மீனவர்களைப் பாதுகாக்க, காவல் பொறுப்பை அய்.நா. மன்றம் ஏற்கவேண்டும் - பெ.மணியரசன் அறிக்கை

மீனவர்களைப் பாதுகாக்கத் தமிழகக் கடலோரக்

காவல் பொறுப்பை அய்.நா. மன்றம் ஏற்கவேண்டும்

தமிழ்த் தேசப் பொதுடைமைக் கட்சி பொதுச்செயலாளர் பெ.மணியரசன் கோரிக்கை!

சிங்களக் கடற்படையினர் தமிழக மீனவர்களைக் கொலை செய்த எண்ணிக்கை 7.7.2001 இரவுடன் 451 ஆக உயர்ந்துள்ளது. வேதாரணியம் அருகே உள்ள வெள்ளப்பள்ளம் கிராமத்தைச் சேர்ந்த செல்லப்பன் என்ற மீனவர் பன்னாட்டுக் கடல் எல்லையில் மீன் பிடித்துக் கொண்டிருந்த போது கொல்லப்பட்டார். சிங்களக் கடற்படையினர் அப்படகுக்குள் சென்று கம்பி, தடி, கயிறு ஆகியவற்றால் படகில் இருந்த மீனவர்கள் செல்லப்பன்,காளியப்பன், செல்வராசு திருவன் புலம் ஆகியோரைத் தாக்கியுள்ளனர். அத்தாக்குதலில் செல்லப்பன் இறந்தார்.மற்ற மூவர் காயமடைந்தனர். இதற்கு முன்னால் கடந்த ஆண்டுகளில் துப்பாக்கியால் சுட்டு 450 தமிழக மீனவர்களைச் சிங்களப் படையினர் கொன்று விட்டனர்.

இன்னொரு படகில் மீன்பிடித்துக் கொண்டிருந்த முருகேசன் அறிவழகன், சின்னப்பூ, இளையராஜா ஆகிய நால்வரையும் இரும்புக் கம்பியால் தாக்கி விட்டு, அவர்கள் நால்வரின் உடைகளைக் களைந்து அவற்றைக் கடலில் வீசி விட்டனர்.

பன்னாட்டுக் கடலில் மீன் பிடிப்பதைத் தடுக்க சிங்களப் படைக்கு எந்த அதிகாரமும் இல்லை. இந்த பேரவலம் பல்லாண்டுகளாகத் தொடர்கிறது.காரணம், தமிழக மீனவர்கள் அயல்நாட்டுப் படையினரால் கொல்லப் பட்டாலோ,அவர்களின் மீன்களையும் மீன் பிடி வலைகளையும் கடலில் வீசினாலோ அவர்களை அம்மணப்படுத்தினாலோ அந்த அட்டூழியங்களைத் தடுத்து நிறுத்தி, பாதுகாப்புக் கொடுக்க தமிழருக்கென்று இறையாண்மையுள்ள ஓர் அரசு இல்லை.

இந்தியாவுக்குள் தமிழர்கள் வாழ்ந்தாலும் தமிழகத்தின் இயற்கை வளங்களையும் தமிழர்களின் உழைப்பையும் சுரண்டுவதற்கு மட்டுமே இந்திய அரசு தமிழ்நாட்டைப் பயன்படுத்திக் கொள்கிறது. தமிழர்களின் பாதுகாப்புக்கு அது பொறுப்பேற்பதில்லை.

தமிழகத்தில் உள்ள மாநில ஆட்சியாளர்கள் இந்திய அரசுக்குக் கங்காணி வேலை பார்த்து, தங்களின் பதவி மற்றும் பணப் பசிகளைத் தீர்த்துக் கொள்கிறார்கள். அவர்கள் தமிழக மீனவர்களைப் பாதுகாக்க உருப்புடியான, உறுதியான நடவடிக்கை எதுவும் எடுக்காமல் ஒப்புக்குக் கண்டனம் தெரிவிப்பதும் கடிதம் எழுதுவதும் என்று ஏமாற்றிக் கொண்டிருக்கிறார்கள்.

இதுவரை 451 அப்பாவி மீனவர்களை சிங்கள நாட்டுக் கப்பற்படை கொன்று விட்டது. இனியும் இந்த மனித அழிவு நடைபெறாமல் தடுக்க அய்.நா. மன்றம் தலையிட்டு, தமிழகக் கடலோரக் காவலை அது தன் பொறுப்பில் எடுத்துக் கொள்ள வேண்டும்.

அடுத்து தமிழக மீனவர்கள் தங்களின் தற்காப்பிற்கு ஆயுதம் ஏந்தவேண்டும். இந்த இரண்டு வழிகளைத் தவிர தமிழக மீனவர்களைக் காக்க வேறு வழி தமிழர்களுக்கு விட்டு வைக்கப்படவில்லை. அய்.நா மன்றம் உடனடியாக தலையிடுமாறு தமிழ்த் தேசப் பொதுவுடைமைக் கட்சி சார்பில் கேட்டுக் கொள்கிறேன்.

நாள்: 9.7.20010

சென்னை.

தோழமையுடன்,
பெ.மணியரசன்,
பொதுச் செயலாளர், தமிழ்த் தேசப் பொதுவுடைமைக் கட்சி

செம்மொழி மாநாட்டை சாக்காக வைத்து உளவுத்துறையின் அத்துமீறலும் பழிவாங்கும் முயற்சியும்

செம்மொழி மாநாட்டை சாக்காக வைத்துக் கொண்டு அச்சுறுத்துகிறார்கள் என்று தெரிவித்துள்ளார். தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன்.

அவர் மேலும் இது தொடர்பாக வெளியிட்டுள்ள அறிக்கையில்,

’’உலகத் தமிழ்ச் செம்மொழி மாநாட்டையும், விழுப்புரம் தண்டவாள குண்டு வெடிப்பையும் சாக்காக வைத்துக் கொண்டு ஓசூரில் தமிழ்த் தேசப் பொதுவுடைமைக் கட்சித் தோழர்களை அச்சுறுத்திட அத்துமீறிய நடவடிக்கைகளில் ஈடுபட்டுள்ள காவல்துறையையும் உளவுத்துறையையும் தமிழ்த் தேசப் பொதுவுடைமைக் கட்சிச் சார்பில் வன்மையாகக் கண்டிக்கிறேன்.


தமிழின உரிமைக்காகவும் தமிழ் மொழி உரிமைக்காகவும் சுறுசுறுப்பாக சனநாயக வழிப்பட்ட போராட்டங்களில் ஈடுபடும் ஓசூர் த.தே.பொ.க. தோழர்களை அச்சுறுத்தி பழிவாங்கவே காவல்துறை இவ்வாறு அதிகாரத்தைத் தவறாகப் பயன்படுத்துகிறது.

த.தே.பொ.க. தலைமைச் செயற்குழு உறுப்பினர் தோழர் ஓசூர் கோ. மாரிமுத்துவை 23.06.2010 அன்று குற்றவியல் நடைமுறைச் சட்டப் பிரிவு 160ன் கீழ் ஓசூர் நகரக் காவல்துறையினர் அழைப்பாணை கொடுத்து காவல் நிலையத்திற்கு வரச் சொல்லி செம்மொழி மாநாட்டிற்கு எதிராக எந்த நடவடிக்கையிலும் ஈடுபடமாட்டோம் என்று எழுதிக் கொடுக்குமாறு வலியுறுத்தினர். அதற்கு தோழர் மாரிமுத்து அவ்வாறு எழுதித் தர மறுத்துவிட்டார்.

25.6.2010 அன்று த.தே.பொ.க ஓசூர் கிளைச் செயலாளர் தோழர் முத்தாலுவிடம் க்யூ பிரிவைச் சேர்ந்த சக்திவேல் என்பவர் தொலைபேசியில் “இம்மாதம் 9,10 தேதிகளில் எங்கிருந்தீர்கள்” என்று விசாரித்துள்ளார். அதற்கு தோழர் முத்தாலு “நான் ஓசூரில்தான் இருந்தேன்”, என்றும் “தொழிற்சாலைப் பணிக்கு இரு நாள்களும் போயிருந்தேன்”, என்றும் கூறியுள்ளார்.

