடிவு செய்ய முடியாது. இவ்வாறான சட்டவழியைப் பின்பற்றாமல், கொல்லைப்புற வழிகளைப் பின்பற்றுவது, பா.ச.க. ஆட்சியாளர்களே அரசமைப்புச் சட்டத்தை முறிக்கும் செயலாகும்.

முதல்வர் எடப்பாடி பழனிச்சாமிக்குத் தந்துவந்த ஆதரவை விலக்கிக் கொண்டதாக ஆளுநரிடம் மனுக் கொடுத்த தினகரன் அணியைச் சேர்ந்த 19 சட்டப்பேரவை உறுப்பினர்களைக் கட்சித் தாவல் தடைச் சட்டத்தின் கீழ் பதவி நீக்கம் செய்வதற்கு பேரவைத் தலைவர் தனபால் மூலம் காரணம் கேட்கும் கடிதம் கொடுத்திருக்கும் எடப்பாடி அணியின் செயல், கட்சித்தாவல் தடைச் சட்டத்திற்குப் பொருந்தாது என்பது மட்டுமல்ல, அருவருக்கத்தக்க தன்னல வெறியாட்டம் ஆகும்!

அதேபோல் சட்டப் பேரவையில் தடை செய்யப்படட குட்காவைக் காட்டி, இந்த சட்ட விரோத வணிகத்திற்கு அமைச்சர்களே காரணம் என்று பேசிய எதிர்க்கட்சித் தலைவர் மு.க. ஸ்டாலின் மற்றும் தி.மு.க. உறுப்பினர்கள் மீது நடவடிக்கை எடுத்து இடைநீக்கம் செய்ய எடப்பாடி அரசு முயல்வது, செயலலிதா ஆட்சியில் சசிகலா அதிகாரத்தைத் தன்னல நோக்கங்களுக்குத் தவறாகப் பயன்படுத்தி ஆடிய ஆட்டத்தை ஒத்தது ஆகும்!

இந்நிலையில் ஆளுநருக்கு அரசமைப்புச் சட்டம் வழிகாட்டுகிறதா அல்லது ஆர்.எஸ்.எஸ். வழிகாட்டுகிறதா என்ற வினா எழுந்துள்ளது.

எனவே தமிழ்நாடு ஆளுநர், உடனடியாக சட்டப்பேரவையில் நம்பிக்கை வாக்கு கோர வேண்டும் என்று முதல்வர் எடப்பாடி பழனிச்சாமிக்கு காலக்கெடு விதித்து ஆணை இட வேண்டும் என்று தமிழ்த்தேசியப் பேரியக்கத்தின் சார்பில் கேட்டுக் கொள்கிறேன்.

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com 

இணையம்: www.tamizhdesiyam.com 

"தமிழர் மீட்சி - இன முழக்கம்" தமிழ்நாடடெங்கும் பரப்புரை இயக்கம்!

"தமிழர் மீட்சி - இன முழக்கம்" தமிழ்நாடடெங்கும் பரப்புரை இயக்கம்!







 



பேரன்புடையீர், உங்களைத் தேடி வந்திருக்கிறோம்! “ஆதாயமில்லாமல் வருவீர்களா” என்று நீங்கள் நினைக்கலாம்! அரசியல் வாதிகள் உங்களுக்குத் தந்த அனுபவம் அவ்வாறு உள்ளது!

 

நாங்கள் எந்தப் பதவிக்கும் தேர்தலில் போட்டியிடு வதில்லை. எந்தத் தேர்தல் கூட்டணியிலும் சேர்வ தில்லை. வேறு வகையான எந்தப் பதவிக்கும் முயல்வ தில்லை. தன்னலப் பயன் கருதா தமிழர் பணி மற்றும் தமிழ்ப்பணி என்று செயல்படுகிறோம்!

 

தமிழ்நாட்டு அரசியல் கட்சிகள் தங்களுக்குள் போட்டுக் கொள்ளும் தன்னலப் பதவிச்சண்டையே தமிழ்நாட்டு அரசியல் என்று ஆகிவிட்டது. ஆனால், இந்திய அரசோ இந்தச் சண்டையைப் பயன்படுத்தி, தமிழ்நாட்டு உரிமைகளையும், தமிழர்களின் வாழ்வுரி மைகளையும் ஒவ்வொன்றாகப் பறித்துக் கொண்டுள்ளது. தமிழ்நாட்டு அரசியல் கட்சிகளுக்கு அவ்வுரிமைகளைக் காப்பாற்றும் அக்கறையும் இல்லை; ஆற்றலும் இல்லை!

 

இந்தியாவை ஆளும் பாரதிய சனதாக் கட்சியோ, ஏழை மற்றும் நடுத்தர மக்களின் வயிற்றில் அடித்து பெருங்குழும (கார்ப்பரேட்) முதலாளிகளைக் கொழுக்க வைக்கிறது. இட்லி, தோசைக்கு சரக்கு சேவை வரி (ஜி.எஸ்.டி.) போட்டு வசூலிக்கிறது! போர்டு, ஹூண்டாய், பாரத் பென்சு, மகேந்திரா, அசோக் லேலண்ட் போன்ற பெரும் பெரும் கார்ப்பரேட் முதலாளிகள் உற்பத்தி செய்யும் ஊர்திகளுக்கு இதுவரை வசூலிக்கப் பட்ட உற்பத்தி வரியை (எக்சைஸ்) நீக்கிவிட்டது. அவற்றிற்கான வரியை அவற்றை வாங்குபவர்கள் கட்டிக் கொள்ளட்டும் என்று கூறிவிட்டது!

