கூடங்குளம் அணுஉலையை இழுத்து மூடுக! மதுரை சாலை மறியலில் 220 பேர் கைது!

கூடங்குளம் அணுஉலையை இழுத்து மூடுக! மதுரை சாலை மறியலில் 220 பேர் கைது!

கூடங்குளம் அணுஉலையை இழுத்து மூடு, காவல்படை முற்றுகையைக் கைவிட்டு, பொய் வழக்குகளை இரத்து செய் ஆகிய கோரிக்கைகளை முன்வைத்து, இன்று மதுரையில் கூடங்குளம் அணுஉலை எதிர்ப்பு மக்கள் கூட்டமைப்பு சார்பில் சாலை மறியல் போராட்டம் நடைபெற்றது. போராட்டத்தில் ஈடுபட்ட 220 பேர் கைது செய்யப்பட்டுள்ளனர்.

போராட்டத்திற்கு, இந்தியக் கம்யூனிஸ்ட் கட்சி(மா-லெ) மக்கள் விடுதலை மாநிலச் செயலாளர் தோழர் மீ.த.பாண்டியன் தலைமையேற்றார். தமிழக மக்கள் சனநாயகக் கட்சிப் பொதுச் செயலாளர் திரு. கே.எம்.ஷெரிப், தமிழர் தேசிய இயக்கப் பொதுச் செயலாளர் திரு. க.பரமந்தாமன், தமிழ்த் தேசிய விடுதலை இயக்கப் பொதுச் செயலாளர் தோழர் மோகன்ராசு, தமிழ்ப்புலிகள் துணைப் பொதுச் செயலாளர் பேரறிவாளன், ஆதித்தமிழர் பேரவை மாவட்டச் செயலாளர் தோழர் விஜயக்குமார், விடுதலை சிறுத்தைகள் மாநில துணைப் பொதுச்செயலாயர் திரு. எல்லாளன், பாப்புலர் பிரண்ட் ஆப் இந்தியா அமைப்பாளர் திரு. நசுருதீன், எஸ்.டி.பி.ஐ. பொறுப்பாளர் திரு. ஜாபர், பெண்கள் முன்னணி திரு. ஜானகி, தமிழ்நாடு மக்கள் கட்சிப் பொறுப்பாளர் வழக்கறிஞர் விஜயன், மக்கள் சிவில் உரிமைக் கழகத் தமிழகத் துணைத் தலைவர் திரு. கண.குறிஞ்சி, செந்தில் (நாம் தமிழர் கட்சி), சங்கர் அம்பேத்கர் (தியாகி இம்மானுவேல் பேரவை), செந்தில் (சேவ் தமிழ் இயக்கம்), தோழர் அரங்க குணசேகரன் (தமிழக மக்கள் புரட்சிக் கழகம்), தோழர் கி.வெ.பொன்னையன், தாளாண்மை திருநாவுக்கரசு, கனி(மா.பெ.பொ.க.), பரிதி(தமிழ் தமிழர் இயக்கம்) உள்ளிட்ட பல்வேறு அமைப்புத் தலைவர்களும், அமைப்புத் தோழர்களும் இதில் பங்கேற்றுக் கைதாயினர்.

தமிழ்த் தேசப் பொதுவுடைமைக் கட்சி சார்பில், தலைமைச் செயற்குழு உறுப்பினர்கள் தோழர் அ.ஆனந்தன், குழ.பால்ராசு, பொதுக்குழு உறுப்பினர் தோழர் ரெ.இராசு, தமிழக இளைஞர் முன்னணி துணைத் தலைவர் தோழர் செந்தில்குமார், மகளிர் ஆயம் மதுரை அமைப்பாளர் தோழர் செரபினா உள்ளிட்ட த.தே.பொ.க. தோழர்கள் இதில் பங்கேற்றுள்ளனர்.

கைது செய்யப்பட்டத் தோழர்கள், தற்போது மதுரை சிம்மக்கல் ஆட்டுமந்தை திருமண மண்டபத்தில் வைக்கப்பட்டுள்ளனர்.

கூடங்குளம் அணுமின்நிலையத்தை கடல் வழியாக  முற்றுகையிடும் போராட்டம் நடைபெற்று வருகிறது. இதனையொட்டி தமிழ்நாடு சிறப்புக் காவல் படையினர், ஆயுதப்படையினர், காவல்துறையினர் என 2 ஆயிரத்துக்கும் அதிகமானோர் குவிக்கப் பட்டுள்ளனர்.

இதுதவிர, அணுமின் நிலையத்தை சுற்றி, மத்திய தொழில் பாதுகாப்புப் படையினரும் குவிக்கப்பட்டுள்ளனர். இடிந்தகரை உள்ளிட்ட மீனவக் கிராமங்களைச் சேர்ந்த மக்கள், கடல் வழியாக படகில் சென்று அணுமின் நிலையத்திற்கு எதிரான போராட்டத்தில் ஈடுபட்டுள்ளனர். இதனால் அப்பகுதியில் பெரும் பதற்றம் நிலவுகிறது.

(செய்தி : த.தே.பொ.க.செய்திப் பிரிவு)