அதன் பிறகு மேற்படி சக்திவேல் “நீங்கள் சொல்வது உண்மையா என்று விசாரிக்க உங்கள் பக்கத்து வீடுகளின் தொலைபேசி எண்களைக் கொடுங்கள்” என்றும் “அப்படிக் கொடுக்காவிட்டால் நாங்கள் காவல்துறையிலிருந்து வந்து உங்கள் குடும்பத்தையும் தெருவில் உள்ளவர்களையும் விசாரிப்போம்” என்றும் மிரட்டும் தொணியில் கூறியுள்ளார்.

விழுப்புரம் குண்டுவெடிப்பிற்கும் தமிழ்த் தேசப் பொதுவுடைமைக் கட்சிக்கும் எந்தத் தொடர்பும் இல்லை. உலகத் தமிழ்ச் செம்மொழி மாநாடு குறித்து மாற்றுக் கருத்துகள் எங்கள் கட்சிக்கு உண்டு. எங்களின் மாற்றுக் கருத்துகளை சனநாயக வழிகளில் வெளிப்படுத்த எங்களுக்கு உரிமை உண்டு என்ற போதிலும் நாங்கள் அவ்வாறான எதிர்ப்பு நடவடிக்கைகள் எதிலும் ஈடுபடவில்லை. எங்கள் கட்சி அமைப்பை வலுப்படுத்துவதற்குரிய இதர பணிகளைப் பார்த்துக் கொண்டுள்ளோம்.

மேற்கண்ட காவல் துறை மற்றும் உளவுத் துறைகளின் சட்டத்திற்குப் புறம்பான அத்துமீறல்கள் குறித்து கிருட்டிணகிரி மாவட்டக் காவல்துறைக் கண்காணிப்பாளரிடம் 25.6.2010 அன்று தொலைபேசி வழி முறையீடு செய்துள்ளேன்.

இதன்பிறகும் த.தே.பொ.க.விற்கு எதிரான காவல்துறை மற்றும் உளவுத்துறையின் அத்துமீறலும் பழிவாங்கும் முயற்சியும் ஓசூரில் தொடர்ந்தால் உடனடியாகத் தமிழகமெங்கும் கண்டன இயக்கம் நடத்துவோம் என்பதைத் தெரிவித்துக் கொள்கிறேன்’’என்று தெரிவித்துள்ளார்.

இந்திய இலங்கை ஒப்பந்தத்தை எதிர்த்து தமிழகமெங்கும் கண்டன ஆர்ப்பாட்டங்கள்!

ஈழத்தமிழ் இனத்தை உருக்குலைக்கும் இந்திய இலங்கை ஒப்பந்தங்களை நீக்கக் கோரி தமிழ்த் தேசப் பொதுவுடைமைக் கட்சி சார்பில் நாளை (18.06.2010) வெள்ளிக்கிழமை தமிழகமெங்கும் கண்டன ஆர்ப்பாட்டங்கள் நடத்தப்படுகின்றன. இவ்வார்ப்பாட்டங்கள் நடைபெறும் இடங்களை இக்கட்சியின் தலைமைச் செயலகம் அறிவித்துள்ளது.

தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன், தஞ்சை மாவட்டம் செங்கிப்பட்டியில் நடைபெறும் ஆர்ப்பாட்டத்தில் கலந்து கொண்டு கண்டன உரையாற்றுகிறார். அவ்வார்ப்பாட்டத்திற்கு ரெ.கருணாநிதி தலைமை தாங்குகிறார். தஞ்சை மாவட்டத் துணைச் செயலாளர் குழ.பால்ராசு முன்னிலை வகிக்கிறார். செங்கிப்பட்டியில் 18.06.2010 அன்று மாலை 4 மணியளவில் இவ்வார்ப்பாட்டம் நடைபெறுகிறது.

தஞ்சை நகரம், ரயிலடியி்ல் 18.06.2010 அன்று மாலை நடைபெறும் ஆர்ப்பாட்டத்திற்கு த.தே.பொ.க. நகரச் செயலாளர் முனியாண்டி தலைமை தாங்குகிறார். தமிழக இளைஞர் முன்னணியின் பொதுச் செயலாளர் நா.வைகறை கண்டன உரையாற்றுகிறார்.

கடலூர் மாவட்டம் காட்டுமன்னார்குடியில் காலை 10 மணிளவில் பேருந்து நிலையம் அருகில் நடைபெறும் ஆர்ப்பாட்டத்திற்கு த.தே.பொ.க. கிளைச் செயலாளர் சிவ.அருளமுதன் தலைமை தாங்குகிறார். பெண்ணாடத்தில் நடைபெறும் ஆர்ப்பாட்டத்தற்கு பெரியார் செல்வம் தலைமை தாங்குகிறார். த.தே.பொ.க. பொதுக்குழு உறுப்பினர் முருகன் முன்னிலை வகிக்கிறார். இவ்விரு இடங்களிலும், த.தே.பொ.க. தலைமைச் செயற்குழு உறுப்பினர் கி.வெங்கட்ராமன் கலந்து கொண்டு கண்டன உரையாற்றுகிறார்.

சென்னை சைதாப்பேட்டை பனகல் மாளிகை அருகில் மாலை 4 மணியளவில் நடைபெறும் ஆர்ப்பாட்டத்திற்கு த.தே.பொ.க. பொதுக்குழு உறுப்பினர் பழ.நல்.ஆறுமுகம் தலைமை தாங்குகிறார். இளந்தமிழர் இயக்கத்தின் ஒருங்கிணைப்பாளர் க.அருணபாரதி, வழக்கறிஞர் இளவரசன் ஆகியோர் கலந்து கொண்டு கண்டன உரையாற்றுகின்றனர்.

திருத்துறைப்புண்டி கடைத்தெருவில் நடைபெறும் ஆர்ப்பாட்டத்திற்கு த.தே.பொ.க. ஒன்றியச் செயலாளர் வழக்கறிஞர் இ.தனஞ்செயன் தலைமை தாங்குகிறார். த.தே.பொ.க. தஞ்சை மாவட்டச் செயலாளர் பழ.இராசேந்திரன், மூத்த தோழர் இரா. கோவிந்தசாமி ஆகியோர் இதில் கலந்து கொண்டு கண்டன உரையாற்றுகின்றனர்.

மதுரை ஜான்சி ராணி புங்கா அருகில் நடைபெறும் ஆர்ப்பாட்டத்திற்கு த.தே.பொ.க. மாநகரச் செயலாளர் ரெ.இராசு தலைமை தாங்குகிறார். திருச்செந்தூர் குறும்புரில் நடைபெறும் ஆர்ப்பாட்டத்திற்கு த.தே.பொ.க. பொதுக்குழு உறுப்பினர் தமிழ்மணி தலைமை தாங்குகிறார்.

இதே போல், தமிழகமெங்கும் நடைபெறுகின்ற இவ்வார்ப்பாட்டங்களில் திரளான தமிழ் இன உணர்வாளர்கள் கலந்து கொண்டு இந்திய இலங்கை ஒப்பந்தத்திற்கு எதிராகத் தம் உணர்வுகளைப் பதிவு செய்திட வேண்டும் என்றும் கேட்டுக் கொள்கிறோம்.

இந்திய இலங்கை ஒப்பந்தத்தை எதிர்த்து தமிழகமெங்கும் த.தே.பொ.க. ஆர்ப்பாட்டம்!

ஈழத்தமிழர்கள் மீது மீண்டுமொரு போரை தொடுக்கும், இந்திய இலங்கை அரசுகள் புதிதாக போட்டுள்ள ஒப்பந்தங்களை கண்டித்து தமிழகமெங்கும் வரும் 18.06.2010 அன்று கண்டன ஆர்ப்பாட்டங்கள் நடைபெறும் என தமிழ்த் தேசப் பொதுவுடைமைக் கட்சி அறிவித்துள்ளது.

இது தொடர்பாக அக்கட்சியின் தலைமைச் செயலகம் வெளியிட்டுள்ள அறிக்கையில் குறிப்பிட்டுள்ளதாவது:

ஈழத்தமிழர்களுக்கெதிரான ஐந்தாம் கட்டப்போரை இலங்கையும், இந்தியாவும் புதிய முறையில் தொடங்கியுள்ளன என்பதற்கான அடையாளம் தான் மன்மோகன் சிங் இராசபட்சே உடன்பாடுகள்!