 

ஏழை, நடுத்தர மக்கள் மானிய விலையில் பயன்படுத்தி வரும் சமையல் எரிவளி (கேஸ்) உருளைக்கு அளித்து வந்த மானியத்தை பா.ச.க. ஆட்சி முற்றாக நீக்கிவிட்டது. அதன்விலை கிடுகிடுவென்று உயரப் போகிறது! அத்துடன் ஞாயவிலைக் கடைகளை இழுத்து மூடும் திட்டத்தையும் இப்போது அறிவித்துள்ளது!

 

தமிழ்நாடு அரசு பாடத்திட்டத்தின்படி படித்த தமிழ்நாட்டு மாணவர்கள், தமிழ்நாடு அரசு நடத்தும் மருத்துவக் கல்லூரிகளில் சேர முடியாதபடி, தில்லிப் பாடத்திட்டத்தில் (சி.பி.எஸ்.இ.) படித்த மாணவர்களுக்கு இடம்கொடுக்கும் வகையில் பா.ச.க. ஆட்சி “நீட்” தேர்வைப் புகுத்தியுள்ளது. தமிழ்நாட்டு ஆட்சியாளர்கள் தமிழைப் புறக்கணித்து, ஆங்கில ஆதிக்கத்தை வளர்த்து வருகிறார்கள். இந்திய அரசோ இந்தியையும் சமற்கிருதத்தையும் தீவிரமாகத் திணிக்கிறது.

 

காவிரி, முல்லைப் பெரியாறு, பாலாறு, தென்பெண்ணை போன்ற தமிழ்நாட்டு ஆறுகளின் உரிமைகளை அண்டை மாநிலங்கள் பறித்துக் கொள்ள இந்திய அரசு துணை செய்கிறது. கச்சத்தீவை இந்திய அரசு இலங்கைக்குக் கொடுத்ததால், ஏராளமான தமிழக மீனவர்களை சிங்களப்படை சுட்டுக் கொன்றது. இப்போதும் தமிழ் மீனவர்களையும், அவர்களின் படகுகளையும் சிங்களப்படை இலங்கைக்கு அன்றாடம் கடத்திக் கொண்டு போகிறது.

 

நெல், வாழை, கரும்பு, தென்னை, மஞ்சள் போன்றவை விளையும் வளமான நிலங்களில் பெட்ரோலியம், எரிவளி, மீத்தேன் உள்ளிட்ட ஐட்ரோ கார்பன் மற்றும் நிலக்கரி ஆகியவற்றை எடுக்க ஓ.என்.ஜி.சி.யையும், பெரும் கார்ப்பரேட் நிறுவனங்களையும் களத்தில் இறக்கி விட்டுள்ளது இந்திய அரசு! தமிழ்நாடு அரசோ, தமிழ்நாட்டு மக்களின் உரிமைகளைக் காக்க முன்வராமல், வாழ்விற்காகப் போராடும் மக்கள் மீது காவல்துறை முற்றுகையையும், அடக்குமுறையையும் ஏவி விடுகிறது. அறப்போராட்டம் நடத்துவோரை சிறையிலடைக்கிறது!

 

பெண்களும், ஆண்களும் தங்கள் வாழ்க்கையைப் பாதுகாத்துக் கொள்ள டாஸ்மாக் மதுக்கடைகளை நிரந்தரமாக மூடப் போராடுகிறார்கள். தமிழ்நாடு அரசோ அவர்கள் மீது காவல்துறையை ஏவித் தாக்குகிறது! புதிது புதிதாக டாஸ்மாக் கடைகளைத் திறக்கிறது! தமிழ்நாட்டின் பெரிய அரசியல் கட்சிகள் மேற்கண்ட போராட்டங்களைத் தாங்கள் முன்னெடுக்காமல், அப்போராட்டங்களை ஆதரிப்பதாக கூறிக்கொள்கின்றன.

 

இந்நிலையில்தான், தமிழ்நாட்டுத் தாயக உரிமைகளையும் தமிழர்களின் வாழ்வுரிமைகளையும் பாதுகாத்திட தமிழ்த்தேசியம் என்ற தத்துவச் சுடர் ஏந்தி, தமிழ்த்தேசியப் பேரியக்கம் மக்கள் போராட்டங்களுடன் தன்னை இணைத்துக் கொள்கிறது! அப்போராட்டங்களிடையே ஒருங்கிணைப்பை உருவாக்கவும், ஒட்டு மொத்தத் தமிழ்நாட்டின் எழுச்சியாக அவற்றைக் கொண்டு செல்லவும் திசைகாட்டுகிறது.

 

இது குறித்து உங்களுடன் உரையாட விரும்புகிறோம்!

