மூன்றாவது மொழியென இந்தியைத் திணிக்கும் இந்திய அரசைக் கண்டித்து சென்னையில் கண்டன ஆர்ப்பாட்டம்!

 

மூன்றாவது மொழியென இந்தியைத்

திணிக்கும் இந்திய அரசைக் கண்டித்து

சென்னையில் கண்டன ஆர்ப்பாட்டம்!

 

மும்மொழிக் கொள்கையை தமிழ்நாட்டில் எப்படியாவது திணித்தே தீருவது என முடிவெடுத்து செயல்படுத்தி வரும் ஆரியத்துவ மோடி அரசு, இப்போது “மூன்றாவது மொழி” என்ற பெயரில் இந்தியைக் கொண்டு வர முயல்கிறது. இதனை அம்பலப்படுத்தும் வகையில் பின்வரும் கோரிக்கைகளை முன்வைத்து தமிழ்த்தேசியப் பேரியக்கம் சார்பில் சென்னையில், இன்று கண்டன ஆர்ப்பாட்டம் எழுச்சியோடு நடைபெற்றது.

கோரிக்கைகள்

=============

1. இந்திய அரசே! இந்திய அரசின் 2020 புதிய கல்விக் கொள்கையிலிருந்து தமிழ்நாட்டிற்கு மொத்த மாக விலக்குக் கொடு! தமிழ்நாட்டிற்கு உரிய கல்வித் தொகை அனைத்தையும் முழுமையாக - உடனடியாக வழங்கு!

2. இந்தித் திணிப்பை உள்ளடக்கிய மும்மொழிக் கொள்கையை முற்றிலுமாகக் கைவிடு! தமிழர்கள் இந்தியைத் தவிர்த்துவிட்டு, தென்னாட்டு மொழிகளில் ஒன்றை மூன்றாவது மொழியாகக் கல்வியில் ஏற்க வேண்டும் என்று நயவஞ்சகமாகக் கூறி, இந்தித் திணிப்பிற்கு இன்னொரு வாசலைத் திறக்காதே!

3. இந்திய அரசமைப்புச் சட்டத்தில் மாநில அதிகாரப்பட்டியலில் இருந்த கல்வியை, சர்வாதிகாரி இந்திராகாந்தி 1976-இல் அரசமைப்புச் சட்டத்தில் திருத்தம் செய்து இந்திய அரசின் மேலாதிக்கம் உள்ள பொதுப்பட்டிய(Concurrent List)லுக்கு மாற்றினார். அதை மீண்டும் மாநில அதிகாரப் பட்டியலுக்குக் கொண்டுவா!

4. உயர் கல்வியில் ஆதிக்கம் செலுத்தி, மாநில அரசுக்கு மிஞ்சியுள்ள கல்வி அதிகாரத்தையும் பறிக்கின்ற பல்கலைக் கழக மானியக் குழுவை (UGCயை) நிரந்தரமாகக் கலைத்திடு! பல்கலைக் கல்விக்கென அனைத்து மாநிலக் கல்விப் பேராளர்களைக் கொண்ட பரிந்துரைக்குழு அமைத்திடுக!

5. இந்திய அரசின் ஒரே ஆட்சி மொழி இந்தி மொழியே எனக் கட்டளை இடும் இந்திய அரசமைப்புச் சட்டத்தின் உறுப்பு 343-ஐயும் அதன் தொடர்புடைய உறுப்புகளையும், அரசமைப்புச் சட்டத்திருத்தம் கொண்டுவந்து முற்றிலுமாக நீக்கு. உலகின் மற்ற கூட்டாட்சி நாடுகளில் இருப்பதுபோல், இந்திய அரசமைப்புச் சட்டத்தின் எட்டாவது அட்டவணையில் உள்ள - தமிழ் உள்ளிட்ட, 22 மொழிகளையும் இந்தியாவின் ஆட்சி மொழிகள் ஆக்கு!

6. தமிழ்நாடு அரசே, தமிழ்நாட்டிற்கென தனி கல்விக் கொள்கையை அறிவித்திடு!

இன்று (25.02.2025) - செவ்வாய் காலை நுங்கம்பாக்கம் வள்ளுவர் கோட்டம் அருகில் நடைபெற்ற கண்டன ஆர்ப்பாட்டத்திற்கு, தமிழ்த்தேசியப் பேரியக்கத் தலைமைச் செயற்குழு உறுப்பினர் தோழர் வெற்றித்தமிழன் தலைமை தாங்கினார். தமிழ்த்தேசியப் பேரியக்கத் துணைப் பொதுச் செயலாளர் தோழர் க. அருணபாரதி, தமிழ்த்தேச மக்கள் கட்சிப் பொதுச் செயலாளர் தோழர் தமிழ்நேயன், தமிழர் விடுதலைக் கட்சித் தலைவர் திரு. மு. மேகநாதன், தமிழர் கழகத் தலைவர் ஐயா தமிழ் முகிலன், செட்டியூல்டு வகுப்பினர் ஐக்கிய முன்னணி பொதுச்செயலாளர் திருமதி. ஜெ. ரேவதி நாகராசன், திசம்பர் 3 - சென்னை குழு பொறுப்பாளர் திரு. சி.ஆர். டேவிட் ஆகியோர் கண்டன உரையாற்றினர்.

பொறியாளர் சி.பா. அருட்கண்ணனார், பேரா. தா. மணி, வேலு சுபராசன் (உலகத் தமிழ் இயக்கம்), குழல் (வினைத் தமிழ் இயக்கம்) உள்ளிட்ட பல்வேறு அமைப்பினரும், பேரியக்கப் பொது்குழு உறுப்பினர் தோழர் பழ.நல். ஆறுமுகம், தோழர் இரா. இளங்குமரன், சென்னை நடுவண் கிளைச் செயலாளர் மு. வடிவேலன், தென்சென்னை செயலாளர் மு.வெ. இரமேசு, திருவள்ளூர் செயலாளர் செயப்பிரகாசு, மகளிர் ஆயம் பொறுப்பாளர் மாதவி உள்ளிட்ட திரளான பேரியக்கத் தோழர்களும் பங்கேற்றனர்.

=====================================

தலைமைச் செயலகம்,

தமிழ்த்தேசியப் பேரியக்கம்

=====================================

பேச: 9443918095, புலனம் : 9841949462

முகநூல் : www.fb.com/tamizhdesiyam

ஊடகம் : www.kannottam.com

இணையம் : www.tamizhdesiyam.com

சுட்டுரை : www.twitter.com/Tamizhdesiyam

காணொலிகள் : youtube.com/Tamizhdesiyam

=====================================