கடந்த 08.06.2010 அன்று புதுதில்லியில் சிவப்புக் கம்பளம் விரித்து இராசபட்சேயை வரவேற்ற இந்தியா 09.06.2010 அன்று இலங்கையுடன் செய்து கொண்ட ஒப்பந்தங்கள் ஈழத்தமிழர் தாயகத்தைப் பறிப்பதையும், ஈழத்தமிழ் இனத்தைச் சிதைத்துச் சின்னா பின்னமாக்கி விரட்டுவதையும் நோக்கமாகக் கொண்டுள்ளன.

இந்தியாவும், இலங்கையும் போர்படைகளைப் பரிமாற்றிக் கொள்ளவும் சிங்களப் படையினர்க்கு இந்தியா உயர்தரப் பயிற்சி அளிக்கவும் ஒப்பந்தம் போடப்பட்டுள்ளது.

சிங்களக் காவல்துறையில் புதிதாக சேர்க்கப்படும் ஆட்களுக்கு இந்தியாவில் உயர்தரப் பயிற்சி அளிக்கப்படும்.

இந்தியா தனது செயற்கைக் கோள் தகவல் மையத்தை இலங்கையில் நிறுவும்.

பலாலி விமானப் படைத்தளத்தை மேலும் வலுப்படுத்தித் தர இந்தியா ஒப்புக் கொண்டள்ளது.

இத்தனை போர்த் தயாரிப்புகளும் எந்தப் பகை நாட்டிற்கு எதிராக? இலங்கையில் இந்தியாவும் சிங்கள அரசம் ஈழத்தமிழர்களைத்தாம் ஒரே பகை சக்தியாகக் கருதுகின்றன.

வடக்கு, கிழக்கு மாநிலங்கள் முழுவதையும் பல்லாயிரக்கணக்கான படைமுகாம்கள் சூழ்ந்துள்ளன. சிங்களப் படையாளுக்குத் தெரியாமல் ஒரு தமிழர் சிறுநீர் கிழிக்கக் கூட வெளியே போக முடியாது.

தமிழர்களின் வீடுகளையும் விளைநிலங்களையும் சிங்களர்கள் ஆக்கிரமித்துக் கொண்டனர். இதன்பிறகும் ஏன் புதிய போர்த்தயாரிப்புகள்? ஈழத்தமிழர்களை முற்றிலும் சிதைத்து உதிரிகளாக மாற்றுவதற்காகவே இந்தத் தயாரிப்பு!

இந்தியா தனது துணைத் தூதரகங்களை யாழ்ப்பாணத்திலும் அம்பன் தோட்டாவிலும் திறக்க உடன்பாடு போட்டுள்ளது. அந்தச் சுண்டைக்காய் நாட்டிற்குக் கொழும்பில் உள்ள இந்தியத் தூதரகம் போதாதா? தமிழர் தாயகப் பகுதிகளில் தூதரகப் பெயரில் படைசார் உளவுப் பிரிவுகளை நிறுத்துவது தான் இந்தியாவின் நோக்கம்.

வடக்கில் வசந்தம் என்ற பெயரில் தமிழர் நிலங்களை ஆக்கிரமித்து சிங்களர் வேளாண் பண்ணைகள் அமைக்கும் திட்டத்தை இந்தியா, ஏற்கெனவே இலங்கைக்கு வழங்கியுள்ளது. அதற்கான ஒப்பந்தம் இப்போது போடப்பட்டுள்ளது.

போர் விதவைகளின் மறுவாழ்வுக்கு உதவுவதற்கு இந்தியா ஒப்பந்தம் போட்டுள்ளது. இத்திட்டம் சிங்களப் படையாட்களின் மனைவி மார்களுக்கு உதவிடத்தானே தவிர, போரால் விதவையான தமிழ்ப் பெண்களுக்கு உதவிட அல்ல.

தமிழகத்திலிருந்து கடல் வழியாக இலங்கைக்கு மின்சாரம் தர இந்தியா ஒப்புக் கொண்டுள்ளது. இதனால் நெய்வேலி மின்சாரத்தை இலங்கைக்கு அனுப்பக்கூடிய ஆபத்து உள்ளது.

பண்பாட்டுப் பரிமாற்றம் என்ற பெயரில் சிங்களப் பண்பாட்டையும் புத்தமதத்தையும் ஈழத்தில் திணிப்பதும் சிங்களக் குடியேற்றங்களை அங்கு அதிகப்படுத்துவதும் தான் நடக்கும்.

எனவே இந்திய அரசம் இலங்கை அரசம் போட்டுள்ள ஒப்பந்தங்கள் ஒவ்வொரு தமிழரையும் இராணுவக் கண்காணிப்பின் கீழ்வைத்து, உரிமைக்குக் குரல் கொடுப்போரை நசுக்கவே பயன்படும்.

இந்த ஒப்பந்தங்களை நீக்க வலியுறுத்தி தமிழ்த் தேசப் பொதுவுடைமைக் கட்சி சார்பில் 18.06.2010 வௌ;ளிக்கிழமை தமிழகமெங்கும் கண்டன ஆர்ப்பாட்டங்கள் நடைபெறும். ஆர்ப்பாட்டம் நடைபெறும் இடங்கள் பின்னர் அறிவிக்கப்படும்.

PRESS RELEASE : தடையை மீறி இராசபட்சேவுக்குக் கருப்புக்கொடி ஆர்ப்பாட்டம் - பெ.மணியரசன் அறிக்கை

தடையை மீறி இராசபட்சேவுக்குக் கருப்புக்கொடி ஆர்ப்பாட்டம்

தமிழ்த் தேசப் பொதுவுடைமைக் கட்சி பொதுச் செயலாளர் பெ.மணியரசன் அறிக்கை

 07.06.2010.

 

இலட்சக்கணக்கில் ஈழத்தமிழர்களைக் கொன்று குவித்த கொலைகாரக் கொடூரன் இராசபட்சேவுக்குத் தில்லியில் இந்திய அரசு சிவப்புக் கம்பள வரவேற்புக் கொடுப்பதைக் கண்டித்தும், இராசபட்சேயைத் திரும்பிப் போக வலியுறுத்தியும் 08.06.2010 அன்று சென்னை இலங்கைத் தூதரகம் முன்பும் மாவட்டத் தலைநகர்களிலும் கருப்புக் கொடிக் கண்டன ஆர்ப்பாட்டம் செய்யத் தமிழ் இன உணர்வு அமைப்புகள் முடிவு செய்துள்ளன.

சனநாயக வழிமுறைப்படி நடைபெறவுள்ள இந்த ஆர்ப்பாட்டத்திற்குத் தமிழகம் முழுவதும் தமிழக அரசு தடை விதித்துள்ளது. தமிழக அரசு விதித்துள்ள இந்தத் தடை சிங்கள இனவெறி அரசுக்கு ஊக்கமளிப்பதாக உள்ளது.

அமெரிக்க ஐரோப்பிய நாடுகளில் உள்ள மனித உரிமை அமைப்புகள் இராசபட்சேயைப் போர்க் குற்றவாளியாக அறிவித்துள்ளன. மனித உரிமைக்கான நிரந்தரத் தீர்ப்பாயம் அயர்லாந்து தலைநகர் டப்ளின் நகரில் கூடி திறந்தவெளி விசாரணை நடத்தி இராசபட்சே கும்பலைப் போர்க் குற்றவாளிகள் என்று தீர்ப்பு வழங்கியுள்ளது. அமெரிக்காவில் செயல்படும் மனித உரிமை கண்காணிப்பகம், இராசபட்சேயைப் போர்க்குற்றவாளியாக விசாரிக்க வேண்டும் என்று வலியுறுத்தியுள்ளது. ஐ.நா. மனித உரிமைப் பிரிவும் இராபட்சே கும்பல் மீது விசாரணை நடத்த வேண்டும் என்று கோரியுள்ளது. இலங்கை அரசு தமிழர்களுக்கு எதிராகப் போர்க் குற்றங்கள் இழைத்துள்ளது என்று கூறி ஐரோப்பிய ஒன்றிய நாடுகள் இலங்கையுடன் நடக்கும் வணிகத்திற்கு அளித்து வந்த வரிச்சலுகையை நீக்கிவிட்டன. பிரித்தானிய நாடாளுமன்றம் விசாரணைக்குழு அமைத்துள்ளது.