 

தலைமைச் செயலகம்,
தமிழ்த்தேசியப் பேரியக்கம்

 

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: www.tamizhthesiyam.com

கமலகாசன் கணிப்பின்படி தமிழ்நாட்டில் ஜனகணமன பாடும் வரைதான் “திராவிடம்” இருக்குமா? தோழர் பெ. மணியரசன்!

கமலகாசன் கணிப்பின்படி தமிழ்நாட்டில் ஜனகணமன பாடும் வரைதான் “திராவிடம்” இருக்குமா? தோழர் பெ. மணியரசன், தலைவர், தமிழ்த்தேசியப் பேரியக்கம்.

தி.மு.க.வின் “முரசொலி” நாளிதழின் பவள விழா சென்னை கலைவாணர் அரங்கத்தில் 10.08.2017 அன்று நடந்த போது அதில் பேசிய நடிகர் கமலகாசன், “ஜனகணமன பாடல் இருக்கும்வரை “திராவிடம்” இருக்கும் என்று கூறியுள்ளார். தமிழ்நாட்டில் ஜனகணமன பாடல் பாடப்படும் வரை தான் திராவிடம் இருக்குமோ” என்ற கவலையோடு இவ்வாறு பேசியிருப்பாரோ?

அடுத்து, “திராவிடம் என்பது தமிழகத்தோடு தென்னகத்தோடு முடிந்து விடுவதில்லை; அது நாடு தழுவியது. திராவிடம் என்பது பரந்த இந்தியன் (Pan Indian). இது தொல்லியல், மாந்தவியல் அறிந்தவர்களுக்குத் தெரியும். திராவிடம், சிந்துச் சமவெளியில் தொடங்கி, மெதுவாகத் தள்ளிக் கொள்ளப்பட்டு வந்து, தேநீரில் தேயிலைச் சாறு போல் தமிழ்நாட்டில் இருக்கிறது” என்றார் கமலகாசன்.

அப்படி அவர் பேசிய போது மேடையில் வீற்றிருந்த, மு.க. ஸ்டாலின் பூரித்துப் புன்னகைத்தார். ஒரு காலத்தில் தி.மு.க. தலைவர்கள் முழங்கிய ஆரிய - திராவிட இனப் போராட்டங்களின் வரலாறு, இக்காலத்தில் கழகத்திற்குப் பழங்கால சுமையாகி விட்டது. அந்த “வரலாற்றுக் கழிவு மூட்டைகள்” கமலகாசன் கையால் இறக்கி வீசப்படுவது, இந்திய தேசிய நீரோட்டத்தில் புனித நீராடிக் கொண்டிருக்கும் தி.மு.க.விற்கு ஓர் அங்கீகாரம்தான்!

“திராவிடம் அனைத்திந்தியத் தன்மை வாய்ந்தது” என்று கமலகாசன் கூறுவது சரிதான்! திராவிடப் பெயரை வடநாட்டில் உருவாக்கியவர்கள் ஆரியர்கள். தென்னாட்டுப் பிராமணர்களைப் பஞ்ச திராவிடர்கள் என்றார்கள் அவர்கள்! தமிழர்களைத் “திராவிடர்கள்” என்று குறிப்பதைத்தான் நாம் தவறு என்று கூறுகிறோம். மற்றவர்கள் தங்களைத் திராவிடர்கள் என்றுக் கூறிக் கொண்டால், அதில் நாம் தலையிடவில்லை.

தமிழ்நாட்டில் தமிழர்கள் தங்கள் தற்காப்பு அடிப்படையில் இன உணர்ச்சி கொள்ளும் போதெல்லாம் அதை மடைமாற்றிப் பேசுவது கமலகாசனுக்கு வாடிக்கை!

இயக்குநர் பாரதிராசா தலைமையில், காவிரி உரிமைக்காகத் தமிழ்த்திரை உலகினர் நெய்வேலி அனல் மின் நிலைய முற்றுகைப் போராட்டம் நடத்திய போது, “போராட்டத்தினால் காவிரியில் தண்ணீர் வர வேண்டும். இரத்தம் வரக்கூடாது” என்றார். தென்னிந்திய நடிகர் சங்கத்தின் பெயரைத் தமிழ்நாடு நடிகர் சங்கம் என்று மாற்ற வேண்டும் என்று தமிழ் நடிகர்கள் கோரிக்கை வைத்த போது, “அனைத்திந்திய நடிகர் சங்கம்” என்று மாற்றலாம் என்று கருத்து மாற்றம் கூறினார் கமலகாசன்.

இந்திய அடையாளமும் திராவிட அடையாளமும் பின்னிப் பிணைந்து கிடக்கின்றன! சபாஷ் கமலகாசன், பூணூல் அணியாமலும் பிராமணியம் பேசலாம்!

தலைமைச் செயலகம்,

தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

தமிழ்த்தேசியப் போராளி கா. பரந்தாமன் அவர்களுக்கு வீரவணக்கம்!

தமிழ்த்தேசியப் போராளி கா. பரந்தாமன் அவர்களுக்கு வீரவணக்கம்! 