இவ்வாறு அப்பாவி ஈழத்தமிழ்ப் பொது மக்களை இனப்படுகொலை செய்து போர்க்குற்றங்கள் இழைத்துள்ள இலங்கைக் குடியரசுத் தலைவர் இராசபட்சேவுக்கு எதிராக உலகமே கண்டனம் முழங்கும் போது இந்திய அரசு 08.06.2010 அன்று தில்லியில் சிவப்புக் கம்பள வரவேற்புக் கொடுப்பது வன்மையாகக் கண்டிக்கத்தக்கது.

போர்க்குற்றவாளி இராசபட்சேவுக்கும் அவரை வரவேற்கும் இந்திய அரசுக்கும் கண்டனம் தெரிவிக்கும் வகையில் நடைபெறவுள்ள கண்டன ஆர்ப்பாட்டத்தைத் தடைசெய்வதன் மூலம் தமிழக அரசு இனத்துரோகம் செய்து, தமிழர்களை இலட்சணக்கணக்கில் கொன்ற இராசபட்சேவுக்குத் துணை போகிறது.

அரசமைப்புச் சட்டம் வழங்கும் அடிப்படை உரிமையான ஆர்ப்பாட்டம் நடத்தும் உரிமையைப் பறிக்கும் தமிழக அரசின் ஏதேச்சாதிகாரத்தையும் இனத்துரோகத்தையும் தமிழ்த் தேசப் பொதுவுடைமைக் கட்சி சார்பில் வன்மையாகக் கண்க்கிறேன்.

அதே வேளை தடையை மீறி கருப்புக் கொடி ஆர்ப்பாட்டம் நடைபெறம் என்பதையும் உறதிபடத் தெரிவித்துக் கொள்கிறேன்.

 

தோழமையுடன்,

பெ.மணியரசன்,

பொதுச் செயலாளர்,

தமிழ்த் தேசப் பொதுவுடைமைக் கட்சி.

 

தமிழகத்திலிருந்து கேரளா செல்லும் பாதையை முற்றுகையிடுவோம் - த.தே.பொ.க. அறிவிப்பு!

முல்லைப் பெரியாற்று நீரில் தமிழகத்திற்கு உள்ள உரிமையை மறுத்து கேரளம் செய்யும் அடாவடித்தனத்தைக் கண்டிக்கும் வகையில், தமிழகத்திலிருந்து கேரளா செல்லும் பாதைகளை மறிக்கும் போராட்டத்தில் தமிழ்த் தேசப் பொதுவுடைமைக் கட்சி பங்கெடுப்பதாக அறிவித்துள்ளது. அக்கட்சியின் பொதுச் செயலாளர் திரு. பெ.மணியரசன் தலைமையில் 28.05.2010 அன்று காலை பொள்ளாச்சி நடுப்புணி சாலையில் மறியல் நடக்கும் என்றும் அறிவிக்கப்பட்டுள்ளது.

இது தொடர்பாக அக்கட்சி வெளியிடப்பட்டுள்ள அறிக்கையில் கூறப்பட்டுள்ளதாவது:

முல்லைபெரியாறு அணை வலுவாக உள்ளது, முதற்கட்டமாக 142 அடி தண்ணீர் தேக்கலாம். சிற்றணையில் சில பணிகள் செய்தபின் 152 அடி தேக்கலாம் என்று 27.2.2006 அன்று உச்சநீதிமன்றம் தீர்ப்பளித்தது.அத்தீர்ப்பைக் கிழித்தெறிவதற்குச் சமமாக அதை எதிர்த்து ஒரு சட்டத்தைக் கேரளம்15.3.2006 அன்று நிறைவேற்றியது.

கேரளச்சட்டத்தை எதிர்த்துத் தமிழகம் தொடர்ந்த வழக்கில் உச்ச நீதிமன்றம் இதுவரை தீர்ப்புச் சொல்லாமல், அணை வலுவாக இருக்கிறதா என்று ஆராய புதிய குழுவை அமைத்துள்ளது. அக்குழுவி;ல் இடம் பெற முதலில்மறுத்த தி.மு.க ஆட்சி, பின்னர் தமிழகம் சார்பில் ஒருவரை இணைத்துள்ளது. அக்குழுவில் ஆள் போடுங்கள் என்று இந்திய அரசு ஒரு மாதத்திற்குள் இரு கடிதங்கள் எழுதி விட்டது என்கிறார் முதல்வர்கருணாநிதி. உச்சநீதி மன்றத்தீர்ப்பை நிறை வேற்றுமாறு இதுவரை ஒரு கடிதம் கூட இந்திய அரசு கேரள முதல்வருக்கு எழுத வில்லை.

வலுவாக உள்ள முல்லைப் பெரியாறு அணையை இடித்து விட்டுப் புதியஅணை கட்டும் பணிகளை நடுவண் அரசின் ஒப்புதலுடன் கேரளம் தொடங்கி விட்டது.

இந்திய அரசின் முழு ஆதரவும் கேரளத்திற்கு இருப்பதால்இ மலையாளிகளின் இனவெறிச் செயல் மேலும் மேலும் தீவிரமடைகிறது. தமிழர்களைப் பகை இனமாகக் கருதி முல்லைப்பெரியாறு அணை உரிமை மட்டு மன்றிஇ மற்ற நீர் வரத்துகளையும் தடுக்கிறார்கள். அமராவதி ஆற்றிற்கு வரும் பாம்பாற்றில் அணைகட்டுகிறார்கள். பாம் பாற்றில் அணைக்கட்டுவதால் தமிழகத்திற்குப் பாதகமில்லை என்று முதல்வர் கருணாநிதி சட்டப்பேரவையில் கூறினார்.; நெய்யாற்றங்கரை இடது கரைக் கால்வாயில் தண்ணீர் விட மறுக்கிறார்கள். செண்பக வல்லி அணை நீர்வரத்தை அதிகரிக்க தமிழகம் சிறிய தடுப்பணைக் கட்ட அனுமதி மறுக்கிறார்கள்.

அரிசி, பருப்பு, பால், முட்டை, காய்கறி இறைச்சி, மணல் முதலிய பல்வேறு பொருட்களை அன்றாடத் தேவைகளுக்கு கேரளம் தமிழ் நாட்டை சார்ந்துள்ளது என்ற உண்மையை மலையாளிகளுக்கு உரைக்கும் வகையில் உணர்த்த வேண்டும்.

மறுமலர்ச்சி திராவிட முன்னேற்றக் கழகம் தமிழகத்திலிருந்து கேரளாவிற்கு செல்லும் 12 சாலைகளில் பொருள் போக்குவரத்தைத் தடுக்க மறியல் நடத்துகிறது. தமிழ்த் தேசப் பொதுவுடைமைக் கட்சி, பொதுச்செயலாளர் தோழர் பெ.மணியரசன் தலைமையில் அப்போராட்டத்தில் கலந்து கொள்கிறது.

உலகின் முதன் மொழியைப் பேசும் தமிழினமே வையகம் வியக்க வாழ்ந்து வஞ்சகத்தால் வீழ்த்தப்பட்டு கிடக்கும் தமிழினமே!

கெஞ்சிக்கேட்டால் கிடைக்காது கிளர்ச்சி செய்யா விட்டால் நடக்காது நெஞ்சை நிமிர்த்தி வாருங்கள் நேருக்கு நேர் நின்று பார்த்திடுவோம்!

இவ்வாறு அவ்வறிக்கையில் கூறப்பட்டுள்ளது.

முத்துக்குமார் சிலைக்கு அனுமதி மறுப்பு! முள்ளிவாய்க்கால் வீரவணக்கப் பொதுக்கூட்டத்தில் கண்டனம்!

ஈழத்தமிழர்களுக்காக தன் இன்னுயிரைத் தீக்கிரையாக்கிய ஈகி முத்துக்குமாருக்கு இளந்தமிழர் இயக்கம் சார்பில் சிலை நிறுவப்படும் என்று அறிவிக்கப்பட்டது அனைவரும் அறிந்ததே.

கடந்த ஆண்டு மே மாதம் சிங்கள இந்திய அரசுகள் தமிழீழ மக்கள் மீது தாக்குதல் தொடுத்த, பல்லாயிரக்கணக்கான மக்களை முள்ளிவாய்க்கால் பகுதியில் கொன்றொழித்ததை நினைவு கூறும் விதமாக, முள்ளிவாய்க்கால் வீரவணக்கப் பொதுக் கூட்டம் ஒன்றை தமிழ்த் தேசப் பொதுவுடைமைக் கட்சியினர் ஏற்பாடு செய்திருந்தனர். அந்நிகழ்வின் போதே, சிலை திறப்பு நிகழ்வையும் இணைந்து மே 16 அன்று நடத்த ஏற்பாடானது. இதற்காக காவல்துறையினரிடம் முறையான அனுமதியும் பெறப்பட்டிருந்தது.
உலகெங்கும் உள்ள தமிழ் உணர்வாளர்களிடம் முத்துக்குமாருக்கு முதல் சிலை நிறுவும் நிகழ்வுக்கு ஆதரவு குவிந்தது. பல்வேறு இடங்களிலும் இந்நிகழ்வுக்கான அறிவிப்புகள் சிறப்புற செய்யப்பட்டிருந்தன.

இந்நிலையில் நிகழ்ச்சி நடக்கவிருக்கும் முன்தினம்(15.05.2010) அன்று சிலை திறப்புக்கு காவல்துறையினர் திடீர் தடை விதித்தனர். அதன் பின், மாணவர்கள் இளைஞர்கள் சுடரேந்தி வரும் சுடரோட்டம் நிகழ்வுக்கு, நிகழ்ச்சி நடக்கவிருந்த 16.5.2010 அன்று காலை அனுமதி மறுக்கப்பட்டது. கூட்டத்திற்கு மட்டும் அனுமதியளிக்கப்பட்டது. மேடையில் முத்துக்குமார் சிலையை வைப்பதற்கும் காவல்துறை தடை விதித்தது.

நிகழ்வை ஒருங்கிணைத்த தமிழ்த் தேசப் பொதுவுடைமைக் கட்சியின் தஞ்சை மாவட்டத் துணைச் செயலாளர் குழ.பால்ராசு, தமிழ்த் தேசப் பொதுவுடைமைக் கட்சியின் தலைமைச் செயற்குழு உறுப்பினர் கி.வெங்கட்ராமன் ஆகியோர் இடையறாத பேச்சுவார்த்தைகள் நடத்திய பின்பும் கூட காவல்துறை தனது நிலையை மாற்றிக் கொள்ள மறுத்துவிட்டது.

வீரவணக்கப் பொதுக் கூட்டம்

இந்நிலையில், தமிழகத்தின் பல்வேறு பகுதிகளிலிருந்தும் தஞ்சை வந்திருந்த உணர்வாளர்கள் சுமார் 2000க்கும் மேற்பட்டோர் கலந்து கொண்ட, முள்ளிவாய்க்கால் வீரவணக்கப் பொதுக் கூட்டம் மட்டும் எழுச்சியுடள் நடத்தப்பட்டது. இளந்தமிழர் இயக்கத்தினர் உணர்வாளர்களை வரவேற்று ஆங்காங்கு தண்ணீர் பந்தல்கள் அமைத்திருந்தனர்.

எழுச்சித் தமிழிசை

புதுவைச் சித்தன் செயமூர்த்தி குழுவினரின் எழுச்சித் தமிழிசையுடன் தொடங்கிய வீரவணக்கப் பொதுக் கூட்டத்திற்கு தமிழ்த் தேசப் பொதுவுடைமைக் கட்சியின் தஞ்சை மாவட்டத் துணைச் செயலாளர் குழ.பால்ராசு தலைமை தாங்கினார். அவர் பேசும் போது, காவல்துறையினரின் அடாவடிப் போக்கைக் கடுமையாகச் சாடினார். முத்துக்குமார் சிலையை நிறுவ சட்ட முயற்சிகளை மேற்கொள்வோம் என்றும் அறிவித்தார்.

புலவர் கலியபெருமாள் சிலை திறப்பு

தமிழ்நாட்டு விடுதலைக்காகப் போராடி உயிர் நீத்த புலவர் கு.கலியபெருமாள் அவர்களின் நினைவு நாளை முன்னிட்டு, கரூர் ஓவியர் பரணர் தீட்டிய புலவரின் முழு உருவ ஓவியப் படத்தை தமிழ்த் தேசப் பொதுவுடைமைக் கட்சியின் மேற்கு மண்டலச் செயலாளர் கோ.மாரிமுத்து திறந்து வைத்துப் பேசினார்.

வீட்டுக்கு வீடு முத்துக்குமார் சிலை

அதன் பின் மேடை ஏறிய, இளந்தமிழர் இயக்கத்தின் செயற்குழு உறுப்பினர் ம.செந்தமிழன், “முத்துக்குமாருக்கு ஒரு சிலை அல்ல, ஓராயிரம் சிலைகளை நாங்கள் நிறுவுவோம். கையடக்கமுள்ள முத்துக்குமார் சிலைகளை இளந்தமிழர் இயக்கம் தானே தயாரித்து, உணர்வாளர்களிடம் பரப்பும். வீட்டுக்கு வீடு, வீதிக்கு வீதி, தம் சொந்த இடத்தில் இச்சிலை நிறுவப்படும். இதனை யார் தடுக்க முடியும்?” என்று பேசினார்.

(உணர்ச்சிக் கவிஞர் காசி ஆனந்தன் பேசுகிறார்...)

(தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன் பேசுகிறார்...)

(புலவர் புலமைப்பித்தன் பேசுகிறார்...)

(இயக்குநர் புகழேந்தி தங்கராஜ் பேசுகிறார்...)

(இயக்குநர் ராம் பேசுகிறார்...)

(கூட்டத்திற்கு வருகை தந்த மக்கள் திரள்...)

(முள்ளிவாய்க்கால் நினைவுச் சுடரை திரு. பெ.மணியரசன், உணர்ச்சிக் கவிஞர் காசி ஆனந்தன் ஆகியோர் ஏற்றி வைக்கின்றனர்...)

(மகளிர் ஆயத்தின் ஒருங்கிணைப்பாளர் மதுரை அருணா பேசுகிறார்...)

(இளந்தமிழர் இயக்கத்தின் ஒருங்கிணைப்பாளர் க.அருணபாரதி பேசுகிறார்...)

(இளந்தமிழர் இயக்கத்தின் செயற்குழு உறுப்பினர் ம.செந்தமிழன் பேசுகிறார்...)

ஈகி முத்துக்குமாரின் தந்தை திரு குமரேசன் வருகை தந்து சிறப்புரையாற்றினார். அதன் பின், மகளிர் ஆயத்தின் தமிழக ஒருங்கிணைப்பாளர் மதுரை அருணா, இளந்தமிழர் இயக்கத்தின் ஒருங்கிணைப்பாளர் க.அருணபாரதி, முன்னாள் சட்ட மேலவைத் தலைவர் புலவர் புலமைப்பித்தன், உணர்ச்சிக் கவிஞர் காசி ஆனந்தன், இயக்குநர் புகழேந்தி தங்கராஜ், இயக்குநர் ராம் ஆகியோர் சிறப்புரையாற்றினர்.

நிறைவில், தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன் நிறைவுரையாற்றினார்.

முல்லைப் பெரியாறு: தமிழக அரசுக்கு த.தே.பொ.க. கடும் கண்டனம்

முல்லைப் பெரியாறு அணை

புதிய ஆய்வுக் குழுவைத் தமிழக அரசு ஏற்றுக்கொண்டது

தமிழக அரசு உரிமையைப் பலியிட்ட செயலாகும்

தமிழ்த் தேசப் பொதுவுடைமைக் கட்சி கண்டனம்

தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன் தஞ்சையிலிருந்து 22.04.2010 அன்று வெளியிட்ட அறிக்கை:

முல்லைப் பெரியாறு அணை வலுவாக உள்ளதால் அதில் முழுக் கொள்ளளவுக்குத் தண்ணீர் தேக்க ஆணையிடக் கோரித் தமிழக அரசும் உழவர்களும் தொடுத்த வழக்கில் உச்சநீதிமன்றம் 2006ஆம் ஆண்டு பிப்ரவரி மாதம் 27ஆம் நாள் தீர்ப்பளித்தது.

அணை வலுவாக உள்ளது என்று மண்ணியல் மற்றும் நீரியல் வல்லுநர் குழுக்கள் அளித்த பரிந்துரையை ஏற்று அணையில் தற்போதுள்ள 136 அடிக்குப் பதிலாக முதல் கட்டமாக 142 அடி தண்ணீர் தேக்கலாம்.