 

தமிழர் தேசிய முன்னணி பொதுச் செயலாளர் கா. பரந்தாமன் அவர்கள், உடல் நலக்குறைவு காரணமாக 29.06.2017 அன்று பிற்பகல் மதுரையில் காலமானார். 

 

திரு. பழ. நெடுமாறன் அவர்களின் வழிகாட்டுதலில் பொதுவாழ்வில் தன்னை அர்ப்பணித்துக் கொண்ட திரு. பரந்தாமன், தமிழ்த்தேசியக் களத்தில் தொடர்ந்து செயலாற்றி வந்தவர். 

 

கடந்த 2002ஆம் ஆண்டு செயல்லிதா ஆட்சியில் திரு. பழ. நெடுமாறன், மருத்துவர் தாயப்பன், சுப. வீரபாண்டியன், சாகுல் அமீது, பாவாணன் ஆகியோரோடு பரந்தாமன் அவர்க‍ளும் பொடாவில் கைது செய்யப்பட்டார்.  அப்போது செய்தியாளர்களிடம் கூறுகையில் "ஈழத்தமிழருக்கு ஆதரவாகப் பேசியதைத் தமிழக அரசு தவறு என்று க‍ருதினால், அதைத் தொடர்ந்து செய்வேன்" என்று கூறினார். பொடா சிறையில் அடைக்கப்பட்டு, 525 நாட்களுக்குப் பிறகே பிணையில் விடுதலையானார்.

கடைசியாக, கடந்த சூன் 26ஆம் நாள் (2017), மதுரையில் "மக்கள் கண்கானிப்பகம்" ஒருங்கிணைத்து நடத்திய, சித்திரவதைக்கு எதிரான கண்டனக் கூட்டத்தில், அவர் உரையாற்றினார்.

30.06.2017 அன்று அவர் சொந்த ஊரான மானாமதுரையில் எவ்வித சடங்குகளுமின்றி, தமிழர் தேசிய முன்னணித் தலைவர் திரு. பழ. நெடுமாறன் தலைமையில் நடைபெற்ற இறுதி வணக்க நிகழ்வில், தமிழ்த்தேசியப் பேரியக்கத் தலைமைச் செயர்க்குழு உறுப்பினர் தோழர் இரெ. இராசு, பொதுக்குழு உறுப்பினர் தோழர் கதிர்நிலவன், தோழர்கள் கரிகாலன், புருசோத்தமன், வழக்கறிஞர் அருணாச்சலம் உள்ளிட்ட பேரியக்கத் தோழர்க‍ள் நேரில் சென்று வீரவணக்கம் செலுத்தினர்.

தன் வாழ்வின் இறுதிவரை தமிழ்த்தேசிய இலட்சியத்தை உயிர் மூச்சாகக் கொண்டு வாழ்ந்து மறைந்த "தமிழ்த்தேசியப் போராளி" கா. பரந்தாமன் அவர்களுக்கு வீரவணக்கம்!

தலைமைச் செயலகம், 

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com 

இணையம்: WWW.tamizhthesiyam.com

“ஆரியப் பேரினவாதம் தமிழை ஏற்காது!” மதுரை வழக்கறிஞர்களின் காலவரம்பற்ற உண்ணாப் போராட்டத்தில் . . .தமிழ்த்தேசியப் பேரியக்கத் தலைவர் தோழர் பெ. மணியரசன் உரை !

“ஆரியப் பேரினவாதம் தமிழை ஏற்காது!” மதுரை வழக்கறிஞர்களின் காலவரம்பற்ற உண்ணாப் போராட்டத்தில் . . .தமிழ்த்தேசியப் பேரியக்கத் தலைவர் தோழர் பெ. மணியரசன் உரை !

சென்னை உயர் நீதிமன்றத்திலும், அதன் மதுரைக் கிளையிலும் தமிழை வழக்காடும் மொழியாக ஆணையிட வலியுறுத்தி, வழக்கறிஞர்களும் இன உணர்வாளர்களும் 9 பேர், சூலை 27 - 2017 முதல் மதுரை மாநகர் காளவாசல் பகுதியில், காலவரம்பற்ற உண்ணாப் போராட்டம் நடத்தி வருகிறார்கள்.

இந்த உண்ணாப் போராட்டத்தில், வழக்கறிஞர் கு. பகத்சிங், வழக்கறிஞர் வே. முருகன், வழக்கறிஞர் ச. எழிலரசு, வழக்கறிஞர் மு. வேல்முருகன், வழக்கறிஞர் மு. செல்வக்குமார், வழக்கறிஞர் வே. திசையிந்திரன், மே பதினேழு இயக்கத் தோழர் மெய்யப்பன், மருது மக்கள் இயக்கம் தோழர் செ. முத்துப்பாண்டியன், இசுலாமிய சனநாயக முன்னணி தோழர் மதுக்கூர் அ. மைதீன் ஆகியோர் பங்கேற்றுள்ளனர்.