மண் அணையில் சிறு செப்பனிடும் பணிகளைச் செய்து முடித்தபின் முழுக் கொள்ளளவான 152 அடி வரை தண்ணீர் தேக்கலாம் என்று ஆணையிட்டது.

உச்சநீதி மன்றத் தீர்ப்பைத் தடுக்கும் வகையில் அரசமைப்புச் சட்டத்திற்குப் புறம்பாகக் கேரளம் இயற்றிய சட்டத்தை நீக்கக் கோரியும், தீர்ப்பை செயல்படுத்தும்படி கேரள அரசுக்கு ஆணையிடக் கோரியும் தமிழக அரசு தொடுத்த வழக்கிற்கு உரிய தீர்ப்பை வழங்காமல் உச்ச நீதி மன்றம் 18.2.2010 அன்று, அணையின் வலுத்தன்மையை ஆய்வு செய்து பரிந்துரைக்க புதிய ஆய்வுக் குழு ஒன்றை அமைத்தது. அக்குழுவில் தமிழகமும் கேரளமும் தலா ஒரு பிரதிநிதியை அமைக்கக் கோரியது.

உச்சநீதி மன்றத்தின் இம் முடிவு சட்ட நெறிமுறைகளுக்குப் புறம்பானது என்றும் மறுபடியும் புதிய ஆய்வுக்குழு ஒன்றை அமைக்கத் தேவையில்லை என்றும் கூறிய தமிழக அரசு, தன் சார்பில் பிரதிநிதியை நியமிக்கமாட்டோம் என்று அறிவித்து அது குறித்து உச்சநீதி மன்றத்திலும் வாதாடியது. இதே நிலைபாட்டுடன் தி.மு.க. தனது பொதுக்குழுவிலும் தீர்மானம் நிறைவேற்றியது. ஆனால் உச்சநீதி மன்றம் புதிய குழு அமைக்க வேண்டும் என்றும் தமிழகம் தனது பிரதிநிதியை அனுப்ப வேண்டும் என்றும் மீண்டும் கூறியது.

இப்பொழுது தி.மு.க. அரசு குட்டிக் கர்ணம் போட்டு முல்லைப் பெரியாறு வலுவைச் சோதிக்கும் புதிய குழுவிற்குத் தனது பிரதிநிதியாக ஓய்வு பெற்ற உச்சநீதிமன்ற நீதிபதி ஏ.ஆர்.இலட்சுமணன் அவர்களை அமர்த்தியுள்ளது.

இம்மாற்றத்திற்கான காரணங்களை 21.4.2010 அன்று சட்டப்பேரவையில் பேசிய முதலமைச்சர் கருணாநிதி, தமிழகப் பிரதிநிதியை அமைக்குமாறு வலியுறுத்தி நடுவண் அரசு 8.3.2010 அன்றும் 5.4.2010 அன்றும் இரு மடல்கள் தமிழக அரசுக்கு எழுதியிருப்பதாகக் கூறினார். அத்துடன் உச்சநீதி மன்றத் தீர்;ப்புதான் தமது அரசுக்கு முக்கியம் என்றும் அதன் அடிப்படையிலேயே பிரதிநிதியை நியமித்திருப்பதாகவும் கூறினார்.

இதே உச்சநீதிமன்றம் 27.2.2006 அன்று 142 அடி தண்ணீர் தேக்கலாம் என்று அளித்த தீர்ப்பைக் கேரள அரசு துச்சமாகத் தூக்கி எறிந்து அதை நிறைவேற்ற மறுத்துவிட்டது. அத்தீர்ப்பை உச்சநீதி மன்றமும் முக்கியமானதாகக் கருதவில்லை, நடுவண் அரசும் முக்கியமானதாகக் கருதவில்லை. அத்தீர்ப்பை நிறைவேற்ற வேண்டுமென்று ஒரு மடல் கூட கேரள அரசுக்கு நடுவண் அரசு எழுதவில்லை.

இந்தப் பின்வாங்கல், முல்லைப் பெரியாறு அணையில் உள்ள உரிமையை தமிழக அரசு தானே முன்வந்து கைவிடுவதற்குச் சமம் ஆகிவிட்டது. இது எங்கே போய் முடியும்? எப்படி முடியும் என்ற பெருங்கவலை அக்கறையுள்ள அனைவர்க்கும் ஏற்பட்டுள்ளது. முல்லைப் பெரியாறு உரிமைக்காக உச்ச நீதி மன்றத்தில் வாதாடிய போதே (17.2.2010) தமிழக அரசு சார்பில் பேசிய வழக்கறிஞர் பராசரன், புதிய ஆய்வுக்குழு அமைப்பதை ஏற்றுக் கொண்டார்.

முல்லைப் பெரியாறு அணை வழக்கைக் கவனித்து வந்த அக்கறையுள்ளோர் புதிய ஆய்வுக்குழுவை ஏற்பதால் ஏற்படப் போகும் ஆபத்தைச் சுட்டிக் காட்டிய பின் தமிழக அரசு தனது கருத்தை மாற்றிக் கொண்டு, புதிய ஆய்வுக் குழு அமைப்பதை எதிர்த்தது. இப்போது அந்த நிலையையும் கைவிட்டு புதிய ஆய்வுக் குழுவிற்கு பிரதிநிதியை நியமித்துள்ளது.

தமிழக அரசின் இந்த உறுதியற்ற சந்தர்ப்பவாத நிலைபாடுகள் கேரள அரசிற்குச் சாதகமானது. 2006 பிப்ரவரி 27 தீர்ப்பிற்கு முன்பிருந்த நிலைக்கு முல்லைப் பெரியாறு வழக்கைப் பின்தள்ளி விட்டார் கருணாநிதி.

இதே போன்று உறுதியற்ற சந்தர்ப்பவாத முடிவுகளை அவ்வப்போது எடுத்துத்தான் காவேரி உரிமையைப் பலியிட்டார் கருணாநிதி. இப்பொழுது முல்லைப் பெரியாறு உரிமையைக் காவு கொடுக்கிறார். அது மட்டுமின்றி அமராவதிக்கு வரும் நீரைத் தடுத்துப் பாம்பாற்றில் கேரளம் அணைகட்டுவதையும் ஆதரித்து இப்பொழுது சட்டப் பேரவையில் அவர் கருத்துக் கூறியுள்ளார்.

உச்சநீதி மன்றம் தனது தீர்ப்பைத் தானே மறுதலித்து அமைத்துள்ள புதிய ஆய்வுக் குழுவைத் தமிழக அரசு ஏற்க மறுத்து அதில் உறுதியைக் கடைப்பிடித்தால் அரசமைப்புச் சட்ட நெருக்கடி ஏற்பட்டு விவரிவான விவாதங்கள் நடந்து, உச்சநீதி மன்றம் தனது முடிவை மாற்றிக் கொள்ளும் படியான நெருக்குதல் உண்டாகியிருக்கும். அதைவிடுத்து, தமிழக அரசு பின்வாங்கி, கேரள அரசுக்குச் சாதகமாக நடந்து கொண்டுள்ளது.

முல்லைப் பெரியாறு அணையை இடிக்கத் திட்டமிடும் கேரளம் இனி, அத்திசையில் உறுதியாகச் செயல்படும்.

இனி முல்லைப் பெரியாறு அணை உரிமையைக் காப்பாற்ற வேண்டுமெனில், கேரள இந்திய அரசுகளை எதிர்த்துத் தமிழக மக்கள் கடுமையாகப் போராடுவதைத் தவிர வேறு வழியில்லை.

மலேசியா அரசு ஈழத்தமிழர்களை திருப்பி அனுப்பக் கூடாது சென்னை மலேசியத் தூதரகத்தில் மனு

மலேசியா அரசு ஈழத்தமிழர்களை திருப்பி அனுப்பக் கூடாது

சென்னை மலேசியத் தூதரகத்தில் மனு

சென்னை, 25.04.2010.

சிங்கள இனவெறி அரசு நடத்தியப் போரில் பாதிப்புற்று, வன்னி வதைமுகாம்களில் அடைக்கப்பட்டு பின் விடுதலையான ஈழத்தமிழர்கள் 75 பேர், வாழ வழியின்றி மலேசியாவிற்கு அகதிகளாக சென்றனர். அவர்களை மலேசிய அரசு கைது செய்து இலங்கைக்கு திரும்ப அனுப்பப் போவதாக தகவல்கள் வெளியாகியுள்ளன.

இந்நிலையில், தஞ்சம் கோரி வந்த தமிழர்களை திரும்ப இலங்கைக்கு அனுப்பக் கூடாது என்று வலியுறுத்தி, தமிழகத் தலைநகர் சென்னையில் அமைந்துள்ள மலேசியத் தூதரகத்தில் மனு அளிக்கப்பட்டது.

இன்று(25.04.2010) காலை சென்னை நுங்கம்பாக்கம் மலேசியத் தூதரகத்திற்குச் சென்ற தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன் இம்மனுவை மலேசியத் துணைத் தூதர் அன்வர் கஸ்மான் அவர்களிடம் நேரில் வழங்கினார். பெரியார் திராவிடர் கழக சென்னை மாவட்டத் துணைச் செயலாளர் குமரன், தமிழ்த் தேசிய விடுதலை இயக்கத்தின் அமைப்புக்குழு உறுப்பினர் சிவகாளிதாசன், இளந்தமிழர் இயக்கத்தின் ஒருங்கிணைப்பாளர் க.அருணபாரதி உள்ளிட்டோர் அப்போது உடனிருந்தனர்.

மனுவைப் பெற்ற மலேசியத் துணைத் தூதர், இம்மனுவின் விபரங்களை தில்லியில் உள்ள மலேசியத் தூதரிடம் கூறுவதாகவும், தங்கள் உணர்வுகளை புரிந்து கொள்வதாகவும் கூறினார்.

அம்மனுவில் குறிப்பிடப்பட்டிருப்பதாவது:

இலங்கையில் வன்னி முகாம்களில் வதைபட்டு பின்னர், இலங்கை அரசால் விடுவிக்கப்பட்ட தமிழர்கள் தங்கள் சொந்த வீடுகளும் கிராமங்களும் தகர்க்கப்பட்டும், சிங்களர்களால் ஆக்கிரமிக்கப்பட்டும் இருப்பதால் வாழ வழியின்றி மலேசியாவுக்கு அடைக்கலம் தேடி வந்துள்ளார்கள். அவ்வாறு படகில் வந்த ஆண்கள், பெண்கள், குழந்தைகள் உள்ளிட்ட 75 பேரை மலேசிய அரசின் கப்பல் படை, தடுத்து பினாங்குத் துறைமுகம் அருகில் நிறுத்தியுள்ளது.

அவர்களுக்கு அடைக்கலம் தரமறுப்பதுடன் இலங்கைக்கு திருப்பி அனுப்பப் போவதாக மலேசிய அரசு கூறுகிறது. “திருப்பி அனுப்பினால் இலங்கை அரசு எங்களைக் கொன்று விடும். அடைக்கலம் கொடுங்கள்; திருப்பி அனுப்பினால் குழந்தைகளுடன் நாங்கள் அனைவரும் கடலில் குதித்து இங்கேயே செத்துப்போவோம்” என்று தமிழ் மக்கள் கூறுகிறார்கள்.

மலேசிய அரசு, மனித நேய அடிப்படையிலும், ஐ.நா. மனித உரிமை அட்டவணைப்படியும் போரினால் பாதிக்கப்பட்டு அடைக்கலம் தேடி வந்துள்ள ஈழத்தமிழர்கள் மலேசியாவில் தங்க அனுமதி அளிக்குமாறு கேட்டுக் கொள்கிறோம். எக்காரணம் கொண்டும் அவர்களை இலங்கைக்குத் திருப்பி அனுப்ப வேண்டாம் என்றும் அவ்வாறு திருப்பி அனுப்பினால் 75 உயிர்களை மலேசிய அரசு ஒரு கொலைக்களத்திற்கு அனுப்பி வைத்ததாகும் என்றும் தெரிவித்துக் கொள்கிறோம்.

இந்திய அரசைக் கண்டித்து தஞ்சையை உலுக்கிய உழவர்கள் மாநாடு!

இந்திய அரசு நடப்பு நாடாளுமன்ற கூட்டத் தொடரில் கொண்டுவர இருக்கும் வேளாண் விரோத கருப்புச் சட்டங்களைக் கண்டித்து தஞ்சையில் பல்வேறு உழவர் அமைப்புகள் இணைந்து நடத்திய மாநாடு நேற்று(18.04.2010) நடைபெற்றது. இதில் பல்வேறு உழவர் அமைப்புத் தலைவர்களும், அரசியல் கட்சித் தலைவர்களும், மனித உரிமை ஆர்வலர்களும் திரளாக கலந்து கொண்டனர்.

விதைச் சட்டம், உயிரித்தொழில் நுட்ப ஆணையச் சட்டம், வெளிநாட்டு நிறுவனங்கள் வேளாண் பண்ணைகள் அமைக்க அனுமதிக்கும் சட்டம் ஆகியவை நடப்பு நாடாளுமன்றக் கூட்டத் தொடரில் முன்வைக்கப்பட்டுள்ளன. மான்சான்டோ, சின்ஜென்டா, டுஃபான்ட் போன்ற பன்னாட்டு விதை நிறுவனங்களுக்கு ஆதரவாகவும், கருத்துரிமையைப் பறிக்கும் வகையிலும் இச்சட்டங்கள் அமைந்துள்ளன. மேலும், கிராமப்புறங்களில் வெளிநாட்டுக் கம்பெனிகளின் பண்ணைகள் அமைப்பதற்கு வழிசெய்யப்பட்டுள்ளது.

உழவர்களின் வேளாண் தொழிலையும், தமிழர்களின் தாயகத்தையும் பறிக்கிற சூதான இந்தச் சட்டங்களை எதிர்த்து உழவர் அமைப்புகளின் ஆலோசனைக் கூட்டம் தஞ்சையில் 25.03.2010 அன்று நடைபெற்றது. அக்கூட்டத்தில் இம்மாநாடு நடத்தத் திட்டமிடப்பட்டது.

அதன்படி, நேற்று தஞ்சை ஆபிரகாம் பண்டிதர் சாலையில் இம்மாநாடு நடைபெற்றது. மாநாட்டிற்கு இயற்கை வேளாண் விஞ்ஞானி திரு கோ.நம்மாழ்வார் தலைமை தாங்கினார். “மீண்டும் ஒரு சுதந்திரப் போராட்டத்தை நடத்த அறிவாளர்களும், உழவர்களும் திரள வேண்டும்” என்று குறிப்பிட்டார்.

மனித நேய மக்கள் கட்சி தஞ்சை மாவட்டத் தலைவர் திரு ஜெ.கலந்தர், தமிழ்த் தேசப் பொதுவுடைமைக் கட்சி தஞசை மாவட்டச் செயலாளர் திரு பழ.இராசேந்திரன், தமிழ்நாடு விவசாயிகள் சங்கத்தின் மாவட்டச் செயலாளர் திரு பன்னீர்செல்வம் ஆகியோர் முன்னிலை வகித்தனர்.

தாளாண்மை உழவர் இயக்கத்தி்ன் செயலாளர் திரு பாமயன் வரவேற்புரையாற்றினார். இதனைத் தொடர்ந்து பல்வேறு அரசியல் கட்சித் தலைவர்கள் தம் கண்டன உரையை நிகழ்த்தினர்.

கிரீன் பீஸ் அமைப்பின் வெளியீடான் ஆங்கில நூல், தமிழில் “மரபீனீ சூதாட்டம்” என்ற பெயரில் மொழிப் பெயர்க்கப்பட்டு மாநாட்டு அரங்கில் வெளியிடப்பட்டது. இயற்கை வேளாண் தொடர்பான நூல்களும், இந்திய அரசின் கருப்புச் சட்டங்களை விளக்கும் நூல்களும் பெருமளவில் விற்பனையாயின.

தமிழ்த் தேசப் பொதுவுடைமைக் கட்சியின் பொதுச் செயலாளர் திரு.பெ.மணியரசன் தம் கண்டன உரையின் போது, “இந்த சட்டங்கள் அமெரிக்க காலனியாக இந்தியத் துணைக் கண்டத்தை மாற்றுகிற முயற்சி” என்றும் “பிரதமர் மன்மோகன் சிங் அமெரிக்காவின் இந்திய வைசிராயாக செயல்படுகிறார்” என்றும் பேசினார்.