தமிழ்த்தேசியப் பேரியக்கத் தலைவர் தோழர் பெ. மணியரசன், பொருளாளர் தோழர் அ. விடியல், மாநகரச் செயலாளர் தோழர் இரெ. இராசு, பொதுக்குழு உறுப்பினர் தோழர் கதிர்நிலவன், மகளிர் ஆயம் நடுவண் குழு உறுப்பினர் தோழர் மேரி, தோழர்கள் சிவா, இளமதி, தங்கப்பழனி ஆகியோர் நான்காம் நாள் (30.07.2017) உண்ணாப் போராட்டப் பந்தலில் சந்தித்து, அவர்களின் போராட்ட இலட்சியத்துக்கு ஆதரவு தெரிவித்து, அவர்களின் ஈகத்திற்கு வாழ்த்துக் கூறினர்.

போராட்டத்தை வாழ்த்தியும், போராளிகளைப் பாராட்டியும் தோழர் பெ. மணியரசன் பேசியதன் எழுத்து வடிவம் :

“தமிழ்நாட்டின் அரசியல் கட்சிகளும், இயக்கங்களும் இந்தப் போராட்டத்தைப் பயன்படுத்திக் கொண்டு, தமிழை உயர் நீதிமன்ற வழக்குமொழியாக்க வேண்டும் என்ற கோரிக்கையை அனைவரும் ஒருசேர வலியுறுத்தி இந்திய அரசுக்கு அழுத்தம் தர வேண்டும்.

அ.தி.மு.க. ஆட்சியிலும், தி.மு.க. ஆட்சியிலும் இதற்காக சட்டப்பேரவைத் தீர்மானங்கள் நிறை வேற்றப்பட்டு, அவை இந்திய அரசுக்கு முறைப்படி ஆளுநர் வழியாக அனுப்பப்பட்டன. எனவே, இங்கு தமிழை உயர் நீதிமன்ற மொழியாக்குவதில் எந்தக் கட்சிக்கும் மாற்று கருத்துகள் இல்லை. எனவே, நாம் ஒன்றுபட்டு இக்கோரிக்கையை எடுத்துச் சென்று போராடுவதற்கான தருணம் இது!

இந்திய அரசமைப்புச் சட்டம், தமிழர்களை அடிமைப்படுத்தும் அடிமை சாசனம் என்பதே எங்கள் கருத்து! இருந்தாலும், அதில் வழங்கப்பட்டுள்ள குறைந்தபட்ச உரிமைகளைக்கூட இந்திய அரசு வழங்குவதில்லை. அதிலும், தமிழர்களுக்கு அந்த உரிமைகள் அறவே இல்லை என்றாகிவிட்டது!

இந்திய அரசமைப்புச் சட்டத்தின் உறுப்பு 348 (2)இன்படி, மாநில அரசு ஆளுநர் வழியாக - அம்மாநில மொழியை உயர் நீதிமன்ற வழக்காடு மொழியாக அறிவிக்கப் பரிந்துரைத்தால் இந்திய அரசு அதை ஏற்றுச் செயல்படுத்த வேண்டும். இந்தி மாநிலங்களில் உறுப்பு 348 (2)-ஐப் பயன்படுத்தி இந்தியை அவர்கள் உயர் நீதிமன்ற வழக்கு மொழியாக அறிவித்து, செயல்படுத்தி வருகின்றனர். ஆனால், இது ஏன் தமிழுக்குப் பொருந்தாது என்கிறார்கள்? இதைத்தான் நாங்கள் இனப்பாகுபாடு என்கிறோம்!

குற்றவியல் நடைமுறைச் சட்டத்தின் பிரிவு 153(ஏ)வின்படி, இந்த “இனப்பாகுபாடு” தண்டனைக்குரிய குற்றமாகும்! ஆனால், இந்தக் குற்றத்தைச் செய்வது இந்திய ஆட்சியாளர்களும், உச்ச நீதிமன்றமும் என்பதுதான் வேதனை; வேடிக்கை!

உச்ச நீதிமன்ற நீதிபதிகள் தங்கள் விருப்பு வெறுப்புக்கு ஏற்றபடி நீதி வழங்க முடியுமா? அவ்வாறு வழங்க முடியுமெனில் இந்திய அரசமைப்புச் சட்டம் எதற்கு? அதன் பெயரால் உறுதி எடுப்பதெல்லாம் மோசடி அல்லவா?

தமிழை வழக்கு மொழியாக்க வேண்டுமென தமிழ்நாடு அரசு கோரிக்கை அனுப்பினால், அதை இந்திய ஆட்சியாளர்கள் உச்ச நீதிமன்றத்தின் பரிசீலனைக்கு அனுப்புகிறார்கள். எதற்காக அதை உச்ச நீதிமன்ற பரிசீலனைக்கு அனுப்ப வேண்டும்? உச்ச நீதிமன்றத்தில் சட்டங்களில் சரி தவறுகளை பார்க்கலாமே தவிர, உச்ச நீதிமன்றமே சட்டமியற்றிக் கொண்டிருக்க அதிகாரமுண்டா? அப்படியென்றால், நாடாளுமன்றம் -_- சட்டமன்றம் எதற்காக?