மக்கள் சிவில் உரிமைக் கழகத் தலைவர் முனைவர் வீ.சுரேஷ், “கம்பெனிகளுக்கு எதிராக பேசுவதையே தடுக்கும் வாய்ப்புட்டுச் சட்டங்களாக விதைச்சட்டமும் உயிரித் தொழில்நுட்பச் சட்டமும் இருப்பதால் இதனை கருப்புச் சட்டம் எனக் கண்டிக்கிறோம்“ என்றார்.

தொடர்ந்து, இந்தியக் கம்யுனிஸ்ட் கட்சி மாநிலத் துணைச் செயலாளர் திரு.சி.மகேந்திரன், மனித நேய மக்கள் கட்சியின் துணைப் பொதுச் செயலாளர் திரு மு.தமிமுன் அன்சாரி, தாளாண்மை உழவர் இயக்க மையக்குழு உறுப்பினர் திரு ச.ரா.சுந்தரராமன், தமிழக விவசாயிகள் சங்கத்தின் மாவட்டத் தலைவர் திரு க.சம்பந்தம், தமிழ் மாநில விவசாயிகள் சங்கத்தின் துணைத் தலைவர் திரு சோம.இராஜமாணிக்கம், பெட்காட் தலைவர் திரு. ஜெயராமன், தமிழக மக்கள் உரிமைக் கழகத்தின் பொதுச் செயலாளர் திரு அரங்க. குணசேகரன், கா.சா. கள அலுவலர் திரு கல்யாணராமன், கேரளாவின் தணல் அமைப்பைச் சேர்ந்த உஷா மற்றும் ஸ்ரீதர் ஆகியோர் கண்டன உரையாற்றினர். மாநாட்டுப் பேச்சாளர்கள் இந்திய அரசின் கருப்புச் சட்டங்கள் திரும்பப் பெறப்பட வேண்டும் என்று வலியுறுத்தினர்.

நிறைவில், தமிழக உழவர் முன்னணியின் ஆலோசகர் திரு.கி.வெங்கட்ராமன், இந்திய அரசின் கருப்புச் சட்டங்களை விளக்கிப் பேசினார்.“பொதுவுடைமை இயக்கங்களும் திராவிட இயக்கமும் அடித்தட்டு மக்களின் மேன்மைக்கு பங்களிப்பை செய்திருக்கின்றனர் என்ற போதிலும் “வேளாண்மை இழிவானது - தமிழரின் மரபு அறிவுத் தொழில்நுட்பம் கீழானது - கிராமம் என்பது பிற்போக்கின் மையம்” என்று கருத்துகள் பரவச் செய்தார்கள். இன்னொரு பக்கம் வேளாண்மை நெருக்கடிளில் இருக்கின்றது. இவை இரண்டின் விளைவாக நிலத்தை இழப்பதற்கு உழவர்களே முன்வரும் சூழல் உருவாக்கப்பட்டுள்ளது” என்று தம் பேச்சில் அவர் குறிப்பிட்டார்.

இந்திய அரசின் இந்தக் கருப்புச் சட்டங்கள் வரைவு நிலையிலேயே திரும்பப் பெறப்பட வேண்டும், உழவர்களுக்கு நேரடி வருவாய் வழங்கக்கூடிய வருவாய் ஆணையம் நியமிக்கப்பட வேண்டும், தமிழ்நாட்டில் உயிரிப் பட்டய வாரியம் ஏற்படுத்த வேண்டும் உள்ளிட்ட தீர்மானங்கள் மாநாட்டில் நிறைவேற்றப்பட்டன.

தமிழக உழவர் முன்னணியின் பொதுச் செயலாளர் திரு தெ.காசிநாதன் மாநாட்டில் கலந்து கொண்டவர்களுக்கு நன்றி கூறினார். திரு கோ.திருநாவுக்கரசு, திரு கு.பழனிவேல் ஆகியோர் மாநாட்டுப் பணிகளை ஒருங்கிணைத்திருந்தனர்.

பார்வதி அம்மையாரைத் திருப்பி அனுப்பியதற்கு தமிழ்த் தேசப் பொதுவுடைமைக் கட்சி கண்டனம்

சிகிச்சைக்காகச் சென்னைக்கு வந்த

பார்வதி அம்மையாரைத் திருப்பி அனுப்பியதற்கு

தமிழ்த் தேசப் பொதுவுடைமைக் கட்சி கண்டனம்

தஞ்சை, 17.04.2010

தமிழ்த் தேசப் பொதுவுடைமைக் கட்சியின் பொதுச் செயலாளர் பெ.மணியரசன் வெளியிட்டுள்ள அறிக்கை:

தமிழீழ தேசியத் தலைவர் திரு. பிரபாகரன் அவர்களின் அன்னையார் திருமதி பார்வதி அம்மாள் அவர்கள், தமது எண்பது வயதில் கடுமையாக நோயுற்று சென்னையில் உயர் சிகிச்சை பெற மலேசியாவிலிருந்து விமானத்தில், 16.04.2010 அன்று இரவு வந்த போது அவரை மீனம்பாக்கம் விமான நிலையத்தில் தரையிறங்க விடாமல் இந்திய அரசும் தமிழக அரசும் சேர்ந்து தடுத்து, அவரைத் திரும்ப மலேசியாவுக்கு அனுப்பி விட்டார்கள்.

இந்திய தமிழக அரசுகளின் இந்தச் செயல் மனித நேயமற்ற செயல்மட்டுமல்ல. தமிழ்நாட்டுத் தமிழ் மக்களை இழிவுபடுத்தும் செயலும் ஆகும்.

படுத்த படுக்கையாய் உள்ள எண்பது வயது மூதாட்டி சென்னையில் தங்கி சிகிச்சை பெற்றால் இந்தியாவுக்கு என்ன ஆபத்து நேர்ந்துவிடும்!

முறையாக விசாவுக்கு விண்ணப்பித்து மலேசியாவில் உள்ள இந்தியத் தூதரகம் இந்திய அரசுடன் கலந்து பேசி, திருமதி பார்வதி அம்மையார் சென்னை வர விசா வழங்கியுள்ளது.

ஆனால், சென்னை விமான நிலையத்தில் பார்வதி அம்மையாரையும் அவருடன் வந்த பெண உதவியாளரையும் இந்திய அரசின் குடிவரவு அதிகாரிகளும் தமிழகக் காவல்துறையினரும் விமானத்தை விட்டு இறங்கவிடாமல் தடுத்து, அதே விமானத்தில் அவர்களை மலேசியாவுக்குத் திருப்பி அனுப்பிவிட்டனர்.

உயிருக்குப் போராடிக் கொண்டிருக்கும் எண்பது வயது மூதாட்டி எந்த நாட்டிலும் மருத்துவ உதவி பெறுவதற்கு மருத்துவத்துறை நீதியும் மனித உரிமையும் அனுமதிக்கும்.

விசா வழங்கிவிட்டு திருப்பி அனுப்புவது மனித உரிமை மீறல் குற்றம் மட்டுமல்ல. மருத்துவநீதியை மறுப்பதும் ஆகும்.

பார்வதி அம்மையார் பிரபாகரனுக்கு மட்டும் தாய் இல்லை. ஒட்டுமொத்த தமிழ் இனத்தின் தாயாக உலகம் முழுவதும் உள்ள தமிழர்களால் போற்றப்படுகிறார். அவர் மீது அனைத்துத் தமிழர்களும் பாசம் வைத்துள்ளனர். அவரை வர அனுமதித்துத் திருப்பி அனுப்பியது அவரை மட்டுமல்ல ஒட்டு மொத்த தமிழ் இனத்தையும் அவமானப்படுத்திய செயலாகும்.

சிகிச்சையாகப் படுத்த படுக்கையாய் விமானத்தில் வந்த மூதாட்டி பார்வதி அம்மையாரைத் திருப்பி அனுப்பிய இந்திய - தமிழகக் கொடுங்கோலர்களின் தமிழ் இன எதிர்ப்பு உணர்ச்சியைக் கண்டித்து, மனித நேயம் உள்ளவர்களும் தமிழ் இன உணர்வாளர்ககளும் கண்டனப் போராட்டங்களை நடத்துமாறு தமிழ்த் தேசப் பொதுவுடைமைக் கட்சி சார்பில் கேட்டுக் கொள்கிறேன்.