இந்திய அரசு, உச்ச நீதிமன்றத்திடம் தன் சட்ட நடைமுறைகளில் சில விளக்கங்களை (Clarifications) கேட்கலாமே தவிர, அதன் பரிந்துரைக்கு அனுப்புவது எதற்காக? இதில் என்ன சட்டக் குழப்பம் இருக்கிறது? அரசமைப்புச் சட்ட 348(2) படி, இச்சிக்கலுக்குத் தீர்வு காண வேண்டியதுதான் நடுவண் அரசின் வேலை!

எனவே, தமிழை உயர் நீதிமன்ற வழக்கு மொழியாக்கக் கூடாது என்பதற்காக சூழ்ச்சியாக உச்ச நீதிமன்றத்தின் பரிசீலனைக்கு அத்தீர்மானத்தை இந்திய அரசு அனுப்பியது. இது பச்சை அயோக்கியத்தனம் அல்லவா?

காங்கிரசும், பா.ச.க.வும் அண்ணன் தம்பிகள் போல, இருவருக்கும் பெரிய அளவில் கொள்கை வேறுபாடுகள் கிடையாது. எனவேதான், இவ்விருவரும் இந்திய அரசை ஆளும்போது, தமிழை வழக்கு மொழியாக்க மறுத்தார்கள்.

இங்கே கூட்டாட்சி நடப்பதாகக் கூறப்படுகின்றது. ஆனால், தமிழை வழக்கு மொழியாக்கினால் “தேசிய ஒருமைப்பாடு”க்கு ஆபத்து வந்துவிடும் எனக் கூப்பாடு போடுகிறார்கள். உண்மையில், “தேசிய ஒருமைப்பாட்டு”க்கு அல்ல - வடக்கத்தியரின் ஆரிய மேலாதிக்கத்திற்குத்தான் இது ஆபத்து என்று அவர்கள் புரிந்து கொண்டிருக்கிறார்கள்.

ஆரிய மொழியான சமற்கிருதம் போட்ட கலப்பினக் குட்டிதான் இந்தி! எனவே அதை வழக்கு மொழியாக்க அவர்கள் எதிர்ப்புத் தெரிவிப்பதில்லை. சமற்கிருதத்தையே வழக்கு மொழியாக அறிவித்தால்கூட, அங்கு எதிர்ப்புகள் எழாது!

அண்மையில் ஒரு தொலைக்காட்சி நேர்காணலில், பா.ச.க.வின் ‘ஆரியத்துவாப் பொறுக்கி’ சுப்பிரமணிய சாமி, “ஒரு நாட்டில் ஒரு மொழிதான் இருக்க வேண்டும். அதுபோல் இந்தியாவுக்கு இருக்க வேண்டிய ஒரு மொழி சமற்கிருதம்தான். இடைக்காலத்திற்காகத் தான் இந்தி இருக்கிறது, ஏனெனில், இந்தியை சமற்கிருத வரி வடிவத்தில்தான் இப்பொழுது எழுதுகிறோம். எனவே கொஞ்ச நாளைக்கு இந்தி! அதன்பிறகு சமற்கிருதம்தான் இந்தியாவின் ஒற்றை மொழியாக இருக்க வேண்டும். இப்போது தமிழில் 40 விழுக்காடு சமற்கிருதச் சொற்கள் கலந்துள்ளன. மலையாளத்தில் 70 விழுக்காடு சமற்கிருதச் சொற்கள் இருக்கின்றன. இதேபோல் இந்தியாவிலுள்ள எல்லா மொழிகளிலும் சமற்கிருதச் சொற்கள் நிறைய இருப்பதால், எல்லோராலும் சமற்கிருதத்தை எளிதில் புரிந்து கொள்ள முடியும். எனவே, தமிழை சமற்கிருத வரி வடிவத்தில் எழுதிப் பழக வேண்டும்” என்று கூறினார்.

அவர் வெளிப்படையாகக் கூறி வருவதைத்தான் காங்கிரசும், பா.ச.க.வும் ஒளித்து, மறைத்து செய்து வருகின்றன. பா.ச.க.வைப் போலவே, காங்கிரசும் சமற்கிருதத் திணிப்புக் கொள்கை உடையதுதான்! ஏன் காங்கிரசின் அனைத்திந்தியத் தலைமை, பா.ச.க.வின் சமற்கிருதத் திணிப்புக்கு எதிராக முழங்குவதில்லை?

ஒரே வரி - ஒரே மொழி - ஒரே மையம் என்று இந்திய அரசு செயல்படுகின்றது. நமக்கு மாநில உரிமைகள் பறிக்கப்படுவதைப் போல், அனைத்து மாநிலங்களுக்கும்தான் உரிமைகள் பறிக்கப்படுகின்றன. ஆனால், நீட் - ஜி.எஸ்.டி. என மாநில உரிமைப் பறிப்புகளுக்கு எதிராக, பீகார், உ.பி., ம.பி., ராசஸ்தான் போன்ற இந்தி மாநிலங்கள் ஏன் கொதித்தெழுவதில்லை?

நடுவண் அரசு வலுப்படுவது என்பது, இந்தி பேசுவோரின் அரசு வலுப்படுகிறது என்று பொருள்! அவர்களுக்கு மாநில அரசு, ஒரு வட்டார அரசு போல! இந்திய அரசு - தங்களது சொந்தப் பேரரசு என்று கருதுகிறார்கள்!

தற்போது அவர்களது ஆரிய இனத்திற்கு ஒரு பேரரசர் போல, நரேந்திர மோடி கிடைத்திருக்கிறார். மற்ற மாநிலங்களின் உரிமைகளெல்லாம் பறிக்கப்பட்டு, தங்களின் இந்திப் பேரரசு மோடியின் ஆட்சியின் கீழ் வலுப்படுத்தப்பட்டு வருகிறது என்ற பூரிப்பு அவர்களுக்கு இருக்கிறது. எனவேதான் அவர்கள் மாநில அரசுகளின் உரிமைப் பறிப்புகளுக்கு எதிராகக் கொந்தளிப்பதில்லை!

இந்தியாவிலேயே வரி வசூலில் அதிகத் திறனுடைய மாநிலம் தமிழ்நாடு! நம்முடைய மாநிலத்தில் வரி வசூலித்து, அதை இந்தி மாநிலங்களுக்குக் கொடுக்கிறார்கள். ஆனால், வறட்சி - புயல் பாதிப்பை சந்திக்கும் நாம் 100 ரூபாய் கேட்டால், வெறும் 3 ரூபாய்தான் கொடுக்கிறார்கள். இது இனப்பாகுபாடு இல்லையா?

விந்திய மலைக்கு வடக்கே மற்றும் கிழக்கிலும் மேற்கிலும் இரு கடல்கள் வரை உள்ள மண்டலம் ஆரிய வர்த்தம் என்றார் மனு. அந்த ஆரிய வர்த்தத்தின் ஆட்சிதான் இப்போது நடக்கிறது. அதற்கு சரியான அடியாளாக நரேந்திர மோடி கிடைத்திருக்கிறார்.

மோடி குசராத்தியாக இருந்தாலும் ஆரிய வைசியர். அதுமட்டுமல்ல, இந்திக்காரரை விஞ்சிய இந்தி வெறியர்!

இரசியர்கள் தங்களை மகா இரசியர் என்றுகூறி தற்பெருமை கொள்வார்களாம். இரசியர் அல்லாத ஜார்ஜியராகப் பிறந்த ஸ்டாலின், இரசியர்களைவிடத் தீவிரமாக இரசிய மொழித் திணிப்பிலும், இரசியப் பெருமிதவாதத் திணிப்பிலும் ஈடுபட்டார். அப்போது நோய்வாய்ப்பட்டிருந்த லெனின், ஸ்டாலினின் இரசியத் திணிப்பை அறிந்து, இரசியராய்ப் பிறந்தவரைவிட மகா இரசியராக ஸ்டாலின் இருக்கிறார் என்று கண்டித்தார். இது லெனின் தொகுப்பு நூல்களில் உள்ளது.

எனவே, மாநில உரிமைகளைப் பறிக்கும் மோடியின் ஆரிய ஆதிக்கவாதத்துக்கு வடக்கத்தியரிடம் எதிர்ப்புகள் வருவதில்லை!

வங்காளம், மராட்டியம் போன்ற மொழிகளில் இலக்கியச் செழுமை இருந்தாலும், அவை சமற்கிருத மொழிக் குடும்பத்தைச் சேர்ந்தவை. அதுபோல், தெற்கில் தமிழ்மொழிக் குடும்பத்தைச் சேர்ந்த தெலுங்கு, கன்னட, மலையாள மொழிகள் ஆரிய சமற்கிருதக் கலப்பிலேயே உயிர் வாழ்பவை. “மொழி ஞாயிறு” பாவாணர் அவர்கள் கூறுவார். “தமிழ் தவிர்த்த இதரத் தென்னிந்திய மொழிகளில் வடசொல் சேரச் சேர அம்மொழிகள் சிறப்புப் பெறும்! தமிழோ வடசொல் தீரத் தீர சிறப்புப் பெறும்!”.

நீட் தேர்வில் தமிழ்நாடுதான் கடுமையாக பாதிக்கப் படுகின்றது. இந்தியாவிலேயே அதிக அரசு மருத்துவக் கல்லூரிகள் தமிழ்நாட்டில்தான் இருக்கின்றன. எனவே, இங்கு வெளி மாநிலத்தவரை மருத்துவக் கல்லூரிகளில் சேர்க்கத் துடிக்கிறார்கள். ஏற்கெனவே, வெளி மாநிலத்தவரை தொடர்வண்டித் துறை முதற்கொண்டு இந்திய அரசின் அனைத்துத் துறைகளிலும் தேர்வு என்ற பெயரில் மோசடிகளையும் முறைகேடுகளையும் அரங்கேற்றி, தமிழ்நாட்டில் திணித்துக் கொண்டுள்ளார்கள். நீட் தேர்வு நிலைமையை இன்னும் மோசமாக்கப் போகிறது.

தொடக்கத்தில் தமிழ்நாட்டைச் சேர்ந்த சி.பி.எஸ்.இ. மாணவர்களை அதிகமாகச் சேர்ப்பார்கள். சில ஆண்டுகள் கழிந்ததும், அனைத்திந்திய அளவில் மதிப்பெண் வரிசைப்படி வடநாட்டு மாணவர்களையும் மற்ற மாநிலங்களைச் சேர்ந்த மாணவர்களையும் தமிழ்நாட்டில் அதிகமாகச் சேர்ப்பார்கள். மண்ணின் மக்கள் பெற்றெடுத்த பிள்ளைகளுக்கு, தமிழ்நாடு அரசு மருத்துவக் கல்லூரிகளில் இடம் கிடைக்காது!

எனவேதான், நம் மீது இனப்பாகுபாடு காட்டப்படுகிறது எனத் திரும்பத் திரும்ப சொல்கிறோம். நாம் சட்ட நுட்பங்களை மட்டும் பேசிக் கொண்டிருந்தால் போதாது. இந்திய அரசின் இனப்பாகுபாட்டை அம்பலப்படுத்த வேண்டும்! நமக்கான இன உரிமையைப் பேச வேண்டும்!

நம் தமிழ்ப்பேராசான் வள்ளுவப் பெருந்தகை, “நோய்நாடி நோய் முதல் நாடி” என்றார். நாம் சிக்கலின் தன்மையைப் புரிந்து அதன் வேரை அறிந்து கொள்ள வேண்டும். இந்திய அரசின் ஆரியப் பேரினவாத அரசியலை அடையாளம் காண வேண்டும்.

இங்கே காலவரையற்ற உண்ணாப் போராட்டம் நடத்தி வரும் தோழர்களில் வழக்கறிஞர்கள் கு. பகத்சிங், வே. முருகன், ச. எழிலரசு, மு. வேல்முருகன், மு. செல்வக்குமார், வே. திசையிந்திரன் ஆகியோர் கடந்த முறையும் இதே காலத்தில் இதே இலட்சியத்திற்காக காலவரம்பற்ற உண்ணாப் போராட்டம் உள்ளிட்ட பல போராட்டங்கள் நடத்தியுள்ளார்கள். இதே கோரிக்கை அட்டையை ஏந்தி சென்னை உயர் நீதிமன்றத் தலைமை நீதிபதி அரங்கில் அமைதியாக அமர்ந்து அறப்போராட்டம் நடத்தினார்கள். அதனால் இவர்களின் வழக்கறிஞர் தொழில் செய்யும் உரிமைப் பறிக்கப்பட்டது.

ஒருமுறை பாதிப்புகளை எதிர்கொள்வோர் மீண்டும் போராட்டக்களத்திற்கு வருவதில்லை என்ற கூற்றை உடைத்து சுக்குநூறாக்கி, அந்த பாதிப்புகளையெல்லாம் எதிர்கொண்டு, இப்போது மீண்டும் போராட்டக் களத்திற்கு வந்துள்ளனர். இந்த ஈகத்தை - போர்க்குணத்தை நாம் பாராட்ட வேண்டும்!

புறநானூற்றில் கடலுள் மாய்ந்த இளம்பெருவழுதி என்ற பாண்டிய மன்னன் பாடிய ஒரு பாடல் உள்ளது. “இந்த உலகம் ஏன் இயங்குகிறதென்றால், இந்திரன் அருந்தும் அமிழ்தமே கிடைத்தாலும் _ தான் மட்டும் உண்ணாமல் பிறருக்கும் அளித்து உண்ணும் மனிதர்கள் இருக்கிறார்கள். ஒரு தவறு செய்தால், உலகமே கிடைக்கும் என்றாலும், அத்தவறை செய்ய மாட்டார்கள். உயிரே போகுமென்றாலும் பிறருக்கு நலம் பெயர்க்கும் செயலை செய்வார்கள். தனக்கென வாழாது, பிறர்க்கென வாழும் இப்படிப்பட்ட மாந்தர்கள் இருப்பதால்தான் இந்த உலகம் இயங்குகிறது” என்று “உண்டாலம்ம” என்று தொடங்கும் பாடலில், 2500 ஆண்டுகளுக்கு முன்பு கூறினார்.

அந்த ஈக உணர்ச்சியின் தொடர்ச்சி தமிழினத்தில் இன்றைக்கும் இருக்கிறது என்பதற்கான சான்றுகளில் ஒன்றே இந்த ஒன்பது பேரின் காலவரம்பற்ற உண்ணாப்போராட்டம்! இக்கோரிக்கை வெல்ல வேண்டும்! இந்தப் போராட்டத்தைத் தமிழ் மக்கள் கையெலடுக்க வேண்டும்! இப்பணியில் தமிழ்த்தேசியப் பேரியக்கம் தன்னையும் ஈடுபடுத்திக் கொள்கிறது! உங்கள் அனைவருக்கும் வாழ்த்துகள்! நன்றி! வணக்கம்!”.

இவ்வாறு தோழர் பெ. மணியரசன் பேசினார்.

தலைமைச் செயலகம்,

தமிழ்த்தேசியப் பேரியக்கம்

பேச: 7667077075, 9840848594

முகநூல்: www.fb.com/tamizhdesiyam

ஊடகம்: www.kannotam.com

இணையம்: www.tamizhthesiyam.com